9. Шоовдорлогдон гадуурхагдах байдалд хандах нь

 Хүмүүс өөрсдийнхөө үнэлэмжээр, “хамгийн хайртай, дуртай” гэсэн зүйлсээ таашаан дээдэлж, бусад зүйлсийг зэрэглэл тогтоон гадуурхаж, гоочилдог тийм уур амьсгал бүхий нийгмийг бүрдүүлж амьдарцгаадаг. Тиймээс ч бүх хүн, ямар нэг байдлаар өссөн орчиноосоо, тойрон хүрээллээсээ гадуурхагдах, басамжлагдах, дорд үзэгдэх, үл анзаарагдах, хаягдах байдлыг амсаж, дарамт шаналлыг мэдэрч үзсэн байдаг.

Биднийг үргэлж зовоож шаналгаж байдаг шоовдорлолоос төрсөн аливаа сөрөг бодол санаа, мэдрэмжүүдтэй зөв харьцаж сурахгүй бол, Христ доторхи сүнслэг төлөвшилд маш том саад болдог. Харамсалтай нь бид бүгд, иймэрхүү хандлага харьцаанд тэвчээртэй, эелдэг зөөлөн хандаж, эерэг хариу үйлдэл үзүүлхийн оронд, ямар нэгэн хамгаалах эсвэл сөргөлдөх хариу барьж сурсан байдаг. “Хэнд ч хэзээ ч бузар мууг бузар муугаар бүү хариул. Бүх хүний өмнө юу нь зөв болохыг л харгалзан үзэж бай.” (Ром 12:17) гэж Библи сургадаг.             

Үзүүлээд өгье:                  Бусдын дээр гарахаар улайран зүтгэж, өрсөлдөн тэмцэлддэг хүмүүсийн ихэнх нь шоовдорлогдохоос л үхтэлээ айж, өөрсдийгөө хамгаалж байгаа нь тэр юм. Бусдаар хүлээн зөвшөөрөгдөхийн тулд л нэр алдар хөөцөлдөн, бүр заримдаа элдэв хорон мууг сэдэж нөхцөл байдлыг хутган үймүүлдэг. Бүхий л чадлаараа оргил руу тэмүүлэн, аливаа амжилт хожилд хүрэх нь бусдаар хүлээн зөвшөөрөгдөж, шоовдорлогдохгүй байх баталгаа гэж сэтгэдэг. Тэд бүхнийг төгс гүйцэлдүүлэхийг эрмэлзэж, улмаар сэтгэлийнхээ гүнд үргэлжийн түгшүүр, дарамттай явж, ядаргаа стрэссийн (сэтгэл хямралын) үүр болцгоодог.

Тэд бүхий л зүйлд зөвхөн өөрсөддөө найдацгааж, эсвэл өөрсдөөс нь илүү авъяаслаг, мэдлэгтэй хүмүүсийг л түшиглэдэг ба Бурханд найдаж, Түүний өмнө сул доройгоо хүлээн зөвшөөрхөөс үргэлж татгалздаг тул, Бурхантай харилцах харилцаа нь үнэхээр гажуудсан байдаг. Тэд сайндаа л өөрсдийнхөө  л хараа, зорилго төлөвлөгөө нь бүтэлтэй болоход ашиглах, туслуулах үүднээс л Түүнд ханддаг.

Иймэрхүү хүмүүс аливаа нөхцөл байдал болон тойрон хүрээлсэн хүмүүсээ өөрийнхөөрөө байлгах гэж, зохицуулж хянах гээд л зүтгээд байдаг тул, Бурханаар өөрийгөө хянуулж, Түүний захиргаанд (хаанчлалд) орно гэж бараг үгүй. Тэд хаа газар (тэр ч бүү хэл Эзэний цуглаан дотор ч) ямагт тэргүүнд байж эрх мэдэл, алдар хүндийг өөрсөддөө шаардаж, төвлөрүүлхийг эрмэлздэг. Тэдний өөрсдийгөө үнэлэх үнэлэмж нь хамт олон доторхи байр сууриас нь асар гүнзгий хамааралтай байдаг. Тиймээс ч тэд бусдад Бурханыг харуулах биш өөрсдийгөө л харуулж, бусдыг босгон байгуулах биш эвдэж нураах нь элбэг.

Тэд Бурханд болон өөртөө хамгийн итгэлгүй хүмүүс юм. Хэдийгээр тэд өндөр албан тушаал, сэнтийд залрах боловч ямар нэг “сайн сайхан” зорилгын цаана нуугдацгааж, аливаа хувийн хариуцлага, үүрэг ролиос зугтаж булзах хэв шинжтэй. Энэ нь яг өөрт нь хандсан шүүмжлэл, хувийн хариуцлагын тооцооноос үргэлж зугтааж, эсвэл эрс дургүйцэн сөргөлдөх байдлаар илэрдэг. Тэд эр зоригтойгоор хувийн хариуцлагаа ухамсарлаж, алдаа зөрчилөө гэмших чадваргүй байдаг.

“Та нар тэгж болохгүй. Харин та нарын дунд хэн чинь агуу нэгэн болохыг хүснэ, тэр нь та нарын зарц болог. Та нарын дунд хэн чинь тэргүүнд байхыг хүснэ, тэр нь та нарын боол болог.”(Мт. 20:26, 27), гэж Эзэн айлдсан нь яг үүний эсрэг тэнгэрлэг зүй тогтол юм.

Харамсалтай нь шоовдорлогдхоос айж бултах энэхүү арга нь, аливаа шоовдорлогдолтоос түр зуур л бултуулж хойшлуулдаг ба бүр цаашилбал улам хүчтэй, эргэлт буцалтгүй яллалт буруутгал, шоовдорлолтын үндэс, шалтгаан болдогыг түүхэн дэх олон “агуу хүмүүс”-ийн гунигт төгсгөлөөс харж болно. Судалгаанаас харахад өндөр эрх мэдэлтэй байсан хүмүүс сэнтийнээсээ бууснаас хойш дунджаар есөн сар амьдардаг гэсэн тооцоо бий. Тэд бусдыг хянаж, захирч чадахгүй болсноос болоод удалгүй насан өөд болдог байна.               

Буугаад өгье:                   Бурханы хаанчлалаас гадуурхи дэлхийн тогтолцоо нь “хамгийн шилдэг, хамгийн хүчтэй, хамгийн авъяаслаг, хамгийн мэдлэг чадвартай, хамгийн үзэсгэлэнтэй”-г хүлээн зөвшөөрдөг. Харин эдгээр “хамгийн...” гэсэн үнэлгээг хангаж чадахгүй олонхи болсон хүмүүс нь гадуурхагдаж (хэн бүхнээс илүүтэй өөрөө өөрсдийгөө голж гадуурхан), нийгмийн энэхүү буруу үнэлгээнд бууж өгцгөөдөг.

Тэд сайн сайхан зорилго төлөвлөгөөнөөсөө ухарч, өөртөө итгэлгүй байж, хүч чадлаа бүрэн дүүрэн ашиглахаас үргэлж хойш суун, ялих шалихгүй, гарын үзүүрийн зүйлсээр сэтгэлээ зогоохыг оролдож, өөрсдийгөө гологдмол, хайрлагдах нэгэн биш гэж сэтгэцгээдэг. Тэдэнд үнэ цэнэ үнэлэмж байхгүй, эрхэмлэх дээдлэх зүйл үгүй учраас хямдхан, хялбар, аливаа гэм нүгэл, уруу татлаганд нээлттэй, хүчирхийлэлд амархан автамтгай байдаг.

Уг нь бол, хүн болгонд Бурханаас өгсөн (нэр төр, бие махбодийн болон бэлгийн цэвэр ариун байдал, хувийн ариун цэвэр, хувийн сахилга бат, Эзэн Бурхандаа болон хань нөхөддөө, бас өөртөө үнэнч хувиршгүй байх, зорилго тэмүүлэл, дуудлага алсын хараа, итгэл үнэмшилдээ тууштай байж өөрсдийгөө бүхий л талаар зориулах зэрэг) үнэт зүйлс байдаг боловч, тэдгээрийгээ мэдэрч, үнэлж, өөрийн болгон, улмаар цэвэр ариунаар баттай сахиж, эрхэмлэн дээдэлж, нандигнаж чаддаггүй ба үргэлж бохирлон гутаах хандлагатай.

Тэр ч бүү хэл нандин чанарууд, үнэт зүйлсээ аливаа уруу татлага, хорон муугаас эр зоригтой хамгаалж, авташгүйгээр сөрөн зогсох нь битгий хэл, энэ дэлхийн завхарсан үхмэл тогтолцоо, үзэл баримтлал, бузар сүнслэг орчиноос ашиг олж авахын тулд, мөн шалихгүй дур хүсэл, цаг зуурын тачаалаа хангахын төлөө бодох юмгүй арилжиж, эргэлтэнд оруулах нь нэн элбэг.
Тэдний хувьд эрхэмсэг, тэнгэрлэг, халдашгүй, тууштай байна гэвэл бүр бүтэшгүй.

Тиймээс ч тэд Христийн сайн мэдээ байж, гэрэл давс болох биш, харин ч үл итгэгчдийн өмнө Эзэнийхээ ариун Нэрийг унагааж бохирлож байдаг. Тэд өөрсдийн “муу муухай хувь тавилан”-даа Бурханыг буруутгах нь элбэг тул, Түүнд зүрхээ нээж, зөвт сайхан харилцаатай болход тун бэрх. Энэ цаг үеийн хэвшмэл үнэлгээнд бууж өгсөн эдгээр хүмүүс үргэлжийн шоовдор амьдарлаар амьдарч, улам л шоовдорлогдох хэв шинжтэй.            

Тэрслэе:                         Зарим хүмүүс “шүдийг шүдээр, нүдийг нүдээр”, гэсэн зарчимыг тууштай баримталдаг. Ийм төрлийн хүмүүс дотороо хүлээн авагдахыг маш их хүсдэг ч, “та надад хэрэггүй, таны хайр ч хэрэггүй...” гэж гөжүүдэлцгээдэг. Хүлээн зөвшөөрөгдөх хэрэгцээгээ үргэлж үгүйсгэн, гадагшаа ил болгохоос үхтэлээ айж байдаг. Тэд олон нийтийн дунд зохимжгүй эвгүй ааш авир гарган, этгээд гаж хувцаслан, гажуудаар онцгойрох гэж оролдоцгоон тэрслэлээ илэрхийлдэг.

Хариуцлага, сахилга бат, эмх журам, хүндлэл гэдгийг тэд мэддэггүй ба бага хэмжээгээр мэдсэн ч албаар тэрслэн үгүйсгэж, эсэргүүцэж байдаг. Тэдний хувьд Бурхан, хүмүүсийг чадвараар нь шүүслэн дарамтлагч мэт харагддаг тул бас л Түүний хайр, өршөөл уучлалд хаалттай байж, зөвт харилцаанд ордоггүй.

Чуулган доторхи иймэрхүү хүмүүс, удирдлагаа болон бусдыгаа үргэлж өөлж гоочлох нь үнэхээр засаж сайжруулах үүднээс биш, ердөө л өөрсдийн тэрслэлээ илэрхийлэх үүднээс байдаг. Энэхүү тэрсэлсэн хандлага харилцаа нь хүссэн үр дүнг нь өгдөггүйгээр барахгүй, харин ч улам их эсэргүүцэл, шоовдорлолтыг нийгмээс амсахад нөлөөлж, дайран довтолж буй тогтолцоог нь улам бэхжүүлж байдаг. 

Аливаа шоовдорлох хандлага, дайралт доромжлолын (зөөлнөөр хэлбэл шүүмжлэлийн) эсрэг, та өөрийгөө өмөөрөн хамгаалах ямарч шаардлагагүй юм. Ингэх хэд хэдэн шалтгаан бий. 

1-рт:             "Харин сонсогч хүмүүст Би хэлж байна. Дайснаа хайрла, та нарыг үзэн яддаг хүмүүст сайныг үйлд. Та нарыг хараадаг хүмүүсийг ерөө, та нартай буруугаар харьцдаг хүмүүсийн төлөө залбир... Хэрэв та нар өөрсдийг чинь хайрладаг хүмүүсийг хайрлавал, та нарт юун талархал байх билээ. Учир нь нүгэлтнүүд хүртэл өөрсдийг нь хайрладаг хүмүүсийг хайрладаг шүү дээ... 

Харин та нар дайснуудаа хайрла, сайныг үйлд, хариу харж бүү зээлдүүл. Тэгвэл шагнал тань агуу байх бөгөөд та нар Хамгийн Дээд Нэгэний хөвгүүд байх болно. Учир нь Тэр Өөрөө үл талархагсдад болон бузар хүмүүст ч нигүүлсэнгүй ханддаг юм. Та нарын Эцэг өршөөнгүй. Түүнчлэн өршөөнгүй байгтун.” (Лк. 6:27-36). 

“Бузар муугаар бүү дийл, харин бузар мууг сайнаар дийлэгтүн.” (Ром 12:21) гэж Сударт заадаг. Тиймээс Бурханы зөвт ариун байдал, хувиршгүй хайр дотор төлөвшихийн тулд, бас Эзэн Бурхандаа дуулгавартай байх үүднээс дээрхи тушаалуудыг сахигтун.    

2-рт:             “Хайртууд минь, хэзээ ч өөрийн өшөө хонзонг бүү ав. Харин Бурханы уур хилэнд зай гарга. Учир нь “Өшөө авалт нь Минийх, Би буцааж төлнө”, гэж Эзэн айлдав, гэж бичигджээ.”(Ром 12:19), гэсний дагуу та үнэхээр шударга бусаар гадуурхагдаж, шоовдорлогдож буй бол Бурхан таны төлөө ажиллана. 

3-рт:              Хэрэв та буруу ярьж, буруу зүйлсийг үйлдэж, бусдыг гомдоосныхоо төлөө дайралт, шүүмжлэлд өртсөн бол өөрийгөө хамгаалах гэж үндэслэлгүйгээр өөрийгөө зөвтгөж, бүр эсвэл худлаа ярьж алдаа зөрчилөө улам нэмэгдүүлнэ. Үүний оронд “Тиймээ, таны зөв. Би буруу хийжээ.” гэвэл өөрийн бардам занг ялсан асар том ялалт болох ба алдаагаа засаж, харилцаагаа сэргээх, нэр төр тань ч цэвэр байж, бүр илүү хүндлэгдэх нигууртай.

“Хэрэв бид нүгэлгүй гэж хэлбэл өөрсдийгөө мэхэлж байгаа бөгөөд бидний дотор үнэн алга. Хэрэв бид нүглээ хүлээн зөвшөөрвөл Тэрээр итгэмжит, зөвт бөгөөд бидний нүглийг уучилж, бүх л зөвт бус байдлаас биднийг цэвэрлэнэ. Хэрэв бид нүгэл үйлдээгүй гэж хэлбэл, бид Түүнийг худалч болгож байгаа хэрэг бөгөөд бидний дотор Түүний үг алга.” (1Иох. 1:8-10).   

4-рт:                Үнэхээр таны зөв байж, үндэслэлгүйгээр дайралтанд өртсөнч өөрийгөө хамгаалах хэрэггүй. Учир нь бид энэ ертөнцийнх биш бөгөөд энд бид бусадтай аливаа зүйлсийг булаацалдан маргаж, байр суурь, эрх мэдэлийн өрсөлдөөнд оролцох шаардлагагүй юм. Харин ч бид энэ дэлхийн бүхий л мунхаглал, шударга бусыг чимээгүй тэвчиж, хайрлан уучилснаар Эзэний загалмайг үүрэлцэж буй хэрэг юм.

“...Харин хэрэв та нар зөвийг үйлдээд зовохдоо, үүнийг хүлцэн тэвчвэл, энэ нь Бурханы тааллыг олдог. Учир нь та нар энэхүү зорилгын төлөө дуудагдсан билээ. Яагаад гэвэл та нарыг Өөрийнхөө мөрөөр дагуулхын тулд та нарт үлгэр дууриаллыг үлдээн, Христ та нарын төлөө зовлон эдэлсэн. Тэр нүгэл үйлдээгүй, Түүний аманд ямар ч заль мэх олдоогүй. Тэр зүхэгдэж байхдаа, хариуд нь зүхээгүй. Тэр зовон тарчилж байхдаа заналхийлээгүй, харин шударгаар шүүдэг Нэгэнд Өөрийгөө даатгасаар байлаа.” (1Пт. 2:20-23).

Ингэхэд та зөвхөн шоовдорлогдон гадуурхагдах биш, бүр өөрөө шоовдорлон гадуурхагч болчихсон юм биш биз? Тэгэхгүйн тулд яах вэ?      

Юуны түрүүнд эрхээ эдлэхээ аль болох хойш тавьж, үүрэг хариуцлагаа л итгэмжтэй биелүүлж, хэрэгжүүлхэд анхаар. Бид Христийн авралд багтсанаар онцгой давуу, тэнгэрлэг эрхийг өвлөгчид болсон. Бидний дуу хоолой Тэнгэрт сонсогдож, бидний асуудлуудад Эцэг оролцож, Түүний сүр хүч биднийг хамгаалж байдаг.

Гэхдээ энэ болгоны цаана бас онцгой өндөр үүрэг хариуцлага бий. Энэ бол өөрийн эрх ашиг, дур сонирхолыг огоорон, бусдын эрх ашиг, авралын төлөө зүтгэх, бусдын сул дорой, мөхөс байдлыг ойлгон хуваалцах нь, Христийг гэрчлэх болон Түүний агуу хайрыг үг хэл үйлдэлээрээ харуулж амьдрах нь юм.       

Яллан буруутгахыг биш анхааруулан зэмлэхийг урьтал болго. Анхааруулан зэмлэх нь хүний алдаа зөрчилийг дүгнэсэн дүгнэлтээс үүдэлтэй бол, яллалт буруутгал нь хүний хувь чанар, зан байдал руу нь довтлох үзэгдэл юм. Мэдээж бид яллан буруутгах эрхгүй. Бас анхааруулан зэмлэхдээ ч маш болгоомжтой байж, гарцаагүй баталгаа нотолгоог үндэслэх нь чухал. Бид хүмүүсийн алдаатай үйлдэлд хариуцлага тооцож болох ч, энэхүү алдаанаас нь болж өөрийг нь хэзээ ч хараар будаж болохгүй. Тэр тусмаа түүний гэм нүгэл Христийн цусаар угаагдсан байхад шүү...       

Таны хайрлагдах, хүндлэгдэх, хүлээн зөвшөөрөгдөх, халамжлуулах зэрэг олон хэрэгцээг тань Эзэн эргэн тойрныхноор тань дамжуулан хангадаг. Тиймээс ч эргэн тойрныхноосоо юуг, ямар харилцааг хүсэж буйгаа, тэдний өмнө тавьж буй өөрийн шалгуур шаардлагаа эгэл энгийн байдлаар, цаг бүр, өдөр бүр чөлөөтэйгөөр, эвтэйхэн илэрхийлж сур.  Таны зөв, эерэг байдлаар байнга илэрхийлдэг, хүсдэг, шаарддаг зүйлсийг бусад тань ч элдэв хүндрэлгүй хүлээн авч, зохих хүссэн хариу үйлдлийг тань үзүүлнэ.

Энэ бүгдээс илүүтэй “Тиймээс та нар хүмүүсийг өөрсдөдөө хэрхэн хандаасай гэж хүссэнээрээ л өөрсдөө ч тийнхүү тэдэнд ханд...” (Мт. 7:12) гэсэн зарчимыг дуулгавартай хэрэгжүүлж сурвал бас гайхамшигтай үр дүнтэй.


Неил Т.Андерсоны "Харанхуйг гэтлэхүй" номын 12-р бүлгээс хийсэн товчлол 

8. Сэтгэлийн шархыг эмчлэх нь

Майк Линда 2 нэгэн сайхан Христчин гэр бүлийн хоёр бөгөөд сайн мэдээний илгээлтэнд бэлтгэгдэж байсан юм. Тэгтэл нэгэн аймшигтай зүйл болж Линда хүчиндүүлж, тэр гэр бүл сэтгэлийн гүн хямралд орцгоосон билээ. Сэтгэл нь маш хүнд шархалсан учраас тухайн газараа амьдрах нь ч тэдэнд хүнд байсан. Эргэн тойрны бүх зүйл, орчин нөхцөл болсон явдлыг үргэлж сануулан, сэтгэлийн шархыг нь хөнддөг байсан тул, удалгүй тэндээс нүүцгээсэн юм.

Гэвч шархалсан зүрх эдгэж өгөхгүй л байлаа. Линда болсон явдлыг мартаж, хэвийн амьдралдаа эргэн орох гэж хичнээн чармайгаад ч чадахгүй байлаа. “Өөрт тохиолдсон аймшигтай бас гунигтай энэ явдалыг би мартаж, салж чадахгүй байна. Би хүчиндүүлчихсэн. Энэ зүйл насан туршид минь хар толбо боллоо...” , гэж Линда надад яриад уйлсан юм. “Үгүй дээ Линда, болсон явдал хол ард хоцорсон. Энэ муухай явдалаас болж чи хохирсон нь үнэн. Гэхдээ энэ нь чиний хэн болохыг чинь өөрчлөөгүй ба Бурханы хүүхэд байх эрхэм алдарыг чинь чамаас булаагаагүй.” гэж би хариулсан.

Энэ нүгэлт, харанхуй дэлхий дээр Эзэний хүсэлээс гадуур олон бузар зүйлс оршиж, бусармаг үйл өрнөж байдаг нь нэгээхэн гашуун үнэн юм. Бурханы ариун хүмүүс ч тэдгээрийн хохирогч, золиос болох тохиолдол бий. Таны өнгөрсөн амьдралд тохиолдсон тиймэрхүү аливаа гунигтай үйл явдал таны сэтгэл санааг эмх цэгцгүй болгохоос гадна, таны Христийн доторхи төлөвшилт болон чөлөөлөлтөнд бас нэгэн дарамт саад болдог. Гэхдээ бидний тэдгээрт үзүүлдэг хариу үйлдэл, Христээс гадуурхи хүмүүсийнхээс эрс өөр байх ёстой.

Хүний сэтгэлийн хөдөлгөөн өдөр бүрийн үйл явдлын өрнөлөөс шалтгаалан янз бүр байдаг бол, болоод өнгөрсөн гашуун явдлын улмаас үлдсэн шарх, сэтгэлийн дарамт өөрчлөгдөлгүйгээр, амь бөхтэйгөөр хадгалагдан, өнөөдөрт нь болон ирээдүйд нь таагүйгээр, заримдаа бүр аюултайгаар нөлөөлж байдаг.

Хэрвээ танд юмуу, эсвэл хайртай дотны тань нэг хүнд Линдатай тохиолдсон шиг зүйл тохиолдсон бол, иймэрхүү булай явдалтай холбоотой ямар нэгэн мэдээлэл, яриа хөөрөө, хошигнол, кино, тэр ч бүү хэл зүгээр л “хүчиндсэн” гэх үг сонсогдох төдийд, та хямарч, уур бухимдал тань дэлбэрч өөрийгөө хянах чадвараа алдаж болох юм.

Тэр ч байтугай, зүгээр л хэн нэгний нэр ч, адил ойролцоо зүс царай ч, биеийн галбир ч сэтгэлийн шархыг хөндөх нь бий. Жишээ нь, таны ангийн тань багш харгис түрэмгий, сурагчиддаа догшин хэрцгий ханддаг Билл гэдэг хүн байсан гэхэд, та ийм нэрэнд хаа ч явсан таагүй хандах өндөр магадлалтай ба үр хүүхэддээ ийм нэр өгөх талаархи эхнэрийн тань санал таны уурыг бадрааж, бухимдуулах нь бүр тодорхой.

Тэдгээр эртний, өнгөрсөн зүйлсээс үлдсэн шархнууд ихэнхдээ цаг хугацааны явцад далдлагдан нууцлагдсан байх ба тодорхой үйл явдал өдөөж сэдрээхгүй л бол амьдралд нөлөөлөөд байдаггүй мэт. Гэвч үнэндээ тийм биш. Энэ нь таныг өөртөө итгэлтэйгээр бусадтай эрүүл харилцаанд орж, баяр хөөртэйгөөр, бүрэн дүүрэн сэтгэл хангалуун амьдархад үзэгдэх болон үл үзэгдэх байдлаар саад болж, бүр хортойгоор нөлөөлж байдаг. Тэдгээр нь таны эрх чөлөөг боомилон, аймхай сул дорой болгож, бүр цаашлан аливаа цочмог таагүй зүйлд өртөх эрсдэлтэй төлөв байдалд байлгадаг.

Ихэнх хүмүүс сэтгэлийн шархаа, дотооддоо зүрхэндээ таагүй дурсамжаа хүчлэн дарах байдлаар, гадааддаа сэдрээж болзошгүй үйл явдал, үг ярианаас зугтан зайлах байдлаар зохицуулах гэж оролддог. Гэхдээ энэ нь бүрэн үр дүнтэй арга биш. Та телевизийн нэвтрүүлгээс, кино шийнээс, ном сониноос, хүмүүсийн ярианаас шархыг тань хөндсөн зүйлсийг сонссоор байх болно. Үүнээс болж уур уцаартай, цаашлан зан чанарын доголдолтой байдалд ч та орж мэднэ. Тиймээс та эдгэрэхийн төлөө өөрийн зүгээс хүчин чармайлт гарган тэмцэх нь чухал.

Сэтгэлийн шархтайгаа нүүр тулан шийдэх нь    

Та тэрхүү таагүй дурсамжуудаас зүрхэндээ зугтааснаараа юуг ч хожихгүй ба тэдний хорон муу нөлөөлөл, дарамт зовиуриас бүрэн чөлөөлөгдөж чадахгүй. Танд заавал гадны туслалцаа хэрэгтэй.   Тиймээс эр зоригтойгоор, Ариун Сүнсний тусламжтайгаар нүүр тулан ялах нь маш зөв арга. Эзэн маань танд тухайн үед ямархуу мэдрэмж төрсөн, одоо таны зүрхэнд юу болж байгааг маш сайн мэдэж буй. Тиймээс ч юуны түрүүнд загалмайн өмнө үнэн дүрээрээ, сэтгэлээ нээгээд ирээрэй   Миний зовлонг харж, намайг авраач. Учир нь би Таны хуулийг мартдаггүй. Миний хэргийг өмгөөлж намайг золиоч. Өөрийн үгийн дагуу намайг сэргээгээч. (Дуулал 119:153, 154)   

Эцэг Өөрөө ч хайртай Хүүгээсээ шударга бусаар хагацаж байсан ба, Хүү болох Эзэн Есүс ч шударга бус гүтгэлэг, харгис аллагын золиос болж байсан тул, таныг хамгийн сайн ойлгож, зовлонг тань хуваалцан, эдгэрэл чөлөөлөлтийг зүрхэнд тань гайхалтайгаар төгс хийнэ, гэдэгт итгээрэй. Энэхүү итгэл, сүсэгээр загалмайн өмнө ирж, өөрийн өвдөлт, шаналлыг Эзэнд ил тодоор хэлж, сэтгэл хөдлөл, уй гашуугаа Түүнд үнэнээр нь дэлгээрэй. Учир нь Тэр Өөрөө соригдон зовлон эдэлж байсан тул, сорилтод орогсдод тусалж чадна (Еврей 2:18).

Удаахи нь, тэрхүү хуучин шархыг бий болгосон этгээдийг Эзэн өөрийн шударга ариун шүүлтээр шүүх болно, гэдэг нь гарцаагүй үнэн юм. Тэр хүн гэмшин эргэж Христтэй уулзан, уучлалыг авч ч болно. Эс бөгөөс танд учруулсан хөнөөл болон өөр бусад хорт үйлийнх нь төлөө Эзэн түүнийг шийтгэж, өс хонзонг тань өмнөөс чинь авч өгч ч магад.

Бурхан шударга тул Тэр та нарыг зовоогчдод зовлонгоор хариулж, харин зовсон та нарт болон бидэнд хариуд нь тайвшралыг өгнө. Тэр үед Эзэн Есүс хүчирхэг тэнгэр элч нарынхаа хамт дүрэлзэх гал дотор тэнгэрээс илчлэгдэн, Бурханыг мэддэггүй ба бидний Эзэн Есүсийн сайн мэдээг дагадаггүй хүмүүсээс өшөө авах ажээ. Тэд мөнх сүйрлийн төлөөсийг төлж, Эзэний оршихуй болон Түүний хүчний алдараас сална (2 Тесалоник 1:6-9). 

Энэ нь Эзэний эрх мэдлийн асуудал бөгөөд “... ямартаа ч миний Бурхан хамгийн зөв шударгаар шийднэ...” гэдэгт итгэ. Ер нь тухайн хүний хорт үйл, гэм нүгэл нь таныг зовоож шархлуулснаас илүүтэй Эзэний зүрх сэтгэлийг өвтгөж шархлуулсан үнэнийг ойлгох нь маш чухал. Эзэн бол хартай, өширхөгч Бурхан юм. Эзэн бол өширхөгч, хилэгнэгч юм. Эзэн Өөрийнхөө өстнөөс өшөөгөө авдаг. Тэр Өөрийн дайснууддаа зориулан хилэнг хураадаг (Нахум 1:2). 

Зарим хүмүүс ямарч мэдрэмжгүйгээр, шашинлагаар, муйхараар, шархалсан сэтгэлийн уй гашууг ойлголгүй, учир зүггүй уучлахыг албадан шаардаж, цэцэрхэх нь бий. Бидний Эзэн хулгайч, луйварчид, алуурчид, хүчирхийлэгчдийн Бурхан биш. Тэр тэднийг үзэн яддаг гэдэг нь маргашгүй үнэн юм.

Эзэн доорхи зургаан зүйлийг үзэн яддаг. Тийм ээ, эдгээр долоон зүйл Түүнд жигшил зэвүүцэл болдог. Эдгээр нь гэвээс ихэмсэг харц, худалч хэл, гэм зэмгүй цусыг урсгагч гар, хар буруу төлөвлөгөөг сэдэгч зүрх, хорон муу уруу түргэн гүйгч хөл, худал чалчдаг хуурамч гэрчлэгч болон ах дүүсийн дунд эвдрэлцэлийг тараагч зэргүүд болой (Сургаалт үгс 6:16-19). 

Харин Тэрээр доромжлогдон гутаагдаж, үзэн ядагдаж орхигдогсдын, шударга бусаар хавчигдан, хэлмэгдэн хохирогчдын Бурхан, Авран хамгаалагч гэдэгийг мэдэж итгэх нь гайхалтай итгэл, найдвар, тайвшралыг өгдөг юм. Тэр таны талд байгаа гэдэгийг би баттай хэлэх байна. Эзэний хараал хар муу санаатны гэр дээр байна. Харин тэр шударга зөв байгчийн орон гэрийг ерөөнө. Хэдийгээр Тэр доромжлогч хүмүүсийг тохуурхдаг боловч, зовж зүдрэгсдэд нигүүлслээ өгдөг (Сургаалт үгс 3:33, 34).

Та тухайн үеийн өөрийгөө болон Христ доторхи одоогийн өөрийгөө харьцуулан харах нь гурав дах алхам болно. Мэдээж энэ хоёр хүн тэнгэр газар шиг ялгаатай. Тиймээс шинэ хүний тэнгэрлэг, уужуу тайван сэтгэлээр, сэтгэлийн тэнхээ эр зоригоор, өршөөнгүй ууч сэтгэлээр, шударга үнэн шүүлтээр зовиуртай дурсамжийг харж сур. Хуучин сэтгэлийн шарх бол хуучин хүний нэг хэсэг болохоос, шинэ хүнд ямар ч хамаагүй гэдэгийг мэдэж итгэх нь чухал. Тиймээс хэрэв хэн нэгэн хүн Христ дотор байвал тэр хүн шинэ бүтээл мөн. Хуучин юмс нь өнгөрчээ. Харагтун шинэ болсон байна (2 Коринт 5:17).

Мөн дөрөвдүгээрт нь, өнөөгийн нөхцөл байдалд сэтгэлийн шархыг тань хөндөж сэдрээж буй элдэв зүйлсэд нэн эрүүл саруулаар, уужуу тайвуунаар, Ариун Сүнстэй хамт дэнслэн хандаж сурах ёстой. Өнөөгийн Христ доторхи тэнгэрлэг мөн чанараар, урьдны гашуун явдлыг сануулах элдэв нөлөөлөлд тайван амгаланаар хандаж, нөхцөл байдлыг эрүүлээр дэнслэн, тэдгээрт эмзэглэх ямарч шалтгаан байхгүйг ойлгох нь, тэдгээрээс өвдөлт авч эмзэглэхгүй байж сурах нь маш том ялалт юм. Харин Сүнсний үр жимс нь хайр, баяр баясгалан, амар тайван, тэвчээр энэрэл, сайхан сэтгэл, итгэлтэй байдал, дөлгөөн зан, өөрийгөө захирах байдал юм. Эдгээрийн эсрэг хууль гэж байдаггүй юм (Галат 5:22,23). 

Нөхцөл байдал чамайг барьж байгуулахгүй, харин ч эвдэж бохирлох хандлагатай. Зөвхөн Христ л Ариун Сүнсээрээ, хүчит Үгээрээ чамайг барьж байгуулах болно гэдэгийг мэд. Тиймээс та нар мэргэн бус хүмүүс шиг биш, харин мэргэн хүмүүсийн адилаар хэрхэн алхаж буйгаа хянаж бай. Цагийг авар. Яагаад гэвэл өдрүүд нь бузар булай аж. Тийм учраас бүү мунхаг бай. Харин Эзэний хүсэл юу болохыг ухаар (Ефес 5:15-17).

Эцэст нь уучлан өршөөхөд бэлэн бай. Уучлал бол Бурханы хүмүүст Библийн заадаг бас тэднээс шаарддаг хамгийн гол шалгуур юм. Харин сонсогч хүмүүст Би хэлж байна. Дайснаа хайрла, та нарыг үзэн яддаг хүмүүст сайныг үйлд. Та нарыг хараадаг хүмүүсийг ерөө, та нартай буруугаар харьцдаг хүмүүсийн төлөө залбир. Хацрыг чинь алгадсан хүнд нөгөө хацраа тавьж өг. Дээлийг чинь авсан хүнээс цамцаа бүү харамла. Гуйсан хүн бүрд өг, юмыг чинь авсан хүнээс буцааж бүү нэх.

Та нар хүмүүсийг өөрсдөдөө хэрхэн хандаасай гэж хүснэ, тэдэнд мөн түүнчлэн ханд. Хэрэв та нар өөрсдийг чинь хайрладаг хүмүүсийг хайрлавал, та нарт юун талархал байх билээ? Учир нь нүгэлтнүүд хүртэл өөрсдийг нь хайрладаг хүмүүсийг хайрладаг шүү дээ. Хэрэв та нар өөрт чинь сайныг үйлддэг хүмүүст сайныг үйлдвэл та нарт юун талархал байх билээ.? Учир нь нүгэлтнүүд хүртэл мөн л тийн үйлддэг шүү дээ (Лук 6:27-33). 

Мэдээж Эзэн гэмшсэн тохиолдолд уучлах тухай ярьдаг боловч, одоо нэгэнт тэр хүнтэй та нүүр тулан уулзах магадлал бага тул, Ариун Сүнс зүрхэнд тань ятгах үед уучлан өршөөх нь зайлшгүй чухал (Лук 17:3, 4). Учир нь тэрхүү нүгэлтэн хаа нэг газар гэмшиж ухааран, аврагдсан байх магадлалтай. Тиймдээ ч Эзэн таниас ч бас өршөөхийг шаардаж, ятгаж байгаа хэрэг.

“...Бид өртөнгүүдээ уучилсний адил бидний өрийг мөн уучлаач, харин бузар муугаас гэтэлгээч. [Учир нь хаанчлал, хүч чадал, алдар сүр үүрд Таных. Амен]”  Учир нь, хэрэв та нар хүмүүсийн алдааг уучилбал тэнгэрлэг Эцэг тань мөн та нарыг уучилна. Харин хэрэв та нар хүмүүсийг уучлахгүй бол Эцэг тань мөн та нарын алдааг уучлахгүй (Матай 6:12-15).


Жич: Бусад бүлгүүдийн товчлолд багахан засвар өөрчлөлт хийж байсан ба теологийн үндсэн санааг бараг өөрчлөөгүй бол энэ бүлгийн теологийн үндсэн санаанд нилээн том засвар өөрчлөлт хийсэн болно. Эх бүлгийг нь номноос нь уншина уу...


Неил Т. Андерсоны “Харанхуйг гэтлэхүй” номын 11-р бүлэгт үндэслэсэн тэмдэглэл...

7. Та Эзэний өмнө зөвт байхын тулд бодитой бай.

Сэтгэлийн хөдлөл бол оюун санааг шинэчлэх үйл явцад гол үүрэг гүйцэтгэдэг. Сэтгэлийн хөдлөл тань бодол санааны тань илэрхийлэл, мэдрэхүйн тань толь юм. Таны хэрхэн тунгаан бодож, ухаарч  байгаа эсэх, гэмшиж даруусан өөрчлөгдөж буй эсэх, оюун санаа тань шинэчлэгдэж байгаа эсэх, зүрхэнд тань гэрэл, хайр цутгаж буй эсэх, Эзэний үгээс амьд бодитой, хүчтэй нөлөөг авч ариусаж байгаа эсэх тань сэтгэлийн хөдөлгөөнөөр тань илэрч харагддаг.

“Түүний хилэнгийн саваанаас болж зовлон үзсэн хүн нь би байна. Тэр намайг тууж гэрэлд биш харанхуйд алхуулсан. Үнэхээр миний эсрэг Тэрээр бүх л өдрийн турш дахин дахин мутараа эргүүлсэн. Тэр миний арьс махыг тураан эцээж, яснуудыг минь хэмхчсэн. Тэр намайг уй гашуу, хүнд бэрхээр бүслэн ороов. Он удаан үхэгсэдийн адилаар намайг Тэр харанхуй газруудад оршин суулгав.


Би гадагш гарч чадахааргүйгээр Тэр намайг хашив. Тэрээр гинжийг минь хүнд болгов. Хашхиран, тусламж дуудахад минь ч Тэрээр залбирлыг минь хаасан. Тэр миний замыг цавчсан чулуугаар хааж, миний жимийг тахир болгов. Миний хувьд Тэрээр отон хэвтэж буй баавгай мэт, далд газруудад байх арслан мэт юм.”(Иер. гаш. 3:1-10) гэж нэгэн эш үзүүлэгч Сударт гашуудан, шаналан байж сэтгэл хөдлөлөө илэн далангуй илэрхийлсэн байдаг.

Мэдээж, Бурхан түүнд тохиолдсон гай зовлонгийн учир шалтгаан байгаагүй. Бурхан түүнийг харанхуйн замд оруулаагүй. Бурхан хүмүүсийг зажлахгүй залгих араатан биш. Хэдийгээр тухайн нөхцөл байдалд Иеремиа зовж шаналах үедээ Бурханы талаар буруу төсөөлөлтэй байж, Түүнийг буруутгах өнгө аяс бүхий гомдол цөхрөлийг хашхирсан ч, энэхүү сэтгэлийн хөдөлгөөнөө нуулгүйгээр, илэн далангуйгаар илчилсэн нь түүнд эмчилгээ болж, Эзэний өмнө ч худал хуурмаг бус үнэн төрхөөрөө байсны улмаас зөвтөд тооцогдож сэргэлт ивээлийг авсан нь дараагийн шүлэглэлээс харагддаг.

“Миний зовлон болон тэнүүчлэлийг, агь ба гашуудлыг санаач. Миний сэтгэл үнэхээр дурсан санаж, миний дотор бөхийсөн байна. Үүнийг би оюун бодолдоо дурсан саналаа, тиймээс надад найдвар бий. Эзэний хайр энэрэл үнэндээ хэзээ ч дуусахгүй. Учир нь Түүний өршөөл хэзээ ч унахгүй. Тэдгээр нь өглөө бүр шинэ юм. Таны итгэлтэй байдал агуу ажээ. Эзэн бол миний хувь юм гэж сэтгэл минь хэлж байна. Тийм учраас би Түүнд найддаг.” (Иер. гаш. 3:19-24) гэсэн байдаг.

Шүлэгч маань бүрмөсөн эргэсэн байгаа биз. Тэгэхлээр Бурхан өөрчлөгдсөн гэсэн үг үү? Аль эсвэл Иеримиаг тойрон хүрээлж байсан хүнд бэрх нөхцөл байдал сайжрав уу? Аль нь ч биш. Гагцхүү Бурханы талаархи ойлголт, мэдрэмж нь өөрчлөгдөж дагаад бас сэтгэл хөдлөл нь сайн тал руугаа өөрчлөгдөж байна.

Танд үнэндээ хүрээлэн байгаа орчин нөхцөл, үйл явдалын өрнөл нөлөөлхөөс илүүтэй, тэдгээрийг та хэрхэн тусгаж, хүлээн авч байгаа тань хүчтэй нөлөөлдөг. Амьдралд тань тохиолдож буй болгон таны хэн бэ гэдгийг тань тодорхойлохгүй. Харин та ямархуу хариу үйлдэл үзүүлж байгаа тань л таны хэн болохыг тодорхойлно.

Үнэн хэрэгтээ бид сэтгэл хөдлөлөө маш бага хянадаг. Харин бид бодол санаагаа илүүтэй хянаснаас болоод, ухамсартай бодол санааны үр дүн болсон хуурамч илэрхийллүүд, бидний чин сэтгэлийн сэтгэл хөдлөл, хариу үйлдэлийг гажуудуулж, хуурамч дүрийг эсгэдэг.

Тиймээс ч оюун санаандаа Бурханы талаархи зөв мэдлэг, мэдээллийг гүн бат суулгах нь маш чухал. Тэгээд амьдрал, хувь заяагаа Түүний л байр суурь, хараагаар харж амьдрах хэрэгтэй. Тэгвэл таны, үйл явдал өрнөлийг, орчин нөхцөлийг буруугаар хүлээн авч, бас буруу сэтгэлийн хөдөлгөөнөөр буруу хариу үйлдэл үзүүлдэг дотоод мөн чанар тань шинэчлэгдэнэ.

Үнэн зөв, эрүүл, тэнгэрлэг сэтгэл хөдлөл нь, хариу үйлдэл нь байнгын залбирал гуйлт, дасгалжуулалт, Үгийн мэдлэг болон Эзэнтэй нөхөрлөсөн хувийн дотно нөхөрлөл, танин мэдэхүйгээс дүр төрхөө олдог. Христ дотор сайтар төлөвшөөгүй сэтгэл хөдлөлдөө автвал, амьдрал тань бас л тийм тогтворгүй, найдваргүй болно.

Сэтгэл хөдлөлийнхөө анхааруулсан дохиог хэрэгсэхгүй байж болохгүй. Жирийн эрүүл ямар ч хүн өвдөлтөнд дургүйцэн ханддаг. Харин та өвдөлт мэдрэхгүй байвал ямар нэгэн гэмтэл эсвэл халдвар авч, нэг зүйл доголдсоны шинж. Сэтгэл хөдлөл бол таны дотор юу болж буйг дохиологч Бурханы луужин юм. Тэдгээр нь сайн муу аль нь ч бай, тэр ч бүү хэл ёс журамгүй ч бай, таны хувь чанарын нэг хэсэг юм.

Хэрвээ та өршөөл хайр, үзэн ядалт, баяр баясал, уйтгар гуниг, урам зориг, дарамт шаналал, амар тайван, эсвэл сандрал түгшүүр гэхчилэн сэтгэл хөдлөлд хойрго, удаан, мэдрэмжгүй байвал, таны зүрх хаалттай, хатуурч байгаа юм биш биз? Эзэнд хандаарай. Ухамсартай бодол санааны зүгээс сэтгэл хөдлөлд хариу өгөх хэд хэдэн арга байдаг.

Сэтгэл хөдлөлөө хорих арга:       Дотоодод нь юу болж буй нь үл мэдэгдэх, гадаад нөлөөлөлд ямар хандлагаар хариу үйлдэл үзүүлж буй нь нууцлагдмал хүмүүс ихэнхдээ дүр эсгэгчид бөгөөд, “цагаанаар будсан булш” байх магадлалтай. Тийм хүмүүс сэтгэл хөдлөлөө дарж булшлан, үүссэн асуудлыг шийдхээс үргэлж хойш суудаг. Есүс Эзэн хэзээ ч сэтгэл хөдлөлөө нуун дарж байгаагүй.

Тэрээр Лазарыг үхсэнийг сонсоод уйлж, сүм дотор худалдаа хийгсэдийг зэмлэж, дагалдагчдынхаа бүтэлгүйтэлд дургүйцэж, эмэгтэйгийн тослолтонд талархаж, цовдлогдохынхоо өмнөх шаналгааг ч ил тодоор гаргаж байсан. Сэтгэлийн хөдөлгөөнөө бүү дар. Энэ нь танд болон эргэн тойрныхонд тань далдуур, урт хугацааны хорон нөлөөг үзүүлдэг. Хамгийн гол нь Бурханы ажилд зүрх сэтгэл тань хаалттай байж, Бурхан та хоёрын харилцаанд хана хэрэм болсоор байдаг.

Сэтгэл хөдлөлөө дэлбэлэх арга:      Өөр бас нэг зөв бус арга бол, тухайн үеийн сэтгэл хөдлөл, мэдрэмж эмзэглэлээ ямар ч бодлогогүйгээр, хэнд ч хамаагүй гаргах нь юм. Энэ нь таны хувьд, дотооддоо тайвшран чөлөөлөгдөх мэт зарим талаар ашигтай юм шиг байвч, таны эргэн тойрны хүмүүст тань тун ч таагүйгээр хүлээн авагдаж байдаг. Дараа нь та бодлогогүйгээр хэлсэн үг, гаргасан зан аашийнхаа муу үр дагаварыг цайруулах гэж нилээн хүндрэлтэй тулгарна.

“Уурласан ч нүгэл бүү үйлд. Та нарын уур хилэн дээр нар бүү жаргаг.” (Еф. 4:26) гэсэн нь уурлаж болох боловч, харин уураа илэрхийлэн гаргахдаа бодолтой байхыг сануулж байна. “Хайрт ах дүү нар минь, үүнийг та нар мэдэгтүн. Харин хүн бүр сонсохдоо түргэн, ярихдаа удаан, уур хилэндээ хойрго бай. Учир нь хүний уур хилэн Бурханы зөвт байдлыг биелүүлдэггүй юм.” (Иак. 1:19, 20) гэсэн нь, дэлбэлэх арга бол өөрт тань болон Эзэнд тааламжтай биш ба Бурханыг алдаршуулахгүйг зааж байна.

Бидний уурыг бадрааж, хилэнг өдөөдөг олон тохиолдол учирдаг. Уурласан мөртөө гэм үйлдэхгүй байхыг хүсвэл, Христийг дуурай. Өөрөөр хэлбэл хүнд нь бус гэм нүгэлд нь уураа гарга. Наймаачдыг бус ширээг нь хөмөрчих. 

Сэтгэлийн хөдөлгөөнөө итгэмжит хүмүүстээ учирлан нээх арга:         Та ууртай, сэтгэлийн шаналгаатай, гомдолтой шархтай байгаа мөртөө амаараа сайн сайхан, болж бүтэж байгаа мэт Бурханд хандан залбирч, бусадтай ярилцан инээвэл Бурханд тааламжтай болов уу? Эсвэл Тэр таны дүр эсгэж байгааг мэдэхгүй өнгөрөх болов уу?

Фарисайчууд зүрх сэтгэлээ үргэлж далдлан гаднаа зөв зохистой, болж бүтэж буй мэт дүр эсгэдэг байсан. Тэд Бурханы өмнө шударга байж чадаагүй. “Та нарын зөвт байдал, фарисайчууд болон хуулийн багш нараас илүү гарахгүй бол та нар тэнгэрийн хаанчлалд орохгүй.” (Мт. 5:20) гэж Эзэн хэлдэг. Түүний өмнө та үнэн сэтгэлээсээ байхгүй л юм бол, та зөвт бус байх болно.

Та хэн хүний өмнө догдлоод, бухимдаад байж болохгүй. Харин цөөн тооны итгэмжтэй хүрээлэлтэй байх нь, тэдэндээ бүхнийг илчилдэг байх нь Библийн арга юм. Есүс хүнд дарамттай, шаналгаатай байх үедээ Гетсэмани цэцэрлэгт Петр, Иохан, Иаков гуравт сэтгэлээ нээж, зовлонг нь хуваалцахыг хүссэн.

Элч Паул, Барнаб, Силас, Тимот нарыг түшиж тулж явсан. Танд, иймэрхүү үнэнч, таныг ойлгож зовлонг тань үүрэлцэж, баяр хөөрийг тань өөрийн мэт хүлээн авдаг ядаж нэг хүн, бүр Библийн дагуу гурван хүн байдаг бол та ямар ивээлтэй вэ? Гэхдээ хамгийн итгэмжит нэгдүгээр хүн тань Есүс Эзэн байгаасай гэж зөвлөе. Түүнд хандан бүхий л сэтгэлээ үнэн зөвөөр илэрхийлж, нээж, Түүний өмнө үнэн төрхөөрөө байж сураарай.

За тэгээд сайтар төлөвшөөгүй хүний сэтгэл хөдлөлд өлсгөлөн ходоод, бие махбодийн ядрал, элдэв өвчлөлүүд, сексийн хүсэл, агаарын хэм, жирэмсэний үе, сарын тэмдэгийн үе гэхчилэн олон гадны болон бие махбодийн хүчин зүйлсүүд нөлөөж байдаг ба энэ бүгдэд хамгийн сайн Туслагч, Багш, Удирдагч, Тайвшруулагч бол Есүс Эзэн билээ.


 Неил Т. Андерсоны "Харанхуйг гэтлэхүй" номын 10-р бүлгээс хийсэн товчлол...

6. Оюун санааныхаа зөрчил тэмцэлийг ялан дийлэх нь

Хүмүүс бид амьдралыг зөвөөр танин мэдэж, хувь заяагаа ухамсартайгаар хөтлөн удирдахыг хичээдэг. Харин Бурхантай хамт явахын гол шалгуур нь ухамсар биш, итгэл юм. Ихэнхдээ энэ хоёр нь харшилддаг. Гэхдээ энэ нь, Бурхан биднээс ухаж ойлгохгүй, бодож сэтгэхгүй, сохор итгэлийг шаардаж байдаг гэсэн үг биш. Харин ч эсэргээрээ Бурхан биднээс эрэгцүүлэн бодож, ухамсартайгаар шийдэж, хариуцлагатайгаар сонгохыг хүсэн хүлээж байдаг.

Бидний Эзэн бол асар ухаалаг, торгон мэдрэмжтэй Бурхан бөгөөд, бидний оюун санааны чадвар боломжийг харгалзан, итгэлд тулгуурлан ажлаа явуулдаг. Хүмүүний сэтгэлгээний чадвар боломж нь хязгаартай. “Тэнгэр нь газраас өндөр байдаг шиг, Миний зам та нарын замаас, Миний бодол та нарын бодлоос өндөр билээ.” (Иса. 55:9), гэсэн байдаг. Хүн төрөлхтөн өөрсдийн ухаан бодлоор, Бурханы бодол санааг танин мэдэх чадваргүй. Тиймээс ч Бурханы илчлэлтээс хамааралтай байдаг.

Танд, Бурханы зам, удирдамж нь хэзээд зөв байдаг гэдэгт итгэх таны итгэлээр болон тэдгээрт нь таны дуулгавартай захирагдах байдлаар тань тодорхойлогдох (А) төлөвлөгөө байна гэж үзье. Бас өөрийнхөө хязгаарлагдмал оюун санаагаараа удирдуулж, өөртөө найдсан байдлаар тань тодорхойлогдох (Б) төлөвлөгөө ч бас таны халаасанд байж байдаг. Нэгэн итгэгч бүсгүй “Би энэ гэрлэлт зөв эсэхийг мэдэхгүй байна. Бүтэлгүйтэж ч магад. Тиймээс ч цаашдынхаа амьдралыг одооноос бодож, тооцоолж байсан нь дээр...” гэсэн бодолтой байна. Энэ нь (Б) төлөвлөгөө юм.

Гэтэл Бурханы зүгээс, нөхөр эхнэр хоёр нь насан туршдаа үнэнчээр хамтдаа амьдрах нь зохистой, гэсэн зарчимыг илчилдэг. Энэ бол бүх эмэгтэйчүүдэд зориулсан (А) төлөвлөгөө юм. Хэрвээ бүсгүй хэдийгээр (А) төлөвлөгөөг мэддэг ч гэсэн, өөрийн халаасны (Б) төлөвлөгөөнд ач холбогдол өгөөд, нухацтай бодож эхэлбэл, (А) төлөвлөгөөгөөр дамжин өгөгдөх бүхий л сайн сайхан амлалт, ерөөлүүдээс нь хорогдоод эхэлнэ.

Ихэвчлэн хүмүүс (А) төлөвлөгөө л сайн гэж ярьдаг, мэддэг боловч, бүтэлгүйтвэл амиа авч гарах (Б) төлөвлөгөөг халаасандаа хадгалсаар л байдаг. Тэгээд (Б) төлөвлөгөөг эргүүлж тойруулан бодсоор, түүнийхээ дагуу алхам хийж эхэлдэг. Хүн амьдралаа хэрхэн авч явах талаархи өөрийнхөө төлөвлөгөөнд хэдий чинээ цаг зав, хүч хөдөлмөрөө зарцуулна, төдий чинээ Бурханы төлөвлөгөөг олж харах, ашиг шимийг нь хүртэх боломжоо алдсаар байх болно. “Тэр хүн хоёр санаа өвөрлөгч бөгөөд бүх үйлдээ тогтворгүй байдаг юм.” (Иак. 1:8), гэж Сударт айлддаг. Та энэ хоёр замын хооронд гуйвж дайвах тусам таны сүнсний өсөлт зогсонги болж, өдөр тутмын амьдралдаа урамгүй, ялагдсан нэгэн болж хувирдаг.

(Б) төлөвлөгөө хаанаас бий болдог вэ?            1-рт: Ариун Сүнсээр дахин төрөхөөс өмнөх он жилүүдийн турш хэвшсэн, хуучин бодол санаанууд, дадал зуршилууд нь (Б) төлөвлөгөөний эх үүсвэр юм. Энэ нь Бурхангүйгээр бүх зүйлийг шийдэж, хийж сурсан нэгэн хувь (хүн) оршигч гэж үзэж болно. Тэр (хүн) оршигч бол та биш. Харин Сүнсээр дахин төрсөн нэгэн нь Бурханаас төрж, тэнгэрээс бууж ирсэн цоо шинэ хүн бөгөөд, жинхэнэ та мөн.

Харамсалтай нь олон хүн тэрхүү хуучин оршигчийг өөрийгөө гэж бодож, итгэж, шаардасныг нь дуулгавартай дагадаг. Тэр оршигч бол таныг дээрээс төрөх үед үхчихсэн нэгэн шүү дээ. Тэгэхлээр та үхсэн нэгэнд хөтлөгдөн явдаг гэсэн үг. Харин шинэхэн, амьд, жинхэнэ хүн чинь (А) төлөвлөгөөний дагуу, Бурханаас хамааралтай амьдрахыг шаардаад байдаг.

2-рт: Бүр Эден цэцэрлэгийн үес л Бурханы ажлыг эсэргүүцэгч нэгэн нь, энэ дэлхий дээр идэвхийлэн ажиллаж байдаг. Сатан болон түүний албат болсон муу ёрын сүнснүүд, таны бодол санааг өөрсдийн атгаг хорон бодлын мессежээр үймүүлж, итгэлээс тань унагахыг байнга оролддог. Тэд санаа бодолд тань сөрөг муу зүйлсийг шившиж, эргээд дэлхийн амьдрал руу чангаадаг. Үнэндээ (А) болон (Б) төлөвлөгөөний хоорондын сөргөлдөөнд хэн нь ялахыг шийдэх эрх танд л байдаг.

Оюун санаанд тань болж буй тэмцэл тулааны тухай таны зайлшгүй мэдэж байх ёстой зүйл бол, энэ нь хүн төрөлхтөний арга ухаан, ур чадвар, мэдлэг боловсролын талбар дээрхи тэмцэл тулаан огт биш юм. Та өөрийнхөө хүчээр, арга залиар, овжин сэргэлэн байдлаар хуучин оршигч болон, муу сүнснүүдийг дийлж чадахгүй. Хэрэв та ялахыг хүсч байвал “агуу хүч чадал”-аар зэвсэглэх ёстой.

Сударт, “Учир нь бид махан бие дотор алхдаг боловч, махан биеийн дагуу дайтдаггүй. Учир нь бидний байлдааны зэвсэг бол махан биеийнх биш, харин цайзуудыг эвдэж нураах Бурханы хүчит зэвсгүүд юм. Бид цэцэрхэл болон Бурханы мэдлэгийн эсрэг босогч аливаа өндөрлөг зүйлийг устгаж, ямар ч бодол санааг Христийн дуулгавартай байдалд олзлуулдаг.” (2 Кор. 10:3-5), гэж маш оновчтой томъёолсон байдаг.

Тэгэхлээр бидний устгах ёстой гол бай бол, “бат цайз”-ууд байх нь. Эдгээр нь он жилүүдийн турш хатуурч хэвшсэн, эсвэл нэг удаагийн онцгой хямралын улмаас бий болсон, бидний оюун санаанд шингэсэн сөрөг эсвэл бүр “эерэг” бодлууд юм. Энэ дэлхий дээрхи хүмүүсийн үнэлгээний дагуух муу, муухай гэгддэг зүйлсээс гадна бас сайн сайхан гэгддэг олон зүйлс, тэнгэрээс бидний Эзэний буулгаж өгдөг шинэ амьтай зөрчилддөг.

Хүн дахин төрөөгүй байх үедээ, энэ дэлхийн амьдралд тэсч үлдэх, асуудлыг хэрхэн давж гарах зэрэгт өөрийн гэсэн, Бурханаас ангид философитой болчихсон байдаг. Хэдийгээр дахин төрж шинэ хүн болсон ч эргэн тойронд тань, ахуй амьдралд тань бурханлаг бус нөлөөллүүд байсаар л байдаг.  Асар олон төрлийн цайзууд бат бэхээр бидний зүрхэнд авташгүй мэт сүндэрлэж байдаг.

Гэвч тэдгээр нь таны чин сэтгэлийн залбирал гуйлт, Эзэний үгийн хүч чадал, эрх мэдлийн өмнө, загалмай дээр урссан Христийн ариун цус, үхлийг ялсан ялалтын өмнө цаасан байшин адил юм. “Энэ үеийн явдалд бүү нийцэгтүн. Харин зүрх сэтгэлээ шинэчилснээр өөрчлөгдөж Бурханы хүсэл юу болохыг, тухайлбал сайн, тааламжит, төгс төгөлдөр хүслийг батлагтун.” (Ром 12:2) гэж цайзуудыг нураах аргыг Судар заадаг.

Дайсагнал гэсэн цайз байдаг.    Хэрвээ та аливаа маргаантай асуудалд омголон ширүүн хандаж, хүчээр, хэрүүл тэмцэлээр асуудлыг шийдэх дуртай бол, ийм л замаар асуудлыг давж сурсантай холбоотой. Харин Эзэн, дайснаа хүртэл хайрла, гэж сургадаг.

Өөрийгөө дорд үзэх нь ч бас цайз юм.    Энэ нь олон жилийн басамжлал, хувийн бүтэлгүйтэл зэргээс үүсэлтэй юм. Харин Сударт, таныг Бурханы үр юм гээд, хэн ч таныг дорд бүү үзэг, гэсэн байдаг.

Элдэв башир, булхай аргаар бусдыг өөртөө ашигтайгаар хөдөлгөх нь, ижил хүйстнүүдийн гаж харилцаа нь, хоолны дуршил багасах буюу ихсэх нь ч, шавьжнаас, замын хөдөлгөөнөөс, хоол унднаас гэхчилэн олон зүйлээс айж сэжиглэх нь, зэрэг маш олон цайзууд байдаг. Эдгээр цайзууд нь Бурханы мэдлэгийн эсрэг бодлуудыг улам лавшруулдаг тул, Бурхан бол хайрын Эцэг, би Түүний хайртай хүүхэд гэдгийг мэдэж, хүлээн зөвшөөрхөөс эхлэн тэмцэлийн гараагаа эхлүүлэх хэрэгтэй.

“Гэвч могой залиараа Еваг мэхэлсэн шигээ Христ рүү хандсан цэвэр, энгийн байдлаас та нарын санаа бодлуудыг төөрүүлчих вий гэхээс би айж байна.” (2 Кор. 11:3), “Ингэсэн нь биднийг Сатан мэхэлж далимдуулах вий, гэсэндээ юм. Учир нь түүний хөнөөх санааг бид ямар мэдэхгүй биш.” (2 Кор. 21:1) гэх зэрэг сэрэмжлүүлэгээс харах юм бол Бурханы болон бидний дайсан бодит нэгэн байдгыг өгүүлж байна.

Сатан таны тархинд ямар нэгэн бодол санааг оруулж дөнгөх л юм бол, түүнийг таны өөрийн чинь бодол гэж итгүүлж хуурах нь тийм ч хэцүү биш. “...Учир нь түүнд үнэн байдаггүй. Тэр худал хэлэхдээ, чухам өөрөөсөө хэлдэг. Учир нь тэр худалч бөгөөд худал хуурмагийн эцэг нь юм.” (Иох. 8:44), гэж Эзэн сатаны мөн чанарыг тодорхойлсон. Бидний бодол бүр Христэд дуулгавартай олзлуулахгүй бол тэр хэмжээгээр сатанд боломж өгдөг бөгөөд, ингэж хуурахаас өөрөөр түүнд биднийг захирах ямарч хүч байхгүй. Нэгэнт л түүний гол зэвсэг нь худал хуурмаг, заль мэх юм бол бидний сөргүүлэн барих зэвсэг нь үнэн юм.

Энэ тулаан нь мэдлэг болон туршлага, эсвэл авъяас чадварын тулаан биш үнэнээр үзэлцэх, үнэнийг дээдлэх тэмцэл юм. Үнэнийг илчлэн ярьж, гэмээ улайж, бас хамгийн гол нь Эзэний үгийг хичээнгүйгээр нухацтай судлан, зүрхэндээ үргэлж тунгаан бясалгаж, амьдралдаа хэрэгжүүлэх нь шинэ хүнийг тань бүрэн хүчирхэгжүүлдэг бөгөөд ялалтыг баталгаажуулдаг.

“Би Танаас тэднийг ертөнцөөс аваач гэж гуйхгүй, харин тэднийг муугаас хамгаалаач гэж гуйж байна. Би ертөнцийнх биш адил, тэд бас ертөнцийнх биш. Үнэн дотор тэднийг ариусгаач. Таны үг бол үнэн мөн.” (Иох. 17:15-17), гэж Есүс бидний төлөө залбирдаг.


Неил Т. Андерсоны "Харанхуйг гэтлэхүй" номын 9-р бүлгээс хийсэн товчлол...

5. Зөв удирдамж заавар амьдралыг зөв зам руу хөтөлдөг

Сатаны зорилго нь, таны сүнсийг харанхуйн хүчин дор гинжилж, сэтгэл санааны хямралтай байлгаснаар таны итгэлийг будлиулж, самууруулах нь юм. Таныг Бурханы хүүхэд болох тэр үед л, тэр таныг үүрд алдсан юм. Гэвч тэр таны оюун санааг булингартуулж, итгэлийг тань сулруулж чадах аваас, Хаанчлалын төлөө хийж буй ажлын тань үр ашигыг бууруулж, өсөлт төлөвшилийн хувьд зогсонги нэгэн болгож чадна.

Бурхан биднийг амжилтаар дүүрэн, цэнгэл жаргалтай байлгахыг хүсдэг. Гэхдээ амжилт, ач холбогдол, бүрэн дүүрэн байдал, сэтгэл ханамжтай байдал, цэнгэл жаргал, баяр баясал, аюулгүй байдал, амар тайвны талаархи таны ойлголтууд гэмт дэлхийн дагуу бус, харин Бичээст үндэслэсэн байх нь, сүнсний тань төлөвшилтөнд маш чухал.  

Амжилтын гол цөм нь зөв зорилго: 
Амжилт зорилгоос шууд хамаарна. Хуучин хүний дагуух, дэлхийлэг гэмт хүсэл зорилгоо хаялгүйгээр Эзэнээр ерөөгдөнө гэж үгүй. Амжилтын талаархи таны хэвшмэл бодол санаа ч үндсээрээ өөрчлөгдөх ёстой. Бидэнд зориулсан Бурханы зорилгын талаар болон бурханлаг амжилтын тухай хамгийн зөв сайн дүгнэлтийг (2 Пт. 1:3-10)т өгүүлсэн байж болох юм.

“Өөрийнхөө алдар ба давуу чанараар биднийг дуудсан Түүний жинхэнэ мэдлэгээр дамжуулан, Түүний бурханлаг хүч бидэнд амь болоод сүсэглэлд хамаатай бүхнийг соёрхсон. Эдгээрээр дамжуулан Тэр бидэнд үнэтэй бөгөөд гайхамшигт амлалтуудаа соёрхсон. Ингэснээр та нар энэ дэлхийд тачаалаар байх ялзралаас ангижирснаар бурханлаг мөн чанарын хуваалцагч болох юм. 

Яг энэхүү шалтгааны улмаас та нар бүхий л хичээл зүтгэлээр, итгэл дээрээ сайн давуу байдлыг, сайн давуу байдал дээрээ мэдлэгийг, мэдлэг дээрээ өөрийгөө захирах байдлыг, өөрийгөө захирах байдал дээрээ тэвчээрийг, тэвчээр дээрээ сүсэглэлийг, сүсэглэл дээрээ ах дүүсэг энэрлийг, ах дүүсэг энэрэл дээрээ хайрыг хамтатга. Хэрэв та нарт эдгээр чанарууд байгаа бөгөөд улмаар нэмэгдсээр байвал, эдгээр нь бидний Эзэн Есүс Христийг мэдэхэд та нарыг үр ашиггүй, үр жимсгүй байлгахгүй. 

Эдгээр чанаруудаар дутагддаг хүн бол урьдын нүглүүдээсээ цэвэршсэнээ мартсан, сохор эсвэл богино бодолтой нэгэн юм. Тиймээс ах дүү нар аа, Түүний та нарыг дуудан сонгосныг батагахын тулд бүр ч илүү хичээнгүй бай. Учир нь та нар эдгээрийг үйлдэж л байвал хэзээ ч бүдрэхгүй.”

Энд таны төлөө аль хэзээний хийчихсэн зүйл дээр үндэслэж Бурханы зорилго эхэлж байгааг анзаарна уу. Танд амьдрал болоод итгэл бишрэлийг өгсөн Христийн зөвтгөл аль хэзээний болоод өнгөрчихсөний дээр, ариусах явц ч мөн л аль хэдийнээ эхэлчихсэн шүү дээ. Та бурханлаг шинж байдлыг хуваалцагч бөгөөд, гэм нүгэл үхсэн ба та түүнийг даван туулчихсан. Хичнээн сайхан гараа вэ? Гэтэл хичнээн олон хүн энэхүү зөвтгөл, уучлалыг хайн үргүй хоосон бэдэрдэг гэж санана.

Харин одоо өндөр ёс суртахуун, өргөн мэдлэг, өөрийгөө захирдаг, тэвчээртэй, итгэл бишрэлтэй, ах дүүстээ элгэмсэг байх зэрэг бурханлаг зан чанарт хичээнгүй суралцаж, амьдралдаа хэрэгжүүлэх нь таны нэн тэргүүний зорилго юм. Мөн эдгээр зан чанаруудыг байнгын хэрэглээ болгосноор, таны амьдрал үр дүнтэй, итгэлийн үр жимсээр дүүрэн байхаас гадна, хэзээ ч бүдрэхгүй гэж Судар амлаж байна. Энэ чинь л жинхэнэ амжилт шүү дээ.

Энэхүү жагсаалтанд авъяас билэг, ур чадвар, боловсрол мэдлэгийн талаар огт дурдаагүйг анзаарсан биз дээ. Тэдгээр нь таны гол зорилго биш, бас амжилт гэж тооцогдохгүй. Бас хүн бүрт тэгш заяагддаггүй. Харин Сүнсний (бурханлаг) зан чанарууд нь хүн болгонд харамгүйгээр тэгш хувиарлагдсан ба, хүлээн авагч хүний зүтгэлээс шалтгаалан их, бага байдаг.

Израилийг Канаан руу амжилттай удирдан оруулсан Иошуад Бурхан “Тууштай бөгөөд зоригтой байгтун. Миний зарц Мосегийн чамд тушаасан бүх хуулийг сахин биелүүлэхэд анхаарал тавь. Хаа явсан газраа амжилт олохын тулд, түүнээс баруун тийш ч, зүүн тийш ч бүү хазай. Хуулийн энэ номыг амнаасаа салгалгүй, харин түүн дотор бичигдсэн бүхнийг сахин биелүүлэхээр өдөр шөнөгүй түүнийг бясалгаж яв. Тэгвэл чи хөгжин дэвжиж, амжилтанд хүрнэ.” (Иош. 1:7, 8), гэж бас хэлсэн. Танд зориулсан Бурханы зорилгыг хүлээн зөвшөөрч, дуулгавартай дага. Дуулгавартай байдлыг зорилгоо болговол амжилт улам баталгаатай байх болно.  

Ач холбогдол нь цаг хугацаагаар тодорхойлогдоно:
Цаг хугацаа өнгөрхөд мартагдаж буй зүйл бол ач холбогдол багатай зүйл байсных. Харин үргэлж дурсан санагдаж буй зүйл нь агуу ач холбогдолтой зүйл юм. “Хэрэв хэн нэгний ажил эцсийн өдөрт үлдвэл, тэр хүн шагналаа хүлээн авна.” (1 Кор. 3:14). Бид мөнхийн баялагыг цуглуулах чухал ажил гүйцэтгэж буй хүмүүс. Есүсийн төлөө хийж буй ямар ч үг, ямар ч ажил одоохондоо онцын ач холбогдолгүй мэт харагдавч, үнэндээ үүрд мөнх үлдэх нигууртай.  

Бүрэн дүүрэн байдлын гол нь, хамгийн чухал ажлаа барьж авах:
“Хүн бүр хүлээн авсан бэлгээрээ бие биедээ, Бурханы олон төрлийн нигүүлслийн сайн нярвууд шиг үйлчил.” (1 Пт. 4:10). Хэрэв та өөрт байгаа ганц ч болов билэг авъяасаа нээн, түүнийгээ сайн мэдээний үйлчлэл болгон ашиглаж, Эзэнийг алдаршуулах аваас амьдрал тань бүрэн дүүрэн байх болно. Бурхан хүн нэг бүрт үйлчлэлийн онцгой талбар бэлдсэн байдаг.

Таныг хэн ч орлож чадахгүй тэрхүү талбар болон үүргийг олж хараад, чин сэтгэлээсээ үүргээ биелүүлэх шаардлагатай. Та дэлхийн 7 н тэрбум хүний дунд давтагдашгүй цор ганц бөгөөд гэр бүлдээ нөхөр, аав, ээж, эхнэр, эцэг эх болон үр хүүхэд гээд таныг хэнээр ч орлуулшгүй юм. Бурханы үйлчлэлийг хийхээр онцгойлон дуудагдсан талбар бол гэр бүл тань шүү. Цаашилбал таны ажлын болон сургуулийн тань хамт олон дундаа та цор ганц бөгөөд тэндээс ургац хураах Бурханы ажилчин нь та мөн.  

Сэтгэл ханамжийн цөм нь чанар чансаа: 
Хэн нэгэнд эсвэл ямар нэгэн зүйлд сэтгэл хангалуун бус байх нь тухайн хүн, эсвэл үйлчилгээ, бараа бүтээгдхүүний чанар муутай холбоотой. Сэтгэл ханамж нь тоо хэмжээний тухай бус, чанарын тухай асуудал юм. Олон зүйлийг замбараагүй, хуумгай хийснээс цөөн зүйлийг чанартай сайн хийвэл, та сэтгэл хангалуун байх болно.

Хувь хүний сэтгэл хангалуун байдал нь эрх мэдэл, нөлөөлөлөө тэлэх нь биш, харин тодорхой зүйлийг чанартай хийхэд оршино. Энэ нь хүмүүс хоорондын харилцаанд ч мөн адил. Өнгөц олон найзтай, олон танилтай байснаас, халуун дотно цөөн хэдэн найз үнэ цэнэтэй.  

Цэнгэл жаргалын утга учир нь, хэн байгаадаа болон юутай байгаадаа талархалтай байх нь юм: 
Цэнгэл жаргалын талаархи энэ дэлхийн хэвшмэл ойлголт бол хүсч буй бүхнээ олж эзэмших явдал юм. Харин Бурханыхаар бол, өөртөө байгаа зүйлээ хүсэмжилж байгаа хүн нь цэнгэл жаргалтай нэгэн юм. Хүн өөрт байхгүй зүйлдээ хэдий их тэмүүлнэ, төдий чинээ жаргалгүй байх болно.

Цэнгэл жаргалтай байлгах бүхий л зүйл өөрт тань байдаг. Өөрт тань өгөгдсөн зүйлсийн үнэ цэнийг нь мэдэж, эрхэмлэж, бас тэдгээрийнхээ төлөө талархаж сурвал, та жаргалтай хүн болно. Байхгүй зүйлдээ бүү шунан тэмүүл. “Харин сүсэглэл ба сэтгэл хангалуун байдал нь хамтдаа байвал энэ нь агуу ашиг мөн. Учир нь бид энэ ертөнцөд юуг ч авчраагүй. Мэдээж бас эндээс юу ч авч гарч чадахгүй. Хэрэв бидэнд хоол хүнс, хувцас хунар байвал эдгээрээр бид сэтгэл хангалуун байх болно.” (1 Тим. 6:6-8)  

Баяр баясгалангийн цөм нь эрх чөлөө: 
Баяр баясгалан бол хүлэгдмэл байдлаас чөлөөлөгдсөнөөр аяндаа бий болдог зүйл. Баяр баясалын гол саад нь, нэр нүүрээ хадгалах гэж өөрийгөө хорьдог махан биеийн хандлага юм. Бид хэн нэгэнд илүү харагдах, бусдад дорой харагдах дургүй учраас, олон нийттэй нийцэх гэж хуурамч дүр эсгэн, биеэ их барьдаг.  

“Учир нь би хүмүүсийн тааллыг эрж байна уу? Эсвэл Бурханы тааллыг уу? Эсвэл би хүмүүсийн сэтгэлд нийцүүлэхийг оролдоно уу? Хэрэв би эдүгээ хүртэл хүмүүсийн сэтгэлд нийцүүлсээр байсан бол, би Христийн боол биш байх байсан.” (Гал. 1:10). Та хүмүүст таалагдах гэж хичээж байснаас Бурханд таалагдах гэж хичээвэл илүү их баяр хөөртэй амьдарна.  

Аюулгүй байдалын цөм нь ганхашгүй найдвартай зүйлд түшиглэсэн байх: 
Аюулгүй байдал зөвхөн мөнх зүйлээс л ирдэг. “Би тэдэнд мөнх амийг өгнө. Тэд хэзээ ч мөхөхгүй бөгөөд тэднийг хэн ч Миний гараас булаахгүй.” (Иох. 10:28). “Хэн биднийг Христийн хайраас салгах юм бэ? Гамшиг уу, зүдрэл үү, хавчлага уу, өлсгөлөн үү, нүцгэн байдал уу, аюул уу, илд үү?...” (Ром 8:35). 

“Түүний дотор та нар ч бас үнэний үгийг буюу та нарын авралын сайн мэдээг сонсосны дараа, мөн Түүнд итгээд, амлалтын Ариун Сүнсээр тамгалагдсан байв. Тэр нь Бурханы эзэмшилийн золилт хүртэл бидний өвийн батлан даагч болж Түүний алдарыг магтуулхын тулд өгөгдсөн юм.” (Еф. 1:13-14), гэж Судар айлдсан.

Үүнээс илүү баталгаатай аюулгүй байдлыг та хаанаас, хэрхэн олж авах вэ? Түр зуурын үнэлэмж ба харилцаа нь ихэнхдээ бүтэлгүй тул, та тиймэрхүү зүйлд итгэвэл үргэлж эрсдэлтэй, аюултай нөхцөлд байна гэсэн үг. Харин бурханлаг үнэлэмж ба харилцаанаас гардаг олон сайхан ашиг тус, үр дүнгүүдийн нэг бол жинхэнэ аюулгүй байдал ба энэ нь мөнх байна.  

Амар тайван байдлын гол цөм нь дотоод зөрчлийн төгс сайн шийдэл юм:
Бурханы амар тайван нь танд аль хэдийнээ өгөгдчихсөн зүйл. “Тиймээс итгэлээр зөвтгөгдсөн бид, бидний Эзэн Есүс Христээр дамжуулан Бурхантай эвлэрсэн билээ” (Ром 5:1). Үүнийг ямар нэгэн хичээл зүтгэлээр олж авдаг юм биш, харин дахин төрөх үедээ та хүлээн авсан. Бурханыг эсэргүүцэх эсэргүүцэл тань аль хэдийнээ өнгөрсөн бөгөөд, таны дотоод ертөнц Бурханы амар тайвантай үүрд хамт байх болно.

Гадаад ертөнцийн ширүүн шуурган дунд өдөр тутам, цаг мөч бүр дотоод ертөнцдөө хүлээн зөвшөөрч байх хэрэгтэй зүйл бол Бурханы амар тайван юм. Гадаад ертөнцийн эмх замбараагүй бужигнааныг та тэр бүр хянан зохицуулж чадахгүй. Харин Бурханы амар амгалангаар зүрх сэтгэлээ удирдуулж чадвал, та өөрийн сэтгэл хөдлөл, мэдрэмжүүд, бодол санаагаа хянан зохицуулж, хорон муу нөлөөнд авташгүй, ганхашгүй байж чадна.


Неил Т. Андерсоны "Харанхуйг гэтлэхүй" номын 8-р бүлгээс хийсэн товчлол...