Эзэн Есүс Христийн мэндэлсэн гайхамшигт баярын мэнд хүргэе

Ертөнцийг бүтээсэн агуу Бурханы ард түмэн болсон Христийн Чуулганы ахан дүүс та бүхэндээ Аврагч Эзэн Есүс Христийн мэндэлсний баярын мэндийг хүргэе.

Энэхүү өдөр нь Бүтээгч Эцэгийн маань бүтээлийн бүхий л түүхэн дэх хамгийн онцгой чухал тэмдэглэлт агшин мөн. Энэ өдөр биелсэн агуу гайхамшигт үйл явдлыг Эцэг Өөрөө бүх бүтээлийн эхнээс л төлөвлөж, энэ нь амжилттай хэрэгжихийг тэнгэр газар дээрхи бүх бүтээл тэсэн ядан хүлээсэн билээ. Би газар дэлхийн суурийг тавихад чи хаана байв аа?... Юун дээр түүний сууриуд тогтсон бэ? Түүний булангийн чулууг хэн тависан бэ? Тэгэхэд өглөөний одод хамтдаа дуулцгааж, Бурханы бүх хөвгүүд баярлалдан уухайлсан (Иов 38:4-7).

Өдгөөгөөс 2016 оны тэртээ нэгэн онгон бүсгүй жирэмслэн, улмаар Хүү төрүүлсэн нь, өнөөх агуу төлөвлөгөөний эхлэл байлаа. Гэнэт Эзэний тэнгэр элч тэдний өмнө зогсож, Эзэний цог жавхлан тэдний эргэн тойронд гийсэнд хоньчид үлэмжийн айдаст автжээ. Тэнгэр элч тэдэнд –Бүү айгтун, харагтун, би бүх ард түмнийг үлэмж баярлуулах сайн мэдээг та нарт авчирлаа. Өнөөдөр Давидын хотод Аврагч, Эзэн Христ та нарын төлөө мэндэллээ. Тэжээлийн тэвшинд байх даавуунд өлгийдсөн нялх хүүхдийг та нар олж харна. Энэ нь та нарт тэмдэг болно гэлээ. Гэнэт өнөөх тэнгэр элчийн хамт олон тооны тэнгэрлэг дайчид үзэгдэж, Бурханыг магтан, -Дээр өндөрт алдар нь Бурханд байх болтугай, доор газарт амар тайван нь Түүний тааллыг олсон хүмүүст байх болтугай гэцгээв (Лук 2:9-14).

Яагаад энэ нь, бүхний тэсэн ядан хүлээсэн эрхэм нандин мөч байсан бэ?! Тэнгэр газар дээрхи бүх л оюун ухаант, ухамсарт бодгалиуд, тэр ч бүү хэл бусад бүхий л бүтээлүүд (Ром 8:19-22) үүнийг л хүлээж байсан гэж Библи бидэнд илчилдэг. Судар нь эхнээсээ л хүн төрөлхтөний зөнгөөрөө ч бай, ухамсартайгаар ч бай эрж хайж, эмээн биширч, шүтэж мөргөж, хүндэлж дээдэлж ирсэн Бурхан нь, Сүнсээр оршигч Нэгэн гэдгийг илчилж, тодорхойлсон байдаг. Газар нь ямар ч хэлбэр дүрсгүй, эзгүй хоосон, гүний гадаргуу дээгүүр нь харанхуй бүрхэж, Бурханы Сүнс усны мандал дээгүүр элин хальж байлаа (Эх. 1:2).

Энд нэгэн сонирхолтой зүйлийг та ажиглав уу? Бурханы Сүнс.., гэсэн нь бас Бурханы Бие гэж байх нь ээ?!! Тиймээ, Ариун Судар бидэнд бас нэгэн агуу нууцыг илчилдэг нь, энэхүү агуу хүчирхэг Ариун Сүнс маань Өөртөө биеийг бүтээж, Түүн дотроо Өөрийгөө бүрэн дүүрнээр алдаршуулж, улмаар хараалд унаж бохирлогдсон бүх бүтээлийг шинэчилж ерөөхийг хүссэн тухай юм. 2010 оны тэртээ Иудейн Бетлехем хотод болж өнгөрсөн эгэл юм шиг боловч энгүй гайхамшигт тэрхүү үйл явдал нь, дээрхи зорилгын биелэл байлаа. Тэр бол үл үзэгдэгч Бурханы дүр мөн бөгөөд бүх бүтээлийн Ууган нь мөн. Учир нь Түүн дотор тэнгэр ба газар дахь бүх юмс, үзэгдэх ба үл үзэгдэх юмс, хаан ширээнүүд, эсвэл ноёрхолууд, удирдлагууд, эсвэл эрх мэдлүүд ч бүтээгдсэн. Бүх юмс Түүгээр болон Түүний төлөө бүтээгдсэн байна. Тэр бүх юмсын урьд байна. Бүх юмс Түүний дотор оршин тогтнодог (Кол. 1:15-17).

Үүнээс өмнө нь, Бүтээгч нь бүтээлүүдээсээ ангид байж, тэдний хоорондынх нь харилцааг Мосегийн хуулиуд зохицуулж байв. Харилцаа хүндрэл, гацаанд орох үед Ариун Сүнс хэн нэгнийг Өөрийн хүч онгодоор хөглөн гажуудлыг арилгахад ашигладаг байлаа. Тэднийг шүүгчид, бас эш үзүүлэгчид гэж нэрийддэг байв. Харин мөнөөх малын саравчинд, тэжээлийн тэвшин дотор мэндэлсэн Хүү маань, бага наснаасаа л ...-Та нар юунд намайг хайсан юм бэ? Эцэгийнхээ гэрт байх ёстойг минь та нар мэдсэнгүй гэж үү? (Лук 2:49) гэж байсан ба хожим “аймшиггүйгээр“ Би болон Эцэг нэг юм (Иох. 10:30) ...Намайг харсан хүн Эцэгийг харсан... (Иох. 14:9) гэж тунхагласан юм.

Энэ бол бүх бүтээлийн түүхэнд шинэ эрин ирсэнийг зарласан суут тунхаглал байлаа. Үүнээс хойш бүтээл нь, бүтээл биш харин Бүтээгчийн байр суурь, зиндаанд өргөмжлөгдөн, улмаар Түүнтэй хамт шинэ тэнгэр, шинэ газрыг бүтээлцэх боломжтой болсон билээ. Харин Өөрийг нь хүлээн авсан болгонд, Өөрийнх нь нэрэнд итгэдэг хүмүүст Бурханы хүүхэд болох эрхийг Тэр өгөв (Иох. 1:12). Би Өөрийн Эцэг дотор, та нар Миний дотор, Би та нарын дотор байхыг та нар тэр өдөр мэдэх болно (Иох. 14:20). Би ялагчийг Өөрийн Бурханы сүм дэх багана болгоно. Тэр цаашид тэндээс гарахгүй. Би түүн дээр Өөрийн Бурханы нэр, тэнгэрээс Миний Бурханаас буун ирэх шинэ Иерусалим буюу Өөрийн Бурханы хотын нэр, Өөрийн шинэ нэрээ бичнэ (Илч. 3:12). Би ялж, Эцэгийнхээ хамт Түүний сэнтийд заларсны адил, Надтай хамт Миний сэнтийд залрахыг ялагчид соёрхоно (Илч. 3:21).

Тэр үед Тэр цор ганцаараа, бусдаас дэндүү онцгой өөр Нэгэн байж, үл үзэгдэх мөнхийн Бурханы үзэгдэх дүр төрх, нүүр царай болж байлаа. Тэр “сул дорой” байсан. Түүний сонгосон, хайрласан хүмүүс нь хүртэл Түүнийг ойлгодоггүй, хүнд үед нь тус дэм, хамжаа болж чаддаггүй байлаа. Тэр тусмаа харанхуй бурангуй гэмт хүний ертөнц Түүнийг хүлээн авч чадаагүй бөгөөд хажиглан сэжиглэж, гүтгэн доромжилж, улмаар зовоон тарчлааж алсан билээ. Гэвч энэ нь бүх бүтээлийг хайрлан, тэднийг ерөөн шинэчлэхийг зорьсон Эцэгийн хүслийн биелэл байлаа. Яагаад гэвэл Бурхан Түүний дотор Өөрийн төгс дүүрэн нь оршдогийг болон Түүний загалмайн цусаар энх тайвныг тогтоон, Түүгээр дамжуулан газар дээрх, эсвэл тэнгэр дэх юмсыг, бүх юмсыг Өөртэйгөө эвлэрүүлснийг таалдаг (Кол. 1:15-20).

Түүний “сул дорой” нь, Түүний хүч, тэнгэрлэг мэргэн ухааны дагуу байв. Энэ нь, Тэр хүнтэй адил махан биеэр гэр бүл болж, үр хүүхэд төрүүлж, газар тариалан эсвэл мал ахуй, худалдаа наймаа эрхэлж, үр хүүхдээ гэрлүүлж, үр ачаа үзэж, идэж уух, өмсөж зүүхийн л төлөө тэмцэж шаналж, мөхөс хүний тоо томшгүй асуудлуудтай зууралдсаар эцэст нь үхэж ялзралын боол болох хараалаас (Эх. 3:19) ангид Нэгэн гэсэн утгатай. ...Христ Есүс нь бидний хувьд Бурханаас ирсэн мэргэн ухаан, зөвт байдал, ариусгал ба золилт болсон юм (1 Кор. 1:30). ...Энэ нь бидний алдрын төлөө үеүдээс ч өмнө Бурханы урьдаас тогтоосон нуугдмал мэргэн ухаан мөн (1 Кор. 2:7).

Харин Тэр Сүнс дотор хүчирхэг байж, бүхий л сүнслэг хар хүчийг (мөнөөх хараалыг) загалмай дээр устгаж, Өөрийн дотор Бүтээгч ба бүтээлүүдийн хоорондох ханыг нураан, эвлэрэл, энхтайван, өршөөл уучлалын бодит биелэл болсон гэсэн утгатай юм. Гэвч Түүнийг няцалж, өвтгөх нь Эзэний таалал байв. Хэрэв Тэр Өөрийгөө нүглийн төлөөх тахил болгон өргөвөл, Тэр үр удмаа үзэж, Өөрийн өдрүүдийг уртасган, Эзэний хүсэл нь Түүний гарт цэцэглэнэ (Иса. 53:10).

Ийнхүү Бүтээгч болон бүтээлүүдийн хоорондын харилцааг Мосегийн болон өөр бусад тоо томшгүй ёс суртахууны эсвэл байгалийн хуулиуд биш, Эцэг Хүүгийн энхрий дотно, эрхэмсэг тэнгэрлэг, хайр энэрэл, итгэлцэл, зориулалт золиослол, өршөөл уучлал, баяр баясгалангаар дүүрэн харилцааны дээд жишиг болсон загалмайн хууль буюу Христ Өөрөө зохицуулах болсон билээ. Бидний Эзэн Есүс Христийн Эцэг ба Бурхан магтагдах болтугай. Тэрээр Христ дотор тэнгэрлэг газар дахь алив сүнслэг ерөөлөөр биднийг ерөөсөн. Түүний өмнө биднийг ариун бөгөөд гэм зэмгүй байлгахын тулд Бурхан ертөнцийн сууриас урьд биднийг Түүний дотор сонгосончлон, хайраараа Тэр Өөрийн хүслийн сайн тааллын дагуу, биднийг Есүс Христээр Өөрийнхөө хөвгүүд болгон үрчлэн авахаар урьдаас тогтоожээ (Еф. 1:3-5).

Хайрт ахан дүүсээ! ... Христ Чуулганыг хайрлаад түүний төлөө Өөрийгөө өгсөний адил... (Эф.5:25), эдүгээ бид Христийн бие бөгөөд тус тусдаа Түүний эрхтнүүд юм (1 Кор. 12:27). Чуулган бол үл үзэгдэгч мөнхийн Бурханы Өөртөө бүтээж буй дүр төрх, зүс царай, Бие оршихуй нь юм. Чуулган нь Түүний бие буюу бүхний дотор бүгдийг Дүүргэгчийн дүүрэн байдал мөн (Еф. 1:23).

Энэ өдөр бол Аврагч Эзэн Есүс Христ мэндэлсний баяр гэдэг нь, таны Христийн дотор дахин төрж, Бурханы бие болсон баяр юм. Тэр Өөрийнхөө Сүнсийг бидэнд өгсөн учир бид Түүний дотор, Тэр бидний дотор буйг бид үүгээр мэднэ. Есүс бол Бурханы Хүү гэж хүлээн зөвшөөрдөг хэний ч дотор Бурхан байж, тэр Бурханы дотор байна (1 Иох. 4:13,15). Та нар өөрсдөө Бурханы сүм мөн бөгөөд Бурханы Сүнс та нарын дотор оршдог... (1 Кор. 3:16) Харин Эзэнтэй нийлсэн хүн нэг Сүнс байна (1 Кор. 6:17).

Та бол Бурханы Хүү мөн. Та бол шинэ тэнгэр, шинэ газрыг бүтээгч мөн. Учир нь анхны тэнгэр, анхны газар нь өнгөрөн одож, тэнгис байхгүй болов... Сэнтийд Залрагч –Харагтун, Би бүх юмсыг шинэ болгож байна гээд –Бичигтүн, эдгээр үгс итгэмжит бөгөөд үнэн гэв (Илч. 21:1, 5). Тэнд цаашид ямар ч хараал байхгүй болно. Мөн Бурхан ба Хурганы сэнтий түүний дотор байж, боолууд нь Түүнд үйлчилнэ. Тэд Түүний царайг харна. Мөн Түүний нэр тэдний духан дээр байх болно. Тэнд цаашид шөнө болохгүй. Эзэн Бурхан тэднийг гийгүүлэх учраас тэдэнд дэнлүүний гэрэл ч, нарны гэрэл ч хэрэггүй болно. Учир нь Эзэн Бурхан тэднийг гийгүүлнэ. Тэгээд тэд үеийн үед хаанчлах болно (Илч. 22:3-5).

Танд эдгээр бүхнийг энэ л өдөр боломжтой болгосон бидний Тэнгэрлэг Эцэг, Аврагч Эзэн Есүс маань алдарших болтугай. Та бүхэндээ бас, дахин дахин энэхүү гайхамшигт баярын мэндийг халуунаар хүргэе. Халлелүяа.

ХРИСТИЙН ЗОВЛОН 11

1) Есүс Ариун байсан боловч зовлон амссанаараа.

2) Бурхантай хамт байсан ч Түүгээр хаягдсанаараа

3) Бурханы хүслийг биелүүлэхийн тулд зовсоноороо

4) Түүний энэхүү зовлон нь үй олны аврал (Сайн Мэдээ) болсоноороо    (Харин ертөнцийн дагуу зовогсодын зовлон нь өөрт нь болон бусдад үр өгөөж, ашиг тус нэмэргүй юм.)

5)Түүний зовлонгийн үр дүн санаанд оромгүйгээр эргэж, үхлийг ялсан ялалтаар төгссөнөөрөө

   

         
      1) Есүс Ариун байсан боловч зовлон амссанаараа.

Зовж зүдэрч буй нэгнийг харахдаа хорон муу үйлийнхээ үрийг эдлэж буй, эсвэл хараагдсан, бүр эсвэл арчаагүй дорой, амьдрах чадваргүйн улмаас гэсэн нийтлэг хандлагаар шүүн дүгнэдэг нь хүн төрөлхтөний үндсэн шинж юм. Энэ нь бүхий л соёл иргэншил, ард түмний хувьд адилхан байдаг ба мөн бүхий л цаг үеүүдэд хүмүүс ингэж л шүүн дүгнэж ирсэн нь түүхийн нэг үнэн юм. Үүнийг бас Библийн теологи ч баталдаг гэхэд болно. 

Нүгэлтэн нүглийнхээ шийтгэлийг эдлэж зовох нь шударга бөгөөд, түүхээр болон Библиэр баталгаажсан юм бол, бас хажуугаар нь зөвт болон нүгэлгүй Ариун Нэгэн нь яахаараа зовж шаналах шаардлагатай болчихдог нь заавал судлах ёстой чухал асуудал юм. Эндээс хоёр төрлийн зовлон ертөнцөд байдгийг Библи бидэнд ялгаж зааглан, илчилж харуулдаг болох нь ойлгогдоно. Би энэ судалгаагаараа ариун зовлонгийн оргил нь болсон Христийн зовлонгийн онцлогийг харуулахыг зорьсон.     

Есүс хүн болж эхийн хэвлийд олдох нь Ариун Сүнсний гайхамшигт ажил байсан. Тиймээс “Тэнгэр элч Ариун Сүнс чам дээр ирж, Хамгийн Дээдийн хүч чамайг бүрхэнэ. Тиймээс төрөх ариун нэгэн нь Бурханы Хүү гэж дуудагдах болно”  (Лк.1:35), гэж Мариад (одоо бидэнд) гэрчлэн тунхагласан.

Дагалдагч Петрт Эзэний Ариун Сүнс, Есүсийг  Бурханаас ирсэн Ариун Нэгэн гэдгийг илчилсэн байдаг. “Та бол Бурханы Ариун Нэгэн мөн гэдэгт бид итгэцгээсэн, мөн таньж мэдэцгээсэн...” (Лк.6:69)

Бас нэг сонирхолтой зүйл нь, Есүс Бурханы Хүү бөгөөд ямар ч гэм зэмгүй Ариун Нэгэн гэдгийг Бурханы ард түмэн болсон иудейчүүд үгүйсгэн буруутгаж байхад, харин чөтгөрүүд “Назарын Есүс ээ!... Таныг хэн болохыг, Бурханы Ариун Нэгэн гэдгийг чинь би мэднэ... (Мк.1:24), гэж байсан ба харь үндэстэн Понти Пилат “Би Түүнээс ямар ч гэм бурууг олсонгүй”(Иох.18:38) гэж байлаа. Бид үүнээс санаа авч чуулган доторхи бие биенийхээ эсрэг ялалт буруутгал, талцал маргаан, сөрөг уур амьсгалын талаар дахин сайтар бодох хэрэгтэй юм биш үү...    

Хуучин гэрээний үеийн эш үзүүлэгчид тослогдсон, сонгогдсон, ард түмнээсээ ялгарсан онцгой хүмүүс байсан нь зовлонгийнх нь шалтгаан болдог ч, Христ шиг төрөлх мөн чанараараа ч, сүнслэг эрх мэдэл, тэнгэрлэг байр сууриараа ч, хамгийн гол нь үүрсэн зовлонгийнх нь шалтгаан ба зорилгын мөнхийн ач холбогдлоороо ч онцгой ялгарч байгаагүй юм.  Тэгэхлээр ариун нэгэний зовлонгийн нэг үндсэн шалтгаан нь, нүгэлтнүүдийн дунд тэнгэрлэг мөн чанараараа эрс ялгардагаас үүдэлтэйг Библи гэрчилдэгийг харж болно .    

           

   2)  Бурхантай хамт байсан ч Түүгээр хаягдсанаараа

Тэрээр “...өвчин, зовлон, үхэл, хагацлаас айсандаа бус харин хэсэг хугацаанд Бурханаас тусгаарлагдах гэж байсандаа ийнхүү зовж, шаналж байв. ”[1]

             

        Тэр Бурханы ард түмэн болох иудейчүүдэд гологдсоноор барахгүй дагалдагчид нь ч Гетсеманд байхад нь Түүнийг орхин зугтаасан (Мт 26:56, Мк14:34). Харин үүнээс илүү аймшигтай гологдлыг загалмай дээр байхдаа амссан нь Бурхан Түүнийг хаясан явдал юм.

            Уг нь иудейчүүдийн удирдагчдын нэг Никодем гэгч хүн шөнөөр Есүс дээр ирээд, “... Учир нь Бурхантай хамт байхгүй л бол, хэн ч Таны үйлддэг тэмдгүүдийг үйлдэж чадахгүй...” (Иох.3:1, 2), гэж тунхаглаж байв.

            “Намайг Илгээгч нь Надтай хамт байгаа. Би үргэлж Түүнд тааламжтай зүйлсийг үйлддэг учир Тэр Намайг ганцааранг минь орхисонгүй...” (Иох.8:29), гэж гэрчилж байсан Тэрээр орилон байж “Бурхан минь, Бурхан минь юунд Та Намайг орхив” (Мт 27:46) гэснээс харвал хэний ч, хэзээ ч мэдрээгүй ганцаардлыг Есүс амсжээ.  

Учир нь Тэр загалмай дээр “нүгэл” болсон учир Бурхан Эцэг нь Түүнийг Өөрөөсөө тусгаарласан. Бид магадгүй энэ талаар нухацтай бодож үзэх нь Христийн шаналалыг улам ойлгоход тус болж болох юм.

---

[1]Томас Хэйл, Шинэ гэрээний хэрэглээний тайлбар толь,  (УБ:МТӨС 2004он), 282

UBTC Библийн сургуулийн оюутан С...-ийн бакалаврын зэрэг хамгаалсан дипломын ажилаас... /Үргэлжлэл бий/ 

ХРИСТИЙН ЗОВЛОН 10

     Г. Христийн зовлон бусад зовлонгоос юугаараа онцлог вэ?

Би Христийн зовлонгийн талаархи судалгааныхаа явцад нэгэн сонирхолтой материалтай танилцсан юм. Энэ нь, дэлхийн 2-р дайны үед фашистын бөөнөөр хорих лагеруудад хоригдон, зовон тарчилсан ­еврейчүүдийн түүхийг, Христийн загалмайн зовлонтой харьцуулан дүгнэлт гаргах гэсэн оролдлого бүхий ном байлаа.

“Шөнө” гэдэг энэхүү номын зохиогч нь Элли Вейс гэж еврей хүн юм. Тэрээр арав гаруйхан насандаа Освеньцим, Буна, Бухенвальд зэрэг үй олноор хорих газрыг дамжин явж, еврейчүүдийг аймаглан устгах харгис түүхийн бодит гэрч болсон байна.

Фашистууд хороох хүнээ хоригдлуудын дундуур удаан явж, сайтар нягтлан сонголт хийж хайдаг байсан нь, асар их айдас дарамтыг хоригдлуудын сэтгэл зүйд үүсгэдэг байжээ. Тэгээд сул доройчуудыг (настай, өвчтэй, бэртсэн, хэтэрхий эцэнхий туранхай гэх мэт) сонгон алаад, шатаах зууханд шатаадаг байсан байна.

Вейс олон аймшигтай дурсамжуудаа номондоо бичээд, төгсгөлд нь Иудейчүүдийн аймшигт зовлон зүдгүүрийн учир шалтгаан нь юу байв? Үүнийг тайлбарлах арга зам бий юу? Энийг Христийн зовлонтой холбож тайлбарлаж болох уу? Христийн зовлон Освеньцим руу удирдсан уу? эсвэл  Освеньцим нь Христийн зовлонг ойлгуулах гэсэн оролдлого уу? Гавалын газар болон Освеньцимын хооронд нууцлаг холбоос бий юу? гэх зэрэг асуултуудыг дэвшүүлэн гаргаж, түүхэн дүгнэлт хийх гэж оролдсон байна.

Тэрээр “Би Христийн зовлонг еврейчүүдийн зовлонтой холбож, Гавалын газарыг бөөнөөр хорих лагерьтай холбох гэж оролдож байгаа анхны хүн биш ээ!” гэсэн байдаг. Энэ зүйлийг уншаад Библийн үнэнтэй энэ хүний дэвшүүлсэн “түүхэн дүгнэлт” зөрчилдөж байгааг анзаарсан юм.

Нэг үндэстэн нөгөө үндэстнээ аймаглан усгах гэсэн оролдлого хүний түүхийн турш олонтоо давтагдаж байсан нь, гэмт хүний ертөнцийн нэгээхэн аймшигт харанхуй үйл билээ. Мэдээж бас фашистуудын еврейчүүд болон бусад ард түмэнд хийсэн харгислал нь гэмт хэрэгтнүүдийн хувьд гутамшигтай бурангуй, хохирогчдын хувьд харамсалтай, гашуун эмгэнэлт тохиолдолуудын нэг мөн.

Гэхдээ энэхүү түүхийн хар толбыг Христийн загалмайн зовлонтой хүчээр хамааруулж, ямар нэг уялдаа холбоо гаргах гэж оролдох нь огт бүтэшгүй мунхаг хэрэг юм. Тэр тусмаа хүн төрөлхтөний нэн шинэ түүх иймэрхүү олон арван гамшиг зовлонгын баримтаар дүүрэн ба зөвхөн еврейчүүд төдийгүй өөр олон ард түмэн үүний хохирогч, гэрч болсон байхад шүү.  

Есүс нүгэлгүй Ариун Нэгэн байсан бол, еврейчүүдийг нүгэлгүй ариун байсан гэж хэн баталж байгаа юм бэ? Христийн үхэл зовлон үй олны аврал болсон ба болсоор байгаа бол, еврейчүүдийн зовлон хэний аврал болсон гэж? Еврейчүүдийн зовлонгийн талаархи мэдээ баримтууд нь “Сайн Мэдээ” болоод л, түүнийг сонссон хэн нэгэн нь гэмийн хүчээс, сатаны эрхшээлээс чөлөөлөгдөж, ухаарч гэмшин, дахин төрж байгаа гэж үү?

Бүр цаашлан Есүс загалмай дээр зовсоныхоо хариуг еврейчүүдээс авсан хэрэг үү? Тэгвэл фашистууд биш бидний Эзэн, Хайрын Бурхан, хүн төрөлхтөнийг Аврагч Есүс бөөнөөр хорих газарын зовлонд буруутай байх нээ? гэх мэт олон сөргүүлсэн асуултууд яалт ч үгүй миний зүрхэнд үүссэн юм.

Яг үүн шиг олон итгэгчид, махан биеийнхээ дорой хүслүүд болон ертөнцийн уруу татлагад унан бүдэрчихээд, улмаар үүсэн бий болсон хүндрэл бэрхшээлийг “загалмайгаа үүрч байна” гэж сайрхаад байгаа, эсвэл гомдоллоод байгаа нь тодорхойгүй ярьж, дүгнэж явдаг дүр зураг элбэг байдагийг харьцуулан олж харсан.

Энэ нь бидний Эзэний хиргүй, тунгалаг, гэгээн тэнгэрлэг ариун гавьяаг (зовлонг) бохирлон гутааж буй, нэн зохисгүй зүйл гэж үзсэн учир, Христийн загалмайн зовлонгийн онцгой ялгарах шинжийн талаар заавал тусгайлан ярих шаардлагатай юм байна, гэсэн дүгнэлтэнд хүрсэн.

Бидний Аврагчийн зовлон бол ариун бөгөөд нандин, цорын ганц ба үй олны авралын “Сайн мэдээ” юм. Түүний зовлонгийн утга агуулга, шалтгаан ба зорилго, үр дагавар ба ашиг тус нь хэний ч, ямар ч зовлонтой зүйрлүүлэшгүй тэнгэрлэг, бас төгс юм. Өөр ямар ч зовлон хэнд ч, хэзээ ч “Сайн мэдээ” болсон тухай түүхэн ямар ч гэрчлэл баримт үгүй билээ.    

1) Есүс Ариун байсан боловч зовлон амссанаараа.

2) Бурхантай хамт байсан ч Түүгээр хаягдсанаараа

3) Бурханы хүслийг биелүүлэхийн тулд зовсоноороо

4) Түүний энэхүү зовлон нь үй олны аврал (Сайн Мэдээ) болсоноороо    (Харин ертөнцийн дагуу зовогсодын зовлон нь өөрт нь болон бусдад үр өгөөж, ашиг тус нэмэргүй юм.)

5)Түүний зовлонгийн үр дүн санаанд оромгүйгээр эргэж, үхлийг ялсан ялалтаар төгссөнөөрөө

UBTC Библийн сургуулийн оюутан С...-ийн бакалаврын зэрэг хамгаалсан дипломын ажилаас... /Үргэлжлэл бий/

ХРИСТИЙН ЗОВЛОН 9

            4)  Эцэгийг алдаршуулахын тулд

          Анхнаасаа Түүний мэндэлсэн үйл явдал нь Бурхан Эцэгийн алдарын төлөө юм гэдгийг тэнгэр элч нар зарлан тунхагласан юм. ”Дээр өндөрт алдар нь Бурханд байх болтугай...” (Лк.2:14).

             
          Тэрээр үйлчлэлээрээ Эцэгийгээ алдаршуулхад онцгой анхаарч байлаа. ”...Есүс энэ өвчин үхэл уруу биш, харин үүгээр Бурханы Хүү алдаршуулагдахын тулд, Бурханы алдрын төлөө юм гэлээ” (Иох.11:4).  “Шавь нар нь Түүнээс...хэн нүгэл үйлдсэнээс энэ хүн сохор төрсөн юм бэ?... хэмээн асуусанд Есүс...харин энэ нь Бурханы ажлуудыг түүгээр харуулахын тулд юм” (Иох.9:1-3).   

             
           Тэр шавь нараа сургахдаа Эцэгийг алдаршуулах нь Өөрийнх нь зорилго байсны адил тэдний ч зорилго юм, гэдгийг тодорхой заасан. “Та нарын их жимс ургуулснаар Эцэг минь алдаршуулагдана...” (Иох.15:8), “... Тэгээд бүх зүйлд Есүс Христээр дамжуулан Бурхан алдаршуулагдах юм...” (1Пт.4:11)

            
            Тэр хавчигдан шаналж, сэтгэлийн зовлон эдэлж байхдаа энэ бүхэн Эцэгийн алдарын төлөө юм гэдгийг үргэлж гэрчилдэг байсан. “Одоо сэтгэл минь шаналж байна. Би юу гэж хэлэх юм бэ?Аав аа, энэ цагаас Намайг авраач гэх үү? Гэвч Би энэ зорилгын төлөө энэ цагт л ирсэн. Ааваа нэрээ алдаршуулаач гэв. Тэгтэл тэнгэрээс –Би нэрээ алдаршуулсан. Дахин алдаршуулна, гэсэн дуу гарлаа.”(Иох.12:27-28). 

             
         Ялангуяа загалмай дээрхи зовлонт үхэл нь мөн л Бурхан Эцэгийг алдаршуулах зорилготойг гэрчлэн тунхаглаж байлаа. “—Одоо, Хүний хүү алдаршлаа. Бурхан Түүгээр алдаршлаа. Хэрэв Бурхан Түүгээр алдаршсан бол, Бурхан Өөрийнхөө дотор түүнийг бас алдаршуулна. Даруй Түүнийг алдаршуулна”  (Иох.13:31, 32).

  
      Гэмт хүний ертөнцийн сүр жавхлан, алдар хүндэтгэлийн талаархи ойлголт, үнэлэлт дүгнэлт нь биднийхээс эрс өөр юм. Хүмүүсийнхээр бол гял цал өнгөлөг гадаад байдал бүхий баярхал чамирхал, уур хилэн яллалт буруутгал бүхий шүүн шийтгэх эрх мэдэл, цэцэрхэл ихэрхэл бүхий үзэл суртал зэрэг нь харагдах байдлаар айдас төрүүлэм сүр бараатайгаар сүндэрлэж байх ёстой. Ийм л зүйлийг хүмүүс харахыг хүсдэг ба хүссэн зүйлээ харвал шагшин магтаж алдаршуулдаг.

        Хэдийгээр Бурхан Эцэг маань Синайн уулан дээр гал болон багширах утаа, бүрээн дуу болон түнэр харанхуйгаар газар доргиулан бууж ирсэн лүүгээ адилаар, одоо цагт ч Өөрийгөө алдаршуулан илчилж болох ч, энэ нь хүмүүний зүрхэнд айдас дарамтыг авчирхаас өөр үр өгөөж багатайг Израилийн түүх харуулсан. “Гурав дахь өдрийн өглөө уулыг өтгөн үүл бүрхэн, тэнгэр дуугарч, аянга цахилгаан цахилж, асар хүчтэй бүрээн дуу хүнгэнэсэнд хуаранд байсан бүх ард түмэн дагжин чичрэв... Бурхан галаар буун ирсэн учир Синай уул бүхэлдээ утаанд автав. Утаа нь зуухны утаа шиг хөөрч, уул бүхэлдээ асар хүчтэй доргиж байлаа” (Дх.19:16, 18).  

             
          Энэ үйл явдал нь Эзэнээс эмээхүйг Түүний ард түмний зүрхэнд суулгах зорилготойг “Бүү айцгаа. Учир нь Бурхан та нарыг шалгахын тулд, мөн та нарыг нүгэл бүү үйлдээсэй гэсэндээ Түүнээс эмээхүйг та нарт байлгахын тулд ирсэн юм” (Ег.20:20), гэж Мосе гэрчилсэн байдаг. Тэгээд ч энэ арга нь бидний Бурханы язгуур мөн чанарыг бүрэн дүүрэн алдаршуулан илчилж чаддаггүй. “...Учир нь Бурхан бол хайр билээ” (1Иох.4:8).

             
         Харин Есүс баптист Иоханы талаар гэрчлэхдээ сүр жавхлан болон алдар хүндэтгэлийн талаархи дээрхээс тэс ондоо тэнгэрлэг үнэлэмжийг илчилсэн. “Та нар юу харах гэж цөл руу очсон бэ? ... хээнцэр хувцасласан хүнийг үү?... Эш үзүүлэгчийг үү?... Эмэгтэйгээс төрөгсөдийн дунд Иоханаас илүү агуу нэгэн байхгүй. Харин Бурханы хаанчлалын хамгийн бага нэгэн нь ч түүнээс агуу билээ...” (Лк.7:25-28).  

            
          Яг үүн лүүгээ адилаар Өөрөө ч гологдон, зовлонт үхлээр үхсэн нь Эцэгийн алдрын төлөө юм, гэж айлдаж байсан. “—Аав аа, цаг нь ирлээ. Таныг Хүү чинь алдаршуулахын тулд Хүүгээ алдаршуулаач... Хий гэж Надад өгсөн ажлыг тань гүйцэтгэн Би Таныг газар дээр алдаршуулав” (Иох.17:1, 4).

            
        Христийн загалмайн зовлон ба үхэл нь бидний Бурханы хайр өршөөлийн, энэрэл нигүүлсэлийн, эгэл даруу мөн чанарыг төгс илчлэн харуулж алдаршуулдаг билээ. “Бурхан ертөнцийг үнэхээр хайрласан тул цорын ганц Хүүгээ өгсөн. Ингэснээр Хүүд итгэгч хэн ч мөхөхгүй, харин мөнх амьтай болох юм. Бурхан Өөрийн Хүүгээ ертөнцийг яллахын тулд биш, харин Түүгээр дамжуулан ертөнцийг аврахын тулд ертөнц уруу илгээсэн билээ” (Иох.3:16, 17).

UBTC Библийн сургуулийн оюутан С...-ийн бакалаврын зэрэг хамгаалсан дипломын ажилаас... /Үргэлжлэл бий/