Үе үеийн Бурханы ариун охид, тэнгэрлэг бүсгүйчүүддээ баярын мэнд хүргэе.

Бурханы охинд бичсэн захидал 6

Тэгээд Бурхан Өөрийнхөө дүр төрхөөр хүнийг бүтээж, Бурханы дүр төрхөөр эрэгтэй, эмэгтэй хүнийг бүтээв (Эхлэл 1:27).

Сайн байна уу? Бурханы хайртай бумбаахай охин минь ээ. Таны аян зам амжилттай, амар амгалан байсныг, Эзэн дотор би харсан. Бас таныг, хувь заяаны шинэ танхим руу хүчтэй, зоригтойгоор алхан орсонд чин сэтгэлээсээ баярлаж байна.

Би таньтай анх, Эзэний Ариун өргөөнд хэрхэн танилцсанаа, яг л өчигдөр юм шиг санаж байна. Түүнээс хойш, нэг л мэдэхэд 4 н жил харавсан сум мэт өнгөрөн оджээ. Та бол тэнгэрээс, үнэхээр Эцэгийн зүрхнээс газар дэлхийд илгээгдсэн ариухан, цагаахан, булцайсан, жигүүр дээрээ дүүлэн нисэгч тэнгэр элч мөн.

Их Эзэн маань, өчүүхэн надад ямар их ивээлийг хайрлаа вэ? Таньтай учирч, үерхэж нөхөрлөн, хамтдаа Эзэн доторхи, итгэл нэгт ядуу чадуу, гачигдсан дутагдсан, өвдөж зовсон, хөгжлийн бэрхшээлтэй ахан дүүсийнхээ төлөө үйлчилж, зүтгэж явсан маань гайхалтай дотно дурсагдаж байна. Одоо хэн надтай хамт ядарсан, гачигдсан, өвдсөн зовсон ахан дүүстээ зориулж Христмасын бэлэг цуглуулж, хоол унд бэлтгэж, мөнгө төгрөг илүүчилж, зориулалт золиослол гарган гүйх вэ?

Та бол үнэхээр Амьд Бурханы агуу охин мөн. Таниас би агуу лут, алдар цуутай сүмийн зэрэгтэн, шашны зүтгэлтнүүдээс олж хараагүй, тэнгэрлэг үнэт зан чанар, дүр төрхийг олж харсан. Эгэл даруу, үнэнч тууштай, уян зөөлөн, ууч энэрэнгүй, хүлээцтэй тэвчээртэй, мэргэн ухаантай, өгөөмөр нинжин, чин сэтгэлтэй, хэзээ ч өөрийгөө өргөмжлөн мандуулж, алдаршуулан илэрхийлж, хүлээн зөвшөөрүүлж, хүндлүүлэхийг оролддоггүй, хүсдэггүй, үргэлж ард нуугдаж, нууцаар дэмжиж, даруугаар үйлчилдэг тань үнэхээр гайхалтай. Яаж энэ бүгд нэг хүний дотор хамт байж болдог байна аа. Таны дотор эдгээрийг цогцлоосон бидний Бурхан, Есүс Эзэн алдаршиг.

Таниас л би Христийн дүр төрх, мөн чанарыг бодитойгоор олж харсан. Та бол үнэхээр газрын давс мөн. Та бол үнэхээр дэлхийн гэрэл мөн. Та явсан газар болгоноо гэрэлтүүлж, амталж, өөрчилж явсаныг тань одоо эргэн санахад бахдалтай байна. Таны Бурхан таниар бахархаж, бас эрхэмлэн нандигнаж, халуунаар хайрлан хамгаалдагыг би мэднэ. Та бол Түүний бас миний зүрхэн дэх хурц тод од билээ.

Өнгө мөнгө эд баялаг, нэр алдар байр суурь, эрх мэдэл зэрэг цол, наргиан цэнгэл шунал тачаал, өрсөлдөөн тэмцэл үзэн ядалт зэрэг нь таны дотор огт байхгүйг би хаана ч бахархалтай хэлнэ. Та, эдгээрээр дүүрэн энэ ертөнцийх биш. Тэдгээрийг ялсан Өөрийн ялалтыг таны дотор бодитойгоор тавьсан бидний Бурханыг бас дахин магтая.

Та бол тэнгэрийн дагина, Бурханы охин мөн. Таньтай хамт хувь заяаны тодорхой мөчлөгт, хүн төрөлхтөний аврал, сайн сайхны төлөө, Эзэний мөнхийн Хаанчлалын төлөө мөр зэрэгцэн үйлчилж, нөхөрлөж явсан маань, миний хувьд асар их зол завшаан, нэр төрийн хэрэг байлаа.

Тиймээ Эзэний товлосон цаг болж, та надаас явж, хувь заяаны шинэ танхим руу орлоо. Энэ танхимыг таны төлөө бэлдэж, бас товлосон цагтаа хаалгыг нь нээж, гараас тань хөтлөн оруулж буй бидний Эзэн алдаршиг. Энэхүү шинэ хувь заяа дотор та улам агуугаар ашиглагдаж, хаа явсан газраа гэрэлтсээр, босгон байгуулсаар, амталсаар, өөрчлөлт шинэчлэлтийг авчирсаар байх болтугай.

Та үнэхээр бурханлаг, төгс гэргий болно. Бас та үнэхээр бурханлаг, төгс ээж болж чадна гэдгийг би мэдэж байна. Эрнест бол Бурханы хайртай хүү гэдгийг ч би бас мэднэ. Та нар маань үнэхээр Эзэний хайрласан, бас барьж байгуулсан ариун гэр бүл болно гэдгийг ч би бас мэднэ. Энэ бүгдийг бидний Эзэн надад илчилсэн юм. Та хоёроор дамжуулан бяцхан, булбарай, булцайсан тэнгэр элч нар (үрс) газар дэлхийд, Эзэний агуу зорилгыг хэрэгжүүлэхээр ирэх болно гэдгийг ч надад мэдүүлсэн.

Есүсийн ариун, толбогүй цус цохилох зүрхээр нь шахагдаж, лугших судасаар нь урсдаг, Түүний Ариун Сүнс баяр хөөртэйгөөр, бахдалтайгаар дотор нь амьдардаг, ертөнцийг Бүтээгчийн дүр төрх, бие оршихуй нь болсон та нар шиг хүмүүс байгаа учраас л, Мөнхийн Эцэг маань нүгэлт хүн төрөлхтөний эсрэг уур хилэнгээ татаж, мөхөл сүйрлийг хойшлуулж байдаг нь маргашгүй үнэн билээ.

Бид хэдийгээр хэсэгхэн хугацаанд орон зайн хувьд алслагдсан ч, Үүрд Мөнхийн Христийн Ариун Гэр бүлийн гишүүд, Бурханы үрс тул Есүсийн хайр, Ариун Сүнс дотор үргэлж хамт байж, хамтдаа харанхуйг ялж, дэлхийг гэрэлтүүлэх болно.

Бурханы хайртай охин минь ээ, та жигүүртэй, цав цагаахан, баяр хөөртэй, булцгархан тэнгэр элчийн дүрээр миний зүрхэнд үүрд хоногшжээ. Таныг салан явсанд гуниглах боловч, бас хамтдаа үүрд мөнхийн Ариун газар, Христийн зүрхэнд амьдрах нь няцаашгүй үнэн, асар их бахархал, халгисан баяр хөөр тул би тайвширдаг. Таныгаа чанга тэврэн үнсэе. Биднийг Өөрийн агуу зүрхэндээ хамтад нь багтаасан, бас нэгтгэсэн, бидний Эзэн Бурхан, Есүс Христ алдарших болтугай.

GOD bless YOU. JESUS loves YOU.

2011 оны 10-р сарын 20 н Улаанбаатар хот.

Жич: Б.Есүгэн нь төвийн хэвлэл мэдээлэлийн албанд сэтгүүлч, төрийн өмчит нэгэн дээд сургуульд гадаад хэлний тэнхимийн эрхлэгч, англи хэлний багш зэрэг ажил хийж байсан. Англи, герман хэлтэй. 2008 оноос 2011 он хүртэл харааны бэрхшээлтэй итгэгчдийн "Силоам" Христийн цуглаанд итгэмжтэйгээр үйлчилж байсан.

Jesusenkh-ийн хувийн архиваас...

Бурханы охинд бичсэн захидал 5

“Би та нарыг яаж хайрласан шиг та нар бие биеэ хайрлагтун. Энэ бол Миний тушаал.” (Иохан 15:12).

Ертөнцийг бүтээсэн Агуу Бурханы ариухан, эрхэмсэг тэнгэрлэг охин Б.Есүгэн танд бидний Эзэн Бурхан, Аврагч Есүс Христийн мэндэлсний тэмдэглэлт баярын мэндийг, эхэлж буй шинэхэн 2011 оны баярын мэндтэй хамтатган хүргэхийн ялдамд, таны өгөөмөр нинжин, бурханлаг үйлсэд тань талархан энэхүү талархалын захидлыг тэрлэж байна.

Энэ цаг үе нь их сорилтын цаг үе бөгөөд, өнгөтэй мөнгөтэй, аргатай чаргатай, эрдэмтэй чадалтай, эрх мэдэлтэй, нэр нөлөөтэй нь эгэл олноос онцгойрон тасарч, эрх ямба тансаглал баярхал нь улам халгиж, зугаа цэнгэл зуурдын жаргал нь улам цалгиж байхад, энгийн даруу шударга журамтай, тэр тусмаа өөрсдийгөө хүлээн зөвшөөрүүлэх, илэрхийлэх тал дээр чадвар боломж мөхөс, дутуу дулимаг сул дорой, хөгжлийн бэрхшээлтэй иргэдийн хувьд идэж уух, өмсөж зүүхээр гачигдан, амьжиргааны түвшин нь дундаж олныхоос ч хол ард орхигдон хаягдаж, мартагдан гээгдэж буй байдал жирийн үзэгдэл, тогтсон хэв шинж болж байна.

Тэдний төлөө санаа тавьдаг, зориулалт золиослол гаргадаг, өгдөг хуваалцдаг, хүнд байдлыг нь ойлгон тусалдаг, энэрэн нийгүүлсдэг хувь хүн, хамт олон ховор бөгөөд, хаяа нэг аливаа чадвар боломж, эрх мэдэлтэй нэгнээс туслалцаа үзүүлэхдээ, хариуд нь өөрсдийнх нь төлөө санал дэмжлэг өгөхийг шаардах, үзүүлсэн тусламжаараа өөрсдийгөө алдаршуулан шоудах хандлагатай байдаг нь үнэн байдал билээ.

Харин бидний Эзэн “... Үдийн эсвэл оройн зоог барихдаа анд нөхөд, эсвэл ах дүү, садан төрөл, баян хөршүүдээ бүү урь. Учир нь тэд хариуд нь таныг урьж хариу барина. Харин та найр хийхдээ ядуу, эсвэл тахир дутуу, хазгар доголон, сохор хүмүүсийг урь. Тэд танд хариу барьж чадахгүй тул та ерөөгдөх болно. Учир нь гэвэл зөвт хүмүүсийн амилалт дээр хариуг тань нөхөн төлөх болно...” (Лук 14:12-14), гэж айлдасны дагуу хариу нэхээгүй, алдар магтаал горилоогүй, хэдийгээр өөрийн тань амьдрал ахуй, асуудал бэрхшээлд хэрэгцээтэй, шаардлагатай байсан ч, жинхэнэ утгаараа зориулалт золиослол гарган, сул дорой ах дүүстээ, бидний Эзэн Есүс Христийн мэндэлсний баярын хэрэгцээнд нь зориулан 50 000 н төгрөгийн, мөн 2010 оны турш талархалын болон 10-ны 1-ийн өргөл болгон өргөсөн 481 800 төгрөгийн (нийт 531 800 төг.) өргөл хандив тань, тэнгэрт Эзэний оршихуйд таны төлөөх баялаг болон хураагдсаныг тэмдэглэн хэлэхэд таатай байна.

Энэхүү өгөөмөр өглөг хандив тань, “Силоам” Христийн Чуулганы үйл ажиллагаа 2010 оны турш тасралтгүйгээр, бүрэн дүүрэн явагдахад асар том, үндсэн дэмжлэг болж байсан бөгөөд, тус Чуулганаас “VISION” илгээлтийн сургуульд илгээгдэн суралцсан оюутан Ц. Сарагийн сургалтын төлбөр болон төгсөөд Хятад улс руу богино хугацааны илгээлтээр явахад нь зардал тусламж болох, үйлчлэгч Jesusenkh-ийн үйлчлэл, амьжиргаанд тусламж, урамшуулал болох зэрэгээр зарцуулагдаж, ашиглагдсаныг талархалтайгаар дурсан, мэдээлэхдээ баяртай байна.

Үүгээр ч зогсохгүй таны чин зүрхний өгөөмөр өглөг, тусламж цаашаа ч үргэлжлэн, тус Чуулганаас "UBTC" Библийн сургуульд оюутан болон дахин илгээгдсэн Ц.Сарагийн эхний хагас жилийн төлбөр болох 360 000 төгрөгийг ч, Эзэний хайраар ивээл болгон өгсөн нь нэн чухал, цагаа олсон дэмжлэг болсон билээ. Түүнчлэн энд дурдаагүй санхүүгийн болон эд материалын, залбирлын болон сэтгэл санааны, шууд гар бие оролцоо үйлчлэлийн олон олон тусламж дэмжлэг, зориулалт золиослол нь таны зүрх сэтгэл дэх, бидний Бурханы мөнхийн агуу Хайрын илрэл байсныг халуун дотноор тэмдэглэх нь зүйтэй санагдана.

Бүх дэлхий дээрхи Их Эзэний Ариун Нэрээр дуудагддаг, Түүний сонгосон ариун хүмүүс нь нэгэн бие, нэгэн гэр бүл бөгөөд, бурхангүй ертөнцөөс ялгаатай нь, энэ хамт олны дотор хүчтэй нь хүчгүйгээ боолчлон эрхшээж, ноёлон дарангуйлдаг ширэнгэн ойн харгис, хатуу ширүүн зүй тогтол биш, харин ч хайрлан энэрч, тусалж дэмжин, өгч хуваалцан, үүрч дүүрэн хамтдаа алхдаг хайрын халуун дулаан уур амьсгал, тэнгэрлэг мөнхийн зарчим үйлчилдэг билээ.

Энэхүү үнэнийг үйлс өглөгөөрөө гэрчлэн харуулсан таныг, хайртай ойр дотныхныг тань, ажил үйлс хичээл сургуулийг тань, эрүүл мэнд сэтгэл санааг тань, сүнслэг төлөвшил дэвшил хөгжлийг тань эхэлж буй шинэ 2011 н онд, бидний Мөнхийн Тэнгэрлэг Эцэг, Аврагч Эзэн Есүс урьд оныхоос 7 дахин илүүгээр ерөөж, инээд баясал, амар амгалан, мэргэн ухаан, эд баялагын элбэг хангалуунаар бялхаах болно.

Хонгорхон Бурханы охин минь ээ, хүчтэй зоригтойгоор үнэний замаар тууштай алхсаар байгтун. Чанга үнсэе.

GOD bless YOU. JESUS loves YOU.


Жич: Ийм захидлыг 2010 оны 12-р сарын 25 нд Бурханы хайртай охидууд болох Оюунсайхан, Отгонсүрэн, Тэгшэрдэнэ зэрэг тэнгэрлэг, ариун бүсгүйчүүд бас хүлээн авсан билээ.

Jesusenkh-ийн хувийн архиваас...

Тунхаглал

Миний бие эцсээ хүртэл туйлбартай байж, эхэлсэн замаа дуусгах болно.

Миний дотор Ариун Сүнсний хүч чадал байдаг. Надад ухрах зам байхгүй. Миний бие Түүнрүү алхам хийсэн. Бурхангүй амьдралын тав тухаас миний бие бүрмөсөн татгалзаж байна. Миний бие Христийн дагалдагч байхаар нэгэнт шийдсэн. Би өнгөрсөнөө сөхөхгүй, сульдахгүй, удааширч, эргэж буцахгүй. Миний өнгөрсөн, одоо, ирээдүй загалмай дээр урсгасан Христийн цусаар цагаатгагдсан. Амьдрал минь утга учиртай болж Бүтээгч Эзэний мэдэлд очсон. Загалмайн өмнө би, өөрийн дорой амьдрал, өнгөрсөн бүтэлгүйтэл, элдэв төлөвлөгөөнүүд, ирээдүйн талаархи хэрэггүй хараа зорилгууд, Мөнхийн Бурханыг алдаршуулдаггүй хэл яриагаа, үйлдэл үйлсээ, хувиа хичээсэн харамч байдлаа, тодорхой бус бүхнээ өргөж байна.

Миний бие эцсээ хүртэл туйлбартай байж, эхэлсэн замаа дуусгах болно.

Надад Бурханаас л биш бол өөр алдар нэр хэрэггүй. Түүний өгөөгүй байр суурь, эрх мэдэлээс би татгалзаж байна. Есүс Христийн алдрыг халхлах аливаа нэр хүндээс миний бие татгалзаж байна. Хэрэв Эзэн Өөрөө намайг томилоогүй л бол, би хамгийн тэргүүнд байхыг эрмэлзэхгүй. Би бусдын надад үзүүлэх хүндлэл өргөмжлөл, хүлээн авалт болон, тэдний санаа бодлоос ангид байхыг сонгож байна. Хүмүүсийн магтаалыг биш, харин Эцэгийн өгөх шагналыг эрэн хайхаар шийдэж байна. Миний баялаг, бахархал, түшиг тулгуур нь эд хөрөнгө, зэрэг цол, нэр хүнд, албан тушаал биш, харин Мөнхийн амьд Эзэн Бурхан маань, Түүний мөхөшгүй Үг сургааль нь байх болно.

Миний бие эцсээ хүртэл туйлбартай байж, эхэлсэн замаа дуусгах болно.

Одоо миний бие Христийн оршихуйд байгч нэгэн. Би итгэлээ сахина. Миний зорилго тодорхой. Элдэв дайн дажин өрсөлдөөн тэмцэл, бүхий л төрлийн хүчирхийлэл харгислал гэмт хэрэг, садар самуун завхай тачаангуй байдал, авилга хээл хахууль, утга учиргүй зугаа цэнгэл хоосон үргүй баярхал, бүхий л төрлийн өвчин шаналал ядуурал хоосрол, алив донтолтууд болон бардамналуудыг үзэн ядаж, эцэст үхэлийг усттал няцахгүй. Эдгээрийн эсрэг миний бие тасралтгүй залбирна. Хайр уучлал, Эзэний Үг нь миний аливаа үйлс үйлдэл, шийдвэрийн үндэс суурь байх болно. Би хүндрэл бэрхшээлүүдийг, дарамт шахалтуудыг хүлцэн тэвчих болно. Би ойр дотныхныгоо болон дайснаа хүртэл хайрлахаар шийдэж байна.

Миний бие эцсээ хүртэл туйлбартай байж, эхэлсэн замаа дуусгах болно.

Би Бурхан Эцэгийн надад зориулан бүтээж бас хариуцуулсан газар нутаг, ой мод, гол ус, ан гөрөөс, араатан жигүүртэн, мал адгуусыг хайрлан хамгаалж, арчилж тордон, аливаа шунаг хомхой сэтгэлээр хандахгүй байхаар шийдэж байна. Тэдгээрийн үр шим ашиг тусыг зөв зохистойгоор, ариг гамтайгаар ашиглаж, Эзэний хаанчлалд харамгүйгээр өргөх болно. Би байгал дэлхийн цэвэр ариун, онгон дагшин байдалтай бүхий л талаар хүндэтгэлтэй харьцаж, тэдгээрийг аливаа харгис бурангуй халдлага сүйтгэлээс өмгөөлөн хамгаалхаар, тиймэрхүү бүхий л хандлага харьцаатай эвлэрэхгүй байхаар шийдсэн.

Миний бие эцсээ хүртэл туйлбартай байж, эхэлсэн замаа дуусгах болно.

Би Есүс Христийн дагалдагч. Хүмүүст Түүнийг л гэрчлэн ярих болно. Тэрээр намайг хүчирхэгжүүлдэг тул, би Түүгээр дамжуулан хүн төрөлхтөний авралын төлөө боломжтой бүхнийг хийхээр шийдэж байна. Алив харанхуй бурангуй үзэл суртал, тогтолцоо бүтэц, хана хэрмүүдийг, алив дарангуй харгис засаглал, хууль ёс, хэв маягыг газар дэлхийгээс үүрд арчигдтал зүтгэх болно. Би элдэв мэргэ төлөг, илбэ шид, шившлэг дом, ховс нөлөө зэрэг мухар сүсэгийн бүхий л зан үйл, шүтлэг мөргөлийн аливаа өндөрлөгүүдийг үзэн ядаж, хүн төрөлхтөний зүрх сэтгэлээс тэдгээрийн хорон муу нөлөөг арчин хаяхын төлөө тууштай залбирч, тэмцэх болно. Есүс Христээр дамжуулан надад өгсөн хүчээр, миний бие Бурхан Эцэгийнхээ алдарын төлөө хөдөлмөрлөх болно.

Миний бие эцсээ хүртэл туйлбартай байж, эхэлсэн замаа дуусгах болно.

Би урагшлахдаа тууштай байхаар шийдэж байна. Миний хараа үргэлж Мөнхийн Улс руу чиглэх болно. Намайг Газарчлагч Нэгэнийг дагахаар шийдсэн. Би урвахгүй. Энэ дэлхийтэй эвлэрэхгүй, түүний заль мэх, уруу татагч гэм нүгэлийг эсэргүүцэж амьдрах болно. Хойш ухрахгүй, эргэж няцахгүй, замын дунд зогсохгүй, харин бат итгэлтэй, хатан зоригтой, тууштай байхыг сонгож байна. Миний бие, Христийн төлөө өөрийн амьдралыг золин, зориулахыг шийдсэн. Дахин эргэлзэхгүй. Нөхцөл байдал хэдий хэцүү байсан ч, би дайсантай нэг ширээнд сууж хэлэлцэн тохирохгүй, эвлэрэхгүй. Гуйвамтгай байхаас татгалзаж байна.

Миний бие эцсээ хүртэл туйлбартай байж, эхэлсэн замаа дуусгах болно.

Миний бие чадах хирээрээ бусдад өгөх болно. Би бусдын өмнө хайраас өөр өртэй байж, Эзэний тушаагаагүй гэрээ хэлцэл, тохироо, амлалтын буулганд орохгүй. Эзэн надад, “болсон, хангалттай” гэж хэлэх хүртэл, Сайн мэдээний төлөө цуцалтгүй хөдөлмөрлөсөөр байх болно. Сайн мэдээг бусдад тунхаглан, тэдний төлөө халуунаар залбирч, ургацын талбайд хичээнгүйлэн хөдөлмөрлөж, ургац хураах хүртлээ би бууж өгөхгүй, эрч хүчээ алдахгүй, цөхрөхгүй байх болно. Би хувь заяанаас ямар нэг аз жаргал, амжилт ололтыг горьдон хүлээхгүй. Зөвхөн Түүний дахин ирэлтийг чин сэтгэлээсээ итгэж найдан, үнэнчээр хүлээх болно.

Миний бие эцсээ хүртэл туйлбартай байж, эхэлсэн замаа дуусгах болно.





“Дотоод эдгэрэл, ариусал, чөлөөлөлтийн үндэс” курсийг төгсөгчидийн тунхаглалаас үндсэн санааг авч, теологийн болон найруулгын засвар хийж шинэчилсэн хувилбар

”Монголын уламжлалт сэтгэлгээ, арга билгийн ухааны үндэс” хичээлийн тухай

Мэдээлэл бүртгэсэн: administrator огноо: 2010-10-14
2010-05-21 Дугаар: 103
Монголчууд бид иргэншил, соёл, хэл, бичиг, утга зохиол, урлаг, ёс заншил, шашин шүтлэг, ёслол хүндэтгэл зэрэгарга билгийн шүтэн барилдлагын гүн сэтгэлгээ бүхий оюуны олон талт, арвин их өв сантай ард түмэн билээ.

Хотол дэлхийн даяарших үйл явц хүрээгээ тэлж буй эдүгээ цаг дор монголын оюун, сэтгэлгээний өв уламжлалаас суралцах, судлах, хадгалан хамгаалах, сэргээн дэлгэрүүлэх, баяжуулан хөгжүүлэх замаар үндэсний болон нийтийн эрх ашиг, аюулгүй байдал, иргэний эв нэгдэл, хувь хүний итгэл үнэмшил, соёл, үнэт зүйлс, халдашгүй байдлын баталгааг бэхжүүлэх, Монгол хүн бүрийг бага балчраас нь үндэсний уламжлалт соёл, ёс заншил, зан үйлд сургаж амьдрал ахуйд нь мөрдлөг болгон хэвшүүлэх хэрэгцээ шаардлага зүй ёсоор урган гарч байна.

Монгол үндэсний үнэт зүйл, соёл, ёслол хүндэтгэл, ёс заншлын нийтлэг хэм хэмжээг хүүхэд залуучуудын өдөр тутмын амьдрал ахуйд төлөвшүүлэх зорилго бүхий олон нийтийн үүсгэл санаачлагыг бүрнээ дэмжиж, Монгол Улсын Үндсэн хуулийн гучингуравдугаар зүйлийн 1 дэх хэсгийн 3 дахь заалт, Монгол Улсын Ерөнхийлөгчийн тухай хуулийн 12 дугаар зүйлийн 12 дахь хэсгийг тус тус баримтлан ЗАРЛИГ БОЛГОХ нь:

1. Ерөнхий боловсролын суралцагчдад үндэсний үнэт зүйлс, соёл, уламжлалт сэтгэлгээ, зан заншлын нийтлэг хэм хэмжээг таниулах зорилгоор "Иргэний боловсрол" хөтөлбөрийн хүрээнд заавал судлах "Монголын уламжлалт сэтгэлгээ, арга билгийн ухааны үндэс" хичээлийн хөтөлбөрийг батлан хэрэгжүүлэхийг Засгийн газарт чиглэл болгосугай.

2. Улс үндэстнийнхээ оюуны биет ба биет бус өв соёл, үнэт зүйлс, уламжлалт зан заншлыг өвлөх, хадгалах, хамгаалах, судлах, сурталчлах хөдөлгөөн өрнүүлэхийг нийт ард иргэд, айл өрх, төрийн ба төрийн бус байгууллага, урлаг соёлын болон бүх шатны боловсролын байгууллагын ажилтнуудад уриалсугай.

МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖ

МОНГОЛ УЛСЫН ЕРӨНХИЙ САЙД С.БАТБОЛД


President.mn сайтаас...

Ерөнхийлөгчид бичсэн захидал

Сайн байцгаана уу? Эрхэм хүндэт "Иргэний танхим"-ын албан хаагчид аа. (Ингэж хандах нь зөв үү? Эсвэл "Монгол улсын ерөнхийлөгчийн ажлын албаныхан" гэх үү? Эсвэл "Монгол улсын ерөнхийлөгчийн тамгын газрынхан" гэх үү? Нэр томъёоны хувьд буруу хандсан бол хүлцэнэ үү?) Монгол улсын ерөнхий боловсролын сургалтын хөтөлбөрт "Үндэсний ёс заншил, уламжлал ба арга билгийн гүн ухаан" ч гэнэ үү, хичээл оруулах талаархи санал асуулга, хэлэлцүүлэг явагдаж буйг Eagle TV-гээр үзээд, уг хаягыг олж та бүхэнд хандаж байна.

Тэгээд дээрхи асуудлын талаар зарим зүйл лавлах гэсэн юм. Хожимдож мэдэж, хоцорч хандсандаа хүлцэл өчье.
Асуулт ба хүсэлт:
1. Монгол улсын Үндсэн хуульд "Хүн болгон шүтэн бишрэх, шашин шүтлэг ээ, ертөнцийг үзэх үзлээ чөлөөтэй сонгох эрхтэй" гэсэн заалт байдаг шиг санагдана. Энэ бол "хүн" гэдэг оршихуйн оршин тогтнолынх нь хамгийн эмзэг, чухал, оршихуйнх нь утга учрыг тодотгодог, тодорхойлдог, хувь хүний өөрийгөө болон бусдыг үзэх үзэл, үнэ цэнийг нь бүрдүүлдэг талбар. Энэ асуудалд маш болгоомжтой, өндөр ач холбогдол өгч, нухацтай хандах ёстой. Үүнийг ямарч төр, засаглал, эрхшээл ноёрхлоор, эрх мэдлээр далайлган нэг мөр, нийтийг хамарсан нэгдмэл байдлаар шийдэж чадаж байгаагүй ба ингэх оролдлого бүр харгислал, бурангуй харанхуй, эрх чөлөөгүй боогдмол байдлыг бий болгож, аймшигт хагарал, тэмцэл зөрчилийн үндэс суурь болж, улмаар уг төр, үндэстэн мөхөх үндэс болсоор ирсэн түүхтэй. Гэтэл хуулийн энэхүү заалтаа ч зөрчөөд, түүхэн сургамж, хүн төрөлхтөний нийтлэг үнэт зүйлсийг ч үл харгалзан, сонголт хийх боломж, чадвар, ухамсар төлөвшөөгүй нялх балчир үеийн оюун санаа, зүрх сэтгэлийг хүчээр "өмчилж, боолчлохыг" яагаад оролдоно вэ? Энэ бол маш бурангуй оролдлого, хатуугаар хэлбэл оюун санааны хүчирхийлэл мөн.

2. TV-гээр гарч буй хэлэлцүүлэг, саналаа хэлж буй оролцогчдын ерөнхий уур амьсгал, хэлж буй үг, ялангуяа "ерөнхийлөгчийн шашны зөвлөх"-ийн байр суурь зэргээс харахад, Хичээлийн үндсэн агуулга бараг л нэг л шашныг тунхагласан, бусад итгэл үнэмшилийг үл тоомсорлосон, хашигдмал харанхуй, тодорхойгүй, өгөөжгүй болох шинж анзаарагдаж байна. Хүн төрөлхтөн үүсэн бий болсон цагаас, сүнслэг төлөвшилд нь хамгийн нөлөөтэй байр суурь эзэлж байсан "Сайн ба муугын зөрчил тэмцэл", ирээдүйдээ хандах хандлага, зорилго эрмэлзлэлд нь "Шарын шашин" л хамгийн зөв эцсийн шийдэл, гаргалгаа өгчихсөн юм шиг, тэгээд түүнийг л хар багаас судалснаар үндэстэн хөгжчих юм шиг, хэт нэг талыг барьсан харалган хэлэлцүүлэг болсон. Монголынхоо түүхийг нээлттэй нүдээр сайтар хараач ээ. Тиймээс дахин сайтар зарлан тунхаглаж, сурталчилж байгаад 2 дахь хэлэлцүүлэг явуулж өгнө үү.!

3. Уг хичээл байж болно, гэж би хувьдаа үзэж байгаа бөгөөд, харин дотоод агуулга нь огт өөр байх ёстой. "Үндэсний ёс заншил, уламжлал" гэдэгт малчин ардын ахуйн соёл (гэр хэрхэн хийдэг болон барьдаг, буулгадаг талаар, мал хариулах ухаан, байгал дэлхийг ажиглан шинжиж, уур амьсгал, үзэгдэл юмсийг танин мэддэг, ахуй амьдралдаа зохистойгоор харгалзан үздэг талаар, хүүхэд хүмүүжүүлэх монгол арга, монгол эр хүн, монгол бүсгүйн ёс жудаг, эрхэмлэх зүйлсийн талаар, гэр бүлийн эмх цэгц, дэг журам, ёсзүй, хүндлэх хүндлүүлэх ёсны талаар, хоол хүнс, хэрэглээний соёл, тэдгээрт хамааралтай нэр томъёонууд, мөн газар нутгийн нэр ус, тэдгээрийн утга учир, агуулгын талаар, 5-н хошуу малын болон маллагааны онцлог, ялгааны талаар, бэлчээр нутгын онцлог, бүсчлэл тэдгээрт таарсан ахуйн ба маллагааны, нүүдлийн соёлын талаар... гэхчилэн) амьдрах арга ухааны талаар л байна уу гэхээс, ямар нэгэн шашны хичээл байж огт таарахгүй, гэж бодож байна.

За TV-гээр гарсан хэлэлцүүлэгийг үзээд, нэг иймэрхүү санал бодолтой байгаагаа бичиж илгээхээр шийдлээ. Хэрвээ энэ "хууль" ч гэдэг юм уу, журам ч гэдэг юм уу, тогтоол шийдвэр ч гэдэг юм уу зүйл нь батлагдвал, ажил хэрэг болохоор эцсийн шийдвэр ерөнхийлөгчийн зүгээс гаргавал, "Үндсэн хууль"-ийг, хүний эрхийг зөрчсөн гэдэг үндэслэлээр шүүхэд хандаж болох уу? Асуудал ийм байдлаар бүү эргээсэй гэж би өөрийн итгэдэг Бурхандаа залбирч байна. Та бүгдийн саруул ухаанд найдаж байна.

Ертөнцийг Бүтээгч, цорын ганц, хамгийн Дээд Эзэн Бурхан байдаг бөгөөд энэ ертөнцийн бүх үзэгдэл юмс, оршихуй Түүний л хүслээр оршин байдаг. Ноён Элбэгдоржид, Монгол улсын төрийн тэргүүн байх эрхийг ч Тэр л олгосон. Гэхдээ Өөрийг нь эсэргүүцэж, Түүний ард түмнийг эргүүлээд бурангуй харанхуй руу чирээсэй гэж хүсээгүй нь тодорхой. Тэр хэдийгээр үнэмлэхүй эрх мэдлээр бүхнийг хянаж, амьдралын зохист харьцааг удирдаж байдаг боловч, хүмүүнийг харанхуй, дарангуй байдлаар боолчлохыг хүсдэггүй. Тэр бидэнд ухамсартай сонголтыг хийх боломжийг өгдөг ба зохистой шударга шүүлтийг хэрэгжүүлдэг юм.

Дээд Тэнгэр Бурханаас гаралтайгаа ямар ч үлгэр домгийн шинжгүйгээр, үндэслэлтэйгээр нотлож, бахархаж, омогшиж ирсэн 2-хон үндэстэн дэлхийд оршдог. Нэг нь бид шүү дээ. Биднийг (өвөг дээдсийг) ашиглан, дошны сэтгэлгээтэй бурангуй хүмүүний ертөнцийг сэгсрэн сэрээж, түүхийг хөтлөн удирдаж байсан нь Тэр юм. Тэр одоо ч хүн төрөлхтөнийг түүхийн шинэ эринд хөтлөн авчраад, шинэ сонголтыг тулгаж байна. Түүхийг эрс өөрөөр, цоо шинээр хөтөлхөд нь бас л бид л (Монголчууд) ашиглагдана. Учир нь бид Түүний хүүхдүүд юм. Тэр бидэнд хайртай. Харин энэхүү "Шарын шашин"-ы талыг барьсан шийдвэр тань Түүнд огт таалагдахгүй гэдгийг дахин онцлон анхааруулъя.
Олон талаас нь нухацтай судалж, сайтар бодож бас зөвлөж байж шийдвэр ээ гаргагтун. GOD bless YOU.


Уг захидалыг 2010 оны 05 сарын 13 нд irgen@president.mn хаягаар явуулсан болно. Гэвч харамсалтай нь 2010 оны 05 сарын 21 нд 103тоот зарлиг батлагдсан.

Аз жаргалын талаархи бодролоо хуваалцахуй

Бурханы охинд бичсэн захидал-4

Сайн байна уу? Бурханы хайртай охин минь ээ. Таны бие болоод сэтгэл Их Эзэний ивээл ерөөлөөр бялхаж байгаа биз дээ? Таны төлөө залбирах бүр Эзэн маань тайвшрал, баяр баясгаланг мэдрүүлдэг. Тиймээс ч бүх зүйл тань сайн сайхан байж, Эзэний ивээл ерөөл, хяналт хамгаалалтанд байгаа юм байна, гэж мэддэг.

Мэдээж бас бэрхшээл, шийдэгдээгүй асуудлууд нэгээр тогтохгүй байгаа л байх. Гэхдээ хүмүүний амьдралын зорилго, хараа нь асуудал бэрхшээлийн цаана гарахын төлөө биш, харин амьдралыг, Бурханыг, бусдыгаа хайрлахын төлөө байвал, жинхэнэ утгаараа аз жаргал, амжилт ололт, амар тайвнаар, гэрэл гэгээгээр дүүрэн байх болно.

Бид санаатай болон санаандгүйгээр маш олон зүйлийг амьдралаас, бас Бурханаас хүсэн хүлээж байдаг. Тэдгээрийг нийтэд нь багцлаад “аз жаргал”, гэсэн нэр томъёогоор тодорхойлох гэж оролдсоор ирсэн.

Аз жаргал гэж ер нь яг юуг хэлэх вэ? Энэ нь бодит зүйл үү? Эсвэл хийсвэр, хоосон горьдлого уу? Хэн энэ ертөнцөд аз жаргалтай вэ? Юугаар түүнийг хэмжих вэ?

Мэдээж хүн болгон л өөрийн гэсэн аз жаргалын талаархи тодорхойлолтыг хэлэх байх. Гэхдээ энэ цаг үеийн нийтлэг нэг тодорхойлолтыг гаргаж бас болох юм. Хүн хүний өөрийн гэсэн үнэ цэнийн талаархи ойлголт, эрхэмлэх, хүсэн тэмүүлэх зүйлс, өссөн орчин, тойрон хүрээллийн нийтлэг хэвшмэл ойлголт, итгэл үнэмшил зэргээс шалтгаалан “аз жаргал”-ын талаархи төсөөлөл хэлбэрждэг.

Яг таны хувьд “аз жаргал” гэдэг нь юу вэ? Та өөрийгөө аз жаргалтай хүн гэх үү? Таны аз жаргал хормын төдийд мэдрэгдээд өнгөрдөг мэдрэмж, догдлол, таашаал, сэрэлээр хэмжигдэх үү? Үзэгдэх харагдах эд хөрөнгө, гял цал өнгөлөг чамин зүйлсээр, амттай шимтэй хоол хүнсний элбэг дэлбэг байдлаар, бүр эсвэл эргэн тойрныхон тань таныг, гоо үзэсгэлэнгээр тань, ур ухаанаар тань, авъяас чадвараар тань, мэдлэг боловсролоор тань, зан аалиар тань шагшин бахдаж, бишрэн ширтэж, тойрон хүрээлвэл та аз жаргалтай байх уу?

Бас хүссэн газар орон, улс үндэстэн, түүхэн дурсгалт болон байгалын үзэсгэлэнт газруудаар тааваараа аялж жуулчлан, цэнгэж наргих нь “аз жаргал”-ын хэмжүүр үү? Үнэхээр эдгээр болон бусад олон тодорхойлолтууд, төлөв байдлууд нь таньд оргилсон баяр хөөр, цаглашгүй гэрэл гэгээ, сэтгэлийн гайхам цэнгэлийг өгдөг үү?, гэхчилэн олон талаас нь, янз бүрээр л эрэгцүүлэн, тунгаан бясалгаарай, гэж таниас хүсэе.

Ер нь хүмүүний зүрхийг, аз жаргалын талаархи ямар нэгэн хуурмаг хоосон төсөөлөл, зураглал, мэдрэмжүүд хүлсэн байдаг. Эдгээр нь ихэвчлэн махан биеийн тав тух, ахуйн тохилог нөхцөлөөр л хэмжигддэг. Яахав зарим нь бие махбодийн эрүүл мэндтэй холбож, бас гэр бүлийн дотоод халуун дулаан уур амьсгал, бүрэн бүтэн байдлаар тодорхойлох л байх.

Хүмүүн нь өөрийнхөөрөө аз жаргалын тодорхойлолт, хэм хэмжүүр, үзүүлэлт гарган зүрхнийхээ мухарт хадгалчихаад, тэгээд л түүнийгээ эрж хайгаад, олж эзэмших гээд л тэмцээд, зүтгээд байдаг. Гэтэл үнэндээ тэр болгоныгоо бүрэн дүүрэн үзэж, амталж, бүрдүүлж, тойрон хүрээлүүлсэн ч, эзэмшин эдэлсэн ч жинхэнэ утгаараа аз жаргалыг мэдэрдэггүй.

Учир нь хүн хэдийгээр мөхөс дорой, өчүүхэн бодьгаль боловч хязгааргүй их шунал хүсэл, ханаж цадашгүй, дүүргэгдэшгүй хоосон, ховдог хомхой сэтгэл түүний дотор оршдог.

Хашаанд амьдардаг хүн байранд л орчихвол амьдрал нь сайн сайхан болж, бүх асуудал нь шийдэгдэх юм шиг бодож, төсөөлж байдаг. Байранд амьдардаг нэгэн нь, эдлэн газар, хувийн тансаг сууц, харш мөрөөддөг. Тэдгээрийг л эзэмшчихвэл аз жаргалтай болж, амьд яваагынх нь зорилго нь биелэх юм шиг санадаг.

Дугуйтай нь мотоцикл мөрөөдөж, мотоциклтой нь машин мөрөөдөж, машинтай нь hammer-тай, бүр усан болон нисдэг онгоцтой болохыг санаархаж байдаг, гэхчилэн. Үүнийг бас өөр талбар, төлөв байдал руу ч шилжүүлэн зураглаж болно. Бакалаврын зэрэг цол, дипломтой нь магистрт санаархаж, магистрынхтай нь дараагийн доктор, профессор, акидемич гэх мэт цол гуншинг, дагалдан ирэх алдар хүндийг хүсэл мөрөөдлөө болгодог.

Бас хороон дарга нь дүүргийнхийг, дүүргийн дарга нь хотын захирагчийн суудлыг, хотын дарга нь их хурлын гишүүний, бүр цаашлан ерөнхий сайд, ерөнхийлөгчийн сэнтийг хүсэн мөрөөддөг. Ерөнхийлөгч болсон нэгэн нь үндэстний, түүхэн агуу их удирдагч, эсвэл бүр хаан болохыг ч санаархаж мэднэ. Гэвч эдгээр нь бүгд хоосон зүйлс.

Бас нөгөөтээгүүр хүмүүн нь энэхүү “аз жаргал” гээчийг өнгөрөн одсон цаг үед, хуучин дурсамжинд, эсвэл ирээдүйд хэзээ нэгэн тодорхойгүй цаг хугацаанд хамааруулан ойлгох, тайлбарлах хандлагатай байдаг. Гэтэл энэ нь яг одоо цагын ухагдхуун шиг. Эзэн биднийг хүүхэд адил болохгүй бол Мөнхийн улсад орохгүй, гэдэг.

Хүүхдэд өнгөрсөн гэж үгүй, бас ирээдүй ч гэж үгүй учраас, тэд хамгийн аз жаргалтай сэтгэл хангалуун амьдарцгаадаг. Өөрөөр хэлбэл тэд өнгөрсөнөө санан дурсаад гоморхоод, гуниглаад, эсвэл ирээдүй рүүгээ “холыг харж” том том зорилго тавиад, тэдгээрийнхээ биелэх эсэхэд санаа нь зовон шаналдаггүй, зөвхөн яг одоо цагаараа амьдарч, юухнаас ч чамин сонинг, зугаатай хөгжилтэйг олж харж, хөөрөн баясах нь, өчүүхэнд ч сэтгэл ханан догдлох нь гайхамшигтай ажгуу. Тэд бол тэнгэрийн улсын гэрэл гэгээ, ариун цайлган, төгс төгөлдрөөр амьдрагсад буюу газар дэлхий дээрхи тэнгэрийн элч нар мэт.

Эндээс хүн болгон л тэнгэр элчийн хувиар дэлхий рүү илгээгдсэн боловч, харамсалтай нь цаг хугацааны явцад, хорон муу тойрон хүрээллээсээ болж эвдрэн бохирдож, тэнгэрлэг мөн чанараа гээдэг нь, аз жаргалаасаа төөрөн одохын шалтгаан нь болдог, гэсэн гаргалгаа гаргачмаар. Гэхдээ бас л учир дутагдалтай.

Хүмүүн нь хичнээн гэнэн хонгор, цайлган цагаахан амьдравч “аз жаргал эдэлж” буйгаа ч тодорхойлон хэлж мэдэхгүй байвал, ерөөс “аз жаргал”-ын тухай ярих нь утгагүй болно. Харин сайн муу, сайхан муухайг танин мэдээд, ялгаж салгаад, улмаар ухамсартайгаар, зорилготойгоор, бүрэн хариуцлагатайгаар төгс сайныг сонгосон тохиолдолд л “аз жаргал” гэдэг энэ ухагдхуун, жинхэнэ утгаараа үнэлэгдэх юм шиг.

Ер нь “аз жаргал” гэдэг холбоо үгийн утгыг нэг нягталаад үзье. “Аз” гэдэг нь хувь хүнээс өөрөөс нь үл шалтгаалах, гэнэт учрах хоромхон зуурын тохиол, учралыг хэлдэг. “Жаргал” гэдэг нь сэтгэл ханамж, таашаал, баяр хөөрийн мэдрэмжийг хэлдэг. Тэгэхлээр хүний амьдарлын замд гэнэт тохиолддог завшаантай учрал, гэж ойлгогдож байна.

Нээрээ ч хүнд өөрөөс нь үл шалтгаалаад ирдэг, бас өөрөөс нь үл шалтгаалаад авагддаг зүйл бол энэхүү “аз жаргал” гэсэн ухагдхуун юм (Энэ ухагдхуун дотор маш олон янзын ойлголт, төсөөлөл, амьдралын өрнөл, төлөв байдлыг өгүүлж байгаа шүү дээ). Тэгэхлээр энэ нь хүмүүнээс өөрөөс нь үл шалтгаалдаг, өөрийнх нь хяналтанд баригддаггүй, тогтворгүй, найдваргүй, түр зуурын, тохиолдлын хором мөчийг хэлдэг шиг.

Эндээс “аз жаргал”-ын талаархи хүмүүний олон янзын төсөөллүүд нь цаг зуурын, үзэгдээд л өнгөрдөг, өөрт нь тэнгэрлэг өөрчлөлт шинэчлэлт, дотоод хорон муугаа ялган таних, улмаар түүнийгээ ялах хүч онгод, ялалт, тэдгээрийнхээ хүлээснээс ангижрах эрх чөлөөг өгдөггүй, тэр тусмаа Мөнх Амийг өгдөггүй, хуурмаг хоосон ухагдхуун гэдэг нь анзаарагдана.

“Аз гэдэг сохор юм. Сохор хүнийг ч дайрч болдог. Харин мэргэн хүн чадал эрдэмдээ шүтдэг юм”, гэж эртний нэгэн киноны баатар (Цогт тайж) өгүүлдэг нь санаанд орж байна. Энэ нь тун ч оносон үг, гэж би боддог. Тиймээс ч үүнээс хойш энэхүү ухагдхууныг “цэнгэл жаргал” гэвэл яасан юм бэ, гэж бодогдох юм. Гэхдээ хүмүүний оюун санаа, зүрх сэтгэлд бат бөх суулгагдсан нэр томъёо тул энэхэн захиандаа хэвээр нь ашиглая.

Хүн унах унаагүй, явган явдаг ч бай, орох оронгүй, айлын хажууд толгой хорогддог ч бай, тэр ч бүү хэл бичиг үсэг тайлагдаагүй, амьдралдаа хот орон газар очиж үзээгүй ч бай аз (цэнгэл) жаргалыг мэдэрч, амар тайван, сэтгэл ханамжтай амьдарч болдог.

Аз (цэнгэл) жаргал гэдэг ойлголт нь хийсвэр хоосон, хуурмаг ухагдхуун биш ээ. Аз (цэнгэл) жаргал бол үнэхээр бодит зүйл. Гэхдээ гарт баригддаггүй, нүдэнд харагддаггүй, чихэнд сонсогддоггүй, хамарт үнэрлэгддэггүй, аманд амтлагддаггүй ухагдхуун.

Аз (цэнгэл) жаргал зөвхөн Эзэн Бурханы мутарт л бий. Тэр мутараа дэлгэн түүнийг таны зүрхэнд өгвөл, санаанд тань оромгүй эгэл жирийн ахуй нөхцөл, энгийн орчин тойрон, ердийн учрал тохиолдлоос баяр хөөрийг амсаж, аз (цэнгэл) жаргалтай амьдрах болно. Энэ нь хүний зүрхэнд Ариун Сүнснээс өгөгддөг, байгаа зүйлдээ сэтгэл ханамжтай байх, хэн байгаадаа талархалтай байх мэдрэмж юм. Бас энэ нь, Эзэний Үгнээс өгөгддөг дотоод зүрх сэтгэлийн ухаарал, гэгээрэл, амар тайван юм.

Эзэн хүмүүнийг аз (цэнгэл) жаргалтай байлгах бүх нөхцөлийг бүрдүүлж өгсөн байдаг. Биднийг шавьж хорхой биш, тухайлан хүн болгон төрүүлсэн. Амьсгалах агаар, идэх хоол, сайхан эх орон, сайн эцэг эх, ах эгч дүүс, сайн хань ижил, сайхан үр хүүхэд бүгдийг л өгдөг.

Бас дээр нь там руу чирэх гэм нүгэлийг минь, цорын ганц Хүүгийнхээ загалмай дээр урсгасан цусаар угааж, цэвэрлэж өгөөд, дахин амилалтаар нь Мөнх Амийг бэлэглэсэн. Энэ бүхнийг ойлгож ухаарч, итгэж үнэмших юм бол энэ ертөнцөд хэнтэй ч зүйрлэшгүй, юугаар ч хэмжишгүй аз (цэнгэл) жаргалтай нэгэн болно. Тэгээд амьсгалах мөч бүрдээ Эзэн Бурхандаа талархаж амьдрах болно.

Амьсгал гэснээс, намайг оюутан байхад, манай сургуульд сурч байсан нэгний тухай цухас дурьдая. Тэрээр уушигны өмөн үү, гэдэг өвчин туссан нэгэн байсан. "Эрүүл саруул, зүв зүгээр л амьсгалаад алхаж байх чинь ямар их ивээл, нийгүүлсэл, аз жаргал гэж санана..." гэж ярьдаг байж билээ. Учир нь уушиг нь хүнд өвчтэй учраас, үе үе амьсгал нь боогдож тарчилдагсан. Лав л миний мэдэхийн, нэг удаа 2 минут хэртэй амьсгал нь боогдож, царай нь хөхрөн, газар унаад тийчэлж билээ. Дараа нь гэнэт амьсгаа татаж хэвийн байдалдаа орсон юм даг. Тэгээд л уйлаад л Бурхандаа талархаж байсан.

Үүнийг хараад би, эрүүл бүрэн бүтэн биетэй, саруул оюун сэтгэлгээтэй, тэгээд болоогүй гэм нүгэлээ уучлуулсан, Эзэнийхээ төлөө сурч, боловсорч, хүн төрөлхтөний сайн сайхны төлөө зүтгэж, тэмүүлж яваадаа үнэхээр их талархаж билээ. Аз (цэнгэл) жаргал бидний эргэн тойронд, яг хажууд, дэргэд байдаг, үргэлж байсаар ирсэн зүйл. Харин түүнийг харж, хүлээн авч, мэдэрч, бас үүнийг өгсөн Бурхандаа талархаж чадаж байна уу? гэдэг л гол асуудал юм.

Уг нь Эцэг, загалмайгаар дамжуулан хүн төрөлхтөнд аз (цэнгэл) жаргалыг үнэгүйгээр бэлэглэсэн боловч, ямар нэгэн хоосон аз жаргал, сэтгэл ханамж, таашаалын эрэлд донтсоор, хэзээ ч жинхэнэ аз (цэнгэл) жаргалыг эдэлж үзэлгүй өнгөрөн одогсод байсаар л байна.

Хэдийгээр тансаг харшид амьдравч, дүүрэн амттан өрсөн ширээнд хоолловч, сайн хань ижил, сайхан үр хүүхэдтэй болж, итгэмжит нөхдөөр хүрээлүүлэвч, авъяас билэг, эрдэм боловсролыг эзэмшивч, эрх мэдэл, нэр алдарт хүрэвч, үргэлж сэтгэл дундуур, илүү ихийг нэхээстэй, шаардаастай, гомдолломтгой, ялархуу, бусдад байгаатай өөрийнхийг харьцуулсан, тэгээд бусдын зүйл илүү сайхан санагдаж, өөрийнхийг гологч нэгэн нь ямар золгүй нэгэн бэ.

Бүр Христийн дотор, Түүнд үйлчилдэг, зүгээр ч үгүй бусдыг харахад амжилттай, үлгэр дууриалтай үйлчилж буй мэт итгэлийн хүмүүс ч, ямар нэгэн зорилго, төлөвлөгөө, төсөөлөлдөө боолчлогдон донтож, тэдгээрийнхээ биелэлтийн төлөө өдөр шөнөгүй шаналан, аз (цэнгэл) жаргал, баяр хөөрийг мэдрэхгүй, амталж үзэхгүй байгаа нь анзаарагддаг. Нэг л их хийрхэл, ачаа дарамт өөрийнхөө болон эргэн тойрныхныхоо нуруун дээр овоолсон, өөрөө ч дарамт стресстэй, бусдыг ч дарамтлан ядраасан, оршин байгаа орчин тойрондоо айдастай, уйтгар гунигтай уур амьсгал, хүнд нөхцөлийг бий болгодог хүн байх юм.

Ариун Сүнсний үр жимс болсон бурханлаг даруу зан чанар, тэнгэрлэг ёс суртахууны ямарч төлөвшил, өөрчлөлтгүй, өөрчлөгдөхийг ч эрмэлздэггүй, үргэлж өөрийнхөө “зөв” гэж боддог, өөрийнхөө “зөв”-ийг бусдад тулгаастай, тэрхүү “үнэт эрдэнэ”ээ аливаа шүүмжлэл, зэмлэл, анхааруулгаас амь тавин хамгаалаастай, тэгээд “дэлхийн гэрэл, газрын давс” байхыг бусдад “заадаг”, Бурханы хайрын тухай цэцэрхэн “номолдог” нэгэн байх юм.

Хэзээ ч ханаж цаддаггүй мангас адил хоосон хомхой зүрхтэй, тэгээд болоогүй Бурханы төлөө, Түүний ариун зорилгын төлөө, бусдын сайн сайхан, авралын төлөө гэхчилэн тэрхүү аймшигтай харанхуй байдлаа гоёж хаацайлах нэгэн нь хөөрхийлөлтөй.

Өөрөө хэзээ ч аз (цэнгэл) жаргал, баяр баясгалантай байж үзээгүй хүн, ямар ч сайхан нэр томъёо, зорилго хараагаар гоёод бусдад аз (цэнгэл) жаргал, баяр хөөр, хайр энэрлийг дамжуулж, өгч чадахгүй. Энэ нь зүрхэндээ Бурханыг болон бусдыг биш, харин өөрийгөө л бодож, өөртөө л хэт төвлөрч, бардамнан явдагаас болдог юм уу даа, гэж бодогддог юм.

Хүний дотроос, зүрх сэтгэлээс элдэв хорон муу нь гарч хүнийг бузарладаг, гэж, Эзэн Есүс айлддаг. Бурханы хүмүүсийн хувьд элдэв зүйл төлөвлөж, нэр алдар мөрөөдөж явах нь зохисгүй бөгөөд энэ байдал нь Эзэнээс өгсөн аз (цэнгэл) жаргалыг нь гутаадаг. Харин Эзэний хайрыг, мөнхийн үнэнийг бусадтай харамгүйгээр хуваалцах нь аз (цэнгэл) жаргалыг маань улам үнэ цэнэтэй болгодог.

Хонгорхон Бурханы охин минь ээ, аз (цэнгэл) жаргал бол гадаад үүрэг хариуцлага, эрх мэдэл, байр суурь, үзэгдэх эд хөрөнгө, эзэмшил, харагдах ажил үйлс, бүтээмжээс илүүтэй дотоод сэтгэлийн ухаарал, гэгээрэл, чөлөөлөлт бөгөөд үр дүнд нь, хэн ч авч чадахгүйгээр зүрхэнд тань нутагладаг тэнгэрлэг амар амгалан юм шүү. Энэ нь бидний Аврагч Есүс Христийг зүрхнийхээ гүнд хайрлан, дээдлэн хүндэлж нөхөрлөсөн, Түүн рүү тэмүүлсэн амьд харилцаанаас ирдэг.

Өгөх нь авахаасаа илүү ерөөлтэй, гэж Эзэний айлдасны дагуу, бид бусдаас, амьдарлаас, Бурханаас аз (цэнгэл) жаргалыг горьдон хүлээдэг бус, харин бусдад, амьдралд, Бурхандаа хэрхэн сэтгэл ханамж, баяр баясгалан, аз (цэнгэл) жаргалыг өгөх вэ?, хэрхэн өөрийгөө бусдын аз (цэнгэл) жаргалын төлөө золиослох вэ?, гэсэн хандлага, сэтгэлгээгээр амьдарвал жинхэнэ аз (цэнгэл) жаргалыг өөрөө бас амсах болно.

Түүхээс харахад хувь хүн ч бай, нийт хүн төрөлхтөн ч бай, өөрсдөө хэзээ ч жинхэнэ аз (цэнгэл) жаргалыг цогцлоож чадаагүй. Хүмүүний аз (цэнгэл) жаргалын төлөөх тэмцэл, эрэл хайгуулын үр дүнд соёл урлагын, гүн ухааны, техник технологиин ололт амжилтыг эзэмшиж, амьдрах ухааны зохих мэдлэг туршлагыг хуримтлуулж, ахуй орчины таатай нөхцөлийг бүрдүүлж, танин мэдэхүйн, засаглал эмх цэгц, нийгмийн зохион байгуулалтын тодорхой өндөрлөгт хүрсэн ч, тэдгээр нь улам л хүмүүнийг аз (цэнгэл) жаргалаас нь холдуулж, эсвэл хүмүүнээс аз (цэнгэл) жаргалыг нь булааж буй мэт.

Өнөөдөр бидний толгой дээгүүр буун сум шунгинаагүй байна. Гэтэл дэлхий дээр 400-н сая гаруй хүн дайн дажны хөлд, хэзээ ч үхэж мэдэх нөхцөлд, айдас дарамттай амьдарч байна. Бас өлсгөлөн гачигдал биднээс хол байна. Харин наад захын эрүүл хүнс, энгийн хооллох нөхцөлөөс хол, тэр ч бүү хэл ундны цэвэр ус ч олдохгүй, гачигдсан өлөн зэлмүүн байдалд 1,6 тэрбум хүн амьдарч байна. Үе үе халдварт өвчин дэгддэг, үй олноороо хиардаг, эрүүл ахуйн наад захын шаардлага хангагдаагүй орчинд 800-н сая гаруй хүн амьдарч байна.

Баян тарган, хөрөнгө зоорь ихтэй, юугаар ч дутагдаагүй мэт боловч, эдийн засгийн хямрал шуурганаар өнөөх нь дундраад, хорогдоод, банк нь дампуурч эсвэл хувьцааных нь ашиг унамагц амиа хорлодог өрөвдөлтэй хүмүүс ч зөндөө байна. Хуруу хумсаа хуйхлан байж, нэр нүүрээ баран байж, тэр ч бүү хэл бусдыг шулан мөлжиж, хууран мэхлэн байж хураасан хумьсан, бусдаас харамлан хамгаалан байж хав дарж бөөцийлсөн эд хөрөнгө, мөнгө төгрөгийг нь “...хэзээ, хэн, хаанаас гарч ирээд тэдгээрт нь халдчих нь вэ, хэрхэн тэдгээрийгээ үнэгүйдүүлэхгүй, шатаахгүй, дампуурахгүй байх вэ...”, гээд л үсээ бууралттал шаналсан зовсон хөөрхийлөлтэй, гаслант амисууд ч энд тэндгүй байна.

Хүн энэ ертөнцөд нүцгэн ирээд, нүцгэн буцдаг. Эндээс юу ч авч явж чадахгүй. Тиймээс ч энэ ертөнцөд үлдэх хоосон зүйлийн төлөө биш, харин эндээс Мөнхийн улс руу хамт явах хайртай дотно хүмүүсийнхээ төлөө, бас авралын үнэнийг мэдэхгүйгээс аз (цэнгэл) жаргалгүй байгаа харанхуй хүмүүсийн төлөө, мөн тэнгэрлэг баялаг болох хайр, итгэл, найдвар, сэтгэлийн тэнхээ, баяр баясгалан, амар тайван, эр зориг, мэргэн ухаан, даруу зан, энэрэл нийгүүлсэл, өгөөмөр нинжин сэтгэлийг эзэмшиж, тэдгээрээр төлөвшихийн төлөө, Ертөнцийг Бүтээгч Эзэн Бурхантайгаа дотно нөхөрлөж, Түүнийг л төгс танин мэдэхийн төлөө амьдрах нь аз (цэнгэл) жаргал билээ. Энэхүү ухамсартай, зорилготой, эцэст нь ялалтанд хүргэдэг амьдралын хэв маяг нь л хүмүүнд бие махбодын ч, сэтгэлийн ч жинхэнэ аз (цэнгэл) жаргалыг өнө мөнхөд эдлүүлдэг болой.

Тиймээс дахин хэлэхэд, “аз жаргал” бол ертөнцийг болон өөрийг нь бүтээсэн Мөнхийн Бурханыг мэддэггүй, төрөх үхэхийн хооронд л амьдардаг, махан бодит хүний хувьд л тохиож болох, олдохдоо олдоод, олдохгүйдээ олддоггүй, олдсон ч үүрд хамт байдаггүй, хувь заяа нь болж чаддаггүй тийм ойлголт, ухагдхуун мэт.

Харин Бурханы ариун хүүхдүүд болсон бидний хувьд, Мөнхийн Эзэний өгөөмөр зүрх сэтгэлээс (Ариун Сүнснээс) үүрд бидний зүрх сэтгэл, бие махбодид өгсөн гэрэл гэгээ, төгс төгөлдөр, цаглашгүй баяр баясгалан, оргилсон хайр энэрлийн мэдрэмж, ухаарал, гэгээрэл, талархалын амьдрал маань бүхлээрээ аз (цэнгэл) жаргал юм.

Хүмүүний аз жаргал, зөвхөн өөрт нь, эсвэл ойрын хүрээлэлд нь түр зуурын нөлөө, тусгал болдог бол, Бурханы үрсийн аз (цэнгэл) жаргал нь тэдний дотроос халиад, улмаар үй олонд хүртэж, нөлөөлж, бусдыг дотоод эдгэрэл чөлөөлөлт, ухаарал гэмшилд удирдаж, улмаар аврал, мөнхийн амьдралд, нэг үгээр аз (цэнгэл) жаргалд хүргэдгээрээ ялгаатай.

Бурханы хайртай охин минь ээ, зүрх сэтгэлдээ өдөр тутам, цаг мөч бүр аз (цэнгэл) жаргалыг амтлагтун. Бас бусдыг аз (цэнгэл) жаргал руу удирдагтун. Үүрд мөнхийн аз (цэнгэл) жаргалыг таны зүрхэнд өгсөн өөрийн Бурханыг хайрлан хүндлэгтүн. Амжилт, аз (цэнгэл) жаргалыг хүсэе. Чанга тэврэн үнсэе. Түр баяртай.

GOD bless YOU. JESUS loves YOU.

Есүгэний хувийн архиваас

Элч Паул “Галат” номонд Ариун Сүнсний тухай юу юуг зааж байна вэ?

Саул бол Иудейчүүдийн хэт шашинлаг, Фарисай бүлгийн хүн бөгөөд (Үйл. 22:6)(Гал. 1:14) шашны эрдэм мэдлэгт сайтар боловсорсон нэгэн байлаа. Тэр Христийн золилтоор хүн төрөлхтөнд ирсэн Авралын итгэлийг Иерусалемд дөнгөж цэцэглэж байхад нь улайран (Гал. 1:13) хавчигч байсан.

Христийн Чуулган нь гаж хортой урсгал гэж үзэн, үүнийг нухчин дарах нь Эзэний таалалд нийцнэ гэдэгт бат (Үйл. 26:9) итгэдэг байжээ. Харин Эзэн бол, үйлс үйлдлээс илүүгээр зүрх сэтгэлийн хандлагыг чухалчлан үнэлдгийг эндээс харж болно.

Товлосон цаг болж, Саул Дамаск руу “Эзэний төлөөх хатуу ширүүн шүүлт”-ийг гүйцэтгэхээр явж байлаа. Яг тэр үед Эзэн түүнд Өөрийгөө илчлэн, хэдхэн хормын дотор махан биеийн хуульч Саулыг, цоо шинэ сүнслэг Паул болгосон юм.

Хуучин амьдарлынхаа хүрээнд хичээнгүй зүтгэлтэйгээрээ нэртэй алдартай байсан түүнд, тэрхүү хуучин бүхнийхээ эсрэг довтлон, үгүйсгэн зүтгэнэ гэдэг бол, хүний санаанд оромгүй хүч чадал, шийдэмгий зориг шаардсан үйлс юм. Тэрхүү харанхуй цаг үед яаж чадсан юм бэ?, гэмээр асар их ажил үйлчлэл амжуулсан нь бахадмаар.

Паулын бичсэн, Христитгэлийн суурь онолууд болсон захидлууд өнөөдөр ч үй олон итгэгчдийн амьдарлыг чиглүүлдэг. Эдгээр нь бүгд Ариун Сүнсний хүч, онгодоор удирдуулан хийгдсэн түүхэн гайхамшигт гэрчлэл юм.

Паул Галатын Чуулганд бичсэн захидалдаа Ариун Сүнсний талаар хэдэн онцлог зүйлийг өгүүлсэн байдаг.

Үүнд: 1. Ариун Сүнс нь тухайн хүн Есүс Христийн (Гал. 3:1, 2) загалмайн авралын үйлсэд итгэсэн тохиолдолд л өгөгддөг, гэсэн анхны тулгуур няцаагдашгүй үнэнийг баталсан. Өөрөөр хэлбэл, Сайн мэдээгээр л дамжин Ариун Сүнсийг (Иох. 14:6) авч болно гэсэн цорын ганц дээд үнэнийг, Галатчууд ч (Гал. 3:2) амьдарлаараа гэрчлэх ёстойг сануулсан. Учир нь тэд ч бас ингэж л Ариун Сүнсийг авцгаасан.

2. Галат нь Ромын эзэнт гүрний нэгэн томоохон аймаг ба тэд Иудейн уламжлалт шашин шүтлэг, Мосегийн хуулийн талаар огт мэдлэггүй, тэдгээртэй хамаагүй “харь” хүмүүс байсан боловч, Сайн мэдээнд итгэснээрээ Ариун Сүнсийг хүлээн авсан. Ингэснээрээ Бурханы ард түмний (Израилийн) эцэг гэгддэг “Абрахамын хөвгүүд” (Гал. 3:26-29) гэж тооцогдох ба өөрөөр хэлбэл Бурханаар ерөөгдсөн, хүлээн авагдсан ард түмэн болсон. “Эрт үед (хуулиас ч өмнө) энэ л Ариун Сүнсээр харь үндэстэн та нарт хамаатай Сайн мэдээ Абрахамд тунхаглагдсан ба тэр итгэлээр зөвтгөгдсөн шиг, та нар ч Мосегийн хуулиас огт хамааралгүйгээр зөвтгөгдсөн гэдгийг Судар ч баталдаг”(Гал. 3:6-9; 14), гэсэн.

3. Үүнээс гадна Ариун Сүнс Өөрөө Чуулганы дунд, итгэгчдийн дотор аливаа гайхамшигийг итгэлийнх нь дагуу үйлдэн хуулиас огт хамааралгүй Нэгэн гэдгээ нотолдог (Гал. 3:4,5), гэсэн. Энэ нь одоо ч Чуулганы дотор хийгддэг эдгэрэл, чөлөөлөлт, харь хэлээр ярих болон эш үзүүлэх, эдгээх, хэлийг тайлбарлах гэх мэт авъяасууд ба Ариун Сүнсний хүчээр аливаа сорилт бэрхшээлийг даван туулах, хэрэгцээт эд бараа, ахуйн хангамжийн хангалт, сүнслэг дахин төрөлт зэргийг бүгдийг нь багтаан хэлсэн нь тодорхой.

4. Ариун Сүнс бол Бурханы Хүү Есүс Христийн Сүнс бөгөөд (Гал. 4:6) Бурханаар бидний дотоод зүрх сэтгэлд амьдархаар өгөгдсөн, гэсэн. Тиймээс ч бид Бурханыг “Аав, Эцэг” гэж дууддаг. Урьд нь бид Бурхантай огт хамаагүй, элдэв хиймэл шүтээн, (Гал. 4:8) хоосон шашныг шүтэж биширдэг, зовлонтой харанхуй амьдарч байсан бол, харин одоо (Гал. 4:5) Түүнд үрчлэгдэн, хөвгүүд нь болсон. Ингэснээр Бурханлаг зан төлөв, сэтгэлгээ, эрх мэдэл, шинэ амьдрал, амлалтууд зэргийг өвлөх юм (Гал. 4:7), гэсэн. Тиймээс ч, Ариун Сүнс биднийг Эцэг Бурхантай минь улам ойр дотно болгох, улам Түүнийг үнэн зөв таньж мэдэхэд удирддаг, гэж байна.

5. Ариун Сүнс нь бидэнтэй хувьчилсан эрхэм дотно харьцаанд байж, дотоод зүрх сэтгэлийг шинэчлэхийг хүсдэг. Тэр бидний дотор идэвхитэй ажиллаж, бид түүнд нь дуулгавартай даруу байж, хүсэмжлэн тэмүүлснээр бурханлаг зан хандлага, Христийн дүр төрх, тэнгэрлэг амьдрах хэв маягт (Гал. 5:22-24) бүрэн шинэчлэгдсэнээр, бидний дээр хуулийн аливаа буруутгал ямарч эрх мэдэлгүй болно, гэдгийг нэн чухалчилсан.

6. Ариун Сүнс ийнхүү бидний дотоодод ажиллахаас гадна, бидний хоорондын харилцаанд тэнгэрлэг нөлөө бүхий чухал үүргийг гүйцэтгэж, алдсан нэгнийг ухааруулан гэмшихэд, эргэн босоход тусалдаг (Гал. 6:1, 2) ба Христийг дуурайн, бие биеэндээ тус дэм, нөмөр нөөлөг, хамжаа болон амьдархад удирддаг (Гал. 6:8-10), гэж байна.

7. Ариун Сүнсээр дахин төрсөн нэгэн нь, хуучин төрөлх гэмт мөн чанартайгаа үргэлж тэмцэж, сүнслэг тулаан дотор байнга байдаг, гэсэн Христитгэлийн амьдарлын бас нэгэн үнэнийг (Гал. 5:16, 17) элч Паул онцолсон. Тэгээд хуучин амьдрал, дур хүслүүдээ дагавал өв залгамжлах эрх хүчингүй (Гал. 5:19-21) болно. Ариун Сүнсний зүрх сэтгэлд чинь хийдэг, дууддаг бүхэнд дуулгавартай байж, хичээнгүйлэн гүйцэтгэснээр Мөнх амийг баталгаатай өвлөх (Гал. 6:8) болно, гэж бас анхааруулжээ.

Эцэст нь дүгнэхэд, бид заримдаа зүрх сэтгэлдээ болон үйлчлэлдээ, мөн хувийн амьдралдаа аливаа дүрэм журмыг тогтоож, түүнийгээ даган биелүүлхээр хичээнгүйлэн зүтгэж, бас бусдыг биелүүлхийг шахаж шаардан, чадахгүй бол буруутган яллах нь бий.

Энэ нь Христийн хувиршгүй хайр, загалмайн золиослолын Сайн мэдээг өөрсдийнхөөрөө дур мэдэн өөрчилсөн бүдүүлэг хэрэг болдог. Харин Ариун Сүнс нь, Бурханаас Мосегоор дамжуулан өгөгдсөн Хуучин Гэрээний хуулийн үйлсийг ч хүчингүй болгон ирсэн загалмайн Сайн Мэдээтэй салшгүй нэгдмэл ба, тэр тусмаа мөхөс хүмүүсийн тогтоодог аливаа дүрэм журамаас огт хамаардаггүй Нэгэн болохыг дахин шинээр нээж, танин мэдлээ.

“Галат болон Иаков ном” хичээлийн гэрийн даалгавар: №1
Шалгасан багш: Рожер Синиор UBTC 2007 он