Итгэлийн талаархи ярилцлага-4 Төлөвшихүйг индексжүүлэх оролдлого

За эдгээр нь жинхэнэ Христитгэлийн гол үзүүлэлт, үнэнч итгэгчийн тодорхойлолт болж чаддаггүй, зөвхөн туслах орц төдий бүрэлдхүүн үзүүлэлт юм байна. Тэгвэл жинхэнэ зөв төлөвшсөн итгэгчийн шинж ямар байх вэ? Жинхэнээсээ Бурханы хүслийн дагуу амьдрана гэж яах вэ? Хэрхэн үнэн зөвөөр Эцэгийн хүслийн дагуу өөрчлөгдөж байгаагаа мэдэх, мэдрэх вэ?

Энэ нь нилээн ярвигтай асуудал. Энд тодорхой жор, аргачлал үгүй. Учир нь гол харилцагч маань болох Эзэн маань бүхнийг мэддэг, чаддаг бөгөөд, хязгааргүй төгс боломж, эрх мэдлийг эзэмшигч Нэгэн тул, амь сүнс болгонтой хамгийн зохистой, таарсан хувилбараар тулж ажилладаг ба ажиллах боломжтой.

Одоо яриа маань эндээс “төлөвшилийн итгэл”-ийн талаархи сэдэв рүү орж байна. Энэ нь цаашдаа үргэлжлүүлэн хэрхэн Эзэний хүслийн дагуу, энэ дэлхийн гэрэл, давс болон амьдрах вэ?, гэсэн том сэдэв юм. Бурхан болон Түүний сонгосон ард түмний хоорондын харилцаа гүнзгийрэн батжхад “хөвч хөндөлт” (Эх. 17:9-14)(Ром 2:29) гарааны үндсэн нөхцөл болдгыг “Гэрээ”-нд заасан байдаг.

Судар бидэнд, хүнийг зүгээр л гэмт байдалд нь, бузар таашаалд нь “жаргаахын” тулд Бурханы Хүү нас барсан гэдэггүй. Эзэн “…чи дээрээс дахин төрөхгүй бол (Иох.3:3-8), өөрчлөгдөж хүүхдүүдтэй адил болохгүй бол (Мт.18:3), тэнгэрийн хаанчлалд орохгүй…” гэдэг. Бас, Намайг “Эзэн минь, Эзэн минь” гэсэн болгон тэнгэрийн хаанчлалд орохгүй. Харин тэнгэрт байгаа Миний Эцэгийн хүслийг биелүүлдэг хүн орно (Мт.7:21), гэж анхааруулдаг.

Эцэг биднийг, Өөрийнх нь Хүү Есүс Христтэй нөхөрлөн (1Иох.1:3-7)(1Кор.1:9), сайн үйлсийн төлөө, Түүний дүр төрхөөр (Еф.2:10), (Фил.2:5) шинэчлэгдээсэй гэж хүсдэг. Тэгэхлээр Христитгэл маань нэг удаагийн гэмшил, сэтгэл хөдлөлөөр бүх асуудал шийдэгддэг байдлыг шаарддаг, зарим хүний гэнэн бодол төсөөллөөс огт өөр, үргэлжлэн өрнөж, үргэлж шинэчлэгдэж байх тэнгэрлэг үйл явц юм.

Энэ нь авъяас болон мэдлэг дотор хүчирхэгжин, нийгэм ба Чуулган доторхи байр суурь, нөлөөлөл өргөжин бэхжих байдлаар илэрхийлэгдхээсээ илүүтэй, Есүстэй тогтоосон хувьчилсан дотно нөхөрлөл дотор батжсан, дотоод мөн чанарын, зүрх сэтгэл, зан хандлагын өөрчлөлт, байх ёстой (Гал.5:22).

Бас энэ нь айхтар сүнслэг ид шид, эрдэм чадлын талаархи яриа ч биш. Харин загалмайн үхлийн, урссан цусны үнэ цэнийг, дахин амилалтын утга учрыг, эцсийн өдрийн дүр зураглалыг улам тодорхойгоор, урд урдхаас илүү гүн батаар зүрхэндээ дахин дахин ухаарах үйл явц юм. Түүний хайрыг улам ойлгон, ээнэгшиж, Түүний өмнө улам даруу, дуулгавартай болох үр жимс боловсрох нь, гол шинж нь болдог.

Үе үеийн Эзэний олон ариун хүмүүс, Христийн доторхи хувь хүний өөрчлөлт, тэнгэрлэг төлөвшил нь яг ямар зарчим, шат дараалал дотор өрнөх, ямархуу шинж тэмдэг, үзүүлэлт харагдах талаар, өөрсдийн туршлага, мэдлэг, Ариун Сүнсний удирдамж, чиглүүлэлт зэргийг үндэслэн индексжүүлэх гэж оролдсоор ирсэн. Индексжүүлэх гэдэг нь олон талтайгаар, маш их баялаг үзэгдэл, үзүүлэлтээр илэрхийлэгддэг барьцгүй хийсвэр мэт ухагдхууныг, тодорхой барьцтай, ойлгомжтой, зураглал болгох гэсэн оролдлого юм.

Энд нэгэн, 3-н үе шат бүхий индексжүүлэлтийг таньд толилуулъя. Эхний шатыг “Тэмүүллийн үе” гэнэ. Энэ нь хүмүүний зүрхэнд Эзэн амийг (Христитгэлийг) өгсөнөөр эхэлнэ. Таны зүрх сэтгэл айдас, тодорхойгүй байдал, ганцаардал, бухимдал, хонзогнол, мухар сүсэг зэрэг харанхуйн дарамт шаналал дотор байсан. Таны эргэн тойрны амьдрал ч бүтэлгүйтэл, гачигдал, хэрүүл тэмцэлээр дүүрсэн, бие махбодь чинь өвчлөл, доройтлоор туйлдсан байсан. Таныг муу зуршил боолчилж, баларч, уруудаж байгаагаа мэдэх боловч яаж ч чаддаггүй байсан.

Гэтэл Эзэн таны зүрхэнд, “гэрэл бий болог гэсэнд, гэрэл бий болно”. (Энэ талаар дээр бид тодорхой ярилцсан. Тэр бидний зүрхэнд Христитгэлийн тулгуур үнэнүүдэд итгэх итгэл үнэмшилийг, Өөрийн сонголтоор бэлэг болгон өгсөн.) Та хар хүчнээс чөлөөлөгдсөнөө, тэнгэрлэг тайвшрал, амар амгалан зүрхэнд тань бий болохыг, гэрэл гэрэлтэхийг мэдрэх болно.

Таны эргэн тойрны тань амьдралд ч Эзэн мутраа сунган оролцож, тулгамдсан, хоолойг тань боомилсон олон асуудлыг хамгийн сайнаар, төсөөлж байгаагүйгээр ончтой шийдэж өгнө. Бие махбодид тань ч эдгэрлийг хэрэгжүүлнэ. Та Чуулганд хамрагдаж, Эзэний Үгэнд шунан дурлах болж, ариун хүмүүсийн нөхөрлөлийг, бусад хуучин хүрээлэл, орчингоосоо илүүтэй эрхэмлэн үздэг болно.

Ийнхүү амийг авсан та, Түүний гоо сайхан, гэрэл, хүч, хайрыг улам бүр, илүү ихээр эзэмдхээр, танин мэдэхээр тэмүүлж эхэлнэ. Ингэхдээ энэ зорилгод тань саад болж байгаа тоо томшгүй хүлээс, зуршил, үзэл бодол, зан чанар, хамаарал таныг боолчилж буйг олж харна. Тэгээд тэнгэрлэг үнэн рүү тэмүүлэх тэмүүлэл, Есүсийг хайрлах хайр тань илүү хүчтэй бол зугуухан (магад нэг хоромд байхыг ч үгүйсгэхгүй) тэдгээрээсээ ангижирч, чөлөөлөгдөж эхэлнэ.

Харин та тэднийг үзэн ядахгүй, чөлөөлөгдөхөөр тэмцэхгүй, бэрхшээлээс айн (заримдаа ч таашаал авдаг гэмт зуршилаа Есүсээс илүү хайрлаж, хагацан яддаг) аялдан дагалдаж, хүлээн зөвшөөрсөн тохиолдолд, тэдгээрээс үүсэлтэй дэлхийн элдэв асуудлуудад нухлуулсан, цаана нь л гарахын төлөө зүтгэсэн, энэхүү зовлонт амьдралдаа Эзэнээ ашиглахыг оролдсон нэгэн болж, гацаж орхих өндөр магадлалтай.

Асуудлуудыг шийдэн ард нь гарах нь бидний амьдралын зорилго биш. Асуудлын цаана асуудал, давалгааны цаана давалгаа заавал байдаг нь, энэ ертөнцийн мөн чанар юм. Харин “…бүх зүрх, бүх сэтгэл, бүх оюун ухаанаараа өөрийн Бурхан Эзэнээ хайрлах нь, хөршөө өөрийн адил хайрлах нь…” (Мт.22-36-40) бидний зорилго ба, үүний төлөө асуудалтай биш өөртэйгөө л тэмцэх ёстой. Петр хэдийгээр Эзэнийг харж байхдаа, зоригтойгоор усан дээгүүр алхсан ч, давалгаа салхи (асуудлуудыг) хараад живж эхэлснийг сана (Мт.14:25-31).

Энэ үе нь уналт босолт, гэмшил харуусал, нулимас заримдаа цус, сахилгажуулалт, ухаарал ба ойлголт, баяр хөөр ба эдгэрэл, сэргэлт, амьдралын орчин нөхцөлийн эрс өөрчлөлт, шинэ танин мэдэхүй зэргийг багтаасан, адал явдал дүүрэн байдлаараа нэн онцлог. Ийнхүү та шантралгүй зүтгэсний үр дүнд, анхлан мэдэрсэн гайхалтай тэнгэрлэг эрх чөлөөг, амар амгаланг, баяр хөөрийг бүрэн өөрийнх болж байгааг ухаарна. Тэдгээр нь таны салшгүй нэг хэсэг, таныг тодорхойлох нэг чухал үзүүлэлт болно.

За ингээд, та энэ шатыг амжилттай давлаа. Мэдээж энэ нь тодорхой тогтсон цаг хугацаагүй. Зарим нь 3-н сар, зарим нь 3-н жил, бүр зарим нь бүх насаа энэ шатанд унан, босон өнгөрөөж ч магад. Бас одоо л энэ үеийг даваад, анги дэвшиж байна даа, гэж тодорхой мэдэгдэхгүй, анзаарагдахгүй зугуухан шилжилт, эсвэл эрс харагдахуйц шинэчлэл сэргэлт, дэвшил ирж ч болно.

Удаахыг нь “Алдаршууллын үе” гэнэ. Энэ үеийг дотор нь хоёр дэд бүтцэд задалж тайлбарлая.

А: Таны оюун санаа, зүрх сэтгэл, дэлхийн олон асуудлаас, хэрэггүй хоосон мөрөөдөл, хүслээс чөлөөлөгдсөн. Нэг үгээр та ариуссан. Дотоод болон гадаад эдгэрэл, шинэчлэл хэрэгжсэн. Тэгээд үр дүнд нь, Түүний хайраар, гэрлээр, үнэнээр бялхсан.

Тэгээд таны энэ дотоод мөн чанарын өөрчлөлт тань, гадаад байдалд тань илэрэн харагдахгүй байхын аргагүй. Сайн модноос сайн үр жимс гарна (Мт.7:17). Таны амьдрах хэв маяг эрүүл саруул, тэнгэрлэг, үлгэр жишээч болно. Таны зан чанар эрс шинэчлэгдсэн байна (Гал.5:22). Таны амнаас үргэлж энэрэл нийгүүлслийн, бусдыг босгон байгуулах үг, бусдыг авралд хөтлөх Сайн Мэдээ урсан гарч байх болно. Зүрхний бялхалаас ам ярьдаг.

Энэ үед та Чуулганд тодорхой үйлчлэлтэй ч болсон бай, үгүй ч бай үл шалтгаалан, таниас Христийн гэрэл, дүр төрх, зөвт ариун байдал цацрах тул, ямарч мунхаг нэгэн анзаарахгүй байхын аргагүй болно. Үүгээр тань дамжин, таны Бурхан алдаршина. Таныг харахдаа олон хүн өөрийн атаач, ховч, шуналтай, завхай, бардам дээрэнгүй гэмт байдлаа жишин олж хараад, ичин гэмшиж, таны Бурхан руу эргэх юм.

Нэгэнт та хэлж ярьж буй зүйлийнхээ (Христийн Сайн Мэдээний) бүрэлдхүүн хэсэг, эд эс нь болсон (та өөрөө сайн мэдээ болсон) тул, тунхаглал тань, үг тань эрх мэдэлтэй, эрч хүчтэй байж, мөхөс сүнсний зүрхний мухарт гүн бат суулгагдана.

Б: Үүгээр ч зогсохгүй. Таны хувьд урд нь, алдаа зөрчил, харанхуй бурангуй, шударга бусаар дүүрэн байсан энэ дэлхий, таны Эцэгийн гайхалтай мэргэн ухаан, төгс хүч чадлынх нь илэрхийлэл гэрчлэл, Түүний гэрлийн оршихуйн тусгал болох нь тодорхой болно. Та юухнаас ч, өөрийн Бурханыхаа хайр, зөвт шударга, хязгааргүй сүр хүчийг нь олж харан, бахдан шагшиж, зүрхэндээ Түүнд алдарыг өргөх болно.

Өглөө нар мандах нь, орой шингэх нь ч юм уу, шөнийн тэнгэрийн үзэсгэлэн гоог ч юм уу, хүмүүний цог жавхлан, үнэ цэнийг ч юм уу, урьд хэзээ ч мэдэрч, ойлгож, ухаарч байгаагүйгээрээ ойлгож ухаардаг, эдгээрээс сэтгэлийн таашаалыг эдэлдэг болж, энэ нь танд маш их аз жаргал, баяр хөөрийг өгнө. Энэ нь юухан дээр ч илэрнэ.

Та нэг ширхэг навчийг харахдаа, тэрхүү гайхалтай бүтээл нь эмзэг бөгөөд турьхан, амьд бөгөөд мэдэрдэг, гадаад нөлөөлөлд хариу үйлдэл үзүүлдгийг ухаарч хайрлан нандигнадаг байхад, хүмүүний ертөнцийн түүхийг судлахдаа ч Эзэний хайр, мэргэн ухаан, хүч нь хэрхэн өдрөөс өдөрт, үеэс үед үй олны аврал, оршихуйнх нь утга учир, хөгжил дэвшлийнх нь тулгуур болж ирсэнийг ойлгон, бахдан баярлах жишээтэй.

Энэ нь нэг удаагийн сэтгэл хөдлөл төдий биш, таны зүрх сэтгэлийн, оюун сэтгэлгээний тань байнгын хэв шинж болон хэлбэржинэ. Олон хүн би “дэлхийн ажил” хийгээд, Эзэндээ алдарыг өргөж, үйлчилж чадахгүй байна, гэж өөрийгөө яллаж, шаналж явдаг. Олон хүн, надад магтаалын, номлолын, эсвэл харь хэлний, эдгэрлийн гэх мэт тосолгоо байвал Чуулганд үр дүнтэйгээр үйлчилж, Эзэнийг алдаршуулна, гэж боддог. Энэ нь том эндүүрэл юм.

Эзэн бидний зүрхийг харж, тэндээс л Өөртөө алдарыг авч “нэн сайхан” (Эх. 1:31) хэмээн дуу алддаг. Үүнийг Эзэн бас өөрөөр, “Бурхан бол сүнс. Түүнд мөргөгчид нь сүнсээрээ, үнэнээр мөргөх ёстой (Иох.4:24), гэдэг.

Тэгээд ч, үйлчлэлийнхээ алдаа, бүтэлгүйтэлд гунихарч, түүнээс болж шаналж, бүр “Эзэн яагаад намайг сорив, шийтгэв,” гэх, эсвэл өчүүхэн ололтондоо бардамнаж, түүнээсээ сэтгэл ханамж, тайвшрал, таашаалыг хайж, бахархал бардамналаа болгох нь, бүр Эзэний өмнө том гавъяа байгуулаад, агуу хайрынх нь хариуг барьчихсан мэт маадгар алхах нь, аль аль нь Эзэнд бузар юм. Ингэж үйлчилж бусдад бүдрэх чулуу болж, өөртөө гэм нүгэл хурааж байснаас, огт үйлчлээгүй (Чуулганд) нь дээр.

Бидний бахархал бардамнал, ханамж таашаал нь зөвхөн загалмай, Эзэнтэй амьд харилцаатайгаас ирдэг ухаарал, гэгээрэл, ариусал байх ёстой. Үйлчлэл тань албадлагаар (1Кор.9:7)(1Пт.5:2), эсвэл айснаасаа (1Иох.4:18), эсвэл цалин хөлсний улмаас (Иох.10:12,13) бус, Эзэнээ хайрласан, Түүний хайраар хөршөө хайрласан сэтгэл зүрхний тань илрэл, алдаршуулал байх болтугай.

Дээр өгүүлсэн болон хойно өгүүлэх төлөвшилийн шинжүүд нь, таныг хэн байх (эр, эм, хар, шар), ямар байр суурьтай байх (дарга, пастор, малчин, орцны жижүүр), хаана байх (монголд, солонгост) зэргээс огт үл шалтгаална. Ер нь, Библи биднийг нэр алдар, албан тушаалд бүү шуна (Иох.5:41; 6:15). Харин улам даруу дорд бол (Мт.18:4; 20:25-28). Хаана, хэн байхаасаа үл шалтгаалан Бурханы Хүү бай, гэдэг. Та хаана, ямар хүрээлэл орчинд байна, тэндээ Эзэнийгээ алдаршуулахын тулд илгээгдсэн болой.

“Алдаршууллын шат”-ын онцлог шинж нь, та сэтгэл хөдлөлд захирагддагаа болино. Ямар ч нөхцөлд тайван амгалан байдлаа хадгалдаг, үйл явдлын далд нууцлагдмал учир шалтгааныг олж хардаг, зөв мэргэн, тэнгэрлэг шийдвэр гаргадаг, аливаа дэлхийлэг хамаарлаас (улс төр, эдийн засаг, эцэг эх, тэрч бүү хэл пастор ахлагч нараас) бүрэн шахуу чөлөөлөгдсөн, Эзэнтэйгээ салшгүй нэгдмэл болсон, зэрэг илрэлүүд байна.

Энэ үеийн хамгийн гол сэрэмжлэх зүйл нь эрх мэдэл юм. Эрх мэдлийн сорилт нь зүрх сэтгэлийг соронздох аймшигтай хүчтэй. Энэ нь үзэгдэх гэхээсээ илүү үл үзэгдэх байдал нь дур татам. Аливаа өвчин, муу сүнс дээрхи болон хэлсэн үг нэг бүр чинь итгэлийн андын чинь, эсвэл бурхангүй нэгний амьдралд биеллээ олох нь, тэр ч бүү хэл цаг агаар, байгалын үзэгдэл юмсанд ч тушаах хүч нөлөөлөл, аманд тань амтагдаж, цээжинд тань бялхах нь нэн таатай.

Яг л Бурхан болсон мэт, олон асуудалд амархан шийдэл, олон бузар мууд амархан төгсгөл хийх боломжтой болсон мэт, санагдана. Энэ байдлаас бүү таашаал ав, зүрхээ бүү эзэмдүүл. Эрс татгалз. Сатанд ч эрх мэдэл байдаг ч, тэр энэ ертөнцийн аврагч биш, харин ч бүх хорон муугийн үндэс юм (Лук10:18-20). Танд өгөгдсөн эрх мэдэл, таны доторхи хүнийг л цэвэр ариун, даруу байлгахын төлөө ашиглагдаг.

Бас энэ үеийн төгсгөлд та цөл рүү дуудагдах нь дамжиггүй. Та зөвхөн нийгмийн амьдарлаас ч тусгаарлагдхаас гадна, бүр Чуулганы амьдралаас ч холдож хөндийрнө. Энэ байдал тань олон хүнд таалагдахгүй ба таниас сэжиглэн цэрвэж, гаж маанагаар чинь дуудаж, мөн “засаж залруулхаар, ухааруулан гэмшүүлхээр” ятгацгаана.

Ийнхүү та эцсийн шат болох “Даатгалын үе”-д дэвшин орлоо. Энэ нь яг л цөлийн амьдарлаас эхлэнэ. Одоо та гуйвшгүйгээр Эзэний зам дээр зогсжээ. Та хоёр, хоюулахнаа нүүр нүүрээ хараад зогсож байна.

Та Түүгээр амьсгалж, Түүгээр хооллож, Түүний дотор, Тэр таны дотор салшгүй нэг болсон. Өнгөрсөн бүхий л хугацаанд та Өөрийн Бурханы сайн гэдгийг хангалттай амсаж (Дуу.34:8) мэдсэн. Таны төлөвлөдөг, төсөөлдөг, мөрөөддөг, тэмүүлдэг ямарч “сайн” нь, таны Бурханаас танд санал болгодог, таны амьдрал дээр бодитоор хэрэгжүүлдэг жинхэнэ сайны дэргэд юу ч биш гэдэг нь, танд тодорхой болсон.

Та олонтоо дасгалжуулагдаж, сахилгажуулагдаж, улам даруусан, таны Эзэний төгс Ариунтай жишихэд, өөрийнхөө хичнээн сул дорой, гутамшигтайг улам гүнзгий ойлгож, жигших болсон (Эх.18:27)(Иох.12:25)(1Иох.1:8,9). Тэгснээр та, улам бүр загалмайн агуу хайрыг, дахин амилалтын хүч нөлөөллийг, эцсийн өдрийн дүр зураглалыг зүрхэндээ шинэчлэн, гүн батаар дахин дахин ухаарсаар байсан.

Таны бахархал, хамаарал, түшиг тулгуур тань, таны мэдлэг, ололт амжилт, үйлс бүтээл тань биш, зөвхөн Есүс л болсон. Та ямарч эргэлзээгүйгээр Түүнд өөрийгөө бүрэн даатгасан. Олон хүн, “Би Эзэний өмнө барьж очих баялаг, өмч хөрөнгөтэй. Тэдгээр нь миний тарьсан чуулган, барьсан сүмүүд, сайн мэдээ тараасан хүмүүс юм”, гэж боддог. Харин та, энэ нь Түүний өмнөх бардамнал юм, гэдгийг таньсан.

Та чуулганы сэргэлтийн төлөө, нийгмийн шинэчлэлийн төлөө дэвхцээд байхаа больсон. Учир нь юунаас ч үл шалтгаалах Христийн амар амгалан зүрхэнд тань гүн нутагласан (2Тес.3:16) ба бүх эрх мэдэл зөвхөн Түүнд байдгийг та мэдсэн (Мт.28:18). Таны гаргасан алдаа завхрал, Түүний цусаар угаагдсан. Бүтээсэн ололт амжилт тань ч Түүний л хүч, нигүүлсэл, төлөвлөгөөгөөр хийгдсэн, үнэнийг мэдсэн.

Ийнхүү таны бодох бодол, мэдрэх мэдрэмж, хэлэх үг, түүний тань хүч нөлөөлөл, хэрэгжилтээс өгсүүлээд, таны юу идэх, хэзээ хооллох, идсэн хоол тань хэрхэн шингэх хүртэлх бүхий л амьдралын тань өрнөл хөдөлгөөн, орчил эргэлт, харилцааг бүгдийг нь Тэр л хариуцана.

Учир нь та, итгэлийн амьдрал бол, хэн нэгэн хүн Христийг дуурайх гэж оролдох нь биш, харин Амьд Бурхан Христийг өөрөөрөө дамжин амьдруулахаар урин дуудах нь юм, гэдгийг ухаарсан. Түүнийг танаар дамжин Өөрийгөө илчлэхэд саад болох бүхнийг, өөрийн зүгээс арилгасан.

Та ямарч хэлцэл тохироонд оролцож, элдэв төлөвлөгөө зохиохоо больсон. Тиймээс маргаашийн төлөө бүү санаа зов. Учир нь маргааш маргаашдаа санаа тавих болно. Өдөр бүрийн зовлон тухайн өдөртөө хангалттай (Мт.6:34) (Сур.үгс27:1). Та, Түүнд зориулж өөрийгөө тусгаарласан (Лук14:16-24; 21:34).

Энд одоо хэн нэгэн нэр бүхий хувь хүн биш, харин хүн төрөлхтөнийг Өөрийнхөө дүр төрхөөр бүтээсэн, биднийг хайрлаж, аврахын тулд амиа өгсөн, бас дахин амилсан, Бурханы Хүү, тэнгэр газар дээрхи бүх эрх мэдлийг баригч Нэгэн ажиллаж, амьдрах болно. Үнэнээр, үнэнээр Би та нарт хэлье. Хэрэв улаан буудайн үр газарт унаад үхэхгүй бол тэр ганцаараа үлдэнэ. Харин тэр үхвэл олон үр бий болгоно (Иох.12:24).

Даатгалын шат нь хязгааргүй үргэлжилнэ. Бүр мөнхийн улсад ч шүү. Эцэст нь та Хүний Хүү шиг нэгэн (Илч.1:13; 14:14;) болно. Нүд тань галын дөл мэт, нүүр тань өөрийн хүчээр гэрэлтэх нар мэт, амнаас тань хоёр талдаа иртэй хурц илд цухуйсан, алтан бүс бүсэлсэн, өнгөлсөн хүрэл мэт хөлтэй Нэгэн болсон.

Таны зүрхэнд тань, бас тэргүүн дээр тань Эцэг “Чи бол Миний хайрт Хүү, Би Чамайг өнөөдөр төрүүлсэн. Чамд Миний таалал оршдог”(Мт.17:5) (Ев.1:5) гэх болно.

Түүгээр ч барахгүй “Чи бол Миний Хүү, Өнөөдөр Би Чамайг төрүүлсэн. Надаас гуй! Би үндэстнүүдийг Чиний өв болгон, Дэлхийн хязгааруудыг ч Чиний эзэмшил болгон өгнө. Чи тэднийг төмөр таягаар хэмх цохиж, шавар сав шиг бутлах болно.” (Дуу.2:7-9) гэнэ.

Бас “Би Чиний хөл дор бүх дайснуудыг чинь, бүр үхлийг ч хаяж, Чи тэднийг няц гишгэнэ” (Эх.3:15) (Ев.1:13) (1Кор.15:25-28) гэж амлана.

Та шинэ тэнгэр, шинэ газрыг (өөрөөр хэлбэл таниар дамжуулан Эзэн) бүтээхээр (Илч.21:1), бүх хана хэрэм (Иош.6:20), цайз хаалгануудыг (Мт.16:18) (Илч.3:8) эвдэх ялгуусан маршаа хийхээр явахад бэлэн боллоо.

Таньд энэ бүхнийг боломжтой болгосон, Таны Бурхан алдарших болтугай. Та бол Бурханы Хүү мөн. Та бол ертөнцийг Аврагч мөн. Халлелүяа.

Итгэлийн талаархи ярилцлага-1 “Анхдагч” итгэл буюу Христитгэлийн суурь

 Багшаа, яг “итгэл” гэж юу вэ?

“Итгэл” гэдэг энэ ухагдахууныг Библи дээр …эцэст үлдэх гурван үнэний нэг (1Кор.13:13), гэж тодорхойлсон байдаг. Я.Цэвэлийн “Монгол хэлний тайлбар толь”-д итгэл гэдэг нь батад найдах, эргэлзэлгүй үнэмших гэсэн утга бүхий үг гэжээ.

Бид амьдралын аливаа асуудалдаа Эзэндээ чин сэтгэлээсээ найдаж чадаж байна уу? Түүний бидэнд илчилсэн үнэн, өгсөн амлалт, тушаалуудад эргэлзэлгүй үнэмшиж байна уу? Тэгээд тэдгээрээрээ амьдарч байна уу? гэж бид Эзэнээс, бас өөрсдөөсөө байнга асуух нь зүйтэй. Та нар итгэл дотор байгаа эсэхээ шалга, өөрсдийгөө батал… (2Кор. 13:5).

Хүн төрөлхтөн Ертөнцийг Бүтээгчийн дүр төрх болохынхоо хувьд, Түүнийг эрэлхийлэн, тэмүүлэх явцдаа олон янзын шашин шүтлэг, сүсэглэлийн тойрог хүрээллүүдийг бий болгосон байдаг. Тэдгээрт хамрагддаг олон төрөл сүсэгтнүүдийн хэн нь ч (урьд цагт ч, одоо ч) өөрсдийгөө “итгэгч” гэж нэрийддэггүй.

Амьдралыг нэг л үгээр тодорхойл, гэвэл олон янзаар тодорхойлох байх. Амьдрал бол хайр, амьдрал бол тэмцэл, …бүтээл,…үг, гэхчилэн. Бүр зарим нь амьдрал бол хувьсал (эволюци), амьдрал бол урсгал, …тоглоом, …дурлал, …аз, …секс, …мөнгө, гэх нь ч бий. Харин энэ удаагийн ярих сэдвийн хүрээнд “амьдрал бол харилцаа” гэж тодорхойлж болох юм.

Өчүүхэн ч гэсэн итгэл байхгүйгээр та хэн нэгэнтэй аливаа харилцаанд орох уу?! Мэдээж үгүй! Эцэг эх үр хүүхэддээ, тэдгээр нь эргээд эцэг эхдээ, андууд бие биендээ, амрагууд янаг хайртдаа, ард түмэн төр засагтаа, төр нь ард түмэндээ итгэх итгэлийн талаар маш их яригддаг.

За тэгээд бизнесийн, улс төрийн, урлаг соёлын, шинжлэх ухааны, спортын, шашин шүтлэгийн, тэрч бүү хэл гэмт хэргийн гэх мэт дур сонирхол ба хүсэл зорилгоороо хамтрагчид, жаахан ч гэсэн итгэл дээр суурилан нөхөрлөж эхлээд, улмаар харилцаа нь гүнзгийрэн хөгждөг. Нэг үгээр бие биендээ итгэх итгэл нь батждаг.

Амьдрал ер нь итгэлцүүр дээр л тогтдог. Ариун Судрыг “Хуучин гэрээ, Шинэ гэрээ” гэж хоёр хэсэгт хуваадгийг бид мэднэ. Гэрээ гэдэг маань хоёр ухамсарт харилцагчийн хоорондын харилцааг зохицуулдаг (бие биенийхээ өмнө үүрэг хариуцлага хүлээн, эрх дархаа тохиролцон зөвшилцсөн) баримт юм. Энэ нь Бурхан ба Түүний ард түмэн (Эх.17:1-7), Бурхан ба бүтээлүүдийн хоорондын (Эх.9:8-17) харилцааг илчилдэг.

Хоёр дахь харилцаанд итгэлийн талаар огт яригддаггүй. Ваарчин ваарнаасаа “…чи надад итгэж байна уу?” (Иса.45:9)(Иер.18:3-6) гэж асууж байна гээд төсөөлөөд үз дээ! Харин Бурханыг ухамсартайгаар танин мэдэж, хайрлан хүндэлж, даган амьдрах сонголт хийсэн, Түүний дотор хуучин амьдарлаасаа гэмшин эргэж өөрчлөгдөх шийдвэр гаргасан, “амьд” харилцагч болсон Эзэний ард түмний хувьд “итгэл” нь хоорондынх нь харилцааны тулгуур үнэлэмж, шалгуур үзүүлэлт болон яригддаг. Итгэлгүйгээр таалагдана гэдэг боломжгүй юм. Учир нь, Бурхан руу ирж буй хүн Тэр байдаг гэдэгт болон Өөрийг нь хайгч хүмүүст Тэр Шагнагч нь болдог гэдэгт итгэх ёстой (Ев.11:6).

Тэгэхлээр "итгэгч" гэсэн нэр томъёоны цаана, Бурхантай харилцагч, хамтран нэгэн зорилгын төлөө зүтгэгч, Түүний дүр төрх, зан чанарыг, мэргэн ухааныг, хайрыг илэрхийлэн харуулагч, Түүний илчилсэн үнэн, амлалтуудад эргэлзэлгүй итгэгч, тэдгээр үнэт зүйлсийг нь үгүйсгэгч дэлхийлэг нөлөөллүүдийг эсэргүүцэгч, тэдгээрээс тусгаар (ариун) амьдрагч, зөвхөн Бурхантай л хамааралтайгаа ухамсарлагч, гэхчилэн олон утгууд агуулагддаг.

Бурхан болон Түүний сонгосон ард түмний хоорондын харилцааг зохицуулагч итгэлцүүр нь яг юу вэ?! Христитгэл гэж чухам юу вэ? Хаанаас үүсэлтэй вэ? Юун дээр суурилаж, ямар хөрсөнд үндэслэж, ямар орчинд ургадаг вэ?, гэж л та асуусан болов уу?, гэж би бодож байна.

Тийм тийм. Яг л тэгэж асуух гэсэн юм.

Библи бидэнд “анхдагч” буюу суурь итгэл (1Кор.3:1,2) (Ев.5:12,13; 6:1), дахин төрсөн хүний шинэ амьдралдаа дэвшин өөрчлөгдөх “төлөвшил”-ийн итгэл (1Кор.2:6) (Ев.5:14), гэсэн хоёр ухагдхууныг заадаг. Эхлээд хоюулаа, Христитгэлийн тулгуур суурь болсон “анхдагч” итгэлийн талаар ярилцая.

Энэ талаар үе үеийн Эзэний ариун хүмүүс олон янзын гайхамшигт тайлбар, тайлал, номлол, илчлэлтүүдийг тунхаглан, бичиж тэмдэглэн үлдээсээр ирсэн. Тэдгээрээс хамгийн алдартай нь, магад Библийн Еврей номын 11-р бүлэг байх. Тус бүлгийн эхэнд л Христитгэлийн талаархи онцгой хэдэн илчлэлтийг өгүүлдэг.

Үүнд: …итгэл нь (Христэч) бидний (итгэгчдийн) найддаг зүйлсийн бодит байдал (Евр.11:1а)… энд түр зогсоё. Та юунд, эсвэл хэнд найддаг вэ? гэсэн асуулт эндээс гарч байна.

Даргадаа, ханьдаа, төр засагт, хадгаламжиндаа,…мөн ирээдүйд бүх зүйл сайн сайхан болно гэдэгт…

Үгүй ээ! …Тухайлан Христчин хүний хувьд?

...Аан тэгвэл,… 1-рт; Бурханы Хүү Есүс Христ гэмтэй миний эдлэх ёстой ял шийтгэлийг Өөртөө үүрч, загалмай дээр цовдлогдон үхсэнээр, урсгасан ариун цусаараа гэмийг маань угаан цэвэрлэсэн.

2-рт; Тэгээд зогсоогүй 3 хоногийн дотор үхлээс дахин амилж, надад үхлийн дараахи мөнх амьдрал, дахин амилалт бодитой гэдгийг баталж, намайг үхлийн айдсаас чөлөөлж, энэ дэлхийн гуниг зовлонгоос үл хамаарах баяр баясал, амар тайвныг өгсөн. Түүгээр ч үл барам, тэнгэр газар дээрхи бүх эрх мэдлийг авсанаа илчилж, үеийн төгсгөл хүртэл хамт байхаа амласнаар энэ хүнд үед хорогдох газар минь болдог.

3-рт; Улмаар энэ дэлхийд эргэн ирж бүхий л хорон мууд цэг тавьж, Өөрийн хүмүүсийг өргөмжлөн, тэнгэрлэг хаанчлалаа байгуулхаа амласнаар ирээдүй хойчид ч хүлээх найдвар минь болсон.

Тун сайхан хариуллаа.
Тиймээ, энэ 3-н гайхамшигт үйлс Христитгэлийн тулгын чулуунууд юм шүү дээ. Бүр яг үнэндээ, Эцэг ертөнцийн анхны тоосонцорыг бүтээхээсээ ч өмнө, загалмайн энэхүү ялгуусан ажлаа товлож, эдгээр үнэнүүдийг тулгуураа болгон барилгаа барьсан (ертөнцийг бүтээсэн) (Иох.1:1-3) (Сур.үгс 8:22-31) ба барьсаар байна (1Кор. 1:30; 2:7), (Еф.2:20-22), (Фил.2:9-11). Тэр дундаа хүмүүнийг Хүүгийнхээ дүр төрхөөр урласан нь үнэхээр бахдууштай (Эх.1:26,27), (2 Кор.5:17), (Гал.3:26-28).

Хүн төрөлхтөн олон янзын хүсэл мөрөөдөл, зорилго бодож олоод тэдгээрийгээ найдвараа болгон тэмүүлдэг. Гэвч тэдгээр нь төгс бус, хоорондоо эрс ялгаатай байснаараа өчнөөн олон зовлон зүдгүүр, зөрчил маргааны үндэс болдог.

Харин христчидийн энэхүү найдвар нь, хүмүүний бодол санааны бүтээл биш (Гал.1:11,12) ба анхнаасаа байсан, хойшид ч байх (1Кор. 2:6,7)(Еф.1:3-14), биднээс үл хамаарах Үнэн (Христ) (Кол.1:16-20) учраас батад найдах найдвар минь болж чаддаг.

Гэхдээ бас нэг зүйл асууя. Та тэрхүү 2000-ны тэртээд очиж Есүсийг цовдлогдохыг харсан юм уу? Цаашлаад үхлээс дахин амилаад тэнгэр рүү одоход нь хажууд нь байсан уу? Мөн ирээдүйд ирээд шүүлтийг хэрэгжүүлнэ гэдгийг яаж баттай мэдэж байгаа юм бэ? Тэр тусмаа эдгээр нь чухам яг таньтай хамаатай гэдэгт яагаад итгэнэ вэ?

Ммм…Үгүй. Яг хажууд нь байж, үзэж хараагүй л дээ. Ирээдүйг ч зөгнөж мэдсэн ч юм алга. Энэ тухай Библи дээр л бичигдсэн байдаг шүү дээ. Тэгээд ч эдгээр нь үнэн бодит, болсон явдал ба болох зүйлс гэдгийг батлах хувийн туршлага, гэрчлэл зөндөө байна.

1-рт; Есүсийн миний төлөө үүрсэн загалмайн зовлон ба үхлийг бодохдоо, Түүнийг маш их өрөвдөн хайрладаг, бас Түүнд хязгааргүй баярлаж талархдаг. Мөн өөрийн гэмийн ямар ноцтой, бузар болохыг ухаарч гэмшдэг. Түүний надад зориулсан агуу хайрыг нь зүрхээрээ мэдэрч, тодорхойлон хэлэх аргагүйгээр догдолж уярдаг.

2-рт; Эзэн Есүсийн амьд хайр, хүч нөлөө нь намайг өдрөөс өдөрт өөрчлөн шинэчлэж байгаа нь гайхмаар бас бахадмаар, үгүйсгэх аргагүй үнэн юм. Энэ нь бие махбодид маань эдгэрэл, цог золбоо, эрч хүч дүүрэн бялхах байдлаар илэрдэг. Мөн эргэн тойрны маань амьдралын бүхий л асуудалд Тэр мутараа сунган оролцож, миний хүч үл хүрэх олон зүйлийг хамгийн сайнаар шийдэж өгдөг. Хамгийн гол нь би өөрөө амьдарлыг огт өөрөөр гэрэл гэгээтэйгээр харж, бусдыг хайрлан уучлаж, хүлцэн тэвчиж ханддаг болон өөрчлөгдөж байгаа байдлаар мэдэгддэг.

3-рт; Гэмийн уруу татлагад маш мэдрэмтгий болж сөрөн зогсож, дургүйцэх болсон. Заримдаа сул доройгоосоо болж алдах үедээ зүрхэндээ Ариун Сүнсний зэмлэлийг мэдэрч, маш их шаналал, гэмшил төрж, гэмийн эсрэг бат хатуу шийдвэр гаргах болсон.

Гайхалтай. Та яг сая, уншсан ишлэлийнхээ тайллыг хэлчихлээ шүү дээ! Тиймээ, таны Христэд итгэсэн итгэл тань, амьдралд тань ийнхүү бодит байдал болон ирж, өөрчлөлт шинэчлэлийг авчирдаг гэж энд хэлээд байна шүү дээ.

Бас нөгөөтээгүүр, Христээр дамжуулан хийгдсэн эхний хоёр үйлс гүйцэлдсэн ба нөгөө нь арай болоогүй ч, хувь хүн дээр ч, үндэстний түүхэнд ч, нийт хүн төрөлхтөний хувь заяанд ч, энэ л үнэнээс ирдэг соён гэгээрүүлэх, хөгжүүлэн цэцэглүүлэх хүч нөлөө нь, энэ л үнэнийг танин мэдэх, эмээн хүндлэх ухамсар, ёс суртахуун нь өөр ямарч эрхшээл нөлөө, итгэл үнэмшил, суртал ухуулгаас илүү бодит юм, гэдэг илчлэлт ч энд байна.

Мөн цаашдаа олон зүйл өөрчлөгдөн хувьсаж, арчигдан хаягдаж, эргэн ирэхгүйгээр өнгөрөн одох боловч (Лк.21:33) (1 Иох.2:15-17), энэ гурвыг танин мэдэж, итгэж үнэмшсэн, түшиглэж найдсан сүсэглэл тань хувиршгүй байж, улам батжин эцэст үхлийг ч ялах бодит хүч болдог (Ев.11:35-38), гэсэн утга ч илчлэгдэж байна.

Энд 3-н салангид, тусдаа зүйлсийн талаар яригдаагүй гэдгийг бас онцлох нь зүйтэй. Эдгээр нь Нэг л Үнэн, хамгийн дээд Нэгний, Өөрийгөө төгс байдлаар илчилсэн, салшгүй нэгдмэл чанартай цул оршихуй (Христ) юм. Үүнийг Христ, “Би бол ЗАМ, ҮНЭН, АМЬ мөн.”(Иох.14:6) гэсэн.

Энэ л дээд Үнэнийг (Христийг) ямар нэг байдлаар салгаж авч үзэх, аль нэг нь бусдаасаа илүү чухал мэт бодох, ярих, хооронд нь ач холбогдолоор нь жиших гэж оролдох зэрэг нь, зөөлөн хэлэхэд төөрөгдөл ба хатуу үнэнийг хэлэхэд Төгс Эзэнийг өөрийнхөө хувьд зэрэмдэглэсэн, төгс илчлэлтийг нь шүүн тунгаан бардамнасан, бузар гэм юм.

За одоо, та цааш нь уншдаа. …харагдахгүй зүйлсийн баталгаа мөн (Ев.11:1б).
За баярлалаа. Одоо энэ хэсгийг тунгаан бясалгаж, задлан шинжилье. Түрүүн бид бас ярилцсан. Та энэхүү түүхэн гайхамшигтай үйлсийг нүдээрээ хараагүй. Бас хараахан гүйцэлдээгүй нэгийг нь урьдчилан зөгнөж мэдээгүй. Улмаар ухан бодох юм бол, үүнийг л тулгуураа болгон Тэнгэр Эцэг маань хэрхэн зах хязгааргүй орчлон ертөнцийг бүтээснийг ч хараагүй (Ев.11:3). Хэрхэн Агуу их хаан Сэнтий дээр (Тэнгэрт) шийдвэр гарч, тэр нь газарт, хувь хүний болон нийт хүмүүний ертөнцийн амьдрал, хувь заяанд бодитоор биелэн хэрэгждэгийг ч мэдэхгүй (Илчлэлт ном). Гэвч та энэхүү Үнэнд (Христэд) итгэдэг.

Ариун Судрыг түүхийн үнэт сурвалж, баримт бичиг гэдэг талаас нь, эртний утга зохиол, яруу найргийн чуулбар гэдэг талаас нь, еврейн болон Газрын Дундад Тэнгис хавийн ард түмнүүдийн түүх соёл, угсаатны зүйн судлагдхуун баримт гэдгээр нь, мөн хэл шинжлэлийн, археологийн, гэх мэтчилэн олон чиглэлээр салбарлуулан маш сайн судалдаг олон лут эрдэмтэн мэргэд байдаг. Тэд Сударыг үг үсэггүй маниасаа ч илүү мэддэг. Гэвч энэхүү тулгуур 3-н илчлэлтэнд (Христэд) огт итгэдэггүй гээд боддоо.

Олон оюунлаг, авъяаслаг, мэдлэг боловсролтой хүмүүс, хүмүүний ертөнцийн улс төрийн, спортын, урлагын, шинжлэх ухааны, бизнесийн, шашин шүтлэгийн болон ёс суртахууны орчинд алдаршигчид, энэхүү Үнэн дээр суурилагдан орчлон ертөнц бүтээгдсэн ба одоо оршин тогтнодог, гэдгийг мэддэггүй, итгэдэггүй. “Энэ нь бас л нэг шашин, ёс суртахууны сургаалийн орчин, Есүс бол түүхэн дэх агуу сайн хүмүүсийн нэг” гэхчилэн үздэг, ярьдаг.

Та тэдгээрээс юугаараа илүү болоод энэ Үнэн нь, хувь хүний болон хүн төрөлхтөний цорын ганц Аврал, оршин тогтнолынх нь Үндэс суурь, гэдэгт итгэсэн юм бэ? Та илүү ухаалаг уу?! Эсвэл сүнслэг мэлмий тань илүү нээлттэй учраас уу?! Үгүй юм! Библи биднийг, бусдаас илүү сайн учраас Бурханд сонгогдсон (Дэд хууль 9:4-6) гэдэггүй.

Харин, “Учир нь Тэр Мосед “Би Өөрийн өршөөх хүнээ өршөөнө. Би Өөрийн өрөвдөх хүнээ өрөвдөнө” гэж айлдсан юм. Ингэхлээр энэ нь хүсдэг, эсвэл хичээдэг хүнээс биш, харин өршөөлт Бурханаас хамаардаг ажгуу.” (Ром 9:15,16). “Харин Бурхан мэргэдийг ичээхийн тулд ертөнцийн мунхаг юмсыг сонгож, хүчит юмсыг ичээхийн тулд ертөнцийн мөхөс юмсыг сонгожээ. Бурхан байгсдыг хүчингүй болгохын тулд байгсдыг бус, энэ ертөнцийн шалихгүй, гадуурхагдсан хүмүүсийг сонгосон нь, Бурханы өмнө ямарч махан биеийг сайрхуулахгүйн тулд болой.” (1 Кор.1: 27-29) –гэсний дагуу юм.

Нэг үгээр, бидний Христитгэл маань Эцэгээс бидэнд бэлэг (2 Кор.9:15) болгон өгөгдсөн Бурханы Үр юм. Эзэн биднийг Мөнхийн, Төгс, Ариун гэр бүлийнхээ бүрэн эрхт нэгэн гишүүн нь болгон сонгон авсаны баталгаа (Ев.11:1), барьцаа (2 Кор.5:5) болгон зүрхэнд маань тарьсан Ариун Сүнсний Үр юм. Үүгээрээ ч бусад шашин шүтлэг, ёс суртахууны сургааль номлол, зам мөрийн онолуудаас эрс өөр юм.

Тиймээс ч бид, би илүү хүнлэг зөвт, сайн хүн байснаас, эсвэл чин зүрхнээсээ Бурханыг хайснаас, бүр эсвэл илүү ухаалаг тул энэхүү Үнэнийг таньж мэдэн, авралыг авчихсан. Тэд мунхаг харанхуй учраас л Сайн Мэдээнд итгэхгүй байгаа юм, гэх маягын бардамналд автахгүй байвал зохино. Тэгээд даруугаар Эзэний гавъяа болон сонголтоор зүрхэнд маань өгөгдсөн тэрхүү Үрийг нандигнан хайрлаж, хамгаалж, урган төлжих боломжийг нь хангахын тулд өөрийн зүгээс хамгийн дээд чадах чинээгээрээ хичээн зүтгэх нь зохистой юм.

За улмаар Еврей 11-р бүлгийг цаашаа үргэлжлүүлэн унших юм бол, Хриситгэлийн нийтлэг ерөнхий шинжийг янз бүрийн гэрчлэл, жишээ татан тодорхойлсон байдаг. Энэ нь Бурхангүй ертөнцөөс итгэгчдийг хэрхэн үзэж үнэлж ханддаг ба, тэд нь эргээд ямархуу хариу үйлдэл (реакц) үзүүлдгийг бичсэн. Эдгээрийг анхааралтай уншиж, тунгаан бясалгахад доорхи дүгнэлтүүд тодордог.

1-рт; Христитгэл бидэнд энэ дэлхийн аз жаргал, элбэг хангалууныг, хүндлэл өргөмжлөлийг амладаггүй (Евр.11), (Мт.5:39-42; 19:21-24; 20:25,26). Харин Эцэгийн өмнөх төрөлх болон олдмол гэмийн уучлалын, Бурханы оршихуй дахь мөнхийн амьдралын, эцсийн шүүлтийн өдрөөс аврагдах найдварын баталгаа болдог. Гэтэл олон хүн энэ ертөнцийн өөрсдийгөө өргөмжлөх, өнгөлгийг эзэмших өрсөлдөөн тэмцэлд амжилт олох түшиг тулгуур, дэмжлэг гэж Хриситгэлээ үнэлэн бодож байдаг.

2-рт; Харин ч эсэргээрээ, хавчлага гадуурхал, басамжлал доромжлол, зөрчил тэмцэлийг зайлшгүй дайран гарч, даван туулах ёстойг анхааруулдаг (Евр.11), (Мат.5:10,11,44; 10:21,22; 16:24). Хэн нэгэн нь буддист, эсвэл ислам, эсвэл бөө мөргөлтөн гээд хавчигдаж, гадуурхагдаж байгаа тухай та сонссон уу?... Үгүй!...Тухайлан эдгээр сүсэглэлийнх нь төлөө хэн нэгнийг хачирхаж, чичилж, гаж маанагаар нь дуудаж, хавчиж боож тэгснээрээ бах нь ханаж, таашаал авах нь огтгүй.

Харин Христитгэлийн талаар ярихлээр л эвэртэй туулай үзсэн мэт элдэвлэж, сэжиглэн цэрвэж, амны зугаа болгон тохуурхаж, тэрч бүү хэл санаатайгаар ажил үйлсийг нь боож хааж, эрүүл мэнд, хүний эрхийнх нь халдашгүй дархан орчинд нь халдах оролдлого ч бүдүүлгээр гаргадаг. Энэ нь хувь хүнийх нь хэн байх, эсвэл хоорондынх нь ямар нэгэн үл ойлголцол зэргээс үүдэлтэй биш байдаг.

Бүр боломж олгоод хууль эрх зүйн ч юм уу, нийгмийн (олонхийн) сэтгэл зүйн орчин нь бүрдсэн байх юм бол, буу бариад (зүгээр л Христчин гэдэг шалтгаанаар) алаад эхлэхэд бэлэн мэт хүмүүс ч зөндөө. Яагаад ингэж зэвүүрхэн үзэн яддаг учир шалтгаанаа барьцтай, тодорхой өөрсдөө ойлгодоггүй ба бусдад итгэж үнэмшмээр, зөвтгөн тайлбарлаж ч чаддаггүй.

3-рт; Дээрхийн шалтгаан нь Христчид, хүн төрөлхтөний дадаж хэвшсэн, дасаж зохицсон тааламжтай үг хэл, үйлс амьдрал, сэтгэх хэв маягаас нь тэс өөрөөр, тэдгээрийг нь эрс үгүйсгэсэн тэнгэрлэг зарчимаар сэтгэн бодож, ярьж тунхаглаж, гэрчилж амьдардгаас болдог (1 Кор.2:12-14), (Евр.11:38), (1 Пт. 4:2-4). Нэг үгээр бид тэнгэрийн иргэншилтэй болсон тул энэ ертөнцийн хувьд харийнхан юм.

Гэхдээ бидний цаг ирэх бөгөөд, тэр цагийг Абель, Ноа, Абрахам, Иаков, Иосеф нараас эхлээд, одоо үед бид үргэлжлүүлэн (бүх үеийн Бурханы хүмүүс хамтдаа) тэвчээртэйгээр хүлээж байна (Евр.11:40). Библи биднээс хүлээлтийг, яг л маргааш, эсвэл өнөө шөнө Эзэн маань ирнэ, гэсэн тэсэн ядсан хүлээлтийг, мөн энэ ертөнцийн уруу татлагад автахгүй үргэлж сонор соргог байж, ариун тусгаар байдлаа сахихыг шаарддаг (Мт.25:1-13), (Лк.12:35-40), (Лк.21:34-36). Хүлээлт нь тэвчээрийг, сэтгэлийн хатыг, даруу зан чанарыг, үнэнч хувиршгүй итгэлийг төлөвшүүлдэг.

Хүмүүс өөрсдийн бодож олсон шашин, ёс суртахууны сургааль, ёс зүй, хууль цааз, хувийн болон үндэстнийхээ түүхэн мэдлэг, туршлагыг үнэний хэмжүүр болгодог. Харин бид итгэлээр минь дамжуулан өгөгддөг Үнэний мэдлэг, Ариун Сүнсний удирдамж, Эзэний Үгийг үнэний хэмжүүр болгон амьдрах нь ариун байдал юм.

Итгэлийн талаархи ярилцлага-2 Аврал нь итгэлээр үү? эсвэл үйлсээр үү?

Баярлалаа багшаа. Гэхдээ таниас бас нэг зүйл асууя. Элч Паулын захидлуудад үйлсээр бус итгэлээрээ аврагдана, гэж онцлоод байдаг. Та ч бас сая тэгээд л хэлчихлээ. Харин Иаков ахлагч болохоор үйлсгүй итгэл чинь үхмэл, гэж загнаад байдаг нь ямар учиртай вэ?

Та нүдээ олсон асуулт тавьлаа. Олон хүн энэ тухай бодож тунгааж, гайхаж, эргэлзэж, маргаж мэтгэлцэж байдаг. Тэр ч бүү хэл, энэ нь (аврал нь итгэлээр үү, үйлсээр үү гэдэг нь) христитгэлийн мөнхийн, маргаантай шийдэгдээгүй асуудал гэж ярьж, бичих нь ч бий. Энэ нь Ариун Сүнсний удирдамжаар Сударыг сайтар судлаагүйгээс, амьд Эзэнтэйгээ хайр дотор, дотно харилцаанд төлөвшөөгүйгээс бий болдог айдсаас улбаатай, дэгс дүгнэлт юм.

Анхны Чуулганы түүхэн цаг үед, багш, ахлагч, итгэл дотор чиглүүлэгчдийн олонхи нь Иудей итгэгчид байлаа. Учир нь тэд Абрахам, Мосегийн үеэс л Бурханы Үг, тушаал, хууль цааз дотор амьдарч, тэдгээрээр амьсгалж ирсэн ард түмэн юм. Тэднээр л дамжуулан хүн төрөлхтөнд Эзэний Үг болсон Библи, аврагч Эзэн Есүс өгөгдсөн.

Тиймдээ ч тэд итгэл болон тэнгэрлэг мэдлэг, Үгийн боловсрол зэргээрээ, бусад үндэстэн, ард түмний итгэгчдээс эрс ялгарч байсан (Ром 3:1,2). Нөгөөтээгүүр, мянга мянган жил тэдний амьдралын алтан зарчим нь Мосегийн хууль байж, зүрх сэтгэлд нь гүн бат суурилагдсан байсан нь, сургааль номлол, тунхаглалд нь тусгалаа олж, загалмайн авралаас гадна, Иудей маягаар хөвч хөндүүлж, Мосегийн хуулийн олон заалтыг чандлан сахиснаар авралд батжина, гэсэн буруу сургаалийг бий болгосон (Ром 2).

Хуучин гэрээний үед, хуулийг чандлан сахих гэхдээ, бүр хэтийдэж “амралтын өдөр өндөгнөөс хүнд юм өргөвөл, хорин алхамаас илүү алхвал бузартана” гэх мэтийн дүрэм журам ч гарсан байлаа. Иудейн шашны удирдагчид хуулийн хамгийн гол заалт болох хайрыг (Мт.22:36-40) орхигдуулаад, шалихгүй хэрэггүй дүрэм журмынхаа төлөө, Бурханы дүр төрх болсон хүнийг яллан буруутгаж, амьдарлыг нь шашинлаг элдэв ачаа дарамтаар гашуун зовлонтой болгож байсан (Мт.23:23,24).

Энэ нь Христээс хойш ч, олон Иудей багш нарын баримтлах зарчим байж, хуулийн заалтыг хэр хэрэгжүүлж байгаагаар нь тухайн хүний аврагдсан үгүйг тодорхойлох хандлага газар авч байсан (Гал.1:6-9; 2:11-14). Энэ гажуудал, Христийн Сайн Мэдээний үнэ цэнийг бүрхэгдүүлж, нялх итгэгчдийг бүдрүүлж байсан ба өнөө үед ч дүр нь хувирсан байдлаар илэрдэг.

Дээр бид ярилцсан. Авралын итгэл бол нэн эртнээс төлөвлөсөн төлөвлөгөөнийхөө дагуу (Эх.3:15в; 9:9-11; 12-3), Судараар илчлэгдсэн амлалтынхаа дагуу (Ис.11:10; 53), (Зех.9:9), Есүсийн үхэл ба дахин амилалтаар бидэнд өгөгдсөн үнэгүй Бэлэг (Ром 5:15-17) юм. Үүнийг л элч Паул тодотгож, ” Гэсэн хэдий ч хүн хуулийн үйлсээр бус, харин Христ Есүст итгэх итгэлээр зөвтгөгддөг гэдгийг мэднэ. Тиймээс бид ч гэсэн Хуулийн үйлсээр бус, харин Христэд итгэх итгэлээр зөвтгөгдөхийн тулд Христ Есүст итгэсэн шүү дээ. Яагаад гэвэл нэг ч махан бие Хуулийн үйлсээр зөвтгөгдөхгүй (Гал.2:16). Хэн ч Бурханы өмнө Хуулиар зөвтгөгддөггүй гэдэг нь тодорхой. Яагаад гэвэл зөвт хүн итгэлээр амьдарна (Гал.3:11).” гэж бичсэн.

Өнөө үед пастор, ахлагчдынхаа үгэнд дуулгавартай байж, цуглаанаас зохиож байгаа бүх ажилд идэвхитэй гар бие оролцож, аравны нэгээ тогтмол өргөж байж л аврагдана, эсвэл аврагдсаны шинж гэх мэтээр ярьж, номлон, орчин үеийн “хуулийн үйлсийг” бий болгох хандлага байдаг. Энэ нь буруу. Дахин хэлье, энэ бол буруу сургааль.

Есүс Христэд итгэх итгэлээр Бурханы зөв нь итгэгч бүх хүнд байна. Ялгаварлал байхгүй. Бүгд нүгэл үйлдсэнээр Бурханы алдарт хүрдэггүй, харин Христ Есүс доторх золилтоор дамжуулан, Түүний нигүүлслээр үнэгүй зөвтгөгдсөн билээ (Ром 3:22-24). Ямар ч лут пастор, ахлагч, хэн нэгний аврагдсан эсэхийг тодорхойлохгүй ба үйлчлэлийнх нь үүрэг зорилго ч биш. Сүм цуглааныхаа үзэгдэх амжилт ололт, “сэргэлтийн” төлөө, өөрийн алдар хүндийн төлөөх зүтгэл, төлөвлөгөөний улмаас, бүр эсвэл өөрөө ч авралын үнэ цэнийг зүрхэндээ үнэн зөв хүлээн аваагүйгээс, итгэгчидээ дээрхийн адил ташуурдагч нэгэн нь золгүй еэ.

Бидний үйлчлэлийн зорилго бол аливаа “амжилт, алдар хүнд” биш, харин олны зүрхэнд Христийн цусны үнэ цэнэ улам гүн бат үнэлэгдэхийн тулд, биеэрээ хайрыг харуулан үлгэрлэх нь юм. Та зүтгэлтэй байсныхаа төлөө биш, харин Христ таны төлөө үхсэн учраас л аврагдсан.

Тэр тусмаа итгэгчид хоорондоо, “жинхэнэ итгэгч, дүр эсгэгч” гэж бие биенийгээ үнэлж дүгнэн бодох, шүүн тунгаан ярилцах нь ч гажуудал. Энэ нь, “Та нарын Эцэг өршөөнгүй. Түүнчлэн өршөөнгүй байгтун. Шүүгдэхгүйн тулд бусдыг бүү шүү. Яллагдахгүйн тулд бусдыг бүү ялла. Уучлагтун, тэгвэл та нар ч мөн уучлагдана.” (Лк.6:36-37) гэсэн тушаалыг зөрчсөн гэм болдог.

Тиймээс ч, ялангуяа үйлчлэлтэй хүмүүс энэ тал дээр онцгой анхаарч, аливаа санаж сэдсэн ажил тань Эзэний хайр, зөвт байдлыг алдаршуулах, гэрчлэх, итгэл дотор бусдыг босгох, халамжлах зорилгоор уу, эсвэл хэн нэгэн дарга даамал, эрх мэдэлтний, эсвэл олны өмнө тааллыг олох өөрийн алдарын төлөө юу, бүр эсвэл зүгээр л өөр цуглааныхантай барьцах сэдлээр үү, гэдгээ хянаж байхад ердөө илүүдэхгүй.

Хамгийн гол нь хийх ажил үйлчлэл тань, Ариун Сүнснээс өгөгдсөн санаа, удирдамжаар эхлэл нь тавигдаж, анд нөхдийн чинь Эзэнийг гэсэн итгэл, хайр нь батжихын төлөө, олны авралын төлөөх Сайн Мэдээ улам дэлгэрэх зорилгоор, мөн л Ариун Сүнсээр удирдуулж байх нь зохистой. Хэрвээ үнэхээр Эзэний алдарын төлөөх Ариун Сүнсний гайхамшигт санаа тань бусдаар дэмжигдэхгүй, итгэлийн андууд тань уухайлан туслахгүй байвал, бусдыг яллалгүй, барьцаж гоморхолгүй өөрийн нөөц бололцоог хай, шавх, Эзэнээс зөвлөлгөө, туслалцаа гуй. Үнэхээр өөрийн тань хүч, бололцоо хүрэхгүй бол, Эзэнээс тодорхой аргачлал өгөгдөхгүй бол тааламжтай цагийг болтол хойшлуул, түр орхи. Эзэн, таниар л дамжуулан хийхээр шийдсэн бол, Өөрөө бүх нөхцөл байдлыг бүрдүүлээд хийх л болно.

Тэгээд ч, бидний Эзэн бол, хүнийг л үнэлдэг хайрладаг болохоос, ямарваа нэгэн ажил бүтэлгүйтэхэд ялалдаг шийтгэдэг нэгэн биш (Лк.10:38-40). Бусадтай барьцсан ямарч үйлчлэл, зүтгэл тань тааламжит өргөл болон хүлээн авагдахгүйг ч сана (Лк.18:10-14), (Мт.5:22-25).

Харин, хэн нэгэн нь бидний дунд орж ирмэгцээ л айдас, дарамт шаналал, санаа зовнил, ичгүүр гутамшиг, ядрал туйлдалаа (энэ дэлхий эдгээрээр дүүрэн) мартагнан ангижран, тэнгэрлэг тайвшралыг, амар амгаланг, эрх чөлөөг мэдэрдэг байх, улмаар Эзэнд зүрх сэтгэлээ нээн гэмшиж, амьдралдаа урьж, дахин төрдөг байх, тийм хайр, итгэлцэл, ил тод байдал цогцолсон уур амьсгал, харилцаа бүхий орчинг (Ариун Сүнсний оршихуйг) бүрдүүлэхийн тулд Эзэний ивээлийг гуйж, Түүнтэй хамтран ажиллах нь зүйтэй ба үр дүнд нь, Эзэнээр удирдуулсан, Түүнд дуулгавартай, эв нэгдэлтэй хамт олон (цуглаан) босгогдох нь бидний “амжилт” юм.

Тэрхүү нэгэн нь, энэхүү орчинд Ариун Сүнсээр амьсгалж, Бурханы хайрыг мэдэрч, тэнгэрлэг оршихуйд дахин төрөөд, улмаар Христийн зүрх сэтгэл, сэтгэлгээгээр бусдын төлөө, хаанчлалын төлөө амьдарч эхлэх нь бидний “амжилт” юм. Үүнийг мэдээж айлган сүрдүүлэх (олон “удирдагчид” Бурхан гэдэг “хадны мангаа” –гаар бусдыг айлгах эмгэгтэй байдаг), захирч тушаах (олон “удирдагчид” салбарын ахлагчдаасаа итгэгчдийн тоон үзүүлэлт, өргөлийн бүрдүүлэлт, элдэв аргачлал, сургалтын тайлан шаардаж, тэдгээрийг нь үндэслэн үйлчлэлийг нь үнэлж, дарамталдаг) байдлаар гүйцэлдүүлж болохгүй ба чадахчгүй юм. Нэгэнт Ариун Сүнсээр дахин төрсөн нэгэн нь үр жимсгүй, үйлсгүй амьдарч чаддаггүй тул, түүнийг үйлс үйлчлэлд ташуурдаад байх ч шаардлагагүй юм.

Харин Иаков “Иймээс ч итгэл нь хэрэв үйлсгүй бол өөрөө үхмэл юм.” (Иак.2:17), гэсэн нь Христитгэлийн бэлгийг хүлээн авч, зүрхэнд нь Бурханы Үр суулгагдсан хэн ч гэсэн, бусдыг хайрлах, энэрэх, зовсон нэгэнд чин сэтгэлээсээ туслах, байгаагаа хуваалцах зэрэг (үр жимс, үйлсэд) зан чанарт төлөвшсөн байдаг дээрхи үнэнийг онцолсон. Энэ нь аврагдахын төлөө бус, харин аврагдаад, тэнгэрлэг оршихуйд дахин төрсөн хүний хувьд эгэл жирийн амьдарлынх нь хэв маяг байх юм. Бас энэхүү хайрын үйлс нь, зүрх сэтгэлдээ шинэчлэгдэх дотоод үйлсийн илрэл (Иак.1:21; 3:13-18) байх юм, гэдгийг ч онцолсон.

Ийнхүү онцлох ноцтой шалтгаан ч байсан. Үнэхээр анхны Чуулганы үед, Иудейн шашины нөлөөтэй буруу сургаалийн эсрэг элч Паулын сөргүүлэн тавьсан авралын итгэлийн үнэ цэнийг (Еф.2:4-9), сул дорой гэмт мөн чанараа өөрчлөхийн төлөө биш, хаацайлхын төлөө ашиглагчид ч (Гал.5:13) олон байсан. Ийм байдал нь, жинхэнэ утгаараа дахин төрж, гэмшин өөрчлөгдсөнөөс гал халуунаар, Хаанчлалын болон бусдын төлөө амьдарч тэмцэж байсан ахан дүүсийнхээ урам зоригыг мохоох, нялх итгэгчдийн төлөвшилд буруу үлгэр дууриал болох хортой нөлөөтэй байснаас, Ариун Сүнс Иаков ахлагчаар дамжуулан Үгээ илчилсэн ба эдгээр нь, бие биенийгээ нөхдөг салшгүй нэгдмэл чанартай юм.

Ялангуяа, Иаков1:27-д “…ариун бөгөөд бузартаагүй сүсэглэл (төлөвшсөн итгэл) бол…” дараахи 3-н онцлох шинжтэй гэсэн. Үүнд:
1-рт; “Бидний Бурхан (Есүс Христ) ба Эцэгийн өмнө...” амьдрал тэмцэл, үйлчлэл маань байх ёстой гэсэн. Заримдаа бид хэн нэгэн мундаг хүнээр үнэлэгдэх гээд, бусдын тааллыг олох гээд, эсвэл өөрсдийн сэтгэл ханамжийг, хүсэл мөрөөдлийг чухалчилаад, бүр заримдаа энэ дэлхийн улс төр, хууль цаазын өмнө амьдарч, зүтгэж явдаг тал бий.

2-рт; “…зовж зүдрэх цагт нь өнчин хүмүүс, бэлэвсэн эхнэрүүдийг эргэж тойрох…” нь төлөвшсөн итгэгчийн бас нэг шинж гэсэн. Библи биднийг төрөлхийн гэмтэй (бузар) гэдэг. Энэ нь хүний туйлийн хувиа хичээх байдлаар илэрхийлэгддэг. Хар багаасаа л өөрийгөө л өрөвдүүлэх, асаруулах, өөрт л тааламжтайг нэхэх, шаардахыг хэнээр ч заалгалгүй гарамгай чаддаг. Эхэндээ хүмүүс Чуулганд бас л, энэ л хандлагаар ирдэг нь ч нууц биш.

Харин Ариун Сүнс дотоодод нь идэвхтэй ажилласнаар хүн өөрчлөгдөж, тэнгэрлэг оршихуйд дахин төрдөг. Дахин төрсөн, Христийн цусаар угаагдаж гэмгүй (ариун) болсон хүний ялгагдах шинж нь, бусдын төлөө амьдрах нь юм. Энэ нь ялангуяа, ядарсан зовсонтой Эзэнээс авдаг хайраа (Сайн Мэдээний үнэн, сэтгэл санааны дэм, залбирал, биеийн хүч мөн эд баялаг) хуваалцсан байдал дотор илчлэгддэг.

Харин хуулийн үйлсээр аврагдах буруу сургаалийг дагах юм бол, хүн бахь байдаг хэвээрээ л өөрийнхөө л төлөө, өөрийнхөө л авралын төлөө (хувиа хичээсэн өдөөлтөөр) элдэв үйлс, үйлчлэлд шамдан, айдсаар дарамтлагдан амьдархаас өөр аргагүй болдог.

3-рт; “…өөрийгөө хамгаалан дэлхийгээс бохирдохгүй байх нь ажгуу.” гэж өндөрлөсөн. Энэ ертөнц элдэв уруу татлагаар, сорилтоор дүүрэн. Харин бид тэдгээрийг бат эсэргүүцэн зогсож, тусгаар байж сурах хэрэгтэй.

Заримдаа бид Ариун Сүнсний оршихуйг мэдрэн догдолсныгоо, эсвэл цуглаанаасаа зохиогдож буй олон ажилд гар бие оролцож байгаагаа, Чуулганд тодорхой үүрэг хариуцлага үүрээд, албан тушаал сахиж байгаагаа “би маш их өөрчлөгдсөн, Эзэн миний амьдралд олон гайхамшигт өөрчлөлтийг хийчихсэн” мэтээр боддог, ярьдаг. Мэдээж энэ нь Христийн доторхи шинэ амьдарлын зохих үзүүлэлт мөн боловч, Эзэний хүсдэг шийдвэрлэх гол шинэчлэл биш.

Итгэлийн талаархи ярилцлага-3 “Уулыг ч нүүлгэх итгэл”

Уучлаарай багшаа. Гайхамшиг гэснээс, итгэл султайгаас өвчин чинь эдгэхгүй байна. Ариун Сүнс байхгүйгээс асуудлаар дүүрэн амьдарч байна, гэж манай цуглааны нэг эгч биднийг загнаад байгаа шүү. Энэ нь зөв үү?

Тэр эгч тань, та бүхэнд сайныг санасандаа л тэгдэг байх гэж бодож байна. Та түүнд нь нэг их эмзэглээгүй байхаа?! Бурханы хүн аливаа зэмлэлийг (тэр нь үнэхээр шударга бус, үндэслэлгүй ч бай), энэ нь миний төлөө гэсэн сэтгэлээс гарсан үг гэж, хэрвээ бүр хорсол заналын улмаас гэдгийг нь мэдэж байгаа үедээ, үүгээр дамжуулан Эзэн надад юуг ухааруулах, сургах гэв, гэх буюу миний хэр хайр уучлал, тэвчээр дотор төлөвшиснийг шалган, нягталж байна, гэж хүлээн авч сурах хэрэгтэй.

Ер нь, хүн хүнд өөрийн гэсэн итгэлийн хэмжээ байдаг. Энэ нь бас л Эзэнээс өгөгддөг. Харин Бурханы хүн бүрд ноогдуулсан итгэлийн хэмжээний дагуу эрүүл ухаанаар бод (Ром 12:3-10).

“Өндөр” итгэлтэй нь “сул дорой” итгэлтэйгээ халамжлан, босгон байгуулж, урамшуулаасай гэж Эзэн хүсдэг. Тэр биднийг итгэл дотор хүчирхэгжээсэй, найдвараа зөвхөн Түүнд тавиасай гэсний улмаас, зөвхөн Түүнээс л хамааралтайгаа үргэлж ухамсарлан санаж байгаасай гэж, Түүний дотор боломжгүй зүйл байхгүйг танин мэдээсэй гэж, бас бидний зүрхний хандлагыг сорих үүднээс итгэлийн хүч, нөлөөллийн гайхамшигт цочмог үйлс ажлыг хийдэг.

12 жил цус алддаг байсан эмэгтэйн эдгэрэл (Лк.8:44-48), зуутын даргын зарцынхаа төлөө гуйгаад авсан хариулт (Мт.8:13), Канаан эмэгтэйн охиныхоо төлөөх шантаршгүй гуйлтын шагнал (Мт.15:22-28) зэрэг олон жишээ нь бидэнд урам зориг өгдөг боловч, итгэлийн амьдарлын гол үзүүлэлт болгон, улайран хөөцөлдөх зорилго маань биш.

Энэ нь угтаа Эцэгийн болон Өөрийн хүч, эрх мэдэл, алдарыг илчлэх, Тэнгэрийн хаанчлалын энэрэнгүй, гайхамшигтайг мэдүүлэх зорилгоор хийгдсэн ба одоо ч энэ л зорилгоор Чуулганы дотоодод (итгэгчдийг босгон байгуулхын тулд) болон Сайн Мэдээний ажлыг хүчирхэгжүүлхээр Ариун Сүнсний Өөрийнх нь сонголт ба шийдлээр хийгддэг үйлс юм.

Гэтэл үүнийг л жинхэнэ итгэгчийн онцлог, Бурхантай хамт алхагчийн шинж мэтээр буруу бодож, амьдралдаа иймэрхүү итгэлийн гайхамшигийг хэр хэрэгжиж байгаагаар өөрийгөө болон бусдыг дүгнэх нь буруу. Тэр ч бүү хэл ийнхүү ярьж зааж сургадгаас болж, олон нялх сүнсэнд бүдрүүлэх чулуу болох байдал ажиглагддаг.

Үүнийг “…уулыг нүүлгэх итгэл…” (1Кор.13:2), гэж Библи тодорхойлдог. Энэ буруу сургааль нь, “ итгэл гэдэг ташуур бариад, хүсэл мөрөөдөл гэдэг тэргэнд суугаад, буулганд нь Эзэнийгээ хөллөн араас нь ташуурдсаар, зорьсондоо хүрч болох юм” шиг дүр зураг, ойлголтыг бий болгодог.

“Миний итгэл сулаас хүүхдээ солонгос явуулж чадсангүй…”, эсвэл “…тэр жинхэнэ сүнслэг итгэгч учраас түүгээр залбируулбал ажил бүтнэ…”, гэх мэтээр шүүн тунгаах нь, гуйлт нь санаснаар нь бүтэхгүй үед сэтгэлээр унах нь олонтоо. Та нар гуйгаад хүлээн авдаггүй. Учир нь та нар өөрсдийн тааламжид зарцуулъя, хэмээн буруу хандлагаар гуйдаг байна (Иак.4:3), гэж Библи хэлдэг.

Ийм итгэлийг “тугаа” болгогчид, тодорхой нэг, хоёр ишлэл, түүхийг, бас бусдад болон өөрт тохиолдсон гэрчлэлийг сүр дуулиан болгон мандуулж, амьд уялдаа холбоотой байж утга төгс, бүрэн дүүрэн зураглал болдог Библийн бусад мессежийг (Иак.4:2,3), (Иох.14:20,21) орхигдуулдаг.

Жиш: “Гуй, тэгвэл та нарт өгөгдөнө. Хай, тэгвэл та нарт олдоно. Тогш, тэгвэл та нарт нээгдэнэ.” гэсэн нь, 3-хан ишлэлийн дараахи “…тэнгэрлэг Эцэг тань Өөрөөс нь гуйдаг хүмүүст Ариун Сүнс өгөх нь дамжиггүй” гэдэг тайлалаар утга нь бүрэн гүйцэж, уншигдаж байна (Лк.11:9-13).

Таны хаанчлал ирэх болтугай. Хүсэл тань тэнгэрт шигээ газар дээр биелэгдэх болтугай (Мт.6:10), гэсэн хандлагаар амьдарч, гуйлт залбирлаа өргөж бай, гэж Эзэн заадаг. Үүнийг нэгэн хүн, “Хүний хүслийг тэнгэрт биелүүлэхийг итгэл гэхгүй. Харин Эзэний хүслийг газарт биелүүлэхийг итгэл гэнэ”, гэж хэлсэн байдаг.

Итгэл гэдэг нь, өөртөө ашигтайгаар Бурханыг хөдөлгөдөг, эсвэл өчүүхэн зорилгодоо үйлчлүүлхээр Бурханыг ажиллуулдаг, Есүстэй амьд харилцаатай байхаас ангидаар эзэмшиж болдог ямар нэгэн арга, механизм гэж ойлговол, дэндүү мунхаг хэрэг ба, бүр энэхүү мунхаглалаа “өндөр” итгэлийн шинж, гэж бусдад зааж, сургаж, өөрөө үлгэрлэн харуулхаар зүтгэдэг бол нэн харамсалтай.

Багш нар, хэрэгцээтэй зүйлсээ Бурханаас гуйгаад авах чадварыг чухалчлан заахаас илүүтэй, өөрийн Бурханыг хэрхэн чин сэтгэлээсээ хайрлах, Түүнтэй хувьчилсан нөхөрлөл дотор дэлхийлэг элдэв хүслүүдээ ялан дийлж, Түүний Үгээр, Ариун Сүнсний удирдамжаар өөрийгөө Библийн үнэт зүйлс, тэнгэрлэг зарчимууд, Христийн ариун жишгүүдэд хэрхэн зориулхыг, золиослохыг даруугаар зааж, үлгэрлэж байх ёстой.

Гэтэл олон хүн улам л өөртөө итгэлтэй, эрэмгий, захирангуй болж, “Эзэний алдарын төлөө” эсвэл “олны авралын төлөө” үй олон төлөвлөгөө, аргачлал, эмх цэгц бодож олон, тэдгээрийгээ бусдад тулган, хүлээж авахыг шаардах ба тэдгээрийнхээ гүйцэтгэл, биелэлтээс сэтгэл ханамж, бахдалыг авч, бахархалаа болгох нь ажиглагддаг. Түүгээр ч зогсохгүй аливаа сүнслэг ид шид, “гайхамшгийг” үйлдэх эрдэм чадал эзэмшиснээрээ бахархаж, түүгээрээ шоудах нь ч бий.

Ямар нэг байдлаар загалмайгаас өөр зүйлээр сайрхаж бахархдаг, Эзэний өмнө өөрийн байгуулсан гавъяа, ололт амжилтыг барьж очино, гэж боддог хүн байгаа бол, тэрээр огт аврагдаагүй хүн байна, гэхэд хилсдэхгүй. Өөрийн амийг хайрлагч хүн түүнийгээ алдана. Энэ ертөнцөд өөрийн амийг үзэн яддаг хүн түүнийгээ мөнх аминд хүртэл хамгаалах болно (Иох.12:25).

Чуулганд нэгэн цагт хүчтэй нөлөөтэй, үнэтэй хүндтэй, тойрон хүрээлэгдсэн, олон хүний “бахархал, түшиг тулгуур” нь байсан нэр алдартай пастор, ахлагч удирдагчид гэнэт нэг л өдөр “нүцгэн байдал” нь ил болж нуран унах нь бий. Яамай даа. Тэдний өөрсдийнх нь төлөө Эзэнд талархая.

Хөөс сахруулан олны өмнө “жүжиглэж”, яг л “аврагч” болчихсон мэт аяглаж (2Тес.2:4), үй олны зүрх сэтгэлийг өөртөө булааж (2Тес.2:12), бүдрүүлэх чулуу болж яваад, эцсийн мөчид “Хаалган” (Мт.7:22,23) дээрээс хөөгдөснөөс, яг энэ үед сахилгажуулагдан дорд болж, эрэгцүүлэн ухаарч, гэмшин даруусаж, загалмайгаас л зууран, Христийн цуснаас өөр өмч хөрөнгөгүйгээ мэдэж авах нь аврал юм.

Тэгээд ч “өндөр” итгэл нь, зөвхөн махан биеийн эдгэрэл, аливаа асуудал хүндрэлүүдийг бэрхшээл зовлонгүйгээр даван туулах чадвар гэхээсээ илүү, хүнд бэрх үед итгэл үнэмшлийнхээ төлөө амиа өгөхөөс ч үл буцах эр зориг, үнэнч зан (Үй.7:55-60)(2Кор.23-27), өөрийн эд хөрөнгө, хүсэл мөрөөдөл, ирээдүй хувь заяагаа ч Эзэндээ эргэлзэлгүйгээр өргөн барьж, даатган найдах эрс шийдвэр (Үй.4:34-37), аливаа уруу татлагыг, сатаны заль мэхийг соргог мэдэрч эсэргүүцэх чадвар, дадлага (1Пт.5:8,9)(2Шс.18:16-22), үхэл үзэлгүй өөрийн Бурхантайгаа өргөгдөн одох халуун хүсэл (Эх.5:22-24)(2Хд.2:1-11), зэрэг гайхамшигт үлгэр жишгүүдтэй байдгыг Судараас харж болно.

Гэхдээ энэ итгэл нь огт хэрэггүй гэсэнгүй. Энэ нь хүний Христтэй тогтоосон хувьчилсан дотно харилцаан дотор, хүний хэвшмэл сэтгэлгээний хил хязгаарыг давсан тэнгэрлэг үнэмшил, өөрийгөө даруусган зөвхөн Эзэний нийгүүлсэлд найдсан байдлаар хэрэгжиж байвал маш өгөөжтэй.

Өөрөөр хэлбэл, энэ нь ямар нэг байдлаар, бусдыг итгэлээр нь басамжлах, өөрийгөө дөвийлгөх байдлаас бүрэн ангид, даруу төлөвшил дотор их илэрхийлэгддэг. Шууд Ариун Сүнснээс эдгэрэл авдаг нэгэн нь, эмч эмнэлгээр дамжуулан Эзэн намайг эдгээнэ, гэж итгэдэг нэгнээ басамжлахгүй байх ёстой.

Баяр баясгалан

Бид заримдаа бусдын тус дэмжлэгийг байх л ёстой зүйл гэж боддог. Харин Христийн дотор сурсан мэдсэн, ойлгосон ухаарсан маань огт өөр зүйлийг өгүүлж байна.

Бусдын тус дэмжлэг, ивээл ерөөл нь огтхон ч байх ёстой зүйл биш. Тиймээс ч маш их баярласан талархсан сэтгэлээр хүлээн авч, хариу үйлдэл үзүүлэх хэрэгтэй. Ялангуяа Эзэний хайр ивээлээр сонгогдсон маань бидэнд агуу зол завшаан бөгөөд, хариуд нь үргэлжийн баяр талархалаар өргөл өргөх зохистойг Библи мэдүүлдэг.

Үргэлж баяртай бай. Тасралтгүй залбир. Бүх зүйлд талархлаа илэрхийл. Учир нь энэ бол та нарын төлөөх Христ Есүс доторх Бурханы хүсэл мөн (1Тес. 5:16-18).

"Таагүй нөхцөл байдалд ч урам зоригтой байдлаа хадгалсаар байх нь, баяр хөөртэй зан юм аа." гэж Henry Clay гэгч зан чанар судлаач тодорхойлжээ. Бид тийм байж чаддаг уу?! Яг миний хувьд, баяр хөөр нь ямар тохиолдолд намайг эзэмдэн дүүргэдэг билээ?!

Их Эзэндээ хүндэтгэл магтаал өргөж байх үед ихэвчлэн илэрдэг. Түүний миний амьдралд хийсэн, хийсээр байгаа бүхий л гайхамшигт үйлсийг ухаарах, зүрх сэтгэлийн угаас улам гүнзгий ойлгох тусам, баяр хөөр талархал бялхаж байдаг.

Энэ нь бас араасаа маш их сэтгэл ханамж, амар тайвны дүүрэн байдлыг дагуулдаг. Эдгээр нь зөвхөн Их Эзэнтэйгээ ойр байж, Түүний тухай бодож, юуг ч Түүний л төлөө хийхэд л бүрдэж байдаг.

"Үүргээ биелүүлэхдээ баяр хөөрийг амсч буй хүн л, жинхэнэ эрх чөлөөтэй амьдарч байна." гэж Цицерон хэлжээ. Тиймээ ямар ч хүнд нөхцөлд Түүнээс өгөгдсөн аврал, хайр, эрх чөлөөг тунхаглан, бусадтай хуваалцах үед, бид баяр хөөрийг дүүрнээр мэдэрдэг.

Харин Бурхангүй хүмүүсийн хувьд, баяр хөөр нь хуурамч бөгөөд нөхцөл байдлаас шалтгаалж байдаг. Үр хүүхэд нь сургуульдаа сайн сурч байвал баярлана.
Эсрэг тохиолдолд гуниж гутарна, уурлаж уцаарлана. Ажил төрөлдөө амжилт гаргаж, удирдлагийн зүгээс сайшаан урамшуулбал баярлана. Харин бүтэлгүйтэл, түүнээс улбаалсан зэмлэл ирвэл, өөрийгөө болон бусдыг зүхнэ.

Эзэний оршихуйгаас гадуурхи хүмүүс, элдэв шоу зугаа цэнгэлээс, марзан шалихгүй хошигнолоос, спортын уралдаан тэмцээнээс, сексийн элдэв адал явдалаас, архинаас, хар тамхинаас, хонжворт сугалаа, мөрийтэй тоглоомноос, хувцасны шинэ загвараас, хоол хүнснээс сэтгэл ханамж, баяр хөөрийг хайж, эрэлхийлж байдаг нь хөөрхийлөлтэй.

Тэгээд, эдгээрээс нь эргээд уй гашуу, уйтгар гуниг, өвчин зовлон, ядуурал хоосрол, хэрүүл тэмцэл л ирдэг. Энэ нь хүмүүс өөрсдийн амьдарлыг, өөрсдийн санаагаар удирдан залахыг хичээснээс, өөрсдийн хүчээр сэтгэл ханамж, түүгээр дамжин ирдэг баяр хөөрийг олохыг оролдсоноос болдог.

Гэтэл жинхэнэ баяр хөөр, амар тайвны оршихуй болсон Эден цэцэрлэг хүрэх зам нь, херубууд болон зүг бүрт эргэлддэг галт илдээр хамгаалагдсан байдаг (Эх.3:24). Энэ нь, хүн өөрийн хүчээр жинхэнэ баяр баясгалан, амар тайвныг олж чадахгүйг анхааруулдаг өвөрмөц илчлэлт юм. Харин энэхүү Эден цэцэрлэг болсон баяр хөөр, амар тайвны Ариун Сүнсний оршихуй нь, Эзэний Хайр, Уучлалаар (Загалмайгаар) дамжин бидний зүрхэнд өгөгддөг.

Бид, Түүний илчилсэн Үнэнг мэддэг бөгөөд, бидэнд өгөгдсөн гайхамшигт амлалтуудад итгэдэг учир, ямар ч нөхцөл байдлаас үл шалтгаалах, харанхуйн бүхий л дарамт шаналгаан дунд ч баяр хөөртэй байх сэтгэлийн хүчийг олдог.
Түүний илчилсэн Үнэн, гэж юу вэ?

А: Бодож төсөөлдөө, үнэхээр гайхалтай. Бурханы Хүү миний төлөө үхэж, намайг эдлэх ёстой ялаас минь чөлөөлсөн. Одоо гэмийн ял зэм надад ирэхгүй. Гэм миний дээр эрх мэдэлгүй болсон. Тэгээд бас, Бурханы Хүү үхлийг ялж дахин амилсан. Энэхүү дахин амилалт нь, надад ч бас хэрэгжинэ. Үхээд л бүх зүйл дуусахгүй нь байна шүү дээ.

Ингээд л бодохоор, энэ ертөнцийн бусад асуудал ер нь юу юм бэ? Төрөх үхэхийн хоорондох аливаа асуудлууд намайг зовоож шаналгах хүч, эрх мэдэлтэй гэж үү? Би дипломтой ч, дипломгүй ч, зэрэг цол, хэргэмтэй ч, хэргэмгүй ч, баян ч, ядуу ч, урт насалсан ч, богинохон амьдарсан ч, ад үзэгдсэн ч, амжилттай байсан ч, эдгээр нь амьдарлын минь утга учир, үнэ цэнэ биш. Би эдгээрээс болж шаналж зовон, худал хуурмагт орооцолдож, ичгүүр гутамшиг, дорд байдлыг амсахгүй. Ямар гайхалтай эрх чөлөө вэ? Үүнийг Эзэн, “Тэгээд та нар үнэнийг ойлгож, үнэн та нарыг чөлөөлнө.” (Иох.8:32) гэдэг.

Б: Бүх орчлон Түүний хүслийн улмаас, Түүний бодож тооцоолсноор, Түүний мэргэн ухаан, хайр энэрлийн гэрчилэл болон бий болсон. Тэр дундаа хүмүүн бид ч гэсэн.

Эзэн бидэнд, Өөрийнх нь дүр төрхөөр гэрэлтэн амьдрах бүх нөхцөл бололцоог хангаж өгдөг. Тэр бидэнд амьсгалах агаар, уух ус, идэх хоол бүгдийг бас, сайн эх орон, эцэг эх, ах эгч, дүүс, хань ижил, үр хүүхэд, найз нөхөд, ажил үүргийг ч өгдөг. Тэр ч бүү хэл хүсэл мөрөөдөл, халуун тэмүүлэл, эрч хүч, эрүүл мэнд ч зөвхөн Түүнээс юм. Улмаар зүгээр л нэг өгөөд, зөнд нь орхичихдоггүй, харин улам төгөлдөржүүлэн хөгжүүлж, хөтлөн удирдаж байдаг.

“Таны сүр хүчний цог жавхлант яруу алдар болон, Таны гайхамшигт үйлсийг би тунгаан бодно. Хүмүүс Таны сүрдмээр үйлсийн хүчийг ярих бөгөөд, би ч Таны агуу байдлыг тунхаглана. Тэд, Таны элбэг баян, сайн сайхны дурсгалыг хичээнгүйлэн ярих бөгөөд, Би ч Таны зөв шударгын тухай баяртайгаар хашхирна.” (Дуу.145:6,7).

В: Олон хүн, хүн төрөлхтөн мөхөл сүйрлийнхээ замаар явж байна, гэдэг. 21-р зуунд байгалын элдэв гамшигт үзэгдлүүд хүмүүний байнгын дагуул болж, Азоны цоорхой улам нэмэгдэж, хоол хүнс улам хомсдож, ундны цэвэр ус ч олдошгүй эрдэнэ болон, улам олон шинэ шинэ өвчингүүд олширч, бид цаашдаа оршин тогтнох эсэх нь эргэлзээтэй болж байна, гэдэг. Энэ нь гутрангуй, Эзэний бүтээсэн, хөтлөн удирдаж, улам төгөлдөржүүлж байдаг, амьдрал гээч гайхамшигт үзэгдлээс зөвхөн хар барааныг нь олж хардаг сэтгэлгээ юм.

Гэтэл өдөр бүр Аврагч Есүсийн нэр, Түүний яруу алдар дуурсаж, үй олон хүмүүс, олон үндэстнүүд Тэнгэрийн хаанчлал руу ирж байна. Энэ дэлхийн бүхий л бузар мууд, миний Эзэн, өөр хэн ч (хэн нэгэн Будда ч юм уу, эсвэл хэн нэгэн сайн ерөнхийлөгч ч юм уу) биш, чухам миний Бурхан Есүс цэг тавьж сөнөөх болно. Бүхий л төсөөлж болох сайныг, хамгийн сайныг, бүр ямар ч төсөөллөөс ч илүү сайныг бодитоор авчирна.

Олон ард түмнүүд ирээд “Ирцгээ, Эзэний уул руу, Иаковын Бурханы өргөө рүү явцгаая. Тийнхүү Тэрээр бидэнд Өөрийн замыг зааж, бид Түүний жимээр алхах юм”, гэцгээнэ. Тэр өдөр “Үзэгтүн. Энэ бол бидний Бурхан байна. Тэр биднийг аврахыг, бид хүлээж байсан. Энэ бол бидний хүлээж байсан Эзэн. Түүний авралд баясан цэнгэцгээе.” гэх болно (Исаиа 2:3, 25:9).

Тиймээс одоо та нар уй гашуу боловч, Би та нартай дахин уулзана. Та нарын зүрх баярлана. Та нарын баяр баясгаланг, хэн ч та нараас булаахгүй, гэж Их Эзэн амладаг (Иохан 16:22).

Тэгэхлээр үнэн баяр баясгалан гэдэг нь, бидний амьдралд тохиолдож буй зүйлсийн үр дүн биш, харин бидний зүрх сэтгэлд Христээр дамжуулан юу байгаагын илрэл юм.

Г: Бидэнд тохиолддог бүх л сорилт, бэрхшээл зовлонгууд нь, бидний зан чанар улам төлөвшиж, оюун сэтгэлгээ улам гэгээрч, зүрх сэтгэл (ёс суртахуун) улам ариусаж, өдөр ирэх бүр Түүнтэй адил болохын төлөө учирдаг нь баярлахгүй байхын аргагүй үнэн юм. Амьдрал бол долгионлог үзэгдэл.

Мөнгө болон хувьцааны ханш, эд барааны үнэ, эдийн засгийн үзүүлэлтүүд ч, хувь хүний амьдрал, хамт олон, сүм чуулганы сэргэлт, нуралт ч, ард түмнүүд, улс үндэстнүүдийн хөгжил цэцэглэлт, уруудаж доройтох нь ч Түүний л мутраас юм. Тэр биднийг шигшиж тунгааж, цэвэршүүлдэг. Газар дэлхий бол Түүний уурхай юм. Мөнгөний уурхай болон алтыг цэвэршүүлдэг газар зайлшгүй байдаг. Төмрийг шорооноос авдаг бөгөөд зэсийг хүдрээс гаргадаг (Иов 28:1,2).

Энэхүү шаталсан долгион нь, Эзэнээс гадуурхи тохиолдолд дандаа уруудсан үзүүлэлттэй байдаг бол, харин Эзэний дотор үргэлж өөдөө байдаг нь бахадмаар. Түүний хайр уучлалаас гадуурхи хүмүүсийн, амьдралынх нь хамаг сайн сайхан нь ихэвчлэн ард нь хоцорч, өнгөрөн одсон байдаг.

Тиймээс ч Бурхангүй хүмүүс “аз жаргал” нь хажууд нь байсныг мэдэлгүй өнгөрөөснөө, гэнэн мунхаг байснаа бодож шаналж, харамсдаг ба ирээдүй нь тийм ч (хүслийнх нь дагуух) сайныг амлахгүй байгааг харахдаа гутардаг. Харин хайрлагдагсдын хувьд бүх л итгэл найдвар, гэрэлт ирээдүй маань, өмнө маань байдаг нь, хувиршгүй баяр баяслын үндэс болж өгдөг. Баяр баясгалан гэдэг нь, гуниг зовлон байхгүйн баталгаа бус, харин Христ байгаагын илэрхийлэл юм.

Хэдийгээр инжрийн мод цэцэглэлгүй, усан үзмийн мод үр жимсгүй болж, чидун модны ургац гарахгүй, талбайд ямарч хүнс ургахгүй байсан ч, мөн хашаандаа хоньгүй, саравчиндаа үхэргүй болсон ч, би Эзэний дотор баясан хөөрч, авралынхаа Бурхан дотор баярлана (Хабаккук 3:17,18).

Үнэхээр гайхамшигтай. Их Эзэний юугаар ч үнэлэшгүй золилтоор дамжуулан аврагдаад, дээрхи гайхамшигт үнэнүүдийг ухаарч ойлгоод, баярлахгүй, баясахгүй байна гэдэг нь мунхаг хэрэг юм. Зүрх сэтгэлээсээ Түүнд талархан, баяр хөөртэй амьдрах үед, Ертөнцийн Эзэн Эцэг маань биднийг Ариун Сүнсний хур онгодоор тэтгэн, махан биед ч, оюун санаанд ч, сүнсэнд ч хүч чадал, эрүүл мэндийг өгч байдаг.

Тэр бидний бие цогцосыг гайхамшигтай эрхэм нандинаар бүтээсэн бөгөөд, зөвхөн баярлаж баясах үед л иммунитет систем буюу дархлааг хөгжүүлдэг тусгай даавар цусанд ялгарч байдаг. Бас бидний баяр хөөрөөр дамжуулан, Эзэн бусдад (гутранги, гомдолломтгой, аймхай нэгэнд) урам зориг, сэтгэлийн тэнхээ өгдөг. Нэг үгээр, бусдыг Эзэний замаар дагуулах хүч чадалыг бидэнд өгдөг.

Мөн, баяр баясгалантай байснаараа, бидний Эзэнтэй тогтоосон харьцаа улам батжин, Үгийн нууцууд илэрхийлэгддэг.

Дүгнээд хэлэхэд: Баяр баясгалан бол бидний мэргэн ухаан юм.

Таны үгс олдсон бөгөөд би тэднийг идсэн билээ.
Таны үгс надад баяр хөөр болон зүрх сэтгэлийн минь таашаал болсон билээ.(Иеремиа15:16)

Эзэний сургааль нь зөв, зүрхийг баярлуулдаг.
Эзэний тушаал нь тодорхой, нүдийг нээж өгдөг. (Дуулал 19:8)

Баяр баясгалан бол бидний хүч чадал юм.
Ах дүү нар минь, элдэвийн сорилтонд орохдоо үүнийг бүрэн баяр хөөр гэж үз. (Иаков 1:2)

Харин та нар Христийн зовлонгуудыг хуваалцдагтаа баярла. Ингэснээр мөн, Христийн алдар илчлэгдэхэд та нар баяр хөөртэйгээр баярлах юм. (1Петр 4:13)

Баяр баясгалан бол бидний эрүүл мэнд юм.
Баяр хөөртэй зүрх бол сайн эм.
Харин эмтэрсэн сүнс ясыг хувхайруулна. (Сургаалт Үгс 17:22)





"Зан чанар төлөвшихүй" хичээлийн гэрийн даалгавар
Шалгасан багш: Амаржаргал UBTC 2006

Саул, Давид нарыг харьцуулах нь

1.Тэдний гарал үүсэл

Саул нь (1Сам.9:1,2) Афиагийн жич, Бехоратын гуч, Зерорын ач, Абиелын хөвгүүн Киш гэдэг эр зоригтой, Бениамин хүний ганц хүү юм. Саул нь тэр үедээ Израилчуудын дунд байхгүй өндөр биетэй, шилдэг гэж үзэгддэг, сайхан залуу байсан. Тэр үхэрчин байсан.

Давидын гарал үүслийн талаар Библийн Хуучин Гэрээний (Рут.4:18-22) (1Шас.3:10-17)-д, Шинэ Гэрээний (Мт.1:1-6) (Лук3:23-28)-д нилээн нарийвчлалтайгаар дэлгэрэнгүй өгүүлсэн байдаг. Түүний угийн бичгийг Адамаас эхлүүлэн дэлгэрэнгүй өгүүлсэн байдаг боловч, энд (Мт.1:1-6)-д бичигдсэн хувилбарыг оруулав. Абрахам Исаакийн эцэг, Исаак Иаковын эцэг, Иаков Иудагийн эцэг, Иуда нь Перез, Зера нарын эцэг бөгөөд тэд Тамараас төржээ. Перез Хезроны эцэг, Хезрон Рамын эцэг, Рам Аминадабын эцэг, Аминадаб Нахшоны эцэг, Нахшон Салмоны эцэг юм. Салмонд Рахабаар Боаз, Боазд Рутаар Обед төржээ. Обед нь Иессийн эцэг, Иесси нь Давид хааны эцэг билээ.
Давид нь дээрээ 6-н ахтай, 2 эгчтэй, айлын отгон хүү юм. (1Шас,2:13-16) Түүний ах нар нь Елиаб, Абинадаб, Шимеа, Нетанел, Раддаи, Озем нар ба эгч нар нь Зериуа, Абигал нар юм. Тэрээр хоньчин байсан. (1Сам.16:11) (1Сам.17:20)

2. Тэдний хаанаар тослогдсон нь:

Саул нь Израилийн хамгийн анхны хаан юм. Түүнийг хаанаар тослогдох үе нь, Израилчууд шүүгчдийн засаглалыг хүчгүй, сул дорой гэж голон “бусад үндэстнүүдийн адил хаантай” болохоор хүсэн тэмүүлж байсан үе юм. Тэд тахилч, эш үзүүлэгч, Израилийн сүүлчийн шүүгч Самуэлээс хааныг эрчимтэй шаардаж байлаа. (1Сам.8:6). Самуэл хичнээн дургүй байсан ч Бурханы сануулснаар, хааны засаглал нь ямархуу хэцүү дарамтыг тэдний нуруун дээр авчирахыг Израилд сануулсан боловч, тэд үргэлжлүүлэн шаардсан (1Сам,8:19,20). Тиймд Эзэн хааныг томилохоор шийдвэрлэдэг. Ийнхүү Эзэн Самуэл Саул нарын уулзалтыг гайхамшигтайгаар товлосноор тэд уулзаж танилцдаг (1Сам.9:17-21). Маргааш өглөө нь Самуэл Саулыг (1Сам.10:1) тослон хаанаар сонгогдон томилогдсоныг нь хэлсэн. Хэсэг хугацааны дараа Самуэл Израилыг Мизпад цуглуулаад, тэнд Саулыг Эзэнээр сонгогдсон хаан гэдгийг нь зарласан.

Давид нь Израилийн бүх үеийн турших хамгийн аугаа хаан юм. Түүнийг эцгийнхээ хонийг хариулсан залуухан хүү байхад, Израилийг Саул хаан захирч байв. Гэвч Саул Эзэний өмнө бардам, дуулгаваргүй байснаас Эзэн түүнийг хаан байлгахаас татгалзан, улмаар Самуэлийг Бетлехем рүү илгээсэн. Самуэл тэнд Иессийн 6-н хүүг шинжсэн боловч Эзэний сонгосон хүн тэдний дунд байсангүй. Харин хонины бэлчээрээс отгон хүү Давидыг нь авчирмагц, Эзэн түүнийг тослохыг Самуэлд тушаасан. Самуэл ах нарынх нь дунд эвэртэй тосоор түүнийг тосолсноос хойш Давидын дээр Ариун Сүнс хүчтэйгээр бууж ирэх болсон (1Сам.16:6-13). Гэсэн ч тэрээр хааны сэнтийд бодитоор залартлаа хүнд хэцүү, хатуу ширүүн он жилүүдийг туулан өнгөрөөсөн нь, жирийн хоньчин хүүг Бурханы ард түмэн Израилийн агуу их хаан болгохоор дасгалжуулан бэлдэж байсан Эзэний сахилгажуулалт, сургууль байсан юм. Түүнийг өөрийнх нь оронд Израилийн хаан байхаар тослогдосныг сонсоод Саул хаан түүнийг алахаар улайран хөөцөлдөж эхэлсэн нь Давидыг улам л алдаршуулж, хатуужуулж, ухааруулж, төлөвшүүлж байлаа. Он жилүүд өнгөрч Саул хаан амиа хорлон үхмэгц, Давид өөрийн дагалдагчдын хамт Хебронд ирж суусан ба Иудагийн эрчүүд (2Сам.2:4) ирж, тэнд түүнийг Иудагийн гэрийн хаанаар тосолсон. Тэр үед тэр 30-н настай байсан. 7-н жил 6-н сар Иудаг хаанчилж байхдаа бүх Израилд хүлээн зөвшөөрөгдөөгүй байсан ба Иш-Бошет, Абнер нарын захирсан Израилийн гэртэй дайтаж байлаа. Харин Абнер, Иш-Бошет нар алагдасны дараа Израилийн бүх ахлагчид Хебронд цуглан Давидтай Эзэний өмнө гэрээ байгуулж, бүх Израилийн хаан болгон тосолсон (2Сам.5:1-5).

3.Тэдний хаанчилсан хугацаа

Хаанчлал нь зөвхөн тухайн нэр бүхий хувь хүний амьдралын хугацаагаар хэмжигддэггүй. Түүний үр удам нь угсаа залган хэр их, он удаан жил тасралтгүй хаанчилснаар хэмжигдэнэ

Саулийн хаанчилсан хугацааны талаар зөрөөтэй саналууд, таамагууд байдаг. Ямартаа ч Монгол Библи дээр 40-н насандаа хаан болоод (1Сам.13:1) Израилийг 32 жил захирав, гэсэн байдаг. Зарим эх сурвалж 30-н насандаа хаан болж 40-н жил Израилийг захирсан гэсэн байдаг. Саулыг нас барсаны дараа, түүний 4-р хүү Иш-Бошет хойд Израилийн хаан суудалд сууж 2 жил хаанчилсан. Иш-Бошет өөрийн албатууддаа алуулснаар Саулын хаанчлал бүрэн тасарсан.

Давид 30-н насандаа хаан болж, Хебронд 7-н жил 6-н сар, Иерусалимд бүх Израил болон Иудаг 33-н жил, нийт 40-н жил хаанчлав (2Сам.5:4,5), гэж бичигдсэн байдаг боловч Эзэн түүнд “…Чиний гэр болон чиний хаанчлал Миний өмнө мөнхөд үргэлжилж, чиний хаан ширээ мөнхөд тогтоно...” (2Сам.7:16) гэж амласан нь гайхалтай.
Гэвч Давид гэмд унаж, ноцтойгоор нүгэл үйлдэн, шударга, үнэнч дайчныхаа (Уриагийн) амийг хөнөөж, эхнэр Батшебаг нь эзэмдсэн нь түүний гэрт, хойчийн угсаа залгамжилсан хаанчлалд нь бүдрүүлэх чулуу болсон юм. Эзэн түүний энэ гэмд хилэгнэн “…чиний гэрээс хэзээ ч илд салахгүй (2Сам.12:10), чиний эсрэг гэрийнхнээс чинь гай зовлон ирэх болно…” (2Сам.12:11) гэж айлдсан нь, түүхэнд хэрэгжсэн юм.
Дөрвөн зууны туршид Давидын удам Иудагийн хаан ширээнд тасралтгүй суусан боловч Давид шиг сүнслэг, итгэмжит тослогдсон хаан байгаагүй ба хиймэл шүтээн шүтэгчид, урван тэрсэлж завхайрагчид, олон байсан тул, энэ удмынхнаас илд салалгүй байсаар, МЭӨ 587 онд Иерусалим сүйрч Вавилонд эзлэгдсэн ба Давидын удмын сүүлчийн хаан Зедекиа нүдээ сохлуулан олзлогдсон байдаг (2Хаад 25:6,7).
Тэгэхлээр Бурханы амласан мөнхийн хаанчлал 400-гаадхан жилийн настай байсан гэсэн үг үү?! Бурхан Давид-д амлахдаа, зөвхөн Өөрийн талаас л энэхүү амлалт үүргийг хэрэгжүүлнэ, гэсэн болохоос Давидын талаас ямар үүрэг хариуцлагатай болохыг заагаагүй. Түүний амлалтын оргил нь Давидын удмаас мөнхийн Хаан болох Мессиа төрнө гэсэн нь юм (Ис.9:6,7) (Ис.11:1,10).
Энэхүү гайхалтай амлалт нь Евагийн үр могойн толгойг няцлах болно (Эх.3:15), гэсэн зөгнөлийн үргэлжлэл, Абрахам болон түүний удамд өгсөн амлалтын (Эх.12:1-3) үргэлжлэл байлаа. Энэ амлалтын биелэлт нь Давидын удмын итгэмжит охин Мариа, зөвт залуу Иосеф нарын гэр бүлд, тэнгэр элч Габриелийн тунхагласнаар Есүс Христ мэндэлснээр биелэлээ олж эхэлсэн (Лк.1:30-37) ба улмаар, Христ үхлээс амилан, тэнгэр газар дээрх бүх эрх мэдэл Түүнд өгөгдөж (Мт.28:18-20), Эцэгийн баруун гарт заларсан (Үйлс 2:29-36) явдлыг ч багтаадаг. Давидын удам, мөнхийн Хаан Христийн (Илч.3:7) (Илч.22:16) хаанчлал нь энэ үед Бурханы хаанчлалыг удирдан Чуулганыг тэргүүлж байгаа ба ирэх үед мөнхийн мөнхөд шинэ тэнгэр, шинэ газрыг бүтээж удирдан захирснаар (Илч.21,22) төгс биелэнэ.

4. Тэдний хувийн зан чанар

Саул нь анх Самуэлтэй уулзаж, хаанаар тослогдож байх үедээ өөртөө итгэлгүй, даруу бүрэг ичимхий (1Сам.9:21) (1Сам.10:22,23) нэгэн байсан. Эзэн Ариун Сүнсээрээ түүнийг тосолж, зан чанарыг нь өөрчилсөн (1Сам.10:9). Эзэн энэхүү тосолгоог хэрэгтэй цаг үед нь дахин хийснээр (1Сам.11:6) тэрээр өөртөө итгэлтэй (1Сам.11:7), хүмүүсийг удирдан зохион байгуулж, тэргүүлэх чадвартай (1Сам.11:11) хүчирхэг нэгэн болон хувирсан байдаг. Хэдийгээр түүнийг хаанаар өргөмжлөх үед үл бүтэх хүмүүс басамжилсан боловч, анхны ялалтаа байгуулж, эрх мэдэл, байр сууриа баталсан үедээ тэднийг шийтгэн өс авахаас татгалзан (1Сам.11:13), өгөөмөр язгууртан занг харуулж байлаа.
Гэвч тэрээр амархан сэтгэл хөдлөлд автдаг, түүндээ захирагддаг байсныг нь ашиглан, муу сүнс түүнийг атаархал айдас, дуулгаваргүй байдалд хөтөлсөн. Тэрээр дайснаа ялахад нь ихээхэн хэрэгтэй байсан, хүч тэнхээ сэлбэх хоолыг нь хорьж, хөнгөн хуумгай шийдвэр гаргаж Эзэнд тангараг (1Сам.14:24) өргөсөн нь хүү Ионатаных нь амийг ноцтойгоор аюулд (1Сам.14:31-44) учруулсан байдаг. Саул нэр төр, алдар хүндэд шунагч байсан ба дайсандаа хүртэл нэр тал олохыг оролдож (1Сам.15:9), Амалекийн хаан Агагийг амьд үлдээн Бурханд дуулгаваргүй хандсан байдаг. Тэрээр амьдралынхаа сүүл үед, хаан ширээнийхээ төлөө хардах, харамлах сэтгэлдээ хөтлөгдсөн, ирээдүйн Израилийн хаан Давид-д атаархсандаа солиорох шахсан, огцом ууртай нэгэн (1Сам.18:11) болсон.
Тэр Давид руу, тэр ч бүү хэл, хүү Ионатан руугаа (1Сам.20:33) жад шидэн алах гэж оролдосноос нь харахад, биеэ барих чадвараар сул дорой байсан бололтой. Тэрээр үнэнч биш хувирамтгай зангаасаа болж Давид-д амласан амлалтнаасаа гурвантаа буцсан байдаг. Анхны удаа том охин Мерабыг эхнэр болгон өгөхөөр амлаад (1Сам.18:19) өөр хүнд өгсөн ба мөн удаах охин Михалыг Давидын эхнэр болгосон боловч, бас л өөр хүнд өгсөн байдаг. Бас түүнийг алах боломжийг ашиглаагүй, амийг нь өршөөсөн Давид-д (1Сам.24:16-21) амласан амлалтаа няцаж, дахиад л түүнийг алахаар мөшгөн хөөсөн (1Сам.26:2).

Давид бага залуу 20 хүрээгүй насандаа олны дунд алдар хүндийг олж эхэлсэн. Бурхан түүнийг нэн эртнээс Өөрийн зорилгын төлөө бэлтгэж, эр зоригтой, шударга, үнэнч нэгэн болгон өсгөсөн байна. Тэрээр хоньчин хүү байхдаа л арслан, баавгайг нүцгэн гараараа (1Сам.17:34,35) цохиж алдаг байв.
Давид бурханлаг удирдагч хүний олон сайн зан чанарыг цогцлоосон нэгэн байв. Тэрээр туйлдаж ядарснаас болоод тулалдаанд оролцож чадаагүй хүмүүстэйгээ дайны олзноос эн тэнцүү хуваалцсан (1Сам.30:23-25), Абигалын ятгалгыг сонсож уур хилэнгээсээ эргэж, Набалынхныг хүйс тэмтэрхээс татгалзсан (1Сам.25:32-34), Саулыг алах боломжоос 2 удаа татгалзсан (1Сам24:4-6) (1Сам.26:9-11), Бурханы авдарын өмнө, олон нийтээс ичиж зоволгүй бүжиглэсэн (2Сам.6:14-16), Саул (2Сам.1:14-16) болон Иш-Бошетийг (2Сам.4:9-12) алсан алуурчдыг шийтгэсэн, Саул, Иш-Бошет, Абнер нартай дайтаж тэмцэж явсан боловч, үхсэнийх нь хойно харамсан гашуудаж (2Сам.1:17-27) (2Сам.3:31-35) хүндэтгэл үзүүлж байсан, Ионатантай байгуулсан гэрээгээ сахиж, хүү Мефибошетод нь өршөөл энэрэл, өглөгийн гараа сунгасан (2Сам.9:6-13), эш үзүүлэгч Натаны зэмлэлийг сонсоод, Эзэний өмнө шууд л гэмшин даруу болсон (2Сам.12:13), Бурханаас түүний амьдралд хийж буй сахилгажуулалт бэрхшээл зовлонд ч дуулгавартай даруу байж (2Сам.15:25,26) хүлээн авдаг байсан ба хүний хараал (Бениамин хүн Шимеи) зүхлийг ч хүлцэн тэвчиж (2Сам.16:10,11) уучлан өнгөрөөсөн (2Сам.19:18-23) зэрэг зан чанарын илрэлүүд нь, эгэл хүнд баймгүй тэнгэрлэг зан, сүнсний төлөвшилийн үр дүн байсан. Энэ бүхэн нь Эзэнтэй Ариун Сүнсний нөхөрлөл дотор байсны ач болов уу?!
Гэхдээ Давид төгс төгөлдөр нэгэн байгаагүй. Тэр эмэгтэй хүнд амархан сэтгэл алдардаг байв. Энэ муу зуршилаасаа болж, эхнэртэй нь завхайрахын тулд, гэмгүй нэгэн шударга дайчнаа үхүүлж аллага үйлдсэн.
Мөн үр хүүхдийнхээ хүмүүжилд маш муу анхаардаг эцэг байсан. Тэднийгээ сахилгажуулж, хүмүүжүүлж чаддаггүй байснаас болж, нэг нь нэгнийгээ хүчирхийлж (2Сам.13:11-14), хоорондоо алалцаж (2Сам.13:28,29) бас хаан ширээ булаалдаж (1Хаад 1:5,6), тэр ч бүү хэл өөрийнх нь амь насанд ч заналхийлэн, хаан ширээнд нь шунаж байлаа.

5. Тэдний итгэл үнэмшил, сүнсний байдал

Саул нь бага залуугаасаа Эзэнтэй ойр дотно байгаагүй нь хүний ганц хүү байснаас болсон байж магад. Хүний ганц хүү учир эрх дураараа, элбэг хангалуун өссөн байх.
Тэрээр ямартаа ч амьдралынхаа аливаа асуудлыг Эзэнд даатгадаггүй, өөртөө их найддаг нэгэн байсан нь харагддаг. Тэр илжигнүүдээ хайгаад олохгүй болохоор гэртээ харихаар шийдсэн үед (1Сам.9:5) зарц нь түүнд Эзэний хүн дээр очиж асуухыг зөвлөснөөр (1Сам.9:6) Самуэл руу очсон. Бас Саулыг эш үзүүлж байгааг, түүнийг урд нь мэддэг байсан хүмүүс хараад (1Сам.10:11,12) маш их гайхацгааж, “Саул ч бас эш үзүүлэгчдийн нэг гэж үү?!” гэж ярилцацгаасан ба энэ нь бүр олны дунд зүйрлэл, хэлц үг болсоноос харахад, тэрээр аливаа сүнслэг амьдралын хэв маягаас (Бурханаас) дэндүү хол хөндий, эгэл практик бодьгал байсан бололтой.
Тэр тахилч биш боловч Эзэний хуулийг, Үг тушаалыг нь умартан тахил өргөсөн нь, түүний зүрх сэтгэлд Эзэн болон Түүний Үг ямархуу байр суурь эзэлж байсных нь илрэл болсон. Тэрээр Бурханаар сонгогдсон, Бурханы ард түмний удирдагч гэхэд дэндүү хөнгөн, өнгөцхөнөөр Үг тушаалд нь ханддаг, Эзэнийг зөвхөн өөрийнх нь байр суурь, хүсэл сонирхолд нь л үйлчлэгч Нэгэн мэт санадаг байсан нь харагддаг (1Сам.13:9-12). Мөн тэрээр хүмүүсийн тааллыг хайж, тэдний өмнөх нэр хүнд байр сууриа чухалчилж (1Сам.15:30) өөрийн итгэл үнэмшил, Эзэний хүсэл тушаалыг огоорсон нь, түүний хаанчлал эцэс болж Эзэний Сүнс түүнийг орхих учир шалтгаан болсон байдаг.
Саул Самуэлд л их найдаж, аливаа зүйлд түүнийг түшиглэдэг байсан ба Самуэлийг нас бармагц, түүний дурсгалд зориулж (Бурханыг хүндэлсэндээ биш) бүх мэрэгч, төлөгч нарыг Израилаас хөөсөн (1Сам.28:3).
Гэвч энэ шийдвэр нь, үнэхээр түүний чин үнэнч итгэл үнэмшилийнх нь илрэл биш гэдэг нь 2 зүйлээр харагддаг.
1. Хэрвээ тэр Бурханд л чин зүрхнээсээ итгэж найддаг байсан бол анхнаасаа л хаан болмогц л энэ шийдвэрийг гаргах байсан.
2. Тэрээр хожим дайсны хүчинд шахагдаад эхэлмэгц гаргасан шийдвэрээсээ тун амархан урваж Ен-дорын төлөгч эмд очиж (1Сам.28:7-19) хувь заяагаа асуун, бүр улмаар үхсэн нэгний сүнсэнд (1Сам.28:14) мэхийн мөргөсөн байдаг.
Энэ нь Израилд өгсөн (Д.х.6:4,5) “…Эзэн бол ганц. Чи өөрийн Бурхан Эзэнийг бүх зүрх, бүх сэтгэл, бүх хүч чадлаараа хайрла. (Д.х.13:1-5) Аливаа эш үзүүлэгч, мэргэч, зүүдэчийн үгийг, тэмдэг гайхамшиг үзүүлсэн ч бүү сонс…” гэсэн тушаалыг зөрчсөн ноцтой гэм байсан юм. Саул нь Бурханыг өөрийн ашиг сонирхолд үйлчлүүлэх зорилгоор л хардаг, сул дорой итгэл, дуулгаваргүй бардам зан, муу үйлсээрээ бидэнд ухаарал сургамжийг сануулдаг, Библийн нэгэн эмгэнэлтэй дүр билээ.

Давид бага залуугаасаа Эзэнтэй ойр дотно хувьчилсан харилцаатай, Түүгээр хайрлагдсан нэгэн байлаа. Тэр, Эзэнээр удирдуулдаг, Түүнд бүх итгэл найдвараа тавьдаг нэгэн байсан нь, түүний зохион дуулсан олон дууллаас тодорхой байдаг.
Дуулал номын 73-н дуулал дээр Давидынх гэдгийг нь баталсан гарчиг бий. Тэр хонины бэлчээрт байхдаа л Эзэнд зориулж олон дуулал зохиож, Түүнийг магтдаг байсан нь, Саул хаанд нэгэн залуугийн (1Сам.16:18) тодорхойлж байснаас харагддаг. Түүний зохиосон дууллууд нь үе үеийн тоо томшгүй итгэгчдийн өмнөөс Бурханд дуулдаг ба тэдэнд урам зориг, итгэл найдвар, тайвшралыг өгч, босгон байгуулдаг.
Энэ нь Ариун Сүнсний илэрхийлэл гэж хүлээн зөвшөөрөгдөж, одоо ч Эзэн тэдгээрээр дамжуулан олон олон хайртай хүүхдүүддээ ухаарал гэмшилийг өгч, сургаж хүмүүжүүлж байдаг. Мөн тэр өөрөө гайхалтай магтаалын тосолгоотой нэгэн байсан бөгөөд Ариун Өргөөнд, Эзэний Оршихуйд үргэлж магтаал хүндлэл өргөж байх магтаалын багыг (1Шас.16:4) анх удаа томилон үйлчлүүлсэн.
Ингэснээр Ариун Газар Эзэнд өргөх хүндэтгэл-мөргөлийн тогтсон хэв маяг, уламжлал дүр төрхөө олж, улмаар өнөө үе хүртэл үндсэн хэв загвараа хадгалсаар, Чуулганы мөргөлийн үйлчлэлийн гол цөм болдог. Тэрээр нүүдлийн байдалд байсан Эзэний авдарыг гүн хүндэтгэлтэйгээр, ёслол төгөлдөр Иерусалимд авчирч байрлуулаад Эзэний Оршихуйд зориулж Ариун Өргөөг барихаар (2Сам.7:2) санаа дэвшүүлсэн.
Харин Эзэн, цус их урсгасан дайнч хүн гэсэн шалтгаанаар татгалзсан ба хүүгээр нь бариулахыг зөвшөөрсөн (1Шас.22:7,8) тул Давид хаан, өөрийн аян дайны олз омог болон Израилчуудын өргөсөн, харь хаадаас бэлэглэсэн асар их үнэт металл, эрдэнийн чулууг, мөн барилгын материалыг бэлтгэн, зохих хүмүүст даатган хариуцуулж (1Шас.29:2-8) хүү Соломондоо захиж үлдээсэн.
Бас энэхүү Ариун өргөөний гадаад болон дотоод загвар (1Шас.28:11,12), үйлчлэлд шаардлагатай сав суулга болон бусад эд хэрэглэлийн зураг загварыг (1Шас.28:13-18) Ариун Сүнсний удирдамжаар (1Шас.28:19) зураад Соломон хаанд дамжуулан үлдээсэн байдаг.
Үе үеийн үй олон итгэгчидийн бахархан уншиж, төсөөлөн бодож, сүнслэг ухаарал авдаг, Давидын итгэлийн түвшинг батлан харуулсан оргил үйл явдал бол Голиаттай тулалдсан түүх юм. Жирийн нэгэн хоньчин залуу, өөрийн итгэж найдаж түшиглэдэг Израилийн Бурхан Эзэний нэрээр, ганц чулуугаар, өвч бүрэн зэвсэглэсэн, мэргэжлийн дайчин, аварга биет хүчирхэг Голиатыг алсан нь, Голготын толгод дээрхи загалмайн үйл явдалын бас нэгэн сүүдэр юм.
Одоо ч итгэгч хүн бүр Голиатын эсрэг ширүүн тулаан хийдэг бөгөөд, дарамт шаналал, өвчин зовиур, гачигдал, санаа зовнилоор дүүрэн бодит нөхцөл байдлын эсрэг бидний барьдаг чулуу бол Эзэний Үг юм. Давид Ариун Сүнсний хүчээр эгэл хүний дааж давж чадахгүй олон зовлонг даван туулж, хийж чадахгүй олон үйлсийг хийсэн тухай өмнөх “хувийн зан чанар” гэсэн хэсэгт цухас дурдсан тул энд дэлгэрэнгүй өгүүлсэнгүй.
Давид хаан нь Бурханаар удирдуулсан, Түүнтэй нөхөрлөсөн өөрийн гайхамшигт амьдрал түүхээрээ, Эзэний хүмүүст үлгэр дуурайл болсон гайхалтай итгэлийн баатар билээ.

6. Тэдний гэр бүлийнхэн

Саул нь 4-н хүү, 2 охинтой байсан (1Сам.14:49). Түүний эхнэр нь Ахимаазын охин Ахиноам юм (1Сам.14:50). Түүний хөвгүүд нь Ионатан, Шиви, Малхишуа, Иш-Бошет нар юм. Охид нь Мераб ба Михал нар юм. Бас түүнд Аиагийн охин Ризпа гэж татвар эм байсан (2Сам.3:7).

Давид хаан 18 эхнэртэй, бас бусад олон татвар эмтэй байсан. Эдгээрээс анхны эхнэр Михал нь (2Сам.6:23) үр хүүхэдгүй байсан. Иезреел эмэгтэй Ахиноам түүнд Амноныг, кармел эмэгтэй Абигаил Даниелийг, Гешурын хаан Талмаин охин Мааха Абсаломыг, Хаггит Адонаиг, Абитал Шефатиаг, Егла Итреамийг, Батшеба Шимеа, Шобаб, Натан, Соломон нарыг төрүүлж өгсөн байна (1Шас.3:1-9).
Түүний 10-н бага эхнэр нь эмгэнэлтэй хувь заяаг туулсан. Тэд эцгийнхээ эсрэг бослого гаргасан Абсаломын (2Сам.16:22) улс төрийн тоглоомын золиос болсон ба үүнийхээ төлөө бүх насаараа хоригдол (2Сам.20:3) мэт амьдарчээ. Мөн Давид хаан хөгширсөн хойноо шунем охин Абишагийг өөртөө үйлчлүүлдэг байлаа (1Хаад 1:3,4).
Бас татвар эмсүүд нь хүүхдүүд төрүүлсэн байдаг (1Шас.3:7). Түүнд хэдэн охин төрсөн нь тодорхойгүй. Ямартаа ч Амнонд хүчиндүүлсэн охин Тамар нь, Маахагын охин ба Абсаломын дүү юм.

7. Тэдний үхэл

Саул, аугаа Бурханы сонгосноор, Бурханы ард түмэн Израилын хаанаар томилогдсон боловч эмгэнэлтэй хувь заяаг туулж, харамсалтайгаар 3-н хөвгүүнийхээ хамт нас барсан (1Сам.31:4). Филистчүүдийн ээлжит довтолгооны эсрэг Гилбоа ууланд тулалдаж яваад, амьдрах найдваргүйгээ мэдээд амиа хорлож үхсэн. Түүний цогцосыг дайснууд нь ялалтынхаа тэмдэг болгон Бетшаны хананд (1Сам.31:10) өлгөсөн ба харин Амнон хүн Нахашийн харгислалаас түүний аварсан Иабеш-Гилеадын эрчүүд ачийг санаж, цогцосыг нь хулгайлж авчираад зохих ёсоор шатааж, Иабеш дахь сухай модны доор оршуулсан байдаг.
Саул болон хүү Ионатаных нь үхлийн тухай сонсоод Давид маш их гашуудаж, гашуудлын дууг дуулсан байдаг. Саул нь Израилд хаант засаглал хэлбэр дүрсээ олж бат тогтнох үндэс суурийг засаж, бүх үеийн турших Израилийн аугаа хаан Давидын хаанчлалын урдчилсан нөхцөлийг бүрдүүлж, Бурханы зорилгод ашиглагдсан нэгэн билээ.

Давид хаан баялаг, хүндэтгэлээр дүүрэн өдрүүдээ эцэслэн, өндөр насыг наслаад үхэв (1Шас.29:28). Түүнийг Давидын хотод оршуулсан (1Хаад 2:10). Тэрээр өөрийнхөө оронд хүү Соломоноо хаанаар өргөмжилсөн (1Хаад2:12).





“1,2 Самуэл” хичээлийн гэрийн даалгавар
Шалгасан багш: Эрик Томсон

Марк 10:17-31-р хэсэгт тайлал харьцуулалт хийсэн нь

(Марк10:28-31) Петр Түүнд, -Хар л даа. Бид бүхнийг орхиод дагасан, гээд ярьж эхлэв. Есүс -Үнэнээр Би та нарт хэлье. Хэн Миний төлөө болон сайн мэдээний төлөө гэр орноо, ах дүү, эгч дүүгээ, эх эцгээ, үр хүүхэд, эдлэн газраа орхино, тэр хүн одоо энэ үед гэр орноо, ах дүү эгч дүүгээ, эцэг эхээ, үр хүүхэд, эдлэн газраа хавчлагатай хамт зуу дахин илүү авна. Гэвч эхэнд байх олон хүн сүүлчийнх болно, сүүлчийнх нь эхнийх болно гэлээ.

• Хүн төрөлхтөнд Эзэн Бурханаас бэлэглэсэн нэгэн гайхамшигтай “хайрын захидал” байдгийг Библи гэнэ. Энэ нь Хуучин Гэрээ, Шинэ Гэрээ гэсэн үндсэн 2 хэсгээс бүрдэнэ.

Энэхүү “ захидлын” товч агуулга нь, нэгэн маш сайн Эцэг цорын ганц Хүүтэй байсан ба тэд хайрын Ариун Сүнсний нэгдэл дотор хамтран нэгэн зорилгоор гайхамшигтай үзэсгэлэнтэй төгс төгөлдөр орчлон ертөнцийг бүтээсэн тухай өгүүлдэг. Улмаар тэд өөрсдийн дүр төрхөөр хүнийг бүтээж, түүнд бүх бүтээлүүдийг захирах эрх мэдэл, байр суурийг олгон итгэл хүлээлгэв.
Гэвч харамсалтай нь хүн дайсантай /муу сүнс/ нөхөрлөн Тэдний халуун хайрлуу ус цацдаг.

Ийнхүү гайхамшигтай тэрхүү ертөнцөд /дэлхийд/, Эцэг, Хүү, Ариун Сүнсний эсрэг бузар булай болгон хөгжиж цэцэглэж эхлэв. Гэвч Тэд зөвт шударга, хайр нигүүлсэл дүүрэн төгс оршихуй тул бүх бүтээлээ устган сүйрүүлэхийг хүссэнгүй. Энэ нь тэдний бүтээлийг бузарласан нэгэнд ялагдсан хэрэг болох байлаа.

Дайсанч үүнийг л хүссэж байв. Эцэг гэмтнийг /хүн төрөлхтнийг / уучилсан бөгөөд, харин үнэхээр мөхөс дорой,сайн мууг ялгах чадваргүй тэдэнд, уучлал хайрыг нь хүлээн авч зүрх сэтгэлээ нээх боломж олгохоор, тодорхой төлөвлөгөөний дагуу бэлдэх шаардлагатай байв.

Ийнхүү бэлтгэж, бас ”та нарыг авархаар Хүүгээ явуулна” гэж, үе үеийн сонгогдогсдоороо дамжуулан амласан амлалтуудыг болон, Хүүг хүлээн авхад хүмүүсийг бэлтгэж байсан, түүхэн үеийн тухай 39 номыг Хуучин Гэрээний КАНОН гэнэ.
Иймээс энэхүү КАНОНЫ хамгийн гол сэдэв нь Аврагч ирэх болно, гэсэн нь юм.

Харин Хүү ирээд бүх амлалтыг хэрэгжүүлсэн, Эцэгийн уучлал хайрыг нотлон харуулж, бас дахин эргэн ирж Сэнтийдээ залрах тухай гэрчлэл, нотолгоо, захиа даалгавар бүхий 27 номыг Шинэ Гэрээний КАНОН гэнэ. Иймээс энэхүү КАНОНЫ хамгийн гол сэдэв нь Аврагч ирсэн, Тэнгэрт одсон, дахиад ирэх болно, гэсэн нь юм.

• Эдгээр Шинэ Гэрээний 27 номноос, илгээгдсэн Хүү Есүс Христийн амьдрал тэмцэл, ялалт, өргөмжлөлийг гэрчлэн бичсэн 4 ном байдгийг сайн мэдээний бичээсүүд гэнэ.

Эдгээрээс “Марк” номыг хамгийн анхлан бичигдсэн ном гэдэг. Судлаачдын үзэж байгаагаар МЭ 50-60 онд Ром хотод бичигдсэн гэж үздэг. Тэр үед Ром хотод дэгдсэн их түймрийг, Христчид асаасан гэсэн гүтгэлэг газар авсанаас, тэр үеийн Ромын хаан Неро итгэгчдийн эсрэг маш их харгислал хавчлага явуулж байжээ.

Яг энэ үед хүнд нөхцөлд итгэлээ хамгаалж байсан итгэгчдэд /хүлээн авагчдад/ урам зориг өгөх зорилгоор тус ном бичигдсэн гэж үздэг.
Учир нь “тэр даруй” гэдэг холбоос үгийг олон дахин хэрэглэн, үйл явдлын өрнөлөөс өрнөлд түргэн шилжиж, Есүсийн үйлчлэлийг чухалчлан өргөсөн байдаг.

Мөн дагалдагч байхын үнэ цэнэ, золиослолыг олонтоо дурьддаг. Гэсэн мөртөө сургаальт зүйрлэл харьцангуй бага бичигдсэн. Бас Есүсийн мэндэлсэн тухай болон Иудейн ургын бичигийг орхигдуулсан, бас Арамей үгсийг орчуулан, Латин нэр томъёо ашигласан зэргээс харахад, ромчуудад /иудей биш харь үндэстнүүдэд / зориулагдсан байна гэж үздэг.

Зохиогч Марк нь, номынхоо гол агуулгыг элч Петртэй хамт үйлчилж байхдаа, түүний гэрчлэлээс олж авсан бололтой. Иохан Марк нь, Ромын чуулганы ахлагчдын нэг байсан. Тэр элч Петр/Үйлс 12:12,25/ / I Петр 5:13/, элч Паул/Үйлс 13:1-13, Кол.4:10,Флм.1:24/, дагалдагч Барнаб /Үйлс 15:39/ нартай хамт Эзэний алдарын төлөө зүтгэж явсан нэгэн байдаг.

Нэгэн эд хөрөнгөөр баян залуу мөнхийн амийг хэрхэн өвлөн авахыг Эзэнээс асуусан. Эзэн, эд хөрөнгөөр баян нэгэн нь түүндээ итгэл найдвараа тавьдаг, түүнийгээ бурханаас илүүгээр хайрладаг учир, Бурханы хаанчлалд орохгүй гэсэн. Яг эндээс дагалдагч Петр гомдоллож эхэлсэн ...Бид бүхнийг орхиод дагасан гэдгээрээ тэр, өмч хөрөнгөө орхисон гэсэн санааг илэрхийлсэн. Энд халуун цочмог, түргэн зантайгаараа Петр л эхэлж ярьсан болохоос, бусад дагалдагчид ч түүн шиг бодолтой байсан нь тодорхой байдаг.

Түүхэн нөхцөлд нь авч үзвэл, израйлчууд зүрх сэтгэлийн цэвэр ариун, мөс чанарын даруу дуулгавартай, хайр нийгүүсэл, итгэл найдвар,амар амгалангаар дүүрэн өнө мөнхийн Бурханы хаанчлалын талаар ямарч төсөөлөлгүй байлаа. Тэд нийтээрээ Мессиа ирээд, Давидын, Соломоны үеийн эд баялагаар баян тансаг, цэрэг армиар хүчирхэг, харь үндэстэн "бузар" хүмүүсийг ялан дийлсэн, захиран дарангуйлсан, хүчирхэг Израйл гүрнийг босгон байгуулна гэж хүсэн хүлээцгээж байлаа.

Дагалдагчид ч энэхүү Мессиа нь, Есүс юм гэдэгт итгэсэн боловч, Түүнийг дагаснаараа ирээдүйд байгуулагдах “энэхүү хүчирхэг гүрний“ эрх мэдэл, эд баялаг бүхий өндөр албанд суухыг хүсэн мөрөөдөж байсныг /Мк.10:35-37/, Зебедейн 2 хүү Иаков, Иохан нар эрх мэдэл байр суурь гуйж ирснээс олж харж болно.

Харин Эзэн, Хэн Миний төлөө болон сайн мэдээний төлөө гэр орноо, ах дүү эгч дүүгээ, эцэг эхээ,үр хүүхэд, эдлэн газраа орхино, тэр хүн одоо энэ үед гэр орноо, ах дүү эгч дүүгээ, эцэг эхээ үр хүүхэд эдлэн газраа хавчлагатай хамт зуу дахин илүү авна, /Мк.10:29-30/ гэсэн.

Харин дагалдагчид энэ үгийг өөрсдийнх нь хүч нөлөө, эрх мэдэл өргөжин тэлж олон хүнийг нөлөөн доороо захирах болно гэсэн утгаар хүлээн авсан бололтойг Иаков, Иохан нарын тавьсан хүсэлтээс харж болно. Бас хавчлагатай хамт гэснийг нь Абрахам, Исаак, Иаков, Иосеф мөн Давид нарын амьдрал тэмцэлд учирч байсан хүндрэл сорилтуудаар төсөөлж байсан болов уу?!

Гэвч эдгээр нь Христийн золилтоор ирэх Бурханы мөнхийн хаанчлалын төлөөх,Сүнсний гайхалтай тулааны урьдчилсан зөн билэгдэл байсныг ухаараагүй байсан болов уу.
Христэд итгэж энэ ертөнцийн харъяалалаас салж, тэнгэрийн иргэншилтэй болсон нэгэнд заавал хавчлага дарамт, гадуурхал , доромжлол, дорд үзэх хандлага тэрч бүү хэл амь нас, эрүүл мэндэд нь халдсан халдлага довтолгоо тухайн үед ч, одоо ч байгааг бид түүхээс болон итгэлийн амьдралын туршлагаараа мэддэг билээ.

Эзэн энд, хожим өгөгдөх эцэг эх, ах эгч дүүс гэж хэнийг, ямар хүмүүсийг хэлэв? /Мт.12:47-50/-д Есүсийг айлд сургааль айлдаж байхад, уулзахаар ирээд орж чадахгүй байсан ээж дүү нарынхаа тухай сонсоод ...Хэн Миний эх, хэн Миний дүү нар юм бэ?, гээд Өөрийн шавь нарын зүг гараа сунгаад, ... Тэнгэр дэх Эцэгийн минь хүслийг биелүүлэгч хэн боловч, Миний эх, ах эгч дүүс мөн, гэж айлдсан байдаг.

Үүнийг бичигч нэгэнтээ Алма- Ата хотод ”Торгон замын алсын хараа ” семинарт оролцох завшаан тохиосон. Тэнд дэлхийн өнцөг булан бүрээс ирсэн, 400 орчим христчид цугларан хамтдаа суралцсан. Хэдийгээр хэзээ ч зүс царайгаа харалцаж, нэр усаа мэдэлцэж байгаагүй боловч, үнэхээр нэг Сүнсэн дотор хэзээний танил ах эгч, дүүс болохоо эхний мөчөөс л мэдэрцгээж байсан нь гайхалтай ивээлтэй байж билээ.

Яг үүн шиг л, маш их эдлэн газар, барилга байшин,өмч хөрөнгө бүхий өнөр өтгөн, аварга том гэр бүл болсон Христийн чуулганы нэг болно гэж Эзэн эш үзүүлсэн байна.
Мэдээж Эзэн биднийг ойр дотныхныгоо ор тас хая, гэж хэлээгүй! Харин тэдэндээ ханддаг байсан хуучин хандлага , харилцаа,хамтын амьдралын хэв маягаа эрс өөрчлөн, зөвхөн Эзэнийг л хүндлэн дээдэлсэн, Эзэнд л тааламжтай шинэ амьдралыг, бурханлаг гэр бүл харилцааг бий болгохыг давхар хэлсэн нь тодорхой байдаг.

Гэвч, эхэнд байх олон хүн сүүлчийнх болно, сүүлчийнх нь эхнийх болно, гэсэн нь нилээн маргааныг өрнүүлдэг.

Нэг хэсэг нь “эхэнд байгаа хүмүүс ” гэдэг нь эд хөрөнгө, боловсрол,байр суурь эрх мэдэл, аль эсвэл авъяас чадвараараа дэлхийд, заримдаа чуулганд ч гэсэн олны хайр хүндэтгэлийг хүртсэн хүмүүс юм.

Харин “Сүүлчийн хүмүүс” нь бусдад танил болоогүй, чухал бус хэмээн тооцогддог эгэл жирийн хүмүүс юм.
...Цаг нь ирэхэд чуулган дахь агуу удирдагчид гэж тооцогдож байсан олон хүн бусдын ард орж, олны танил биш байсан олон хүн өргөмжлөгдөнө*1, гэж тайлдаг.
Энэ тайлал нь /Мк.10:43/ Та нар бусдыг ноёлж болохгүй ,...Харин агуу болохыг хүсвэл бусаддаа даруугаар үйлчил, гэсэн үгээр баталгааждаг.

Бас нөгөө хэсэг нь, Израйлчууд Эзэний сонгогдсон ард түмэн байсан. Тэд бурханлаг, зөвт шударга, ариун амьдарлаараа, мөн Эзэнээр удирдуулсан, Түүнийг хүндлэн дээдэлж байгаагаараа Эзэнийг бусад үндэстний дунд алдаршуулах ёстой байсан. Гэвч чадаагүй.

Харин Есүсийн золилтоор босгогдсон шинэ ард түмэн болсон, Христийн чуулган нь энэ үүргийг гүйцэтгэх учиртайг эш үзүүлэн айлдсан байна, гэж тайлдаг.
Энэ тайлал нь /Мт.21:43/-т Фарисай,Садукай, ахлах тахилч нарт хандан, ... Иймээс Би та нарт хэлье. Бурханы хаанчлалыг та нараас авч, түүний үр жимсийг нь ургуулах үндэстэнд өгөх болно, гэсэн үгээр баталгааждаг.

Бүр нөгөө хэсэг нь цаг хугацааны хүчин зүйлээр тайлдаг. Эхэндээ хүмүүс, “Би Эзэнд тэгэж ингэж итгэмжтэйгээр үйлчилж буй тул , хариуд нь надад тийм ийм ивээл ерөөл, баялаг оногдох болно.”, гэсэн тооцоо хардаг байсан. Хүн төрөлхтөний түүхийн явцад Эзэний ивээлээр хүмүүний сүнс, тэр дундаа Эзэний чуулганы сүнслэг ариун байдал нь улам цэвэршиж, шууд л Эзэнийг харж, зөвхөн Түүний төгс төгөлдөр, дүүрэн байдлыг эрэлхийлж үйлчилдэг хэмжээнд хүрэхийг эш үзүүлсэн байна гэж тайлдаг.

Энэ тайлал нь /Мт20:1-16/-д дурьдагддаг, хөлсний ажилчиддаа, ажилласан цагаас нь үл хамааран яг адилхан хөлс өгсөн газрын Эзэний тухай сургаальт зүйрлэлээр баталгааждаг./Мт.20:16/-д Бас яг адил ... сүүлчийнх нь эхнийх болж, эхнийх нь сүүлчийнх байх болно, гэж айлдсан байдаг.

Эдгээр нь бүгд зохистой, эргээд Судараар баталгааждаг тайлалууд учир, алинаар нь ч номлол сургааль айлдсан, бусдад зааж сургасан болох болов уу?
Хүлээн авагчид зүрхэндээ хэрхэн хүлээн авч, өөртөө дүгнэлт хийн, суралцах өөрчлөгдөхийг Ариун Сүнс л хариуцах буй за.

Маркийн сайн мэдээ нь Есүсийг, үйлчилхээр ирсэн Нэгэн гэдгийг чухалчилан товойлгон бичсэн байдаг. Матай, Лук хоёр Маркийн бичсэн материалуудаас өөрсдийн сайн мэдээнд оруулсан байдаг. Гэхдээ бүхэлдээ Матайн бичсэн сайн мэдээнд багтдаг. Энэхүү гурван сайн мэдээг адил төстэй байдлаар нь харьцуулан судалдаг ухааныг “СИНОПТИКС“ гэдэг.

--------------------------------------------------------------
*1-"Бялхам амь" судлал Библи





"Синоптикс" хичээлийн гэрийн даалгавар
Шалгасан багш: Дашдэндэв