ХРИСТИЙН ЗОВЛОН 7

3) Сударыг биелүүлэхийн тулд

         

            а.  Эвлэрлийн төгс тахил болох   

Христийн зовлонгийн нэг, магадгүй хамгийн чухал шалтгаан болон зорилго нь Сударыг биелүүлэх нь юм. Христийн үеийн Израиль дахь Судар нь Хуучин гэрээ бөгөөд, Хуучин гэрээний цөм нь Мосегийн хуулийн номууд юм. Хуулийн нэн чухал гол заалтууд нь тахил өргөлийн хуулиуд билээ. 

Израильчууд ууган хүүгээ золихын тулд, Бурхантай эвлэрэхийн тулд, гэмийн уучлалд зориулж, гэх мэт олон зорилгоор тахил өргөдөг байсан. Гэхдээ энд анхаарах нэг зүйл нь хүнийг өргөл тахил болгохыг хуульчлан хориглоод (Лев.20:2-4, Дх.18:9-10), хэрвээ ийм тохиолдол гарвал, тухайн хүнийг тавин шекел мөнгөөр золин (Лев.27:1-8) чөлөөлөх тухай заасан байдаг.  

Гэтэл энэ хориг болон заалт нь Есүсийн хувьд огт эсрэгээрээ эргэсэн нь тун гайхмаар юм. Хэрвээ үйл явдлыг хөндлөнгөөс торгон ажиглаж, сүнслэг үнэлэлт дүгнэлт өгөх хэн нэгэн байсан бол (мэдээж байсан нь тодорхой), яав ч энэ хүн Бурханаар хараагджээ (жигшигдсэн, үзэн ядагдсан, орхигдсон, шийтгэгдсэн), гэдэг дүгнэлтэнд хүрэх нь зайлшгүй байлаа.

            Ядаж байхад Түүнийг цаазлахдаа загалмай дээр хадах шийдвэр гаргасан нь хуульд заасан “модон дээр өлгөгдсөн хүн бол Бурханаар хараагдсан болой” (Дх.21:23) гэсэн заалтын биелэл болсон нь, дээрхи дүгнэлтийг улам баталгаажуулах мэт. Тэрээр Өөрөө ч үүнийг хүлээн зөвшөөрч “Хуулийг эсвэл Эш үзүүлэгчдийг хэрэгсэхгүй болгохоор Намайг ирсэн гэж бүү бод. Хэрэгсэхгүй болгохын тулд бус, харин гүйцэлдүүлэхийн тулд Би ирсэн ” (Мт.5:17)

гэж тунхаглаж байлаа.

Бурханы ард түмэн гэмийн уучлалыг авч, Эзэн Бурхантайгаа төгс эвлэрсэн байхын тулд төгс тахил хэрэгтэй байлаа. Тодорхой мөчлөг бүрт өргөдөг малын тахил нь төгс эвлэрүүлэл болж чадаагүйг Израильчуудын түүх харуулдаг.  

Тэгэхлээр Бурхан нүгэлт дэлхий дээр нүгэлгүй ариун Хүүгээ мэндлүүлсэн бас нэг, магадгүй хамгийн чухал, учир шалтгаан ба зорилго нь хуулийн дагуух төгс тахилыг өргөж, ард түмэнтэйгээ эвлэрэх нь юм. 

           Үүнийг тэнгэр элч Габриел ”...Учир нь Тэр Өөрийн ард түмнийг нүглээс нь аварна...” (Мт.1:21), баптист Иохан “Ертөнцийн нүглийг үүрэгч Бурханы Хургыг харагтун “ (Иох.1:29), гэж маш тодорхой тайлбарласан бол, Хуучин гэрээнд Исаакийг тахил болгон өргөхөөр явж байсан Абрахам “...Бурхан Өөрийгөө хургаар хангана” (Эх.22:8), гэж гайхалтайгаар зөгнөн тунхагласан юм.

             Гэм нүгэлтний өмнөөс огт гэм нүгэлгүй өөр хэн нэгэн нь цусаа урсгаж, амиа өргөх нь хүмүүний өнцөгөөс бол яав ч байж боломгүй мунхаглал юм. Харин бидний Эзэн Бурханы ариун төгс зүрх сэтгэл дэх “хайрын шүүлт болон шийдэл” нь энэ байсан юм.

“Учир нь Бурханы мэргэн ухааны тухайд, ертөнц өөрийн мэргэн ухаанаар Бурханыг таньж мэдсэнгүй. Иймд тунхагласан мэдээний мунхаглалаар итгэгчдийг аврах нь Бурханд тааламжтай байсан юм... Яагаад гэвэл Бурханы мунхаглал нь хүмүүсээс илүү ухаалаг, Бурханы мөхөс байдал нь хүмүүсээс илүү хүчирхэг ” (1Ко.1:21, 25).

Ийм гайхалтай тэнгэрлэг авралын арга замыг бодож төлөвлөөд, түүнийгээ Өөрийн биеэр төгс гүйцэлдүүлэхийн тулд аймшигт зовлонг эдэлсэн, бидний Эзэн Есүс Христ алдарших болтугай. 





 UBTC Библийн сургуулийн оюутан С...-ийн бакалаврын зэрэг хамгаалсан дипломын ажилаас... /Үргэлжлэл бий/

ХРИСТИЙН ЗОВЛОН 6

2) Үй олны төгс аврал болохын тулд

“Бид Есүсийг жинхэнэ хүн байсан гэдгийг орхигдуулах, эсвэл үүний хүчийг нь бууруулах нь зохисгүй юм. Энгийнээр хэлвэл, Тэрээр Бурхан байсан боловч гэм нүгэлд унасан дэлхий дээр хүн болон ирсэн тул хүний адилаар зовлон эдлэх нь гарцаагүй байсан юм. “Бурханы Хүүг хүмүүний зовлонгоос чөлөөт байсан хэмээн төсөөлдөг хүмүүс Түүний хүмүүн байсныг жинхэнээсээ хүлээн зөвшөөрдөггүй (Калвин).”[1]

“Есүст хүнд хэцүү даалгавар өгөгдөх тусам, тэр байтугай зовлон шаналал туулах хэрэгтэй болсон үед ч Түүний хүмүүн ёс суртахууны чадвар, дуулгавартай байх чадвар, өмнө нь тулгарах улам бүр хүндрэх нөхцөл байдлын дор өссөөр байсан. Түүний сэтгэлийн хат бэрхшээл зовлонг туулах бүрт улам батжиж байсан гэж хэлж болно.”[2]

“Тэр бүхий л амьдарлынхаа туршид нүгэл үйлдэж байгаагүй, нүгэлгүй Нэгэн байсан. 

 Хэрэв Есүс нүгэл үйлдэж байгаагүй юм бол Тэр хэзээ ч жинхэнэ хүн байгаагүй, яагаад гэвэл хүн бүр гэмтэй гэж зарим хүмүүс үгүйсгэдэг. Гэвч энэ үгүйсгэл нь хүний гажуудан доройтсон одоогийн нөхцөл байдлыг тооцож үзээгүй хэрэг юм. Бурхан биднийг нүгэлт чанартайгаар бүтээгээгүй, харин ариун зөвт байдал дотор бүтээсэн. Адам, Ева хоёр Еден цэцэрлэгт нүгэл үйлдэхээсээ өмнө жинхэнэ хүн байсан.”[3]

Еврей номыг бичигч бидэнд “Есүс нүгэлгүй атлаа бүх талаар соригдсон” тул биднийг бүрэн дүүрэн ойлгож, нигүүлсэн өрөвддөг (Ев2:8,4:15-16). Тэр Өөрөө соригдон зовлон эдэлж байсан тул сорилтод орогсдод тусалж чадна (Ев2:18) гэсэн байдаг. “Есүсийн хүмүүн чанар бидний амьдарлын үлгэрлэн дууриах загвар болдог (1Иох2:6,1Петр2:21). ”[4].

“Олон хөвгүүдийг алдар руу авчрахдаа тэдний авралын Зохиогчийг нь зовлонгоор дамжуулан төгс болгох нь Түүнд зохистой байжээ ( Евр.2:10). “...төгс болгох нь...” энэ нь  Христ ёс суртахууны талаас юм уу, эсвэл сүнсний хувьд төгс болох шаардлагатай байсан гэсэн үг биш юм. Энд үүрэг ролийн тухай яригдаж байгаа бөгөөд Христ хүмүүн байдлынхаа хувьд, үхэл зовлонг тэвчин гарвал  Өөрт нь итгэх хүмүүсийн төгс Аврагч нь болох юм.”[5]

Үүнээс харвал Есүс Христ яг л нүгэлт хүмүүний адил бие махбодь, сүнс сэтгэл санаа, оюун бодол зэрэг бүхий л талаар зовлон эдэлсэн. Христ бидний өмнөөс насан туршдаа хуулийг төгс дагахаас гадна бидний гэм нүглийн шийтгэлийг төлөхөд шаардлагатай зовлонг Өөр дээрээ авсан.

---

[1]Брюс Милн “Үнэнийг мэд” (Улаанбаатар хот:МТӨС, 2005он), 166.

[2]Вейн Грудем “Библийн онол сургаал” (Улаанбаатар хот:Библийн сургалтын төв, 2008он),231.

[3] Вейн Грудем “Библийн онол сургаал” (Улаанбаатар хот:Библийн сургалтын төв, 2008он),231.

[4]Вейн Грудем “Библийн онол сургаал” (Улаанбаатар хот:Библийн сургалтын төв, 2008он),235.

[5]ДональдС.Стампс“БялхамАмь”судлалбибли, УБ: Ариунбичээсбиблийннийгэмлэг, 2004, 2134. 






UBTC Библийн сургуулийн оюутан С...-ийн бакалаврын зэрэг хамгаалсан дипломын ажилаас... /Үргэлжлэл бий/

ХРИСТИЙН ЗОВЛОН 5

В.  Христ заавал зовох ёстой байсан шалтгаан юу вэ? Зорилго нь юу вэ?

     

      1)  Хүмүүний гэм нүглийн улмаас

2) Үй олны төгс аврал болохын тулд

    3) Сударыг биелүүлэхийн тулд

    4)   Эцэгийг алдаршуулахын тулд    

Христ зовсноороо юунд хүрсэн бэ? Тэр яагаад тийм их зовох ёстой байсан бэ? гэдэг нь олон үеийнхний хариултыг нь хайдаг асуулт бөгөөд, бас үл итгэгчдийн бидний эсрэг сөргүүлдэг маргааных нь үндсэн сэдэв юм.

 Үүний хариулт нь ямар нэг шалтгааны улмаас биш зорилгын улмаас байсан, гэж зарим хүмүүс үздэг. Харин би энэ судалгааг хийснээрээ Түүний  зайлшгүй зовох шаардлагатай болсон учир шалтгааныг Библи олон талаас нь ноцтойгоор гаргаж тавьдагийг баттай хэлэх байна. Бас мэдээж тэнгэрлэг агуу зорилгыг ч тодорхой илчилдэг.

Тэгэхлээр Христийн зовлонгийн шалтгаан болон зорилгыг салгаж авч үзэх аргагүй юм. Энэ хоёр нь Библид үргэлж хослон бичигдсэн ба хамтад нь судлан гаргаж ярих ёстой.

1) Хүмүүний гэм нүгэл нь Христийн зовлонгийн нэг шалтгаан. 

Түүнийг баптисм хүртсэний дараа Есүсийг Бурханы Хүү гэдгийг Бурхан Эцэг баталсан байдаг. Тэгэхлээр Бурхан нүгэлт дэлхий дээр нүгэлгүй ариун Хүүгээ мэндлүүлсэн нь ямар учиртай вэ? гэсэн асуулт урган гарна. Харин үүнд тэнгэр элч Габриел ”...Учир нь Тэр Өөрийн ард түмнийг нүглээс нь аварна...” (Мт.1:21), баптист Иохан “Ертөнцийн нүглийг үүрэгч Бурханы Хургыг харагтун” (Иох.1:29), гэж маш тодорхой хариулсан юм.

Үүнээс Түүний зовлонгийн шалтгаан нь хүмүүний нүгэл хилэнц, харин зорилго нь нүгэлтнийг чөлөөлж аврах Эцэгийн хүсэл биелэх нь юм, гэдэг нь тодорхой харагдаж байна.

Эзэн Бурхан ганцхан хүмүүнийг л Өөрийнхөө дүр төрхөөр бүтээж, Өөрийнхөө амь сүнсийг үлээж өгсөн. Тиймээс ч хүмүүсийн нүгэл хилэнц нь хамгийн түрүүнд, хамгийн хүндээр Түүний ариун зүрхийг шархлуулан зовоодог үнэнийг Библийн Хуучин гэрээнд  тодорхой гэрчилдэг ба тэр тусмаа Шинэ гэрээнд Христийн зовлон шаналал илэрхий болгон харуулдаг.

Хүний нүгэл Бурханыг хэрхэн зовоодогийг Христийн зовлон илэрхийлэн харуулдагаас гадна, бас хайр уучлал асар их үнэ өртөгтэйг илчилдэг. Интернетийн олон нийтийн сүлжээнд  “бусдыг хайрлахад ямар ч үнэ өртөггүй тул, зүгээр л бие биеэ хайрлацгаая” гэх  утгатай уриалга нилээн түгээмэл байдгийг би олж уншсан юм.

Харин Есүсийн амьдрал яг үүний эсрэгээр гэрчилдэг. Хайр болон уучлал нь асар их золиослол, зориулалт, үнэ төлөөсийг шаарддаг нь гарцаагүй үнэн юм.

“Учир нь Түүний сэтгэлийн аврал маш их үнэ цэнэтэй бөгөөд түүнийг мөнхөд төлж баршгүй” (Дуу.49:8), гэж Библи хэлдэг. Ийм их, хязгааргүй үнэ өртөгийг төлж, биднийг аварсан Бурханд талархаад баршгүй билээ.  

Тэгэхлээр эндээс бас Эцэг Өөрийн зорилгын төлөө Есүсийг зовоож үхүүлсэн үү? гэдэг асуулт урган гарч болох юм. Уг нь хэн Есүсийг алсан бэ? гэдгээс илүү чухал асуулт бол Бурхан Өөрийн Хүүг үхүүлэхээр илгээснээрээ гэмтнүүдийн төлөө юу хийсэн гэдэг нь гол чухал нь юм.

“Христийн цовдлогдолт нь Бурханы урьдаас тогтоосон үйл явдал байсан хэдий ч энэ нь Бурхан Түүнийг шийтгэж зовоосон гэсэн үг биш. Харин Түүнийг яллан буруутгаж зовоосон нь Иудейн шашны зүтгэлтнүүд ба харийн захирагчдын хамтарсан үйлдэл байсан. Тэдгээр хүмүүс хийсэн үйлдэлдээ хариуцлага хүлээх нь тодорхой ба Бурхан тэднийг өөрсдийнх нь хүслээс ангид зүйл хийхийг хүчлээгүйг санах ёстой.  Эндээс Бурхан, Христийн зовлонг зөвшөөрсөн нь, нүгэлтнүүдийн сонголтоор нь дамжуулан төлөвлөгөөгөө биелүүлсэн нь, үй олны авралын төлөө юм гэдэг нь харагдана.”[1]

“Есүс бидний нүгэл хилэнцээс болж тушаагдсан бөгөөд бидний зөвтгөлийн төлөө амилуулагдсан юм” (Ром.4:25).

UBTC Библийн сургуулийн оюутан С...-ийн бакалаврын зэрэг хамгаалсан дипломын ажилаас... /Үргэлжлэл бий/

---

ХРИСТИЙН ЗОВЛОН 4

Б. Шинэ Гэрээний Сайн мэдээний номуудад Христийн зовлонг гэрчлэн бичсэн нь.  

“Есүсийн амссан зовлон гурван талтай байсныг Бичээс харуулдаг.

1) Насан туршийн хавчлага зовлон.

2) Сэтгэл санааны шаналал зовлон.

3) Загалмай дээрхи бие махбодын зовлон ба үхэл.”[1]

Эдгээр нь нүгэлт хүн төрөлхтөний гэм нүгэлийн улмаас бидний Эзэн Бурханы мэдэрдэг өвдөлтийг харагдах байдлаар илчилсэн юм.

1) Насан туршийн хавчлага зовлон.

Бидний гэм нүглийн төлөө Христийн үүрсэн зовлон нь зөвхөн загалмай дээр л хэрэгжсэн биш юм. Энэ нь Тэрээр төрөхдөө л таагүй тохигүй орчинд мэндэлсэн ба тэр даруйдаа л хавчлага зовлонд өртөж байсан, мөн гэр бүлийнхэн нь ч, дагалдагч нар нь ч, төрсөн хотынхон нь ч, бүх Израиль ч, бүр баптист Иохан ч Түүнд эргэлзэж, итгэлгүй хандаж, урваж шарван, хавчин зовоож байснаар харагддаг. Харин загалмайн зовлон нь дээрх бүх зовлонт замналынх нь оргил байлаа.

Жишээ: Түүнийг бүр эхийн хэвлийд олдсон тухайд нь л эцэг Иосеф нь эргэлзэн сэжиглэж, хардаж сэрдсэн хандлагаар хүлээн авч байлаа (Мт 1:19). Дараа нь төрөх үед нь наад захын аятай тухтай орчин олдохгүйн улмаас малын саравчинд мэндэлж, тэжээлийн тэвшинд хэвтсэн нь Түүний анхны өлгий буюу ор нь байсан юм (Лк 2:5-7).

Есүсийг мэндэлсэн тухай сургийг сонссон Иерусалимчууд баярлах нь бүү хэл бачимдан сандарцгааснаар зогсоогүй (Мт 2:3), Херод хаан алуурчид илгээн, балчирхан Есүсийг алахыг санаархаж байлаа (Мт 2:16). Муу ёрын сүнс үүнчлэн сорилт дайралтуудаар бүхий л амьдралынх нь турш Түүнрүү довтолсон нь цөл дөх сорилт (Мт 4:1-11), загалмайн зовлон ба үхэлийн үед бүр хурцадмал байдлаар илэрч харагддаг билээ.

“Христийн зовлонг зөвхөн зовлонгийн 7хоногт болсон үйл явдлуудтай болон Түүний загалмай дээрх үхэлтэй холбон ойлгох нь өрөөсгөл юм. Тэрээр энэ дэлхийд махан биеээр амьдарсан нь зовлон байсан юм. Үүнийг Түүний дорд орсон зиндаа гэх бөгөөд “Дорд орох гэдэг нь Бурханлаг эрх мэдэл ба сүр алдраа нуун далдлан, хэрэглээгүй болохыг хэлж байна (Мт.3:15, Гал.3:3, 4:4, Фил.2:6-8)”[2]

“Өргөн утгаараа бидний гэм нүглийн төлөө Христийн үүрсэн ял шийтгэл бол насан туршдаа амссан Түүний бие сэтгэлийн зовлон байсан. Хэдийгээр Христийн зовлон загалмай дээрх үхлээр нь дээд цэгтээ хүрсэн ч гэсэн нүгэлд унасан дэлхийд өнгөрөөсөн Түүний бүхий л амьдрал зовлонтой байсан юм.”[3]

 2) Сэтгэл санааны шаналал зовлон. 

Эзэн Есүс бас насан туршдаа сэтгэлийн шаналал зовлонг амссан юм. Зөнч Исаиа Түүний тухай “Тэр уй гашууны хүн бөгөөд өвчин зовлонг мэдсэн..” (Иса 53:3) гэж зөгнөсөн нь сэтгэлийн их дарамт шаналал, зүрх сэтгэлийн гашуудал харуусалыг нь илэрхийлсэн эш үзүүллэг юм. Тэрээр энэхүү бурхангүй нүгэлт дэлхийд цорын ганц тэнгэрлэг ариун Нэгэн байлаа.

Тээж төрүүлсэн эх нь болон зулай дээр нь гишгэж төрсөн дүү нар нь ч Түүнд итгэлгүй хандаж, эргэлзэн тээнэгэлзэж байсан нь (Мт 12:46-50) гэр бүлийнхээ хүрээнд хүртэл сэтгэл амар, түвшин тайван байгаагүйг харуулдаг. Түүний төрсөн нутаг усныхан нь ч үл тоомсорлон, басамжилж байлаа (Мт13:54-58).

Түүнийг ямар зорилгоор хаанаас илгээгдэж, хэнээр тослогдож томилогдсоныг нь Ариун Сүнсний илчлэлтээр мэдэж таньсан, Өөрийг нь олны өмнө гэрчилж байсан баптист Иохан хүртэл, Түүний хэн болох эсэх талаар эргэлзэн тээнэгэлзэж, асуулга тавин хандаж байсан нь Эзэний зүрх сэтгэлд таатай байгаагүй нь тодорхой (Мт. 11:2-3).

Түүний дагалдагч нараас олон хүн үг сургаалийнх нь үнэн мөнийг ухан ойлгохгүй шүүмжлэн буруутгаж, үл итгэн орхин явж, эргэж буцдаг байсан нь сэтгэлийн шаналалын бас нэг шалтгаан байлаа (Иох.6:60-66).

Энэ харанхуй дэлхийд тухайн үед бараг л ганц сүнсний анд нь байсан баптист Иохан хилсээр хороогдсон нь, улмаар яг л ийм хувь заяа, оноолт Өөрийнх нь өмнө байгааг мэдэж байхдаа Тэрээр түвшин амгалан байгаагүйг Библи хэлдэг (Мт. 14:10-14).

Сонгогдсон дагалдагч нар нь ч төлөвшил хүмүүжлийн хувьд дорой байж, албан тушаалд өрсөлдөж, өвөр зуураа зиндаархаж байсан (Лк.9:46) бөгөөд бүр тэдний дунд  Өөрийг нь хэдхэн зоосоор худалдах урвагч хүртэл байгааг мэдэж байсан нь (Иох.13:26-28), Түүний сэтгэлийг зовоон шаналгаж байлаа.

Тэр үеийн дэлхий дээрхи цорын ганц Үнэн Бурханд мөргөдөг сүм өргөө оршдог, мөргөл хүндэтгэлийн төв болсон Иерусалим хотынхны завхрал, урван тэрслэл, Бурханы авралын дуудлагад хандсан хэнэггүй бардам байдал зэрэг нь, мөн эдгээр нүглийнхээ улмаас хүртэх шийтгэл сүйрэл (Мт.23:37-39), Түүний сэтгэлийн шаналалын бас нэгэн  шалтгаан байсан юм (Лк.13:34-35).

Эцэст нь хамгийн хүнд бэрх, хөндлөнгийн туслалцаа дэмжлэг зайлшгүй шаардлагатай үед нь нөгөө итгэмжит дагалдагчид нь махан биеийн дорой байдалд ноёлуулж, Түүнийг ганцаардуулж байсан нь (Лк.22:45-46), мөн дагалдагч нараас нь хамгийн итгэмжит гэгдэх Петр ч Түүнээс гурвантаа урвасан нь дааж давахад бэрх сэтгэлийн шаналалыг өдөөж байлаа (Иох.18:17, 25-27).

Загалмай дээрх үхэл ойртох тусам Есүсийн зовлон улам хүчтэйгээр шаналгаж байсан нь харагддаг. “Сэтгэл минь үхтлээ зовж байна” гэж Есүс загалмай руу очихын өмнө хэлж байсан (Мт 26:38).

 3) Бие махбодийн зовлон ба үхэл. 

Түүнийг Ромын шүүхээс өмнө Иудейн шашны шүүх мөрдөн байцааж, харгислан зодож байлаа. Ромын шүүхэд тушаасан хойно, цэргүүд элдэвээр тохуурхан доромжилж, тэргүүнд нь өргөст титэм өмсгөн зодож байв. Түүнийг бас Херод Пилат нар нааш цааш туун Иерусалим хотоор явуулж, шившиглэн гутааж байлаа.

Эцэст нь Есүс ташуурдуулан цовдлогдхоор туугдан явсан. Тэр үед цовдлогдох ял авсан гэмт хэрэгтнүүд цовдлогдох газар хүртлээ загалмайгаа үүрэх ёстой байсан байна. Эзэн Есүс энэ л ёсоор загалмайгаа үүрч явсан боловч Тэр хэрцгийгээр ташуурдуулан цус их алдсан учраас ямарч  тэнхээгүй болсон. 

Тиймээс цэргүүд Курений Симон гэгч хүнд Түүний загалмайг албадан үүрүүлжээ. Гэмт хэрэгтнүүдийг цовдолдог Голгота буюу гавлын газар гэдэг нь гавлын ясны хэлбэртэй толгой байсан бөгөөд Иерусалимын хажууд байдаг байжээ.

 “Тэр үеийн загалмай дээр хүнийг амьдаар нь цовдолж алах явдал бол хүмүүсийн зохиосон хамгийн аймшигтай цаазын ял шийтгэл байсан байна. Цовдлогдсон гэмт хэрэгтэн маш удаан зовсны эцэст амьсгаа авч чадахгүй боогдож үхдэг. Гарыг нь тэлээд загалмай дээр хадаасаар хадсан байхад тэр биеийн жингийн ихэнхийг гар дээрээ үүрэхээс өөр арга байдаггүй.

Цээжний хөндий тэр үед гадагшаа, дээшээгээ татагддаг тул амьсгаагаа гадагшлуулж, дахин амьсгаа авахад хэцүү болдог. Гэхдээ цовдлуулж буй хүн хүчилтөрөгчийг тэсэхийн аргагүй хүсэх үедээ хөлөөрөө түлхэн биеэ өргөж, гар дээрээ дарах жингээс зарим хэсгийг шилжүүлэн цээжнийхээ хөндийг арай ердийн байдлаар агших боломж олгодог.

Ингэж биеэ дээшээ өргөснөөр хэрэгтэн бүтэж үхэх ээ жаахан хойшлуулдаг ч энэ нь маш их өвдөлтийг авчирдаг байв. Тэгээд  энэ үйлдэлийг тухайн хүн үхэн үхтэлээ давтан үргэлжлүүлдэг байна. Бас цовдлогдохоос өмнө тухайн хүн маш их ташуурдуулдаг бөгөөд тэр шарх нь амьсгалах тоолонд нь модон загалмайд үрэгдэж, өвдөлт нь бүр их шаналгадаг. Тэгээд амьсгалах гэж оролдох болгонд нь өвдөж, ядран, цус алдаж эцэстээ үхдэг байна.

Зарим тохиолдолд гэмт хэрэгтэн бүтэж боогдох шахсан ч үхэлгүйгээр 2-3 хоног амьд байдаг байсан байна. Ийм учраас цаазлагчид зарим үед Иох. 19:31-33 дээр бичигдсэнээр гэмт хэрэгтний хөлийг нь хугалж, үхлийг нь хурдасгадаг байлаа.” [4]

Энэ бүх зовлонг уг нь бол нүгэлтэн, гэм нүглийнхээ төлөөс ял болгон эдлэх ёстой юм. Харин бидний Эзэн ямар ч нүгэлгүй боловч эдгээр аймшигт тарчлалыг эдэлсэн нь, биднийг (нүгэлтнүүдийг) аврах Эцэгийн хүслийн биелэл байсан юм. 

---

[1]Вейн Грудем, Библийн Онол Сургааль. Библийн Сургалтын Төв, Гранд Рапидс: Мичиган, 1999, 251.

[2]Чой Бён Хю, “Христийн онол” (Улаанбаатар хот:Библийн сургалтын төв, 2004он), 38.

[3]Вейн Грудем “Библийн онол сургаал” (Улаанбаатар хот:Библийн сургалтын төв, 2008он),251.

[4] Вейн Грудем “Библийн онол сургаал” (Улаанбаатар хот:Библийн сургалтын төв, 2008он),






UBTC Библийн сургуулийн оюутан С...-ийн бакалаврын зэрэг хамгаалсан дипломын ажилаас... /үргэлжлэл бий/