ХРИСТИЙН ЗОВЛОН 3

 
                                      II.АГУУЛГА

1.       Үг судлал

“ Зовлон” гэдэг үг ямар утгатай вэ? 
Еврейгээр,“ynI[`oniy {on-ee'}, baeK. ke'eb {keh-abe'}”.Грекээр, “pascho, pathema, agony”. Англиар,“passion, affliction, suffering”. Эдгээр үгс нь “гай зовлон, уйтгар гуниг, шаналал, өвчин зовиур, тарчлал, ганцаар тарчлах”гэсэн утгуудыг илэрхийлдэг. 

“Passion” гэдэг үг нь хамгийн багадаа“ үүрэг хариуцлагын төлөөх чармайлт, Есүс Христйин зовлон” гэсэн утгыг илэрхийлдэг байна. Энэ үг нь “зовлон” гэсэн  Латин үгнээс гаралтай ажээ. Тиймээс ч энэ үгийг өөр ямар нэг утга агуулга бүхий хүмүүний зовлонд огт хэрэглэдэггүй. Зөвхөн Библийн түүх, Сайн мэдээний гэрчлэлтэй холбоотойгоор хэрэглэдэг юм байна.

Я. Цэвэл “Монгол хэлний тайлбар толь”-д “зовлон- гэдэг нь ямар нэгэн шалтгаанаар тохиолдсон бие, сэтгэлийн зүдүүр шаналгаа, гаслан зовлон, зовлон гамшиг” гэх мэтчилэн тайлбарлажээ.

         

         2.  Христийн зовлон гэж юу вэ?

А.   Хуучин гэрээнд Христийн зовлонгийн талаар юу өгүүлдэг вэ? 

             Зовлон нь гэмийн шийтгэлийн нэг хэсэг юм. Хүн гэм нүгэл үйлдсэнээр энэ дэлхийд зовлон зүдгүүр ирсэн. Гэмээс үхэл ноёрхсон, гэдэг нь Библийн ч илчлэлт, бас хүн төрөлхтөний нийтлэг ойлголт юм.   

  “Христитгэлийн шашин бол итгэгчидийн амьдралыг хүнд хэцүү байдал, зовлон зүдгүүрээс ангид мэт харагдуулдаг хийсвэрлэл бус, харин ч хүмүүн төрөлхтний мөн чанар ба хувь заяа болсон зовлон зүдгүүрийг, Христийн бодгаль болон авралын ажлын талаарх Библийн илчлэлтийн гол сэдэвтэй уялдуулж холбож өгдөг.”[1].

(Эх3:15)-д “...тэр эмэгтэйн үр хүүхэд чиний толгойг няцалж, чи түүний өсгийг няцлах болно...” гэсэн байдаг. Үүнийг хамгийн анхны сайн мэдээний зөн гэх бөгөөд Есүсийн загалмайд хадагдахыг зөгнөсөн гэж үздэг. 

Хуучин гэрээнд эш үзүүлэгч Исаиа Христийн зовлонгийн талаар маш тодорхой зураглан өгүүлдэг.  

“Эш үзүүлэгч Исаиагийн мэдээнд “зарц” чухал байр суурь эзэлж байсан. Түүнчлэн хүн төрөлхтөний төлөөх Бурханы авралын үйлсийг “Эзэний зарц”-ын хийх ажил гэж тодорхойлсон байдаг. Исаиагийн зарцын дуунуудад (Ис42:1-4, 49:1-6, 50:4-9, 52:13-53:12) “Зарц” асар их зовлон эдэлж буй тухай өгүүлдэг бөгөөд энэ нь төгс хүчит Хаан буюу Мессиаг хүлээж буй байдалтай нийцэхгүй мэт харагддаг. Гэвч яг энэ зүйлийг анхны Христэд итгэгчид Есүсийн амьдарлаас олж харсан юм.”[2]

Өөрөөр хэлбэл Исаиагийн эш үзүүллэг дэх “Зовлонт зарц” хэн байсан нь тухайн үед Иудейчүүдийн хувьд тодорхойгүй байсан гэж үзэж болох юм. Учир нь тэд яг л Давид, Соломон мэт, "төгс хүчит хаан"-ыг хүлээж байлаа. 

             Иудейчүүд Есүсийг өөрсдийнх нь хүлээж байсан Мессиа гэж итгээгүй бөгөөд (Иох 12:38) Мессиаг зовлон эдэлж, алуулна гэж бодоогүй. Харин Есүс тэрхүү Мессиа мөн байсан бөгөөд зовлон эдэлж, үхлийг амссанаараа хүн төрөлхтний гэмийн шийтгэлийг Өөр дээрээ авсан билээ.

“Исаиагийн дуунуудад гардаг Зарц нь “зүрх алдрахгүй, бяцрахгүй “ (42:4), “Тэр Бурханаас татгалзсангүй, гэдрэг ухарсангүй... “ (50:5) гэсэн байх агаад энэ зарц бусдын буруугаас болж зовлон эдэлж байгаа тухай гардаг (53:3-5). Зарцын эдлэж байгаа зовлонг зөгнөсөн нь Есүсийн нас барахад болсон үйл явдалтай яв цав таардаг. Эдгээр багцлал нь Есүсийг Хуучин гэрээний найдлага болсон Мессиа мөн гэж үзэх болсон Христийнхний ойлголтод жинтэй нөлөөлсөн.”[3]

              Энд маш тодорхой гарч буй зүйл нь “Түүнийг няцалж өвтгөх нь Эзэний таалал байв”.

Есүс зовлон эдлэх болно гэж эш үзүүлэгдсэн энэ үед ч Тэрээр Өөрийн гэм буруугаас зовлон эдлэх бус, харин гэмт хүн төрөлхтний төлөө байх агаад Бурхан үүнийг хүсч байсан юм. Есүс “...Миний хүслээр биш, Таны хүслээр болог... “ (Мат26:39) хэмээн залбирсан бөгөөд Хуучин гэрээний зөгнөлөөс болон Шинэ гэрээний биелэлтээс Христ зовлон эдлэх болсон нь санамсаргүй хэрэг биш ба урьдаас тогтоогдсон Бурханы үйлс байсан нь харагддаг.

              (Иса.53)-д тэрхүү Зовлон эдлэх Зарцыг дараах байдлаар илэрхийлсэн бөгөөд Есүсийн амьдралд биелэлээ олсон.

Түүнд хэлбэр дүрс, цог жавхлан байхгүй (Иса. 53:2, Лк. 22:24-30).

Түүнд бидний анхаарлыг татахуйц дүр төрх байхгүй (Иса. 53:2, Лк. 22:24-30).

Тэр үзэн ядагдаж, хүмүүсээр орхигдоно (Иса. 53:3, Мт. 26:57)

Тэр уй гашууны хүн бөгөөд өвчин зовлонг мэдэх болно.

Хүмүүс Түүнийг Бурханд яллагдаж, цохигдож, зовсон гэж бодох болно.

Тэр хүмүүний нүглийн төлөө хатгагдан, бяцрах болно.

Тэр тамлагдан зовох боловч амаа нээхгүй. 

Хавчлага, шүүх Түүнийг авч явах болно.

Тэрээр сэтгэлийн шаналлыг эдлэх болно.

Тэр Өөрийн амийг үхэл рүү асгаж, хилэнцтэнүүдтэй хамт тоологдсон

Тэр олны нүглийг Өөртөө тээж, хилэнцтэнүүдийн төлөө зуучлан залбирах болно (Иса. 53:12, Лук 23:34).

---

[1]Брюс Милн “Үнэнийг мэд” (Улаанбаатар хот:МТӨС, 2005он), 106.

[2] Жон.Дрэйн. “Хуучин Гэрээг Танилцуулахуйд” Улаанбаатар: МТӨС, 2006, 383-384.

[3]Жон.Дрэйн. “Хуучин Гэрээг Танилцуулахуйд” Улаанбаатар: МТӨС, 2006, 209.

UBTC Библийн сургуулийн оюутан С...-ийн бакалаврын зэрэг хамгаалсан дипломын ажилаас... /Үргэлжлэл бий/

ХРИСТИЙН ЗОВЛОН 2

                                           ГАРЧИГ

I. ОРШИЛ

II. АГУУЛГА


1. Үг судлал


2. Христийн зовлон гэж юу вэ?

    A. Хуучин гэрээнд Христийн зовлонгийн талаар юу өгүүлдэг вэ?

    Б. Шинэ Гэрээний Сайн мэдээний номуудад Христийн зовлонг гэрчлэн бичсэн нь.
            1) Насан туршийн хавчлага зовлон
            2) Сэтгэл санааны хавчлага зовлон
            3) Бие махбодийн зовлон ба үхэл

    В. Христ заавал зовох ёстой байсан шалтгаан нь юу вэ? Зорилго нь юу вэ?
            1) Хүмүүсийн гэм нүглийн улмаас
            2) Үй олны төгс аврал болохын тулд
            3) Сударын зөгнөлийг биелүүлэхийн тулд
                     а. Эвлэрлийн төгс тахил болох
                     б. Үйл явдлын дэс дараалал сударт зөгнөгдсөний дагуу өрнөх
            4) Эцэгийг алдаршуулахын тулд

   Г. Тэр нь бусад зовлонгоос юугаараа онцлог вэ?
            1) Есүс ариун байсан боловч зовлон амссанаараа
            2) Бурхантай хамт байсан ч Түүгээр хаягдсанаараа
            3) Бурханы хүслийг биелүүлэхийн тулд зовсоноороо
            4) Түүний энэхүү зовлон нь үй олны аврал (Сайн мэдээ) болсоноороо
            5) Түүний зовлонгийн үр дүнд нь Тэрээр үхлийг ялсанаараа


3. Бид Христийн зовлонг хэрхэн хуваалцах вэ?

   А. Библид зовлонгийн талаар хэрхэн сургаж номлодог вэ?
            1) Есүсийн нэрийн төлөө
            2) Загалмайн Сайн мэдээний төлөө
            3) Бурханы хаанчлалын төлөө
            4) Сайныг үйлдсэнийхээ төлөө
            5) Бидний өөрсдийн төлөвшил ариуслын төлөө

   Б. Христэд итгэгчдийн амьдралд загалмай үүрэх нь хэрхэн илэрдэг вэ?
            1) Дотоод зүрх сэтгэлийн тэмцэл байдлаар
            2) Гэр бүлийн болон хамгийн ойр дотны хүмүүсийн хүрээлэл дунд
            3) Нийгмийн бусад харилцаанд
            4) Чуулганы үйлчлэлийн хүрээнд

   В. Загалмайн зовлон ба асуудал бэрхшээлийг даван туулах арга замын талаархи Библийн сургааль.

III.СУДАЛГААНЫ ХЭСЭГ

IY. ДҮГНЭЛТ

Y. НОМ ЗҮЙ

YI. ХАВСРАЛТ


                                        I.ОРШИЛ 

Зовж зүдэрч буй нэгнийг харахдаа хорон муу үйлийнхээ үрийг эдлэж буй, эсвэл хараагдсан, бүр эсвэл арчаагүй дорой, амьдрах чадваргүйн улмаас гэсэн нийтлэг хандлагаар шүүн дүгнэдэг нь хүн төрөлхтөний үндсэн шинж юм. Энэ нь бүхий л соёл иргэншил, ард түмний хувьд адилхан байдаг. Бас бүхий л цаг үеүүдэд адилхан байдгийг Библиэс харахад л ойлгож болно. Жишээ нь: Есүсийн дагалдагчид сохор хүнийг хараад энэ хүн сохорсон нь эцэг эхийнх нь гэм нүглийнх үү? (Иох. 9:2) гэж асуудаг.

Харин Христийн загалмайн зовлон болон үхэл энэхүү ойлголтыг үндсээр нь эвдсэн юм. Учир нь Есүс бол нүгэлт хүмүүний биш, харин Мөнхийн Төгс Бурханы, нүгэлгүй ариун Хүү байсан атал хорон муу нүгэлтний эдлэх ёстой зовлон зүдгүүр болон ял шийтгэлийг төгс эдэлсэн. Хүмүүсийн ойлголтоор гэм нүгэлтэн л зовдог юм бол нүгэлгүй ариун Есүс аймшигт зовлон эдэлж, харамсалтайгаар нас барсаны шалтгаан нь юу вэ? гэдэг нь заавал эрэгцүүлэн бодож, хариултыг нь хайх ёстой асуудал мөн.

Есүс ариун мөртлөө зовлон эдэлсэн нь Христийн зовлон бол хүмүүний зовлонгоос эрс өөр утга агуулгатай, онцлог шинжтэйг сануулдаг. Мөн хүмүүний зовлонгийн үр дагавар нь ямар нэгэн эерэг сайн нөлөөгүй, ач холбогдол багатай байдаг бол Христийн зовлонгын үр дүнд үхэл болон чөтгөрүүд бүрэн ялагдан сүйрч, тэдгээрийн эрхшээлд боолчлогдсон үй олон хүмүүс аврагдсан, мөн аврагдаж чөлөөлөгдсөөр байгаа нь үнэхээр гайхамшиг юм.

Харин олон хүн Есүс Христийг өөрийн аврагчаар, Бурханаар хүлээн авсаны дараа, Түүнээс асуудал бэрхшээлгүй, зовлон зүдгүүргүй, бүр цаашлан үргэлжийн амжилт ололт, баяр хөөрөөр бялхсан амьдрал, хувь заяаг горьдож, тэр ч бүү хэл нэхэж шаарддаг нь нийтлэг юм. Энэ нь зүгээр нэг жирийн итгэгчдийн асуудал биш, бүр чуулганы сүнслэг удирдагчид, үйлчлэгчид ч ийм зан хандлагатай байх нь элбэг ба энэ нь номлол сургаальд нь тусгалаа олсоноор Библийн үнэнээс гажсан, ертөнцлөг уур амьсгал бүхий, хийсвэр итгэл үнэмшилтэй итгэгчид, хамт олон төлөвших нөхцөл болдог.

Гэтэл бодит байдалд энэ ертөнц асуудал бэрхшээлээр дүүрэн, тэр тусмаа Христийн дотор зөвт, ариунаар амьдархаар шийдсэн хүмүүст тэдгээр нь бүр хүндэрсэн, хурцадмал байдлаар тулгардаг нь итгэгчдийг гайхширалд оруулдаг ба улмаар мохож шантрах, итгэлийн замаасаа ухрах шалтгаан болдог. Тиймээс би, Христэд итгэгчид зовлон зүдгүүр болон асуудал бэрхшээлд хэрхэн хандах ёстой, эдгээр асуудалд Библи ямархуу хариултыг өгдөг, Христийн загалмайн зовлон болон ялалт нь энэхүү асуудлуудын эцэсийн төгс шийдэл мөн эсэх тухайд хариултыг өгөхийг зорьсон юм.





UBTC Библийн сургуулийн оюутан С...-ийн бакалаврын зэрэг хамгаалсан дипломын ажилаас...  /үргэлжлэл бий/

ХРИСТИЙН ЗОВЛОН 1

Сэдэв: “ХРИСТИЙН ЗОВЛОН ӨНӨӨГИЙН ИТГЭГЧДИЙН АМЬДРАЛД”

Судалгааны зорилго:      Энэхүү судалгааны зорилго нь бидний Эзэн Есүс Христ энэ дэлхийд ирээд нүгэлтнүүдийн төлөөх үйлчлэлдээ болон загалмай дээр цовдлогдохдоо хэрхэн зовлон эдэлж байсан талаар судалж тодруулах нь юм. Тэгээд Христэд итгэгчид чуулганы үйлчлэл болон амьдралдаа Түүний (загалмайн) зовлонг хуваалцагчид гэдгийг дахин сануулан, төлөвшилд удирдахад оршино.

Судалгааны зорилт:      Чуулганы итгэгчид Есүс Христ энэ дэлхийд бидний гэмийн төлөөс болохоор ирсэн, гэдгийг мэддэг ч энэ талаар дутуу ойлголттой учраас Христийн зовлонг хөнгөн ойлгодог. Энэ нь бид аливаа асуудал бэрхшээлгүй, саад тотгоргүй, үргэлжийн дардан үйлчлэл болон хувь заяаг шаардан нэхэх байдлаар илэрдэг. Тэгвэл итгэгчид бид харин ч Христийн зовлонг хамтран хуваалцагчид гэдгийг мэдүүлмээр байна.

Судалгааны гол асуудлууд:      Бидний Эзэн Есүс Христ хүмүүсийн гэм нүглийн төлөөс болох гэж ирээд энэ дэлхийд амьдрахдаа хэрхэн зовлонтой амьдарч, загалмай дээр нас барсан бөгөөд өнөөгийн итгэгчид Түүний зовлонгийн хуваалцагчид байх ёстой юм гэдгийг судална.  

Судалгааны асуултууд:
1. Христийн зовлон гэж юу?
2. Христ заавал зовох ёстой байсан шалтгаан нь юу вэ? Зорилго нь юу вэ?
3. Тэр нь бусад зовлонгоос юугаараа онцлог вэ?
4. Бид Христийн зовлонг хэрхэн хуваалцах вэ?
5. Библид зовлонгийн талаар хэрхэн сургаж номлодог вэ?
6. Христэд итгэгчдийн амьдралд загалмай үүрэх нь хэрхэн илэрдэг вэ?
7. Загалмайн зовлон ба асуудал бэрхшээлийг даван туулах арга замын талаархи Библийн сургааль.

Ач холбогдол:                      
Энэхүү судалгааны ажлын үр дүнд:
1. Чуулганыхаа итгэгчдэд итгэлийн амьдрал нь тийм ч дардан биш, харин ч илүү их тэсвэр тэвчээрийг, сэтгэлийн хатыг, бүрэн зориулалтыг шаарддаг гэдэгийг ойлгуулна.
2. Чуулганыхаа итгэгчдийг асуудал бэрхшээл дунд ч, зовлонтой үедээ ч талархалтай байж чадах сүнслэг төлөвшилд удирдана.
3. Би өөрөө болон итгэгчид маань Христийн зовлонгийн хамтран хуваалцагчид байх ёстойгоо гүнзгий ойлгож ухаарснаар, гомдоллох шантрах сэтгэлээс ангижрах юм.
4. Улмаар шинэ итгэгч нарт бэлэнчлэх сэтгэлгээ, хуурмаг хоосон дэлхийлэг горьдлого бүхий сүсэгийг дамжуулах бус харин ухамсартай, бүрэн хариуцлагатай, зөвт итгэлийг эхлүүлж зааж өгөх юм.

Судалгааны хязгаар:     Хуучин Гэрээ болон Шинэ Гэрээний бичээсүүдийг судалж, Христийн зовлонгийн талаар өөр бусад теологчдын ном зохиолд юу гэж хэлснийг олж харна. Хэлний бэрхшээл байгаа учраас судалгаандаа илүү түлхүү Монгол орчуулгатай ном зохиолыг оруулна.  

Судалгааны хүрээ:     Монголын Христитгэлийнхэнд танигдсан 10 цуглаанаас дор хаяж гурав буюу түүнээс дээш тооны итгэгчдээс судалгаа авна.

Судалгааны аргууд:
1. Цуглаануудаар явж, асуулга бүхий хүснэгт бөглүүлнэ.
2. Хүмүүстэй энэ судалж буй сэдвийнхээ дагуу ярилцлага өрнүүлж, тэдний санал сэтгэгдэл, гэрчлэлийг тэмдэглэж авна





UBTC Библийн сургуулийн оюутан С...-ийн бакалаврын зэрэг хамгаалсан дипломын ажилаас...                  /үргэлжлэл бий/ 

11. Төрөл зүйлүүд

Төрөл зүйл нь чухал элемент бөгөөд Библийн нилээд төвөгтэй хэсэг юм. Энэ асуудал дээр Библи судлаачдын санал тэр бүр нийлээд байдаггүй. Гэсэн ч энэ нь бидний мэдүүштэй Судрын үнэний тухай ойлголтуудыг авчирдаг нь гайхамшигтай.

Төрөл зүйл нь дотроо, хүмүүс (Адам, Мосе, Елиа, Мелхизедек), үйл явдал (хүрэл могой цутгаж дээш өргөсөн үйл явдал), бодит юмс (тахилын ширээний өргөл, хурга, утлага), тогтсон заншил (дээгүүр өнгөрөх баяр болон бусад баярууд), газар орон (Канаан нутаг, Иерусалим), албан тушаал (эш үзүүллэгч, ахлах тахилч), зэрэг олон янз байдаг.

1. Төрөл зүйл нь тэнгэрлэг зорилгуудыг илчилдэг. Бурхан юмсын зүй зохилдолгоогоор Өөрийн далд санаа зорилгыг илчилдэг болохыг Библи бидэнд хэлдэг. Жиш: Эр хүн эхнэртэйгээ нийлэн нэгэн бие болохыг, Шинэ гэрээнд Христ Чуулгантай нэгдэж нийлэх зорилгын далд хэлэмж гэж тайлсан байдаг.

2. Зөн билгийн төрөл зүйл нь ирээдүйн биелэлтийн “сүүдэр” юм. Цөлд Израильчуудын барьсан майхан сүм нь тухайн үедээ бодит зүйл байсан боловч, ирээдүйн Ариун Сүнсний сүм болох итгэгч хүний билэгдэл юм. Есүс 2 шавьдаа, Хуучин гэрээний Судрууд бүгд Өөрийнх нь талаархи зүйлс гэдгийг тайлбарласан. Энэ нь Хуучин гэрээн дэх бүх зүйл бол шууд зөн билгийн агуулгатай юм, гэсэн зүйлийг батлаагүй. Харин Хуучин гэрээ бол Христийн дүүрэн байдлыг тодотгохын тулд юм гэдгийг л харуулдаг.

(Эхлэл 22)-р бүлэгт гардаг Абрахам хүү Исаак аа Мориа уулан дээр тахил болгохоор өргөсөн үйл явдал, Шинэ гэрээний (Еврей 11:17-19) хэсэгт Абрахам соригдон, итгэлээрээ Исаакыг өргөсөн гэж байдаг. Бурхан амласан хүүгээ үхэгсэдээс буцаан амилуулж чадна гэж итгэсэн ба ёгт утгаар нь ойлговол, тэр Исаакаа дахин амилалтаар буцаан авчээ. (Иаков 2:21, 22) т Абрахам Исаакыг өргөхөд бэлэн байснаараа зөвтгөгдөн, итгэлийнхээ үйлсээр төгс болгогдсон, гэсэн байдаг.

Ийнхүү Библийн зөн билгүүдийг үнэн зөв ойлгож, илчлэлтийг авахын тулд дараахи зүйлсийг анхаарах ёстой. А. Цөөхөн үзэгдлүүдийг эс тооцвол зөн билэгдэлүүд түүхэн дэх бодит юмс, үйл явдалууд бөгөөд түүхэн маргашгүй үнэн юм. Б. Зөн билэгдэлүүд нь сүнслэг бодит үнэнийг урьдчилан харуулдаг бодит дүрслэлүүд юм. В. Хожимын биелэлт нь үргэлж зөн билэгээсээ өндөр түвшинд байдаг.

Г. Зөн билэгдэлийг болон хожимын биелэлтийг харьцуулахад төвд нь ямагт ганхашгүй үнэн байдаг. Цөөхөн тохиолдолд хоёрдогч туслах зүйлс байдаг. Д. Өнгө, тоо, материал, хэлбэр дүрс гэх мэт зүйлсэд зөн билгийг хамруулан тайлал хийх гэж бүү оролд. Е. Шинэ гэрээнд тодорхой дурдаагүй л бол явцуу, өрөөсгөл дүгнэлт хийхээс үргэлж зайлсхий.

Мөн зөн билэгдэл ба билэг тэмдэгүүд нь дараахи байдлаар ялгаатай. 1. Билэг тэмдэг нь бодит биш бол зөн билэгдэл нь бодитой үйл явдал, юмс үзэгдэл юм. 2. Хуучин гэрээний зөн билгийн тайлал, биелэлт нь Шинэ гэрээнд бий. Харин билэг тэмдэг нь харгалзах цаг хугацаагүй байдаг. 3. Зөн билэгдэл бол онцгой нэг юмс үзэгдэл, эсвэл үйл явдал. Харин билэг тэмдэг бол ерөнхий. 4. Зөн билэгдэл нь нарийвчилсан зүйлстэй байж болно, гэхдээ дандаа тийм биш. Билэг тэмдэг бол нэг зүйл юм. 5. Зөн билэгдэл нь нэг юм уу 2 билэг тэмдэгийг агуулж болно.


"Библийг ойлгох нь" номын 15-р бүлгээс хийсэн товчлол...

10. Билэг тэмдэгүүд

Билэг тэмдэг нь энгийн утганд нэмэлт санаа өгдөг зүйл юм. Энэ нь тагтаа шиг төрөлх зүйл, эсвэл загалмай шиг хүний гараар хийгдсэн зүйл ч байж болно. Хүмүүс ололт амжилтыг нь, гавъяа шагналыг нь төлөөлөн харуулсан энгэрийн тэмдэгүүдийг зүүдэг. Мөн үс засалт, хувцаслалт, шивээс зэрэг зүйлсээр өөрсдийн сонирхол, хандлагуудыг билэгдэн харуулдаг. Тагнуулчид, тусгай онцгой үүрэг биелүүлэгчид нь зөвхөн өөрсдийн явцуу хүрээнд л танигдах онцгой утгатай билэг тэмдэгийг өргөн ашигладаг.

Библид ч билэг тэмдгүүдийг олонтоо хэрэглэдэг. Тэдгээр нь байгалын, бодитоор оршдог зүйлс эсвэл гайхамшигын чанартай, зөвхөн үзэгдэлээр л харагдсан зүйл байж магад. Тэд бодит юмс (давс, гэрэл), үйлдэл (талх идэх, хот барих), тушаал захирамж (баптисм, дээгүүр өнгөрөх баяр г.м), материал (нарийн нэхсэн маалинга), тоо, өнгө, нэр (Содом, Египет, 144 000 хүн, хүрэн улаан нүгэл), метал (алт, хүрэл), үнэт зүйлс (сувд, маргад эрдэнэ), амьд бүтээл (арслан, тагтаа г.м) болон бусад зүйлс байж болно.

Билэг тэмдгүүдийг үнэнийг илчлэх болон нууцлахын аль алинд хэрэглэдэг. Тэдгээр нь, зөвхөн бодит зүйлсийг л харж, сүнслэг зүйлсийг үл тоомсорлодог, билэгдэлийн утгыг ойлгодоггүй хүмүүсээс үнэнийг нууцалдаг. Библи ихэнхдээ билэг тэмдгүүдийн цаад нууцыг илчлэлгүй, утгыг нь уншигчид эрж хайгаад олж мэдэг, хэмээн орхисон байдаг. Тиймээс бид тэдгээрийг үгүйсгэлгүй, бас орхигдуулалгүй маш болгоомжтой судлах ёстой.

Нэг зүйл хэд хэдэн зүйлийн билэгдэл болж болдог.         Жиш:   Ус нь цэвэршүүлэлтийн ба сүйрлийн аль алиныг нь билэгддэг. Нэг газар байгаа билэгдэл бусад газар ч адилхан утгыг илэрхийлдэг гэж бодож болохгүй. “Улаан” өнгийг ерөнхийд нь Христийн цус ба эвлэрүүллийн билэгдэл гэж үздэг. Гэтэл өөр олон газар, олон янзын зүйлд билэгдэл болгон ашигласан байдаг. (Иса. 63:2) т шүүлттэй, (Иса. 1:18) д гэм нүгэлтэй, холбоотой гардаг бол, (Сур. 23:31) д дарсыг улаан гээд, (Мт. 16:2) т тэнгэрийг, (Нах. 2:3) т цэргүүдийг тус тус билэгдэн илэрхийлдэг.

Мөн Илчлэлт ном тэр чигээрээ билэг тэмдэг, нууцлалаар дүүрэн бөгөөд тэдгээрийг Өөрийн товлосон цагтаа Эзэн лацыг нь нээж хүн төрөлхтөнд жинхэнэ утгыг нь мэдүүлэх нь дамжиггүй.
Библи хэдэн онцгой тоог маш өргөнөөр билэгдэл болгон ашигладаг. 1-ийн тоо нь цорын ганц Эзэн Бурхан болон нэг хүний алдаа зөрчил, эсвэл зөвт байдалтай, 3-ын тоо нь ариун байдал болон Бурханы товлосон цаг хугацаатай, 12-ийн тоо нь Бурханы сонгогдсон хүмүүстэй, 24-ийн тоо нь дээд эрх мэдэл болон зөвлөлтэй, 40-ийн тоо нь ихэнхдээ сорилт, шалгууртай, 70-ийн тоо нь цөллөг шийтгэлтэй, 144 000 нь нийт Бурханы сонгогдсон хүмүүстэй гэх мэтчилэн холбогдсон байдаг.

Хамгийн ихээр ашигладдаг тоо бол 7 юм. Энэ тоо нь билэгдэл юм, гэсэн тайлбар байдаггүй ч, үүнтэй холбоотой 600 гаруй ишлэлүүдийн ихэнхийнх нь цаана далд утга байгааг харж болно. Ихэнхдээ энэ тоогоор бүрэн дүүрэн хүч, төгс байдал, цогц нэгдмэл байдлыг билэгдсэн. Гэхдээ тоо болгон билэгдэл гэж үзэж болохгүй. Тэгвэл Иовын нас барсан 7 н хөвгүүн нь төгс байдлыг, 3 н охин нь ариун байдлыг билэгдсэн хэрэг болно.


"Библийг ойлгох нь" номын 14-р бүлгээс хийсэн товчлол...

9. Ярианы дүрслэлүүд

Энэ нь үгчилсэн бодит утгаасаа өөр зүйлийг дамжуулахад хэрэглэгддэг үг, эсвэл хэлц юм. Жиш: “Би үхтэлээ гижигдүүлсэн” гэж хэлбэл, та намайг тарчилж зовоогүй харин хөгжилтэй байжээ гэдэг утгыг хүлээн авах тул, санаа тань зовохгүй. Хүмүүсийн ярианы хэлэнд түгээмэл хэрэглэгддэг тэдгээр дүрслэл нь үгчилсэн утгаараа үнэн биш боловч, илүү хурц, сонирхолтойгоор үнэнийг илэрхийлдэг. Бидний оюун бодол ямар ч эрэгцүүлэлгүй тэдгээрийг хөрвүүлэн хүлээн авдаг.

Гэтэл Библийн үеийн ийм хэлцүүд одоо цагт огт ойлгогдохгүй, эсвэл шал өөр утгаар хүлээн авагдхаар хувирсан байх нь бий. Шинэчлэлийн 2 удирдагч Мартин Лютер, Ульрих Звингли нар “Ариун зоог”-ын талаар Христийн хэлсэн “Энэ бол Миний бие, ... бас цус” гэсэн тухайд санал зөрөлдсөн байдаг. Ромын католик чуулган, ёслолын үед хэрэглэж буй талх, дарс нь үнэхээр Христийн бие, цус болдог гэж зааж байсан.

Звингли үүнийг “зүйрлэл” гэж үзээд, талх дарс нь бие, цус болохгүй, харин хүндэтгэлийн энэ онцгой ёслолын үед Христ Сүнсээрээ хамт байдаг гэсэн. Гэтэл Лютер католикчууд шиг шууд утгаар нь ойлгох нь зүйтэй, гэхдээ улам илүү гүн хүндэтгэлтэй хандах ёстой, гэж үзсэн. Учир нь католикчууд ёслолоос үлдсэн талх дарсыг газарт булдаг, асгадаг байсанд нь Лютер эмзэглэдэг байжээ.

Энэ нь одоог хүртэл нэг мөр шийдэгдээгүй асуудал юм. Тиймээс ч Библийн зарим бүрхэг тодорхойгүй багцлал, ишлэл нь зүйрлэл үү, эсвэл ярианы дүрслэл хэлц үү, гэдгийг судалж мэдэх нь нилээн чухал. Сударт ярианы хэлний олон төрлийн дүрслэлүүдийг хэрэглэдэг.

Үүнд:                      1.   Зүйрлэл нь үндсэндээ огт холбоогүй 2 зүйлийг хооронд нь уялдуулан харьцуулдаг. Жишээ нь, “Би бол өт”, “зөвт хүн бол урсгал усны дэргэдэх мод адил”, “Тэр намайг баяр хөөрөөр бүсэлсэн”, “Бурхан бол хад”, гэх мэт. Яагаад баяр хөөрийг бүстэй адилтгав? Баяр хөөрийг бүсэлж болох уу? Бүс нь хувцасыг биетэй барьж, хүнийг чөлөөтэй хөдөлж, ажиллах боломж өгдөг. Түүнчлэн баяр хөөр ч сүнсэнд хүч болж, айдас дарамтнаас чөлөөлдөг.

2.   Харьцуулалт нь зүйрлэлтэй нилээн төстэй боловч, “шиг, мэт” гэх үгсийг хэрэглэн бодитоор илэрхийлэгддэгээрээ ялгаатай. (Хос. 6:4) т “Та нарын хайр энэрэл чинь өглөөний манантай адил ба эртлэн алга болдог шүүдэртэй адил юм.” гэсэн. Энэ нь итгэмжит бус, хувирамтгай хайрыг дүрсэлсэн байна. Гэтэл бас (Хос. 14:5) д “Би Израильд шүүдэр шиг байх болно.” гэж хэлсэн. Энэ нь амьдралыг дэмжин ургуулагч ус чийг, шүүдэртэй Өөрийн итгэмжит, хувиршгүй хайрын хүч нөлөөг харьцуулсан. Эндээс нэг харьцуулалт нөгөө хэсэгт ашиглагдахдаа яг адил байх албагүйг харж болно. Утгыг нь хам сэдэвтэй нь холбон тайлах ёстой.

3.   Төлөөлөлийн аргыг Сударт бас ашигласан. (Илч. 3:7) д “Давидын түлхүүр” гэсэн нь эрх мэдлийг түлхүүрээр төлөөлүүлж байна. (2 Кор. 3:15) д “Мосэг унших бүрд” гэж Хуучин гэрээний хуулийн номыг зохиогчоор нь төлөөлүүлсэн. (Иер. 25:29) д “Би газар дэлхийн бүх оршин суугчдын эсрэг илдийг дуудаж байна” гэснээрээ илдээр бүхий л уур хилэн, шийтгэлийг төлөөлүүлсэн.

4.   Амилуулах дүрслэлийн арга нь амьгүй юмс үзэгдлийг амьтай мэт дуудаж, үүгээрээ цаана нь хэн нэгнийг төлөөлүүлэх арга юм. (Дуу. 68:16) д “Олон өндөр оргилтой уулс аа, ...Та нар юунд атаархан харна вэ?” гэж уулсыг амилуулж бичсэний цаана, Бурханы Чуулганд атаархах бусад тогтолцоог зүйрлүүлэн дүрсэлсэн.

5.   Хүншүүлэн дүрслэх аргыг нилээн өргөн ашигладаг. (Дуу. 98:8) д “Гол мөрнүүдийг алга ташуулан, Уул нуруудыг баярлан дуулуул” гэж хүншүүлэн асар их баяр хөөрийг зүйрлүүлсэн. (Дуу. 19:2) т “Өдрөөс өдөрт тэдгээр нь ярьж” гэснээрээ Бурханы бүхэл бүтээлүүд, Түүний оршин буйг, Түүний хязгааргүй сүр жавхланг гэрчилж алдаршуулдагыг зүйрлэсэн.

6.    Хэтрүүлэлийн арга нь хэлэх гэсэн зүйлдээ онцгойлон анхаарал татахын тулд, санаатайгаар дэгсдүүлдэг хэлбэр юм. (Ле. 26:36) д ”Хатсан навчны сэрчигнээн тэднийг үлдэн хөөх бөгөөд...” гэж хэлсэн нь, хэн ч навчны сэрчигнээнээс айхгүй нь тодорхой боловч, Бурхандаа итгэмжгүй байвал асар сул дорой, мөхөс болж, зовж зүдрэх болно гэдгийг зүйрлэн хэлсэн.

7.    Байцаалтын аргыг бас Сударт нилээн ашигласан байдаг. (Ез. 18:25) д “Гэсэн ч та нар Эзэний зам нь зөв бус юм, хэмээн өгүүлдэг. Одоо сонсогтун Израилийн гэрээ. Миний зам нь зөв бус гэж үү? Зөв бус нь та нарын замууд бус уу?” гэж байцаан асууж зэмлэсэн. (Ез.18:31, 32) т “...Израилийн гэрээ яагаад чи үхнэ вэ? Учир нь Би үхэгсдийн хэнийх нь ч үхэлд баярладаггүй. ...Тиймээс гэмшиж, амьдар.” гэж байцаагдах асуугдах болсон шалтгаан нь өөрсдөд чинь байна, гэдгийг хэлдэг.

8.    Ёгтлол дүрслэл нь утгаасаа эсрэг зүйлийг ярьдаг тул бусад дүрслэлүүдээс өөр юм. Ярилцах үед ёгтлол нь дууны өнгөөр танигддаг бол, Библид бичмэл хэлбэртэй ёгтлол нь танигдахдаа бэрхшээлтэй байж болно. (2 Сам. 6:20) д “Израилийн хаан өнөөдөр ямар их онцгойров” гэсэн нь Михал Давидыг шившигтэй, ичгүүртэй байдалтай байлаа, гэж егөөдөж буй хэрэг болохыг дараагын өгүүлэмжүүдээс харж болно.


 "Библийг ойлгох нь" номын 13-р бүлгээс хийсэн товчлол...

8. Судрыг Судраар тайлах нь

Библи нь Бурханы талаар хоорондоо зөрчилддөггүй нэг л мэдээг өгдөг онцгой илчлэлт юм. Хэрвээ та өмнөх аргуудыг ашиглан тайлал хийсэн боловч үр дүнд нь Библийн бусад сургаальтай зөрчилдсөн ойлголтонд хүрсэн бол, таны тайлал асуудалтай байна. Тэгэхлээр Библийн хэлдэг ерөнхий сургаальтай таацуулан тухайн багцлалаа тайлахыг энэхүү 6 дахь зарчим шаарддаг.

Библи бүхэлдээ тухайн багцлалын шилдэг хам сэдэв юм. Судалж буй багцлалд чинь тусгагдсан санааг, Библийн бусад хэсэг дэх адил төстэй агуулга бүхий багцлалуудтай, мөн Библийн ерөнхий санаатай  жишин судлахгүй бол тэс өөр утга гаргаж аваад төөрч болзошгүй. Тиймээс ч Библийг бүхэлд нь мэдэх нь төөрөгдлөөс сэргийлнэ.

(Еф. 3:14) т “Иймд би Эцэгийн өмнө өвдөг сөгдөж” хэмээн Паулын хэлсэнийг уншаад, залбирахдаа заавал өвдөг сөгдөх ёстой гэж Библи хэллээ, гэж дүгнэж болох юм. Гэтэл ямар ч байдалтай, тэр ч бүү хэл загасны ходоодноос ч Эзэнд залбирч болох бөгөөд, байрлал биш чин зүрхний даруу хандлага л Бурханд таалагддаг гэсэн бусад сургаальтай зөрчилдсөн хэрэг болно.

Тэрслүү ба хуурамч гаж сургааль нь Библийн тодорхой хэсгийг нь онцгойлон, бусад хэсгийг үл ойшоодог хэв шинжтэй. Библийн бүхэл сургаальд таацуулан хянах хүртэлээ тухайн багцлалын утга агуулгын талаар яаран дүгнэлт хийхгүй байх даруу хандлагаар судалгаагаа хийх ёстой.

Зарим номлол зөвхөн Хуучин гэрээний олон хуулиудад түлхүү ач холбогдол өгч, Христ доторхи итгэлийн зөвтгөлийн хүчийг сааруулдаг бол, зарим нь зөвхөн Шинэ гэрээн дотор л итгэгчдийн мэдэх шаардлагатай бүх зүйл байгаа гэж туйлширдаг. Дахин хэлхэд, Библи бол нэг цогц, салгагдашгүй нэгдмэл Бурханы илчлэлт бөгөөд нэг хэсгийг нь бүхэл ухагдхууных нь хүрээнд ойлгон судлах ёстой.

Нэг л зүйлийн тухай ярьдаг Библийн өөр өөр хэсгүүд дэх ишлэлүүдийг параллел багцлалууд гэдэг. Тэдгээрийг сайтар судалснаар тухайн сэдвээр Библи бүхэлдээ юу хэлэх гээд байгааг гаргаж ирж болно.

Параллелуудыг авч үзэхдээ 1-рт, Параллел нь нэг л үнэнийг баталдаг. Санаа нь илэрхий төстэй байх ёстой. Заримдаа адилхан үг 2 ишлэлд гарсан ч параллел биш байж болохыг анхаар.
2-рт , Адил төстэй байдал ба ялгаануудыг анхааралтай харж, бичиж тэмдэглэ. Ялгаанууд нь утгад хэрхэн нөлөөлж байгааг онцлон судал. Ишлэл бүрийг хам сэдвээр нь судал.

Жиш: (Мт.10:34) т Есүс “Би энхтайвныг бус, илд авчирхаар ирсэн” гэж хэлдэг. Үүнийг шууд утгаар нь ойлгох нь зөв үү? Хам сэдвийг нь унших юм бол энд байр суурь, зэрэг зиндааны талаархи тэмцэлийн тухай өгүүлдэг. (Лк.12:51) бол үүний параллел багцлал юм. Өгүүлбэр бараг бүхэлдээ адил боловч “илд”-ийг “хагарал” гэж өөрчилсөн байна.

Өмнөх болон эндэх хам сэдвүүдийн аль аль нь, итгэлээрээ хуваагдсан гэр бүлүүдийн тухай байна. Тэгэхлээр энд жинхэнэ илд мэс, дайн дажины тухай бус, харин Христэд итгэгч нь чин сэтгэлээсээ Есүсийг дагаж, Түүнийг өөрийн амьдралд 1-рт тавьбал, тэр хүн болон гэр бүлийнх нь хооронд хагарал, зөрчил үүсэх тухай байна.


"Библийг ойлгох нь" номын 12-р бүлгээс хийсэн товчлол...