Элч Паулын үйлчлэл, амьдрал дахь залбирлын үүрэг

Хүмүүний амьдралд олон чухал хэрэгцээ, шаардлага байдаг. Тэдгээр дундаас хамгийн чухал нь юу вэ? Хүн хоол идэхгүйгээр сар гаруй амьд байж чадна. Ус уухгүйгээр хоёр долоо хоног тэснэ.

Харин агаар амьсгалахгүйгээр хоёр минутаас илүү байж чадахгүй. Энэ бол амьдралын органик (махан биеийн) хэлбэрийг оршин тогтноход зайлшгүй шаардлагатай хэрэгцээ юм.
Гэтэл ухамсарт амьдрал зөвхөн органик үйл хөдлөл, хэрэгцээ шаардлагаар хангагддаггүй. Нэгэнт л би “оршигч” гэдгээ мэддэг, ухамсарладаг бол, тухайн оршихуйд өөр олон чухал хэрэгцээ шаардлагатай болдог.

Үүнд: Оршихуйгаа улам л найдвартай, бат тогтвортой суурилсан байхыг мэдрэхэд шаардлагатай итгэх бишрэх, хүндлэх хүндлүүлэх, хайрлах хайрлуулах, сурах мэдэх, аюулгүй амар тайван байх, нөмөр нөөлөг, хамгаалалтыг үргэлж мэдрэх гэх мэт.
Эдгээр нь ямар нэг байдлаар доголдох үед л амьдрал болохгүй, бүтэхгүй болж, гашуун зовлонтой болдог.

Харин хүмүүнийг хайрлан, түүнд Өөрийгөө зориулсан Нэгэний ачаар бид ертөнцөд жинхэнэ байр сууриа мэдэж, хэрэгцээ шаардлагаа хангуулж, мөнхийн аз жаргал руу итгэлтэйгээр урагшлан зүтгэж эхэлдэг билээ.

Энэхүү сүнсний мөнхийн амьдралын амин амьсгал нь залбирал билээ. Залбирал нь яг л агаар амьсгалах мэт энгийн, амар хялбар, бас нэн чухал шаардлагатай байнгын хэрэгцээ байх ёстой.
Энд хэрхэн шашинлаг хэнээтэн Саул, бурханлаг дайчин Паул болон өөрчлөгдөхөд, тэрээр үр дүнтэйгээр Эзэнд үйлчлэн, амжилтанд хүрэхэд залбирал хэрхэн нөлөөлснийг бяцхан судалснаа чадан ядан эвлүүлэн бичлээ.

-- Саул бол еврейчүүдийн хэт шашинлаг, Фарисай бүлгийн хүн бөгөөд (Үйлс 22:6), шашны эрдэм мэдлэгт сайтар боловсорсон нэгэн байлаа.
Тэр, Христийн золилтоор бидэнд ирсэн Авралын итгэлийг Иерусалемд дөнгөж цэцэглэж байхад нь улайран хавчигч байсан.

Мэдээж тэр энэ үед ч гэсэн залбирдаг л байсан байж таарна. (Мт. 23:14) Эзэн “Хоёр нүүрт Фарисайчууд та нар золгүй еэ, … бэлэвсэн эмэгтэйчүүдийн гэрийг цөлмөдөг атлаа, удаан залбирах дүр эсгэдэг тул, илүү хүнд шийтгэл хүлээнэ.” гэсэн байдаг.

Христийн чуулган нь гаж, хортой урсгал гэдэгт тэр бат итгэж, үүнийг нухчин дарах нь Эзэний таалалд нийцнэ гэдэгт итгэдэг (Үйлс 26:9) байжээ.
Харин Эзэн бол, үйлс үйлдлээс илүүгээр зүрх сэтгэлийн хандлагыг хардгийг эндээс харж болно. Түүнийг Эзэнд хандан чуулганы эсрэг гомдоллон залбирч, ялан дийлэх хүчийг гуйж байхад, үүрэг хариуцлагандаа хэр их чин сэтгэл, үнэн бат итгэлтэйгээр зүтгэж байгааг мэдэж, харж байсан нь тодорхой.

Эзэн түүнийг нэн эртнээс Өөрийн алдрын төлөө бэлтгэсэн байсан товлосон цаг болж, тэр Дамаск руу “Эзэний алдрын төлөөх” хатуу ширүүн шүүлтийг гүйцэтгэхээр явж байлаа.
Эзэн түүнд Өөрийгөө илчлэн, хэдхэн хормын дотор эрс өөрчилсөн юм. Ертөнцийн гэрлийг харах нүдийг нь хаасан Эзэн, гурав хоногийн турш сүнсний нүдээр, өнгөрсөн амьдралаа болон ирээдүйгээ, мөн амьдралын утга учрыг, өөрийн оршихуйн мөн чанарыг, Эзэний сүр хүч, цог жавхлан, илчлэлт, илэрхийлэлт болгоныг бодож тунгааж, гэмшин залбирах боломжийг олгосон болов уу?!

Мэдээж тэр чин сэтгэлээсээ гэмшин ухаарч, дахин шинээр төрсөн нь цаашдынх нь амьдралынх нь өрнөлөөс харагддаг.
Ийнхүү махан биеийн шашинлаг Саул, сүнсний бурханлаг Паул болох гараагаа эхэлсэн. Шинэ өнө мөнхийн амьдралд нь нэн чухал шаардлагатай нэгэн зүйл байсан нь залбирал байсан нь тодорхой.

Гурав хоногийн дараа, тэр хараа орсон даруйдаа, баптизм хүртэж, улмаар Дамаскд “Есүс бол Бурханы Хүү мөн“ гэж тунхаглаж эхэлсэн нь гайхалтай.
Тэр улам их хүчийг олж, тэр ч бүү хэл шавь дагалдагчидтай ч болсон нь (Үйлс 9:25), түүнийг ариун сүнсний галаар шатаж байсныг гэрчилдэг.

Хэн нэгэн нь залбирахгүйгээр Эзэнээс халуун хүсэл тэмүүлэл, алсын хараа, түүнийгээ хэрэгжүүлэх, гүйцэлдүүлэх арга зам, үр дүнтэйгээр үйлчлэх хүчийг авч яагаад ч чадахгүйг, судар болон бидний итгэлийн амьдралын туршлага нотолдог.
Тэр тусмаа хуучин амьдралынхаа хүрээнд, хичээнгүй зүтгэлтэйгээрээ нэртэй байсан нэгэнд, тэр хуучин бүгдийнхээ эсрэг довтлон, үгүйсгэн зүтгэнэ гэдэг бол барагтай хүний санаанд орохгүй хүч чадал, шийдэмгий зориг шаардагдах нь тодорхой.

Тэр үнэхээр гайхамшигтай залбирагч байсныг түүний амьдрал, тэмцлээс гэрчлэн бичсэн бусдын гэрчлэл (Үйлс ном), өөрийнх нь захидлууд болон хийж гүйцэтгэсэн ажил үйлс нь нотолдог.
Тэр Эзэн Есүстэй амьд, зүрх сэтгэлийн нандин харьцаатай байж, Түүний хүслийн дагуу шинэчлэгдэн, Түүний төлөө амьдарч, Түүнийг алдаршуулж чадсан нэгэн юм. Техник технологи, зам харилцаа өндөр хөгжсөн, итгэл үнэмшлийн харьцангуй эрх чөлөөтэй, хүний эрх тодорхой хэмжээнд дээдлэгддэг, хамгаалагддаг болсон, Эзэний сүр, суу алдар улам өргөжин тэлж буй өнөөгийн өндөрлөгөөс харахад, тэр харанхуй цаг үед яаж чадсан юм бэ? гэмээр асар их ажил үйлчлэл амжуулсан нь үнэхээр бахадмаар.

Түүний бичсэн Христ итгэлийн суурь онолууд болсон захидлууд өнөөдөр ч бидний итгэлийн амьдралыг чиглүүлдэг нь Ариун Сүнсний удирдлагаар бичигдсэнийг гэрчилдэг. (Үйлс 23:11) Түүнийг шоронд байхад нь зоригжуулахаар, үүрэг даалгавар өгөхөөр Эзэн биечлэн ирж уулзсан тухай ч Сударт байдаг.

Энэ бүхэн зөвхөн залбирлын хүчээр боломжтой юм. Тэр энэ ертөнцөд ямар байр суурь, эрх мэдэлтэйгээ мэддэг нэгэн байжээ. (1 Тимот 2:1) “Тиймд юуны өмнө би гуйя. Гуйлт, залбирал, хүсэлт болон талархалаа бүх хүмүүсийн төлөө үйлд. Хаадын төлөө, эрх мэдлийг баригч бүх хүний төлөө үйлд.” гэснээс нь харахад тэр өөрөө ч үүнчлэн залбирдаг, хариуг нь авдаг байсныг харж болно.
Тэр хаад ноёдын, эрх мэдэлтнүүдийн өмнө буруутгагдан шүүгдэж байхдаа ч аймшиггүйгээр өөрийн Бурханыг гэрчлэн тунхаглаж, өөрийн хүслийг тулган (Үйлс 25:1-12), зохих шийдвэр гаргуулж чаддаг байсан нь бахадмаар.

Тэр эрх мэдэлтэй, богинохон залбирлаараа (Үйлс 13:10,11) үйлчлэлд нь саад болсон, шидтэн Баресүс гээчийг номхруулан, замаасаа зайлуулж байлаа. Тэрч бүү хэл үхлийн дараах сүнсний ертөнцөд ч хүчтэй, эрх мэдэлтэй байсныг судлаачид тодорхойлон бичсэн байдаг.
Ефест нэгэн иудей тахилчийн долоон хүү байсан бөгөөд, тэд Паулыг дуурайх гэж оролджээ. “Паулын хэлээд байгаа Есүсийн нэрээр бид чамд тушааж байна. Зайл” гэхэд сатан өөдөөс нь “Би Есүсийг мэднэ, Паулыг ч танина. Харин та нар чинь хэн билээ?” хэмээн айж зугтах нь бүү хэл, харин ч элэглэн шоолсон байдаг. Эндээс бид Паул тамд ч алдартай байсныг харж болно. Үнэндээ бол энэ дэлхий дээр алдарших нь юу ч биш. Тамд хүртэл алдарших хэрэгтэй. Паул тамынхныг ёстой л “тамладаг” байв. Тэр эрх мэдлээ бүрэн хэрэглэж чаддаг байжээ. Тэр халхалж хамгаалдаг биш, харин дайрч довтолдог, дайсныхаа хамгаалалт, хаалгыг эвдэн, харанхуйн хаанчлалыг нурааж, Бурханы хаанчлалыг тэлэн, Эзэний хүслийг гүйцэлдүүлдэг байлаа. Тэр нэг ч удаа айж түгшиж байсангүй.
Харин ч сатан түүнээс айдаг байжээ. Паул бол тамынхны хар дансанд бүртгэлтэй хүн байсан юм. 1*

Тэр Эзэнд үйлчлэн, Түүний чуулганыг босгохдоо ч, үр дүнтэйгээр залбирдаг залбирлын багийг бүрдүүлэн, хамтран ажилладаг тухай “Филиппой дахь сүм нь, гуйлтын группээс эхэлсэн юм. Их Эзэнтэй ярихын тулд голын эрэг дээр уулзалдаж байсан хэсэг эмэгтэйчүүдийг Паул, Силас хоёр олж харсан юм. Тэдний дунд байсан Христэд итгэгч Лудиа гэгч эмэгтэй тэр хоёрыг Филиппойд байх хугацаанд нь туслах зорилгоор гэртээ байрлуулав.
Эмэгтэйчүүдийн гуйлтын цуглаанаас үүдэн олон гайхамшигт зүйлс тохиолддог билээ. 2* гэсэн байдаг.

Тэр зөвхөн чуулган тариад л орхиод явдаггүй, үргэлж үр хүүхдээсээ хол байгаа эцэг хүний сэтгэлээр хичээнгүйгээр залбиран байдгаа (Фил. 1:4) “Та бүгдийн төлөө залбирах бүрдээ би үргэлж баяр хөөртэйгээр залбирлаа өргөдөг.” гэж бичсэн байдаг. Тэр Есүсийн зориулалт, золиослолын загалмайн үхэл, мөн дахин амилалтын утга учир, үнэ цэнийг маш сайн мэддэг, бас бусдад эмх цэгцтэй ойлгомжтойгоор тунхаглан зааж, номлож чаддаг байсан ба үүнийгээ ч, залбирлын үр дүнд Ариун Сүнсний илчлэлтээр хийдэг байснаа (Еф. 6:19) “Сайн мэдээний нууцыг зоригтойгоор мэдүүлэхээр миний ам ангайхад үг өгөгдөхийн тулд миний төлөө залбир.” гэж даруугаар хүссэн байдаг.

Залбирал бол үйлчлэлийн үндэс, амжилтын түлхүүр гэдгийг хамгийн сайн мэддэг нэгэн тул бусдыг ч хичээнгүйлэн залбирахыг уриалан (1 Тес. 5:17) “Тасралтгүй залбир.” гэж заадаг байсан.
(2 Кор. 3:5,6)-д залбиралгүй сургаал номлох нь аюултайг Паул онцлон дурдсан байдаг. “…харин бидний чадвар Бурханаас гардаг юм. Тэр биднийг үсгээр бус, харин Сүнсээр шинэ гэрээний үйлчлэгчид байх чадвартай болгожээ. Учир нь үсэг бол хөнөөдөг, харин Сүнс бол амь өгдөг аж.” 3* Тэр залбирлын бүхий л төрөл зүйлийг ашигладаг байсныг “Бид Паул, Силас нарын туршлагаас магтаалын залбирлын хүч чадлын тухай нэг жишээг харж болно. Тэд Филиппой дахь шоронд Бурханыг магтахад гэнэт шоронгийн суурийг доргиосон хүчтэй газар хөдлөлт болжээ. (Үйлс 16:19-26) Тэр даруйд шоронгийн бүх хаалга онгойж, хүн бүрийн гав гинж нь мултарчээ. Үүнчлэн магтаалаар бидний бие болон амьдралд маань Бурханы агуу гайхамшигт түүх биелэгддэг юм.” 4* гэж нэгэнтээ бичигджээ.

Түүнд ч бас зовлон зүдгүүр, хүндрэл бэрхшээл тоо томшгүй тохиолддог байсан бөгөөд тэр бүгдэд Эзэний хүчийг залбиран гуйгаад даван туулдаг байсан.

Гэхдээ нэгэнтээ “Ажлаа хийхэд түүнд хараа маш чухал байсан боловч тэр нүдний өвчтэй байлаа. Гэвч Ертөнцийн Эзэн энэхүү согогыг түүнээс зайлуулж өгсөнгүй. Тэрээр өөрийгөө Түүнд зориулан “Тиймээ” гэж хэлэхийг нь хамгаас түрүүнд хүсч байсан юм. Тэр өөрийнхөө “зовлон”-г хүлээн зөвшөөрөх нь Эзэний хувьд хамгаас чухал байсан бөгөөд Паулын ажлаа гүйцэтгэхэд эрүүл мэндээс нь ч илүү ач холбогдолтой байлаа. Ийнхүү асар их гарз хохирлын дараа өөрийнхөө хүслээс татгалзсан нь түүнд ажлаа хийх асар их хүч чадал өгсөн явдал болсон юм.” 5*

Эцэст нь дүгнэхэд элч Паул үнэхээр гайхалтай залбирлын баатар, Сүнсний дайчин бөгөөд түүний өмнө олон хаалга нээгдэж, олон цайз нуран унаж, тэр өөрийн шантаршгүй итгэлийн гал халуун залбирлаараа бүх дэлхийг өөрчлөх Христийн агуу чуулганы суурийг тавилцсан юм. Тэр, хүн төрөлхтний хүсэл мөрөөдөл, амьдрал тэмцлийн замыг Бурханы хүссэн зүгт залахад итгэмжтэй зүтгэн, түүхэнд нэрээ үлдээсэн (Дан. 12:3) Хэрсүү ухаантай нь тэнгэрийн мандлын гэрэл шиг туяарч, олныг зөв шударга байдалд авчрагчид нь од мэт үүрд мөнх гэрэлтэх болно гэж зөгнөгдөгсдийн нэг мөн.

--------------------------------------------------------------------------------
1* Хун Сон-Гонь “Бурханы хайж байгаа хүн” Хуудас 169
YWAM Mongolia 2004
2* Ж. Роберт Ашкрофт “Их Эзэнтэй ярих үед” Хуудас 99
ICI Univercity 1994
3* Лөүл Ландстром “Хэрхэн хүчтэйгээр залбиран гуйж хариугаа авах вэ?” Хуудас130
4* Dr. David Yonggi Cho “Хэрхэн залбирах вэ?” Хуудас 66
2005 он УБ
5* М. Басилиа Шлинк “Залбирал бол бидний амьдралын зам” Хуудас 35
Evangelical Sisterhood of Mary, Darmstadt-Eberstadt 1996






"Залбирал ба сүнслэг тэмцэл" хичээлийн даалгавар
Шалгасан багш: Мөнх-Эрдэнэ

1 Иохан Хэлэлцүүлгийн асуудал

• Иохан захидлын хамгийн гол, чухал гэж бодож буй 3 үгийг бичээд, яагаад гол үг болгон сонгож авснаа тайлбарлана уу.

1. Хайр. /1Иохан. 3:16/-д Хайрын талаархи хамгийн дээд үнэлэмж, стандартыг заасан байна. Нэг үгээр хайр бол золиослол, зориулалт юм. Бурханаас гадуурх хүн, ингэж хайрын золиослол, зориулалт гаргаж чаддаггүй. /1Иохан. 4:8,16/… Бурхан бол хайр.
Жич: 3-р асуултанд илүү тодорхой, дэлгэрэнгүй бичсэн.

2. Итгэл. /1Иохан. 5:1/… Есүс бол Христ мөн… гэсэн итгэл нь Бурханаар төрсний шинж. Энэ итгэлээр /1Иохан. 5:4,5/ бид ертөнцийг ялдаг.

3. Нөхөрлөл. /1Иохан. 1:3/ Бидний сайн мэдээний гэрчлэл дээр тогтсон нөхөрлөл нь, Бурхан ба Хүү Есүстэй нөхөрлөх нөхөрлөл юм. Харин нүгэл дээр тогтсон нөхөрлөл нь Бурхантай нөхөрлүүлдэггүй. Тиймээс /1Иохан. 1:7-9/ Бид юу хийж байгаагаа мэдэж, нүгэл үйлдвэл гэмших нь Түүнтэй нөхөрлөх нөхөрлөлийг улам бат болгодог.
Жич: 2-р асуултанд илүү тодорхой дэлгэрэнгүй бичсэн.

• Бурхантай нөхөрлөх нөхөрлөлд юу хэрэгтэй вэ? Түүнтэй байнга нөхөрлөж, харилцаатай байхын тулд яах хэрэгтэй вэ?

/1Иохан. 1:7/… Тэр Өөрөө гэрлийн дотор байдагчлан бид гэрлийн дотор явбал, бид бие биетэйгээ нөхөрлөж … гэсэн нь гэрэл дотор аливаа үйлс ил тод байдаг бөгөөд бид юу хийж байгаагаа мэдэх боломжтой гэсэн үг. Ингэснээрээ бид бие биеэ илүү сайн таньж, бас Бурхантай дотно нөхөрлөх боломжтой гэсэн үг юм.
/1Иохан. 1:9/… Хэрэв бид нүглээ хүлээн зөвшөөрвөл Тэрээр итгэмжит зөвт бөгөөд бидний нүглийг уучилж, бүхий л зөвт бус байдлаас биднийг цэвэрлэнэ … Энэ нь бид гэрэл дотор алдаа зөрчилөө тод харж, улмаар гэмшиж чадсанаар Түүнтэй байнга нөхөрлөж байх бололцоотой болох юм.

• 1Иохан захидалд, итгэгч хүмүүс бие биенээ хайрлах нь хамгийн чухал гэж гардаг. Яагаад?

Учир нь /1Иохан. 4:7,8/ хайрладаг хүн нь Бурханаас төрсөн, Түүнийг мэддэг. Хайрладаггүй нэгэн нь Бурханыг мэддэггүй. /1Иохан. 4:16/ Бурхан биднийг хайрладаг. Түүнийг нь бид мэдэж итгэдэг. Бурхан бол Хайр мөн. Ийнхүү Бурхан /1Иохан. 3:16/ биднийг хайрласан тул, бид бие биеэ хайрлах ёстой. Үүнд ямар ч сонголт байхгүй. Учир нь энэ бол /1Иохан. 3:23,24/ тушаал юм.
/1Иохан. 2:5/… Түүний үгийг сахидаг хэний ч дотор Бурханы хайр үнэхээр төгс болгогджээ. Үүгээрээ бид Түүний дотор байгааг мэднэ… Нэг үгээр бие биеэ хайрлах нь Түүний дотор байгаагийн гэрчлэл юм.

• Таны хувийн амьдралд, гэр бүлд, цуглаанд бие биеэ хайрлахаас илүү чухал зүйл гэж байдаг уу?

Бие биеэ хайрлахаас илүү чухал зүйл бидний амьдралд байх ёсгүйг бид мэддэг. Тэгээд өнгөцхөн бодох юм бол үнэхээр байхгүй ч юм шиг. Гэхдээ сайтар тунгаан бодвол зарим нэг зүйл бий. Бид заримдаа зүрхэндээ элдэв дүрэм журам, ёс жаяг бодож олоод (хууль тогтоогоод), түүндээ бусдыг тааруулах гэж оролдох, “хуулийнхаа” нүдээр бусдыг харж, шүүх гээд байдаг тал бий. Мөн хэн нэгэнд туслах шаардлагатай болоод, тэгэхийн тулд өөрөөсөө зориулалт, золиослол гаргах хэрэгтэй бол өөрийнхөө боломж, бололцоог эхлээд тооцдог. (Тэгэж цаг гаргах завтай бил үү? Санхүүгийн боломж надад юу билээ? Түүнд тусалсны дараа би өөрөө яах билээ… г.м) Дараа нь тухайн хүнээ (хэр ач холбогдолтой хүн билээ, хэр их итгэлтэй хүн билээ, ирээдүйд үр жимс гаргаж чадах болов уу… г.м) элдвээр үнэлж дүгнэж, шүүн тунгаадаг.
Энэ нь хариу нэхдэггүй хайрын халуун сэтгэл дутуугаас, бас Бурхан биднийг ямар ч үед бусадтай хуваалцах баялгаар бялхаадаг гэсэн үнэнд итгэл султайгаас болдог. Мөн удаах нь бардам зангаас (хууль тогтооно, бусдыг шүүнэ гэдэг нь бардамнал юм.) болдог.

• “Бие биенээ хайрла” хэмээн Бурханы өгсөн тушаалыг яавал амьдрал, гэр бүл, цуглаандаа үр нөлөөтэй хэрэгжүүлж болох вэ?

а. Эхлээд дээрх (болон бусад…) гэмүүдээ хүлээн зөвшөөрч гэмших хэрэгтэй.
б. Өөрийн хүчээр хэрэгжүүлж чадахгүйгээ, сул доройгоо хүлээн зөвшөөрч, Ариун Сүнсний хүчийг гуйх хэрэгтэй.
в. Маш даруу байж залбиран, бусдыг болон амьдралыг хардаг гэмт хэвшмэл сэтгэлгээгээ (цайз, хана хэрмээ) Ариун Сүнсний хүчээр нураах хэрэгтэй.
г. Бусдаас шаарддаг өндөр шаардлагаа (ө.х бусдаас төгс хүнийг харахыг хүсдэг өөрийн хүслээ) өөрчлөх хэрэгтэй.
д. Шаардлагатай үед өөрийгөө бүрэн зориулж чадах хүчийг Ариун Сүнснээс гуйх хэрэгтэй.
е. Эдгээрийг хичээл зүтгэл гарган, амьдралдаа хэвшүүлэхээр чармайх нь зүйтэй.





Шалгасан Багш: И Жэ Шин UBTC
"1, 2, 3 Иохан ном" хичээлийн гэрийн даалгавар
1-р курс 2007 оны 06 сарын 08

Абрахамыг “Бурханы анд найз” гэж нэрлэгдсэнийг Эхлэл номонд хэрхэн өгүүлэхийг бичих нь

                                    Оршил

Эзэн Абрамд (Эх.12:1-3) амлалт, дуудлагийг өгөөд , 75-н настайд нь, төрсөн нутаг,төрөл садангуудаас нь салгаад явсанаас хойш нэг ч удаа түүнийг орхиогүй. Үргэлж хүнд байдал, аюултай нөхцөлд хамгаалж,айсан ганцаардсан үед нь тайвширлийг өгч, эрүүл мэнд хүч чадал, бас эд хөрөнгөөр ч ивээж , үнэхээр үнэнч анд найзын үүргээ бүрэн төгс, эцэст нь хүртэл сахисан юм. Абрам Эзэнийг анд найз гэж хэзээ ч дуудаж байгаагүй. Харин Эзэн өчүүхэн гэмт хүн түүнийг /Иса.41:8,Иак.2:23/ анд найз гэж өргөмжлөн, түүний амьдралын бүхий л өдрүүдэд, одоо ч Өөрийн хүү Есүсийн дотор түүнд амласан амлалтаа итгэмжтэйгээр хэрэгжүүлсээр байгаа билээ.
Анхны итгэгчдээс хойш 2000-гаад жилийн турш дэлхийн олон улс үндэстний тоо томшгүй, итгэгчид Абрахамыг “ итгэлийн эцэг” гэж дуудан, Бурхантай хамт амьдарсан, харилцсан бүхий л түүхээс нь суралцаж, ухаарал сургамжийг авч байдаг.

                              Газар нутгийг амласан нь

Эх.12:7-Би чиний үр хүүхдүүдэд энэ нутгийг өгье...
Эх.13:15-Чамд харагдаж байгаа тэр бүх газар нутгийг Би чамд болон чиний үр хүүхдүүдэд үүрд өгнө…
Эх.15:18-Египет мөрнөөс Евфрат мөрөн хүртэл чиний үр удмынханд өгсөн…
Эх.17:8-Канааны бүх газар нутгийг чамд болон чиний үр удмынханд үүрд өгсөн…
Төрсөн нутгаасаа гараад харь газар ирээд сэтгэл санаа нь хүнд байх үед, дүү Лотоосоо салаад ганцаардан гуниглаж байх үед, тухай бүрт тогтсон газар нутаггүй нүүдэллэн хэцүү байх үед нь, газар нутгийг дахин дахин амлаж, сэтгэл санааг нь тайвшруулдаг байсан. Малчин ч бай , тариачин ч бай тэр үеийн хүмүүсийн оршин тогтнолын гол үндэс нь газар нутаг байсан.Бусдын газар үргэлж харийн хүн мэт амьдарч байсан, өндөр настай Абрахамын хувьд эдгээр амлалтууд маш чухал байсан. Бурхан 4 дараалан газар нутгийг хэн нэгэнд амласан тохиолдол огтхон ч байхгүй. Энэ бол Эзэн, Абрахамыг анд найзаа гэж хүндлэн үздэг байсны нэг илрэл юм. Хожим Иошуагаар удирдуулсан Израйлчууд амлагдсан нутгийг эзэлж, Соломон хааны үед бүрэн эзэмшсэн нь Эзэн амлалтаа хэрэгжүүлсэний гэрчлэл болдог.

               Абрамыг ичгүүртэй байдлаас аварсан нь

Абрам итгэлээр сул дорой байж, айснаасаа болж, Египетийн Фараонд эхнэр Сараигаа булаалган алдсан үед
(Эх.12:17) Фараон хийгээд, түүний гэр бүлийнхэнд хүнд гай зовлон учруулан буцааж авчирсан. Бас олон жилийн хойно дахин энэ алдаагаа давтан, Герарын хаан Абимелехт эхнэр Сарагаа алдах үед нь
Эх.20:3- Чи өөрийн авсан эмэгтэйгээс болж үхнэ…
Эх.20.7- Одоо чи тэр хүний эхнэрийг буцаа …гэж айлган сүрдүүлж, Абрахамын гэр бүлийг ичгүүрт байдлаас удаа дараалан аварсан юм. Жинхэнэ анд найз л, сул дорой найзынхаа айдас, сэтгэлийн шаналалыг ойлгон, түүний төлөө бат зогсон, хүнд байдлаас авардаг. Ийм тохиолдол Библид бас огт гардаггүй. Бурхан өөр хэнд ч ингэж үйлчлээгүй юм.

                 Гэр бүлийн асуудалд нь тусалсан нь

Абрам,Сара нар итгэл султайгаасаа болж, Эзэний амлалтыг өөрсдийн арга замаар хэрэгжүүлэхийг оролдосноор , зарц бүсгүй Хагар жирэмслэн, улмаар зугтаахад нь
(Эх.16:9) Чи эзэгтэйдээ буцаж очоод гарын дор нь дуулгавартай бай…гэж буцаасан. Бас Сара, Хагар нарын маргаанаас болж Ишмаелийн хувь заяаны төлөө Абрахамын санаа нь зовоход
(Эх.21:13)-Зарц бүсгүйн хүү ч чиний үр учир, Би түүгээр нэгэн үндэстэн бий болгоно… гэж амлаад, Хагар, Ишмаел нарын хувь заяаны төлөө үүрэг хариуцлагыг Өөртөө авсан. Хэдийгээр энэ нь Өөрийнх нь хүслийн эсрэг төрсөн үр ч гэсэн, жинхэнэ анд найзын зүрх сэтгэл гарган Абрахамд тусалсан.

                        Абрахамтай зөвлөсөн нь

Эх.18 дугаар бүлэг. Ертөнцийн Эзэн, Бүтээгч Төгс Бурханд, бүтээл болсон хүмүүс нь гэмтэй бузар бол, устган шийтгэх бүх эрх мэдэл байдаг.
Эзэн гэмтэнийг шийтгэхдээ хэнээс ч асуудаггүй. Гэвч Содом, Гоморра хотынхны бузар гэмийг шийтгэхээр бууж ирээд, Абрахамын ятгалгыг сонсож, 10 зөвт хүний төлөө устгахгүй гэж амлаж байв. Үнэхээр тэнд зөвт 10 хүн байсан бол Эзэн шийтгэхгүй л байх байсан. Гэмтэнийг шийтгэхдээ, гэмшээгүй байхад нь, хөндлөнгийн хүний гуйснаар өршөөнө гэж амалсан тохиолдол Библид огт байхгүй. Тэгээд (Эх.19:29) Абрахамыг дурсан санаж Лотыг шийтгэлээс зайлуулсан. Энэ бол агуу Бурханы хувьд Абрахамд үзүүлж байсан гайхамшигтай хүндлэл юм.

                        Хүү өгсөн нь

Эх.12:2а Би чамайг агуу их үндэстэн болгоно…
Эх.13:16 Би чиний үр хүүхдүүдийг газар шороо мэт олон болгоно…
Эх.15:5 Чиний үр хүүхдүүдийг тэнгэрийн од мэт олон болгоно…
Эх.17:6 Чамаас үндэстнүүдийг бий болгож, чамаас хаад гарах болно… гэж олон дахин амласан бөгөөд, 99 настай байхад нь (Эх.18:14) дараа жилийн энэ үед Сара хүүтэй болсон байна, гэж амлаад хүүд нь Исаак гэж нэр өгсөн байдаг.
Мөн (Эх.22:17, 18 ) чиний үрс дайснуудынхаа хаалгыг эзлэн авах болно,… чиний үрсээр дамжуулан дэлхийн бүх үндэстэн ерөөгдөх болно гэсэн нь, (Мт.1:1) Аврагч Христийн дотор бүрэн хэрэгжиж байгаагийн илрэл нь бид юм.

                 Эд хөрөнгө, эрүүл мэндээр ивээсэн нь

Эх.13:2 Абрам мал адгуус, алт мөнгө ихтэй, маш баян байжээ…
Эх.23:16 Абрахам эхнэр Сарагаа оршуулахын тулд хэсэг газрын үнэ 400 шекел мөнгийг (тэр үедээ дэндүү үнэтэй) төлсөн…
Эх.24:22 Хүү Исаакдаа бэр гуйхдаа хагас шекелийн жинтэй алтан ээмэг, 10 шекелийн жинтэй хос алтан бугуйвчийг… (Эх.24:52) алт мөнгөн эрдэнэс, хувцас хунар гаргаж Ребекад өгөөд, түүний ах болон ээжид бас үнэт зүйлс барьжээ.
Эх.24:1б Эзэн бүхий л талаар түүнийг ерөөв, гэснээс харахад Эзэн Абрахамын ахуй хангамжийг юугаар ч дутаахгүй ивээж байжээ. Бас эрүүл мэндээр ч ивээсэн нь 140 орчим насандаа (Эх.25:1,2) дахин эхнэр авч, 6 хүүхэд төрүүлсэн ба 175 настайдаа өөд болсон юм.

                                Зоог барьсан нь

(Дуу.50:12,13) Би өлссөн байсан ч бухнуудын махыг идэж, хуцнуудын цусыг уух гэж үү?...
(Иса.40:28) Мөнхийн Бурхан болох Эзэн, дэлхийн хязгаарыг Бүтээгч нь эцэж туйлддаггүй юм… гэдэг Эзэн, тэнгэр элч нартайгаа Абрахамынд ирээд (Эх.18:4) та нар хөлөө угааж түр амрана уу!? (Эх.18:5) та нар түр амсхийж тэнхээ орно уу, гэж урихад нь, хүлээн авч (Эх.18:8) ээдэм, сүү болон бярууны махаар дайлахад нь, зооглосон нь онцгой тохиолдол бөгөөд, Хуучин Гэрээнд үүнээс өөр тохиолдол байхгүй. Энэ нь Эзэн Абрахамыг хэр их хүндэлж, үнэлж байсны гэрч юм. Эзэн Христийн дотор дэлхийд ирээд, Өөрийн шавь нартайгаа хамт хооллож ундалдаг байсан бөгөөд, үхлээс амилсаныхаа дараа ч (Лук 24:43) хамт хоололсон байдаг. (Илч.3:20) Харагтун... зүрх сэтгэлээ Надад нээвэл бид хамтдаа хооллох болно, гэж амласан байдаг.

                    Эрх мэдэл хүч нөлөөгөөр ивээсэн нь

Абрахам газар нутагтай, ард түмэнтэй хаан, ноён, язгууртан байгаагүй боловч, Бурхан түүнтэй найз байсан учраас (Эх.12:20) Египетийн Фараон ч түүнд хор учруулаагүй, (Эх.14:14) түүний гэрт нь төрсөн, дайтахад бэлтгэгдсэн 318 хүчирхэг эрчүүд байсан гэдэг нь, тэдний цаана хөгшид хүүхэд, эмэгтэйчүүд, дор хаяж 1000 орчим хүн Абрахамаас хамааралтай амьдарч, мал сүргийг нь маллаж, хайр ивээлийг нь хүртэж байсан гэсэн үг.
(Эх. 14:17а) Дүү Лотынхоо төлөө Хедорлаомерийг хамсаатан хаадтай нь бут цохисон нь Эзэн түүнд ялалтыг өгсөнөөс юм.
(Эх 14:17б-21) Салемын хаан Мелхизедек түүнийг хүндлэн талх давсаар дайлж ерөөж байсан.
(Эх.20:14,15) Филистийн хаан Абимелех миний нутгийн дуртай газраа амьдар гэсэн, (Эх.21:22) Абимелех, түүний жанжин Фикол нар ивээл гуйж ирээд гэрээ байгуулж байсан.
(Эх23:6)Хитчүүдийн дунд харь хүн байсан боловч, тэд Абрахамыг,… та бол бидний дундах хүчирхэг ноён мөн, гэж хүлээн зөвшөөрч байсан. Энэ бүгдээс харахад тэр эрх мэдэлтэй, хүчтэй нөлөөтэй амьдарч, хаад ноёд түүнээс эмээдэг, хүндэлдэг байсан.

                       Мөнхийн гэрээ байгуулсан нь

Эцэст нь Эзэн, анх Абрахамд амласан амлалт нь хоосон зүйл биш, үнэхээр бодитой мөнхийн амлалт юм гэдгээ мэдүүлж
(Эх.17:4 )Миний хувьд гэвэл, Би чамтай гэрээ байгуулна…
(Эх.17:7) Би чамд болон чамаас хойшхи үр удмуудад чинь Бурхан болж…Мөнхийн гэрээ байгуулна, гэж амлан, хөвч хөндөх ёслолын тамгыг өгсөнөө сахин биелүүлж Есүс Христээр дамжуулан Ариун сүнсний хөвч хөндөлт болгон төгс хэрэгжүүлсээр байгаа билээ.
Абрахамд өгсөн бүхий л амлалт, ивээл нь( Еф.3:6) сайн мэдээгээр дамжуулан дэлхийн бүх Христэд итгэгчдэд одоо ч хамаатай билээ.





"Эхлэл ном" хичээлийн гэрийн даалгавар
Шалгасан багш: Рожер Синиор

Эхлэл 1- 8-р бүлэг дэх Бурханы зан чанаруудаас

(Эх. 1:1-ээс 2:15) хүртэл Бурханы бүтээлүүдийнх нь төгс гоо үзэсгэлэнтэй, баян тансаг болох тухай, ажил үйлсийнх нь цар хүрээ, бүтээлч хүч чадлын тухай өгүүлж байна. (Ром 1:20)… Түүний мөнх хүч ба бурханлаг төрх нь бүтээгдсэн зүйлсээр дамжуулан ойлгогдон, илэрхий харагдаж байна… гэдэг. Нэг үгээр Түүний бүтээлүүд нь, Түүнийг ямар агуу их хүчтэй, цэцэн ухаантай болохыг харуулдаг. Түүний бүтээлүүдийн эмх цэгц зохион байгуулалт, харилцан уялдаатай маш олон төрөл зүйл байгаа нь, Түүний оюун сэтгэлгээний хязгааргүйг, агуу их хүч чадалтайн нотолгоо болдог.

Сайн сайхан хүсэл мөрөөдөлтэй, тодорхой зорилготой, биелүүлэх арга замаа ч хамгийн сайнаар үнэн зөв төлөвлөж чаддаг, түүнийхээ дагуу тууштай ажиллаж үр дүнд хүрч чаддаг зан чанаруудыг эндээс олж харж болно.

Ажил хөдөлмөрийнхөө үр шимийг амсан, сайн сайхныг нь харж (Эх. 1:4, 10, 12, 21, 25, 31) сэтгэлийн таашаал авч байгаа нь Бурханы зүрх сэтгэлийн гоо сайхныг ч бидэнд илчилдэг.
Тэрээр бүх бүтээлдээ хайраа шингээсэн байдаг. Тэвчээргүй, худалч хуурамч, бузар муу нэгэнд сайн сайхан хүсэл мөрөөдөл, бүтээлч хүч, сэтгэлийн тэнхээ огт байдаггүй.

Бузар муу нэгэн нь үр дүнтэй амьдрах чадваргүй ба бүтээл ч бүтээж чадахгүй, аливаа сайн сайхныг нь харах гоо сайхны мэдрэмж ч түүнд байхгүй юм.

Бурхан бүх орчлонг захирдаг боловч, Өөрийн бүтээл болсон хүнтэй эрх мэдэл хуваалцан (Эх. 1:27) газар дэлхийг, бүх бүтээлийг захирах эрх мэдлийг соёрхсон нь өгөөмөр нийгүүлсэнгүй, даруу зангийн илрэл юм.

Улмаар гэмд унасан хүнийг Өөрийн Хүү Есүс Христийн дотор уучлан, өв залгамжлагчаараа өргөмжилж, нэр алдараа ч харамгүйгээр хуваалцан (Илчлэлт 3:12… Өөрийн Бурханы нэр, Өөрийн шинэ нэр, Өөрийн Бурханы хотын нэрээ бичнэ), орчлонгийн Хаан суудлаа ч (Илчлэлт 3:21… Надтай хамт Миний сэнтийд залрахыг ялагчид соёрхоно.) хуваалцана гэж амладаг.

Агуу их хайр дотор л ийм гайхамшигтай, өгөөмөр нийгүүлсэнгүй зан чанар байж болдог.
Атгаг харамч, бардам нэгэн нь өөрийн хийснийг өөрөө л өмчлөн, бусад хэн нэгэнтэй хамтран эзэмших, эрх мэдэл хуваалцан захиран зарцуулахыг үл тэвчдэг.
Хайрласан нэгэн нь (Адам) Бурханаас урван тэрслэхэд ч, Тэр тэвчээртэй шударга байж шийтгэхээр яараагүй.

Шударга байна гэдэг нь үргэлж яллана, шийтгэнэ гэсэн үг биш. Харин гэмшилд дуудна, боломж олгоно гэсэн үг юм.

Тэр бүхнийг мэддэг тул, Адам гэм хийгээд Өөрөөс нь нуугдаж байгааг ч мэдэж байсан.
Чи хаана байна вэ? (Эх. 3:9) гэсэн нь… би Таны тушаалыг зөрчөөд ичсэндээ (эсвэл эмээсэндээ) нуугдаж байна… гэж хэлээсэй гэсэндээ юм. Харин Адам гэм хийсэндээ биш, нүцгэн (Эх. 3:10) байгаадаа ичсэн гэсэн.

Эзэн маш их харамссан байх. Бид одоо ч мөн адил, бусдыг хайрладаггүй, хувиа хичээдэг, харамч, хоёр нүүрт гэмт зан чанараасаа биш, харин бие эрхтэнээсээ, царай зүснээсээ, өмссөн хувцаснаасаа, нийгэмд эзэлж буй байр сууриасаа ичдэг.

Тэр ч бүү хэл зарим нь цуглаанд явдаг гэж бусдад ярихаасаа ч ичдэг байх нь бий. Бурхан дахиад Адамд боломж олгон (Эх. 3:11)… бүү ид гэсэн модны жимснээс идсэн үү? гэж асуусан.
Мэдээгүйдээ биш, харин… тиймээ, би идсэн тул намайг уучлаач… гэхийг хүссэн болов уу.
Харин Адам, өөрийн яс махны тасархай (Эх. 2:23), нэгэн бие болсон Еваг огтхон ч хайрлаагүй. (Иох. 13:34) Би та нарт бие биеэ хайрлагтун, Би та нарыг яаж хайрласны адил, та нар мөн бие биеэ хайрлагтун гэж шинэ тушаал өгч байна, гэж Есүс айлддаг.

Бүр Бурханыг ч буруутган, өөрийгөө зөвтгөх гэж оролдсон. Бид ч бас адил, гэм үйлдсэн үедээ буруугаа шударгаар хүлээх зориг дутаж, хажуудхаа үргэлж буруутган, бусдад л бурууг тохохыг оролддог.

Эзэн яагаад намайг сорив, яагаад туслахгүй байна, эдгээхгүй байна гэх мэтээр, Түүнийг энэ дэлхийн бузар булайд буруутгахыг оролддог. (1Иох. 1:9) Хэрэв бид нүглээ хүлээн зөвшөөрвөл, Тэрээр итгэмжит зөвт бөгөөд, бидний нүглийг уучилж, бүхий л зөвт бусаас биднийг цэвэрлэнэ.

Хайртай учраас л гэм нүгэл, урвалтыг тэвчин гэмших боломж олгодог. Хайргүй нэгэн нь үргэлж өө сэв хайж, буруутган харгисаар шийтгэж байдаг.

Ева ч буруугаа (Эх. 3:13) могойд тохсон. Одоо ч олон итгэгчид, сатан намайг сориод, би уналтанд ороод гэж гомдоллодог. Гэтэл үнэндээ (1Петр 2:8)… үгэнд дуулгаваргүй байдгаас болж бүдэрдэг…  Бүх гэмийн үндэс болсон могойноос эхлээд, Эзэн гэмтнүүдэд таарсан тохирсон шийтгэлийг нь оноосон. (Эх. 2:17)… Тушаал зөрчвөл үхэх болно… гэсний дагуу үхнэ (Эх. 3:19) гэдгийг нь ч хүнд хэлсэн.

Бид заримдаа бусдыг, үр хүүхдээ гэм буруутай үйлдлийнх нь төлөө шийтгэхээр сүрдүүлдэг боловч, хэрэгжүүлхээс хойш сууж, айдаг.

Тиймээс ч бидний үг үнэ цэнэгүй, хүчгүй байдаг. Харин Эзэн хэлсэн л бол, хэлсэнээ хийдэг. Тэр хүнийг шийтгэсэн боловч хараагаагүй.

Харин газарт, хүний амьдрах орчинд нь хараал хүрсэн. Харамсалтай нь дүүгээ хайрлан хамгаалах, хүндлэх ахын үүргээ умартан, амийг нь хөнөөсөн Каинд, Эзэн гэмших боломж (Эх. 4:9) олгосон боловч гэмшээгүйгээс, хараагдсан удмынхан бий болсон.

Хүмүүс хичнээн бузар муу болж, урван тэрсэлж (Эх. 6:11, 12), үүрэг хариуцлагаа умартсан ч, Өөрийн зүгээс итгэмжтэйгээр үүргээ биелүүлж, ерөөлөө үргэлжлүүлэхээр зөвт нэгнийг (Эх. 7:1) сонгодог Бурхан бол бидний Эзэн билээ.

Гэмт хүмүүсийг шийтгэхдээ ч зөвт нэгнийг аврах аргаа мэддэг. (1Иох. 2:2) Тэр, Өөрөө бидний нүглийн төлөөх эвлэрүүлэл бөгөөд, зөвхөн бидний нүглийн төлөө бус, бас бүх ертөнцийн нүглийн төлөө билээ. Тэр анхнаасаа л хүнийг ерөөсөн нь (Эх. 1:28) агуу хайрынх нь илэрхийлэл юм. (Еф. 1:3) Тэрээр Христ дотор тэнгэрлэг газар дахь алив сүнслэг ерөөлөөр биднийг ерөөсөн.

Харин хайргүй нэгэн нь хараадаг юм. Хайр эрх чөлөөг өгдөг бол хайргүй нэгэн нь үргэлж боолчлон дарангуйлахыг хүсдэг. (Гал. 5:1)… Христ биднийг эрх чөлөөтэй болгохын тулд чөлөөлсөн юм. (Иох. 8:32)Тэгээд та нар үнэнийг ойлгож, үнэн та нарыг чөлөөлнө.
Гэмийн асуудлыг шийдэх хоёр арга байдгийг бид эндээс харж болно. Уучлах, шийтгэх. Уучлахдаа гэмшсэн тохиолдолд л уучлах нь шударга юм. Огт гэмшээгүй тохиолдолд уучлах нь гэм нүгэлтэй эвлэрсэн хэрэг болно.

Ингэх нь Бурханы шударга мөн чанартай зөрчилдөнө. Гэмшээгүй тохиолдолд заавал шийтгэл ирнэ.
Учир нь гэмийг шийтгэхгүй бол шударга бус юм. Шударга зан чанар нь мөн л хайраас эхтэй. (Илч. 3:19) Би хайрласан хүмүүсээ зэмлэдэг, сахилгажуулдаг юм. Тиймээс зүтгэлтэй бай, гэмш.
Сахилгажуулна, шийтгэнэ гэдэг нь ч гэмшилд уриалж, аврахыг хүссэн хайрын уриалга юм. Тэр газар дэлхийг дахин хэзээ ч устгахгүй (Эх. 8:21), эмэгтэйн үр хүүхэд могойн толгойг няц гишгэнэ (Эх. 3:15), гэж амласнаа, Өөрийн Хүү Есүс Христийн дотор төгс хэрэгжүүлсэн итгэмжит Бурхан билээ.

Мөн (Эх. 6:2) Бурханы хөвгүүд хүний охидын гоо үзэсгэлэнг үзээд, тэднээс сонгосон болгоноо эхнэр болгов, гэснийг олонхи хүн Бурханы хөвгүүд нь хэн бэ гэдэг талаар л маргадаг.

Харин эндээс бид, махан биеийн хүслээр, үзэгдэх гоо сайхнаар Бурханыг алдаршуулдаггүй ба тэдгээр нь энэ ертөнцийн аврал ч биш гэдэг зарчимыг олж харан ухааран ойлгох ёстой болов уу.
Харин Бурханы алдрыг илэрхийлдэг нь Үг юм. (Иох 1:14) Үг нь махан бие болж бидний дунд оршин, бид Түүний алдрыг харцгаасан. Энэ нь Эцэгийн цорын ганц Хүүгийн алдар бөгөөд нийгүүлсэл ба үнэнээр дүүрэн байсан юм.

Зөвхөн Үгэнд итгэсэнээр л бид аврагдах юм. (Иох. 1:12, 13) Харин Өөрийг нь хүлээн авсан болгонд, Өөрийнх нь нэрд итгэдэг хүмүүст Бурханы хүүхэд болох эрхийг Тэр өгөв.
Тэд цусаар биш, махан биеийн хүслээр ч биш, хүний хүслээр ч биш, харин Бурханаар төрөгсөд билээ.





Шалгасан багш: Рожер Синиор
"Эхлэл ном" хичээлийн гэрийн даалгавар

“Хуучин Гэрээний Түүх” хичээлийн судалгааны ажил... Эхлэл

1. Сэдэв: Эхлэл

2. Уг номыг сонгох болсон учир шалтгаан:
Оршин буй бүх зүйлийн Анхдагч учир шалтгаан болсон, Аугаа сүр хүчит Бурхан, хэрхэн зах хязгааргүй орчлон ертөнцийг болон амьдрал гээч гайхамшигтай үзэгдлийг цогцлоосон нь нэн сонирхолтой ба, уншиж судлах тутам улам олон, шинэ шинэ илэрхийлэл, илчлэлт нууцууд нээгддэг нь гайхмаар юм. Аливаа ажил үйлсийн эхлэл сайн бол цаашдын өрнөл хөгжил нь ч бас сайн байдаг. Загалмайн золилтоор дамжуулан, Христийн дотор шинэ бүтээл болсон бидний сүнслэг өсөлт хөгжилтөнд зайлшгүй шаардлагатай мэдэх, суралцах ёстой олон түүхүүд байдаг.

Бурхан хүнийг бүтээсэн ба хоорондын харилцааны түүх нь нэн сургамжтай юм. Энэ номноос сурсан мэдсэн болгон сайн мэдээ тунхаглах үйлсэд ч, шинэ итгэгчидийг Эзэний замаар дагуулахад ч, өөрийн сүнсний амьдрал, тэмцэлд ч нэн чухал суурь болж өгдөг. Ирээдүйд энэ номыг улам сайн судалж, бусдад зааж сургахыг хүсдэг. Эхлэл ном байхгүй байсан бол Библи байхгүй байх байсан. Учир нь энэ ном, бусад бүх номын эхлэл, бүх хүний түүхийн эхлэл, ирээдүйн эхлэл юм.

3. Хэзээ, ямар цаг үед, тухайн үйл явдал болсон байна вэ?
Эхлэл ном нь, Библийн бусад номуудын өгүүлдэг түүхээс илүү их, асар өргөн цаг хугацааны тухай бидэнд мэдээлдэг. Ялангуяа (Эх.1:1)-ээс (Эх.2:3) хүртэл хэсэгт дурдагдаж буй бүтээлийн түүхийн долоон хоног нь, бидний мэддэг цаг хугацааны, хоногийн 24 цагийн хүрээнд авч үзэх аргагүй зүйл. (Сургаалт үгс 8:23) Өнө мөнхөөс, газрын цаг хугацааны эхлэлээс Би тогтоогдсон байсан, (2Петр 3:8)... Эзэний хувьд, нэг өдөр нь мянган жил мэт, мянган жил нь нэг өдөр мэт...гэж бичигдсэнээс харахад, Мөнхөд Оршигч Тэнгэр Эцэгийн хувьд, хүмүүсийн цаг хугацааны ойлголтоор хэмжигдэхгүй Нэгэн гэдэг нь тодорхой байдаг.

Бүх орчлонгийн хаана нь ч нэгэн зэрэг оршиж чаддаг Түүнд, өглөө нь нар мандаад, орой нь нар шингээд нэг өдөр өнгөрдөг хүнтэй огт адилгүй нь тодорхой.
Библийн эхний 7-н өдрийн түүхийг анхааралтай унших юм бол, нэг өдөрт ямарваа нэгэн ажлыг бүрэн дуусгаж байгааг харж болно.
Эндээс дүгнэхэд, Эзэн бол аливаа ажлыг хийхээр шийдээд, бүрэн төгс гүйцэтгэж дуусах нь, Түүний хувьд нэг өдөр болдог ба тэр нь хүний хувьд хэдий хэрийн хугацаа болох нь (10.000 жил, 1.000.000 жил) тодорхойгүй юм.
Тиймээс энэ цаг үеийг, Эзэний доторхи нууцлагдмал цаг үе гэж нэрлэж болох юм.

Эхлэл номын цаг хугацааны хүснэгт

Орчлон ертөнцийн үүсэл ба Амьдралын органик хэлбэрийг бүтээсэн үе	Хүний үүсэл ба хүн төрөлхтөний түүхийн эхлэл, нийгмийн хувьсал өөрчлөлт	Бурханы сонгогдсон ард түмний үүсэл
МЭӨ 4000 орчим жилээс урагшаа хязгааргүй	МЭӨ 4000 орчимоос 2200 орчим жилийн үе	МЭӨ 2200 орчимоос 1804 он хүртэлх үе

Энэ үед хүрэл зэвсгийн дунд үе байсан. Египетэд пирамид, Месопотаимд зиккурат баригдаж байв. МЭӨ 2000-1800 оны үе нь хуучин Вавилоны үе юм. Вавилоны хаан Хаммураби “хууль” бичсэн. Вавилончууд цагийн 60 минутыг бий болгосон.
Кретийн Минион, Кноссосын ордон баригдаж, дотоод угаалгын өрөө анх бүтээгдсэн. Хаммурабын үхлийн дараа Хитчүүд Вавилоныг дээрэмдэн тоносон. Ассири хүчирхэгжсэн.   

4. Номын утга санаа, буюу мессеж яг юу хэлэх вэ?
Эхлэл ном нь, бүхий л үзэгдэл юмсын Анхдагч учир шалтгаан, оршин тогтнолын үндэсийн Үндэс бол Бурхан юм. Тэр бол гайхалтай үзэсгэлэнтэй, бүх талаараа өв тэгш орчлонг, тэр дундаа хүн таныг ч бүтээсэн Бүтээгч юм. Түүний бүтээсэн хүмүүний амьдрал гээч гайхамшигтай үзэгдэл нь (Эх.2:17) хууль дээр үндэслэгддэг ба тэрхүү хуулийг тогтоогч нь Бурхан юм, гэдгийг өгүүлдэг.
Тэгээд өнөөгийн дэлхий ертөнц (хүний нийгэм) дэх бузар булай болгоны үндэс нь (Эх.3:1-7) энэхүү хуулийг зөрчиснөөс эхэлснийг харуулдаг. Гэвч Бурхан хуулиас өмнө (Эх.1:28) хүнийг ерөөсөн ба хэрхэн итгэмжтэйгээр гэмд унасан хүн төрөлхтөнийг дахин (Эх.12:1-3) ерөөж эхэлснийг илчилдэг.
Орчлон ертөнц ба хүмүүний амьдралыг бүтээгч, хөтлөн удирдагч цорын ганц Бүтээгч Эзэн байдаг ба Түүнээс ангид орших, ямар нэгэн өөр бүтээгч байхгүйг энэ ном тодорхой гэрчилдэг юм.

5. Тухайн утга санаа, өнөөгийн Бурханы хүмүүст ч мөн зориулагдсан уу?

Хүн өөрийгөө тохиолдлоор, адгууснаас бий болоогүй гэдгээ мэдсэнээр, өөрийгөө болон бусдыг эрхэмлэн үзэж хүндлэн, үнэ цэнээ мэдэрч эхэлдэг. Өөрийг нь болон хүн төрөлхтөнийг хайрласан Ертөнцийн Эзэний хайр нийгүүлсэл, өнө эртнээс нарийн төлөвлөгдсөний дагуу, баттайгаар хэрэгжиж буйг мэдээд, итгэлийн амьдралдаа урам зоригтой болдог.
(Эх.12:1-3) ... чи ерөөлийн үндэс болно.
Чамайг ерөөгчдийг Би ерөөж,
Чамайг хараагч Нэгнийг Би хараана.
Газар дэлхий дээрхи бүх үндэстэн
чамаар дамжуулан ерөөгдөнө... гэсэн амлалт нь амьд мөнхийнх бөгөөд, өнөөдөр ч надаар дамжин олон үндэстнүүдэд биелэлээ олох болно, гэдгийг Бурханы хүн болгон мэддэг билээ.

6. Номын гол сэдэв
Номын хамгийн эхэнд байдаг “bereshith” буюу “эхэнд” гэдэг үгээр ном нэрлэгдсэн байна. Эхлэл ном нь, бүх зүйлийн эх үндэс, үүсэл гарлын тухай ном юм. Бүх бүтээлийн эхлэл (Эх.1:1-1:31), амралтын өдрийн эхлэл (Эх.2:2), хүний үүсэл (Эх.1:27, 2:7), эмэгтэй хүний гарал (Эх.2:22), хуулийн эхлэл (Эх.2:17), (Эх.3:6) гэм нүглийн эхлэл, амлалтын эхлэл (Эх.3:15), гэр бүлийн үүсэл (Эх.2:24), анхны хувцас (Эх.3:7, 21), анхны хүүхэд (Эх.4:1), анхны өргөл (Эх.4:3,4), анхны сануулга (Эх.4:6,7), анхны аллага (Эх.4:8), анхны шийтгэл (Эх.3:14,15), шашны үүсэл (Эх.4:26), үхлийг ялсан анхны ялалт (Эх.5:22-24), анхны гэрээ (Эх.9:9-11), анхны засаглал, эрх мэдэл (Эх.10:8-12), хотын үүсэл (Эх.4:17), дэлхийн соёл иргэншилийн үүсэл (Эх.4:21,22), үндэстнүүдийн үүсэл (Эх.11:8,9), Бурханы ард түмэн Израиль үндэстний үүсэл (Эх.12:1-3) гэхчилэн маш олон зүйл, тогтоц бүтэц, үзэгдэл юмсын эхлэлийн тухай өгүүлдэг.

7. Зохиогч
Эхлэл номыг бичигч өөрийнхөө тухай тус номонд ердөө ч дурдаагүй. Мосе, Хуучин Гэрээний эхний таван номыг (Пентатухыг) бичсэнийг, Хуучин Гэрээний болон Шинэ Гэрээний олон номонд батлан бичсэн байдаг. Үүнд (Малахи 4:4) “Миний зарц Мосегийн хуулийг санагтун. Хоребт бүх Израилийн төлөө Миний түүнд тушаасан тогтоол, зарлигуудыг ч сана” гэсэн байдаг бол, (Марк 12:26)... Мосегийн номны бутны тухай хэсэгт, Бурхан Мосед “Би бол Абрахамын Бурхан, Исаакын Бурхан, Иаковын Бурхан” гэж айлдсаныг та нар уншаагүй юу?, гэж Эзэн айлдсан байдаг.
Эхлэл номыг болон бусад хуулийн дөрвөн номыг Мосе бичсэнийг (Ех.17:14, 24:4, 34:27, Лев.1:1-2, Тоол.33:2 Deu.1:1, 31:19, 1Ха.2:3, 2Ха.14:6, Езр.6:18, Нех.13:1, Дан.9:11-13) гэх мэт Хуучин Гэрээний хэсэгт батлан бичсэн байдаг. (Мк.12:26, Лк.16:29,31, Иох.7:19-23, Иох.5:46, Үйлс.7:22, 26:22, 1Кр.9:9, 2Кр.3:15) гэх мэт Шинэ Гэрээний хэсэгт нотолдог юм.
Мосе гэдэг нь еврей “Mosehen” “гаргаж ирсэн нь, татаж авсан нь”, египетээр “mes” “усны хүү” гэсэн утгатай нэр.

Мосе МЭӨ 1526 оны орчим (зарим мэдээнд 1520 оны орчим гэдэг) Израиль эцэг эхээс төрсөн. Дээрээ нэг эгч (Ех.2:4,7; 15:20) Мириам, нэг ах (Ех.4:14) Аарон бас эцэг эхтэйгээ 3 сар амьдарсан боловч, Фараоны зарлигаас болж (Ех.1:22) Нил мөрний усанд тавигдсан.
Түүнийг Фараоны охин (Ех.2:6) олж, улмаар тэр ордонд 40 жил амьдарч, Египетийн бүх эрдэмд боловсрон, Библийн эхний 5 ном Пентатухыг бичихэд бэлтгэгдсэн.
Мосе Израиль хүнийг өмөөрч, египет хүнийг алсанаас болж Мидиан руу зугтсан бөгөөд, тахилч Иетрогийн охин Зиппоратай (Ех.2:21) сууж, мал маллан 40 жилийг өнгөрөөсөн.
Тэр бутан дунд гал шатах үзэгдэлтэй тулгаран (Ех.3:2) улмаар өөрийн ард түмнийг чөлөөлөх Бурханы аугаа үйлсэд дуудагдан үйлчилсэн.
Тэр хүний түүхэн дэх Бурханы хүмүүсээс хамгийн цуутай нэгэн бөгөөд, Израилийн гайхалтай удирдагч мөн. Тэр Эзэнд 40 жил үйлчилээд, МЭӨ 1405, 1406 оны орчим (Deu.34:1,6), Моабын талд орших Небо ууланд, 120 настайдаа нас барсан.

8. Номын зорилго

Энэ номын анхны хүлээн авагчид нь 400 жил Египетийн дарлалд нухлуулж, боолын сэтгэлгээ, боол маягийн амьдралын хэв маягт дассан, итгэл үнэмшил, урам зориггүй, ирээдүйгээ гэрэл гэгээтэйгээр төсөөлж, харж чадахгүй байгаа Израилчууд байсан. Дөнгөж чөлөөлөгдсөн тэдэнд, чөлөөлөгч болсон Бурхан Эзэн нь хэн бэ, гэдгийг товойлгон үзүүлэхийн тулд бичигдсэн. Бүх юмс үзэгдлийн эх үндэс, тэр дундаа Израил үндэстний эх гарал үүсэл нь ч Бурхан юм гэдгийг харуулах зорилготой байсан. Энэхүү чөлөөлөлт нь нэн эртнээс төлөвлөгдсөн, амлагдсан амлалтын дагуу хэрэгжиж байгаа бөгөөд, ирээдүйд ч их өвөг дээдсүүдэд амласан амлалтын (Абрахам, Эх.12:1-3; 17:1-5; 22:17,18; Исаак, Эх.26:24; Иаков, Эх.28:13-15; 35:9-12; 46:3,4) дагуу, энэ ард түмнийг сэргэлт, хөгжил цэцэглэлт хүлээж байгааг мэдүүлэн, итгэл найдвар өгөх зорилгоор бичигдсэн.


9. Номын бичлэгийн бүтэц ба агуулгын товч тойм

А.Эхлэлүүд (Эх.1:1-11:26)

1. Бүтээл (Эх.1:1-2:25)

Энэ нь бодит түүх үү?, зохиол уу?, билэгдэлийн бичээс үү?, шинжлэх ухааны ном уу? Хүмүүс янз янзаар ханддаг, тайлбарладаг. Харин хамгийн гол, итгэлээр хүлээн авч ойлгох ёстой зүйл нь, энэ орчлонг хэмжээлшгүй эрх мэдэлтэй Нэгэн нь, Өөрийн Үг, тушаалаараа бүтээсэн тухай юм.Хүний уналтаас өмнө, Түүний бүх бүтээл эмх цэгцтэй, замбараатай байсан. Гэрлийг харанхуйгаас, өдрийг шөнөөс, хуурай газрыг далай тэнгисээс ялгаж заагласан. Бүх сүнслэг, материаллаг зүйлс эмх цэгцтэй боловч 2 төрөлд л хуваагдаж байсан бол (Эх.1:11) нялх ногоо, үрт ургамал, үрт жимсний модыг төрөл төрлөөр нь улмаар усны болон жигүүртэн, хуурай газрын аливаа амьтадыг төрөл төрлөөр нь бүтээсэн. Эдгээр нь Бурханы аугаа ур чадвар, хязгааргүй төгс бүтээлч сэтгэлгээний илэрхийлэл болдог. Энд “сайхан” гэдэг үг 6 удаа хэлэгдсэн байдаг.

Мөн, ганцхан хүнийг л Бурхан, Өөрсдийн дүр төрхөөр бүтээснийг эндээс хардаг. Энэ нь 6-н янзын ойлголтоос бүрдэж болох юм.
а) Бүтээлч оюун сэтгэлгээ; Зөвхөн хүн л ухамсартайгаар, зорилготойгоор бүтээдэг.
b) Зүрх сэтгэл ба ухаарал; Ганцхан хүн л “би оршдог” гэдгээ ухамсарладаг, бурууг үйлдвэл гэмшдэг.
с) Захирах эрх мэдэл, байр суурь; Хайрлан арчлан, ухамсартайгаар захиран зарцуулах, хамгаалах, ашиглах эрх мэдэл хүнд л байдаг.  
d) Сайн ба мууг ялгах чадвар; 
е) Бурханы алдар; Үл үзэгдэгч Бурханы, үзэгдэх дүр төрх нь байх үүрэг хариуцлага зөвхөн хүнд л байдаг.
f) Бурхантай болон бусадтай харилцах онцгой хайрын, ухамсартай харилцаа зэрэг нь байж болно.

2. Уналт ба түүний үр дагавар (Эх.3:1-5:32)

а. Уналт (3:1-24): Олон хүн өнөөгийн ертөнцийн бүх асуудлууд, нийгмийн муу орчиноос болдог гэж үздэг. Харин Библи, анхны гэм төгс ахуй орчинд бий болж, тэгснээрээ хүн хүнтэйгээ, хүн Бурхантай харьцах харьцаа гажуудаж, бүх бузар зүйлс бий болсоныг гэрчилдэг. Эндээс гэм нь үргэлж хүний сэтгэлийг татдаг боловч, үр дүн нь маш гашуун байдгийг харж болно.Бас хүн гэмд унаад, хариуцлага хүлээн гэмшиж чаддаг байх ёстойг, эс бөгөөс шийтгэл ирдэгийг мэдэж болно.Хүн хэдийгээр гэмшиж ч мэдэхгүй унасан боловч Бурханы хайр хувиршгүй байж, (Эх.3:15), итгэл найдварын амлалтыг өгсөн нь энд тодорхой бичигдсэн байдаг.

b. Каин ба Абел (4:1-26): Эзэнд хүндэтгэл, мөргөл, гуйлт залбирал өргөөд хүлээн авагдах, авагдахгүйн гол учир нь, хүнд өөрт нь байдгийг эндээс харж болно. Бурханд ойшоогдохгүй байгаагийн бурууг бусдаас хайж болохгүй, харин өөрөө гэмших ёстой.

с. Адамаас Ноа хүртэл ургийн бичиг (5:1-32):  (Эх.5:3) Бурханы дүр төрхөөр бүтээгдсэн хүн, гэмт хүний дүр төрхтэйгөөр төрөх болсон. (Эх.5:18-24) Бурханы тааллыг олж, үхэл үзэлгүй өргөгдөн одсон хүний (Ёнох) тухай онцгойлон мэдээлсэн нь бидэнд урам зоригыг өгдөг.

3.Үер (Эх.6:1-9:29)

а. Хүн төрөлхтөний гэм нүгэл (6:1-8): Олонхи хүн гэм нүгэл гэхлээр биеэрээ үйлдсэн гэмт үйлдэл мэт боддог бол, Библид (Эх.6:5)...хүний сэтгэл санаа, хүсэл бодол бүхэн нь ямагт муухай болсон нь, шийтгүүлэх зохистой гэм, гэж анхааруулдаг.

b. Хөвөгч онгоц барьсан нь (6:9-7:10): Бурхан амлалтандаа итгэмжтэй байж, ерөөлийг үргэлжлүүлэх нэгнийг сонгосон. Ноа дуулгавартай байж усан онгоц урласан нь, залуургүй, далбаагүй, сэлүүргүй байсан нь, зөвхөн Эзэний хүслээр л их усан дээр хөтлөгдсөн гэсэн үг. Бидний амьдрал ч, бидний хүсэл мөрөөдөл, хичээл зүтгэлээр биш, Эзэнээр удирдуулах нь зохистой юм.

с. Үер (7:11-8:14): Жирийн нэгэн аадар борооны үер биш, онцгой гайхамшигтай үйл явдал болж, газрын гүнээс ч ус оргилон, 150 хоногийн турш хальж байсан. Эзэн онгоцны хаалгыг хаасан нь, авралыг төгс хэрэгжүүлдэгийн баталгаа юм.
Бүх хүн төрөлхтөн, бүх ан амьтан үхсэн гэдгийг 3 удаа онцолсон нь, маш том анхааруулга юм. (Эх.8:11) Ноагийн илгээсэн тагтаа нь чидуны шинэхэн нахиа зууж ирсэн нь, одоо ч хүн төрөлхтөнд энх тайвны, аугаа эвлэрлийн, уучлалын тэмдэг болдог.

d. Ноатай болон бүх бүтээлтэй хийсэн анхны гэрээ (8:15-9:17): Эзэн анхилуун үнэрийг таашаан соёрхсон (Эх.8:21), гэсэн нь Ноагийн даруу зангаар, гэмшилтэйгээр, талархалтайгаар, эмээнгүйгээр хандсан зүрх сэтгэлийн хандлага үйлдэл нь Түүний зүрхийг хөндсөн.
Тэр усаар дахиж шүүхгүй гээд, мөнхийн амлалтаа өгч, баталгаа болгон солонгыг томилсон нь, Христийн золилтоор хэрэгжсэн, Шинэ Гэрээний тамга Ариун Сүнсний билэгдэл юм.

е. Хүний гэм нүгэл үргэлжилсэн нь (9:18-29): Ноагийн согтуурлыг үнэнээр бичиж үлдээсэн нь, Библи зөвхөн үнэнийг хэлдэгийн гэрч юм. Үерээс хойш ч хүний гэмт чанар өөрчлөгдөөгүйг Эзэн мэдэж байсан. Хамгийн гол алдаа нь, эцгийнхээ нүцгэн байгааг харсандаа биш, гадуур тунхаглан шоолсонд байгаа болов уу?! Бид заримдаа бусдын алдаа гэмэнд баярладаг. Эзэн, Ноатай санал нэг байсан нь хожмын түүхээс тодорхой байдаг.

4. Үндэстнүүдийн тархалт (Эх.10:1-11:26)

а. Ноагийн үр удам (10:1-32): Хүмүүс нэгэнт мөс чанараараа эв нэгдэлтэй, эмх цэгцтэй, даруу дуулгавартай амьдарч чадахгүй нь тодорхой болсон тул, тэдэнд тохирсон дарангуй засаглал хэрэгтэй болсон. (Эх.10:8-12) Газар дэлхийн анхны хаанчлалыг Нимрод тэргүүлсэн юм.

b. Бабелийн цамхаг (11:1-9): Бурханы хүмүүсийг бүтээсэн зорилго нь (Эх.1:28),... өнөр өтгөн болж, газар дэлхийг дүүргэн эзэмшүүлэх, Бурханыг алдаршуулах нь юм. Харин гэмт хүмүүс, өөрсдийн алдарын төлөө, Эзэний хүслийн эсрэг хот байгуулан, бөөгнөрөн суухыг хүссэн. Гэвч Бурхан төгс эрх мэдлээрээ энэ бүгдийг зогсоосон нь, -- хүмүүс ялзран завхрахгүйн тулд, --газар дэлхийд тархан суухын тулд, --өөрсдийн биш, Бурханы алдарыг хайгаасай гэсэндээ, юм.
Бурхан хүмүүсийн хэлийг самууруулж, үндэстнүүдийг бий болгон бүх дэлхийд тараагаагүй бол, нэг хэлтэй (хэвшмэл нэг сэтгэлгээтэй), нэг гэмт санаатай хүмүүс ялзран, Содом, Гоммора шиг болох байсан биз.
с. Шемээс Абрам хүртэлх ургийн бичиг: (11:10-26):

 
В. Их өвөг дээдсүүд (Эх.11:27-50:26)

1. Абрахам ба Исаак (Эх.11:27-25:18)

а. Абрам дуудагдсан нь (11:27-12:9): Эхлэл номын гол фокус Аврагчийн удам, нэг гэр бүл дээр таарч эхэлдэг. МЭӨ 2100-2000 оны хооронд Ур хотоос гарч явсан болов уу гэж үздэг. Абрам 75-тай, Сара 65-тай боловч хүүхэдгүй байлаа. (Эх.12:1-3).....Миний чамд зааж өгөх газар уруу яв. ....Тэгээд чи ерөөлийн үндэс болно. ....бүх үндэстэн чамаар дамжуулан ерөөгдөнө, гэсэн Бурханы дуудлагын биелэлт нь, зөвхөн Бурханаас шалтгаалах нь тодорхой байлаа.

b. Итгэлд тулгарсан бэрхшээлүүд (12:10-14:24): Абрам амлагдсан газар очтол бөөн асуудлууд угтсан. Эзэний хүслийг дагаж эхэлмэгц, сатан бидэн рүү довтолдог. Абрам залбиралгүй, өөрийн дураар шийдвэр гаргаж, улмаар ичгүүртэй байдалд орсон. Гэвч ямар ч үед Эзэн, Өөрийн хүмүүсийг орхидоггүйг эндээс харж болно. Энэхүү сургамжаас ухаарсан, итгэлээр өссөн Абрам, газар нутаг сонгохдоо дүүдээ боломжийг олгон, өөрийгөө дорд болгон, бас олзлогдон явахад нь чөлөөлөн авсан.

с. Абрамтай хийсэн Бурханы гэрээ (15:1-18:5): Эзэний ивээлээр, Абрам улам өөрчлөгдөж, гэрээ байгуулах түвшинд очлоо. Гэвч тэвчээртэйгээр Эзэний товлосон цагийг хүлээлгүй, асуудлыг шийдэх гэж оролдосноос гэр бүлийн маргаан зөрчилийг бий болгосон нь, өнөөдрийн үндэстэн хоорондын гол асуудал болоод байна. Харин Бурхан амлалтандаа итгэмжтэй байж, Абрамыг (дээдлэгдсэн эцэг) Абрахам (үндэстнүүдийн эцэг) болгон, гэрээний баталгаа (тамга) болгон хөвч хөндөх ёслолыг өгсөн. Бид Эзэн Есүсийн золилтоор шинэ гэрээнд нэгдсэний тэмдэг, зүрх сэтгэлийн хөвч хөндөлт (гэмшил) хийх ёстой билээ.

d. Гэрээн доторхи амьдрал, тэмцэл (16:26-22:19): Гэрээний харилцагчийн хувиар Эзэн үүргээ итгэмжтэйгээр хэрэгжүүлэн, гэмтнийг шийтгэхдээ ч Абрахамтай зөвлөсөн нь агуу хүндлэл, өргөмжлөл байлаа. Абрахам ч Эзэний хүсэн хүлээсэн хариу үйлдэл болсон, зөвт хүний төлөө залбирсан.
Эзэн, гэмт хотыг галаар шийтгэсэн нь 1.Бурхан гэмийг заавал шийтгэдэг. 2. Усаар шийтгэхгүй гэж амласан ч, гал Түүний нөөцөнд байгаагийн, илчлэлт болдог юм.
Абимелехийг Абрахам хуурч, бас дахин ичгүүрт байдалд орсон боловч Бурхан дахин ивээлийн мутраа сунгасан нь, хүн сул дорой бөгөөд, гэрээн дотор ч Эзэний л хүчээр зогсдогийг харуулдаг. Товлосон цагтаа Эзэн амлалтаа биелүүлж хүүг өгсөн нь, гэмт хүмүүсийн төлөө өгсөн Бурханы Хүүгийн билэгдэл юм. Мөн хүүгээ Исаакаа Надад өргө нь гэсэн нь, Есүсийн загалмайн тахилын билэгдэл, эш үзүүллэг байсан.
е. Хөвгүүд ба талбайтай болсон нь (22:20-23:20):
f. Исаакт эхнэр авч өгсөн нь (24:1-67)
g. Абрахам ба Ишмаел нарын үхэл (25:1-18)

 
2. Иаков (Эх.25:19-36:43)
 
а. Иаков Есав нар төрсөн нь: (25:19-34):
b. Исаак ба Абимелех (26:1-35):
с. Исаак Иаковыг ерөөсөн нь (27:1-40)
d. Иаков Лабан руу зугтсан нь (27:41-30:43): Ирээдүй нь тодорхойгүй, айдас шаналал, ганцаардал дунд явсан Иаковд Бурхан үзэгдэн, Абрахамд, Исаакт өгсөн амлалтуудаа батлан, түүнийг ерөөсөн нь, Эзэний итгэмжтэй хувиршгүйн баталгаа болдог. Харин Иаков хариуд нь 10-ны нэгээ амласан нь, Бурханы үнэлж баршгүй хэмжээлшгүй, ивээл ерөөлийн дэргэд юу ч биш боловч, зүрх сэтгэлийн хандлага нь Эзэнд үнэтэй байлаа.

е. Иаков гэртээ эргэж ирсэн нь (31:1-35:29): Иаков (мэхлэгч) Бурхантай барилдан, улмаар түүний амьдрал, хувь заяа зөвхөн Эзэнээс хамаардагийг ойлгон ухаарч, ерөөлийг гуйн зуурч, Израиль (Ялагч) болсон нь, хожим Бурханаар сонгогдсон бүх хүнийг нэрлэдэг нэр болсон юм.
f. Есавын үр удам. (36:1-43)


3. Иосеф (Эх.37:1-50:26):

Эцэг Иаков аа 90 настай байхад нь, Падданарамд төрсөн. Рахелын ууган хүү Иосеф, эцэгтээ онцгойгоор хайрлагдсан бөгөөд, түүнийг өв залгамжлагчаа болгохоор шийдсэн Иаковын шийдвэрээс болж ах нар нь түүнд таагүй хандах болсон. Мөн Бурханы өгсөн илчлэлтийг, гэнэн цайлганаар ярьсан нь түүний хувь заяанд онцгой эргэлтийг буй болгосон. Гэвч энэ бүгдийн цаана төгс хүчит Бурхан, хэмжээлшгүй эрх мэдлээр удирдаж байлаа.
Иосеф бол дөлгөөн, уужуу тайвуу зан, ажил хэрэгтээ чин үнэнчээр хандах хандлага, өршөөнгүй нийгүүлсэнгүй сэтгэлээрээ үнэхээр онцгой нэгэн байсан ба тэгснээрээ эрхэмсэг, тэнгэрлэг амьдралын үлгэр жишээ болон, Хуучин Гэрээний Христ гэж нэрлэгддэг нэгэн юм.

а. Иосеф ба түүний ах нар Канаанд (37:1—36)
b. Иуда ба Тамар (38:1-30)
c. Египет дэх Иосефийн амьдрал, тэмцэл ба дэвшсэн нь (39:1-41:57):
d. Ах нартайгаа уулзсан нь (42:1-45:15):
е. Иаков Египет рүү нүүсэн нь (45:16-50:26):
f. Иаков хөвгүүдээ ерөөсөн нь (49:1-28)
g. Иаков Иосеф нарын үхэл (49:29-50:26)


10. Та уг номноос юу сурсан бэ?

Энэ номыг уншснаараа, орчлон ертөнцийн үүсэл гарал, оршин байгаагийн утга учир, зорилгынх нь талаар үнэн зөв мэдлэгтэй болж, цорын ганц Бүтээгч Эзэний сүр хүч, цог жавхлан, эрх мэдлийг бахдан харж урам зоригыг авдаг. Мөн Түүний оргил бүтээл хүн болон, тэдний хоорондын харилцааны талаар, итгэлийн амьдралд маань сургамжтай олон зүйлийг олж мэддэг.
Хамгийн гол нь ертөнцийн сууриас өмнө биднийг хайрлаад, нэн эртнээс үүнийгээ илчлэн, итгэмжтэйгээр харуулсан, биднийг ерөөсөн Эзэнтэй улам илүү ойр дотно танилцдаг билээ.


11. Хуучин Гэрээг огт сонирхдоггүй хэн нэгэнтэй уулзвал, та хэрхэн зөв аргаар дүрслэн тайлбарлаж, түүнд Хуучин Гэрээг унших сэдлийг төрүүлэх вэ?

Суурьгүй байшин хэврэг байдаг шиг, өөрийнхөө гарал үүслийг, хамгийн үнэн зөвөөр мэдэхгүй бол, Христийн доторхи шинэ амьдралдаа, амжилт ололтонд өсөж чадахгүй юм. Хүн та өөрийгөө, ертөнцийг Бүтээгч Эзэний хамгийн гайхамшигтай эрхэм нандин, бурханлаг бүтээл гэдгээ, мөн өнөөгийн гэмт мөн чанарынхаа эх үүсвэрийг ч мэдсэнээр Есүсийн хайр, зориулалт, золиослолыг жинхэнэ утгаар үнэлж, хүндэлж, зүрх сэтгэлээ улам илүүгээр нээх болно гэдгийг, Эхлэлийн олон гайхамшигтай түүхүүдээс жишээ аван ярьж өгөх болно.


Ном зүй
“Ариун Библи” Монголын Библийн орчуулгын Хороо. 2000 он
“Библийн хураангуй толь бичиг” Zondervan Corporation1989 он
“Бялхам амь судлал Библи” Дональд С.Стамп., Life Publishers International 2006 он
“Хуучин Гэрээг танилцуулахуйд” Жон Дрэйн. Lion Hudson publishing. 2000 он






"Хуучин гэрээний түүх" хичээлийн гэрийн даалгавар UBTC
Шалгасан багш: Петрус Хандоёо 2006 он

Ц.Энхболдын гэрчлэл 1

Мухар сүсгийн хүлээснээс Христ намайг чөлөөлсөн

Гандан, эсвэл ямар нэгэн шарын шашны сүм хийдээр очиж, ном тарни уншуулан, гүрэм засал хийлгэж, рашаан утлага хүртэж үзээгүй монгол хүн бараг байхгүй биз. Би ч мөн адил. Амьдралын минь олон асуудлыг баримал, зурмал, цутгамал, хатгамал, янз бүрийн нэр устай элдэв шүтээнүүд шийдэж, надад амжилт ололт, эд мөнгөний хангалуун байдлыг өгөх юм шиг л боддог байлаа.

Гэм нүглийн талаар ч бүдүүлэг болхи ойлголттой, архи ууддаггүй, тамхи татдаггүй, овилгогүй танхай, замбараагүй амьдрахгүй л бол болж байна, гэж боддог байлаа. Амьдрахын эрхээр Солонгост очиж хүнд хүчир хөдөлмөрт зүтгэж байхдаа ч мэргэч төлөгчид итгэдэг байсан. Харин оюун сэтгэлгээ маань өөр зүйлээр дутагдаж байсан.

XXI зууны, өөрийгөө үнэлдэг, соёл боловсролтой хүний хувьд дэлхийн 3-н том шашны талаар зохих мэдлэгтэй байх нь зүйтэй гэж үзсэний дүнд Христийн цуглаанд анх очиж билээ. Тэнд “Цорын ганц үнэн Бурхан, Амьд Эзэн, цорын ганц Аврагч” гэх мэт үгсийг огтхон ч тусгаж эргэцүүлэн хүлээн авдаггүй байсан. Харин ч “энэрэн нигүүлсэх сэтгэл, зөв зохистой ухаалаг амьдралыг сурталчилдаг нь манай шашинтай адил юм…” гэх маягийн юм боддог байв.

Гэтэл цочир сонин нэгэн гайхамшигт учрал миний амьдралыг орвонгоор нь эргүүлсэн юм. 2003 оны 11-р сарын 02-ны шөнө би гэртээ ирээд (23.00 цагийн орчим) унтахаар дөнгөж хэвтмэгц, таазнаас шал хүртэл тойрог цагаан гэрэл гэнэт бий болсон.
Түүн дотор бүх биенээсээ сүүн цагаан гэрэл сацруулсан, тун чиг танил дотно зүс бүхий нэгэн зогсож байлаа. Тэр шаланд хүрсэн урт цагаан хувцастай, гартаа таяг барьсан, гайхам амгалан, ялдам мишээлээр мишээж байлаа.

Маш их гайхаж алмайрсан би, Түүнийг Есүс болохыг шууд л танисан. Юу бодож эргэцүүлсэнээ огт санадаггүй боловч, цээж дүүрэн маш их баяр баясал ундарч байгааг мэдээд гайхширч байснаа санадаг.
Есүс надад хандан ямар нэг зүйл өгүүлж буйг амных нь хөдөлгөөнөөр мэдсэн боловч, юу ч сонсоогүй эсвэл ойлгоогүй, магад гайхаж цочирдсондоо (шоконд) сааталд орсон ч байсан байх. Тэгээд маш хүнд нойронд дарагдан буйгаа мэдээд, нүдээ анихгүй юмсан гэж хичээж байснаа санадаг.

Маргааш өглөө нь бие бялдар, зүрх сэтгэл маш цовоо сэргэлэн, хөнгөн шингэн ухасхийн боссон бөгөөд, баяр хөөрөөр дүүрэн байлаа. Урьд нь цуглаан дээр заагдаж, тунхаглагддаг байсан бүх Үгс, Зүрх сэтгэлд амилан бужигнаж байлаа. Ийнхүү амьдралыг цоо шинээр харж, нээж, Түүнийг таньж, харьцаж дотносох, гуйн залбирах гэхчилэн гайхамшигт шинэ ажилтай болсон нь, миний амьдралын салшгүй чухал хэсэг болж байна.

Өдөр ирэх бүр шинэ шинэ ойлголт ухаарлыг авч, махан биенд төрсөн хүнийг шүтэж бишрэх, үс засуулах, хумсаа авах, аянд явах, наймаа хийх гэхчилэн олон зүйлийг өдөр сонгон хийх зэрэг мухар сүсгийн бүхий л хүлээснээс ангижирсан. Мөн миний гэмт сэтгэлгээ, зан чанарыг шашин огтхон ч өөрчилж чадахгүй болохыг ойлгосон.

Энэ талаар Библи дээр “…хүний сургааль ба тушаалуудын дагуух шашин болоод хуурамч даруу байдал нь, биеийг зовоох байдлаар мэргэн ухаан мэт үзэгдэвч, үүнд махан биеийн хүслийг эсэргүүцэхэд ямар ч тус байхгүй юм” гэсэн байдаг.
Одоо би, ийм мухар сүсэгт хүлэгдсэн олон хүнд Христийг гэрчлэн, харанхуй төөрөгдөлөөсөө ангижирахад нь тус болдогтоо баярладаг.





“Илтгэл номлолын үндэс” хичээл гэрийн даалгавар
Шалгасан багш: Пүрэвдорж “UBTC”

Ц.Энхболдын гэрчлэл 2

Есүс Христ, миний амьдралын утга учир

Хүн болгон “…миний амьдралын утга учир юу вэ? Би яах гэж амьдарна вэ?, Ямар ирээдүй өмнө минь хүлээнэ вэ?...” гэхчилэн, өөрсдөөсөө асуух үе тохиолддог биз. Би ч эдгээр асуултуудыг нилээн хожуухан бодох болсон. Бүгдийн л адил дунд сургууль төгсөж, улмаар ЗХУ-д барилгын сургуульд суралцсан. Ирээд мэргэжлээрээ ажиллаж бас армид ч алба хаалаа. Нийгмийн өөрчлөлт дөнгөж эхлэх цагт бусдыг дуурайн наймаа арилжаанд мордсон. Эхэндээ одтой байсан ч, хойно нь олон дараалан дампуурсаар, бүр Солонгост хууль бус цагаач хөдөлмөр эрхлэх болтлоо “уруудсан”.

Яах гэж ингэж утга учиргүй, нааш цааш шидэгдсэн амьдралаар амьдарч байгаагаа ойлгохыг оролдон, эргэцүүлдэг л байв. Тэгээд амьдралын минь утга учир бол эх орон, ард түмнийхээ төлөө өөрийгөө золих нь юмаа гэдгийг ойлгосон. Тэгэхийн тулд надад эд хөрөнгө, эрх мэдэл хэрэгтэй гэсэн дүгнэлтэнд хүрсэн. Бүр эрх мэдлийн өндөрлөгт хүрэх тодорхой төлөвлөгөө ч боловсруулсан. Тэгээд зорилготой болсон хүн чинь бие хайргүй зүтгэдэг юм билээ. Өвдөж зовж, ядарч туйлдан гансрах үе зөндөө.
Тэр үед бүтэх эсэх нь баталгаагүй хоосон зүйлийн төлөө зүтгэж байж өвчний үүр, эсвэл үхдэл болох вий гэж айдаг байлаа.

Ганцаардсан, тус дэм үгүйлсэн, бас ч үгүй бардам “Христийн шашныг” судлах, мэдэх гэх мэт шалтгаанаар анх цуглаанд очиж билээ. Тэнд миний мэддэг архичин, хулгайч, худалч, завхай, залхуу, ашигч Монголчуудаас огт өөр Монголчууд намайг угтаж авсан. Тэдний эвтэй, тусч, хүмүүжилтэй, илэн далангүй нөхөрсөг байдал нь намайг соронзон мэт татаж байлаа. Юм л бол сүм рүү гүйдэг болсноо өөрөө ч мэдээгүй. Гэхдээ гол зүйл болох Эзэн Есүс бол амьд Бурхан, Аврагч минь гэдгийг ойлгоогүй л байлаа.

Харин цэлмэг тэнгэрт аянга ниргэх мэт гайхамшигт учрал тохиож, би ганц шөнийн дотор цоо шинэ хүн болсон юм. Энэ нь 2003 оны 11-р сарын 02-ны бүтэн сайны үдэш. Би гэртээ оройтож ирээд дөнгөж орондоо ормогц, бяцхан өрөөг минь сүүн цагаан гэрлээр гэрэлтүүлсэн тойрог доторхи Есүс гэнэт бий болсон юм. Түүнээс цацрах амар амгалан, хайр нигүүлсэл бүх биенд минь уусан нэвчих мэт. Гайхаж алмайрсан надад хандан, ямар нэгэн зүйлийг Тэр өгүүлэх боловч, харин миний зовхи чулуу мэт хүндэрч тасарсан байлаа.
Өглөө нь босоод бяцхан харуусал төрсөн боловч баяр хөөр, хүч чадал бялхам оргилж байж билээ.

Ажил руугаа, харанхуй гудмаар метро руу алхаж явахдаа, зөрөн өнгөрөх хүмүүсийг, ер нь амьдралыг ямар их хайрлаж нандигнаж, хэзээ ч байгаагүй эрхэмээр үнэлж байгаагаа мэдэрээд гайхаж билээ. Утга учиртай, зорилготой, жинхэнэ бүтээлч үр дүнтэй амьдархад эд хөрөнгө, нэр алдар шиг хэрэггүй зүйл байхгүйг ойлгосон.

Эх орон, ард түмнийхээ төлөө ихийг хийж бүтээхэд эрх мэдэл ч чухал бишийг ухаарсан.
“Түүн дотор тэнгэр ба газар дахь бүх юмс, үзэгдэх ба үл үзэгдэх юмс, ноёрхлууд, удирдлагууд, эсвэл эрх мэдлүүд ч бүтээгдсэн…” гэж Библид бичигдсэн, Мөнхийн Эзэн Есүс, өчүүхэн намайг гололгүй, бүх дэлхийг өөрчлөх аугаа үйлсдээ дуудсан нь, миний амьдралын зорилго, утга учир болсон юм. Хэрвээ та дээрхи асуултуудыг өөртөө тавьж байгаагүй бол, эртхэн тавиад, хариултыг нь Есүсээс асуугаарай. Бурхан та бүгдийг ивээг!





 “Илтгэл номлолын үндэс” хичээлийн гэрийн даалгавар
Шалгасан багш: Пүрэвдорж UBTC

“Мэргэн ухааны бичээс болон Зөнчдийн номнууд” хичээлийн судалгааны ажил

1. Сэдэв:  Иона

2. Уг номыг сонгох болсон шалтгаан:

Энэхүү ном нь олон талаараа сонирхол татсан, адал явдал гайхамшигт үйлсээр дүүрэн ном юм.
Их Эзэн Есүс, Өөрийгөө эш үзүүлэгч Ионатай харьцуулсан байдаг. Ионагийн загасны ходоодонд 3 хоносон гайхамшигт үзэгдэл нь, Их Эзэний, хүн төрөлхтөний гэмийн өмнөөс үхээд, булшинд 3 хонох, авралын гайхамшигт үйлсийнх нь урьдчилсан билэгдэл, зөгнөл (Мт.12:39-41) юм, гэсэн байдаг.
Энэ нь уг номыг сонирхон сонгох шалтгаан болсон.

3. Хэрэв цуглаанаас чинь, таныг Хуучин Гэрээний номуудаас хичээл заана уу гэвэл, аль номыг сонгох вэ? Шалтгааныг нь тайлбарлана уу?

Өмнөх семестрт “Эхлэл” номоор судалгааны ажил бичиж байсан. Мөн уг асуултанд, “Эхлэл” номоор хүмүүст хичээл заахдаа урамтай, дуртай байх болно гэж хариулсан. Энэ удаа “Иона” номыг сонгож байна.  Шалтгаан нь
а) Дээр (2-р асуултанд) дурьдсаны дагуу теологийн учир шалтгаанаас
б) Янз бүрийн зан чанартай, өөрийн гэсэн үзэл бодолтой хүмүүсийн хувь шинжийг нь үл харгалзан, ялгаварлалгүйгээр Бурхан Эцэг маань хайрладаг, бас Өөртөө үйлчлүүлэхээр дууддаг болохыг эндээс харж болно. Мөн эн тэнцүү, эгэл жирийн харилцаанд байж, сурган хүмүүжүүлдэг, бас тэднийг сонсож, Өөрийн хүслийг мэдүүлж харилцан ярилцдагийг, Эзэн Иона хоёрын харилцаа харуулдаг.
в) Бас биднийг сонгон дуудсан нь, Бурхангүй хүмүүсийг гэмшил, ухаарал, авралд дуудах сайн мэдээний төлөө юм, гэдэг зарчимын Хуучин Гэрээн дэх зөн болдог.
г) Эзэн зөвхөн Шинэ Гэрээний үед л бүх үндэстнийг Өөртөө дуудаагүй юм. Энэ нь бүр Хуучин Гэрээний үеэс эхлэлтэй, амлагдсан (Эх.12:1-3), бас Ионагаар дамжуулан, харь үндэстэн Ниневе хотынхонд хэрэгжиж байсан, түүхэн гэрчлэл жишээ юм.
д) Мөн хувь хүний итгэлийн амьдралд, Бурхантай харилцах харилцаанд мэдэх, сурах ёстой (Эзэний хүсэл, дуулгавартай байдал, Эзэнээс ирдэг сахилгажуулалт, гэмшил, Эзэний өршөөл нийгүүлслийн талаар...гэх мэт) олон зүйлийг илчлэн, өвөрмөцөөр харуулдаг.
Эдгээр нь энэ номоор бусдад хичээл заах сонирхолыг төрүүлдэг.

4. Номонд гарч буй түүхэн үйл явдал хэзээ болсон бэ?

Уг номонд гарч буй үйл явдалууд нь, үнэн, бодит, түүхэн явдал болохыг Их Эзэн гэрчилсэн (Мт.12:39-41) байдаг. Номонд олон гайхамшигт үйлсүүд гардагийн оргил нь, Ионагийн тунхагыг сонсоод, хаанаасаа харц ардаа хүртэл, бүгд гэмшиж буй Ниневе хотынхны үйлс юм. Ертөнцийн Эзэнийг мэддэггүй, хуурамч шүтээн шүтдэг, догшин түрэмгий Ассиричууд хэрхэн яаж Ионагийн тунхагыг сонсоод, дуулгавартай, даруугаар хүлээн авч, хурдан шуурхай гэмшин хэрэгжүүлсэн нь үнэхээр гайхамшиг юм.

Ассирийн хаан III Аширданыг (МЭӨ 783-755) хаанчилж байх үед, тэр ард түмний дээр ирсэн өвчин тахал, бослого хөдөлгөөн, бас нар хиртэлт нь энэхүү гайхамшиг болохын урьдчилсан нөхцөл болсон гэж үздэг. МЭӨ 765 онд Ассири даяар аймшигт тахал тархсан.
МЭӨ 763 онд Асурийн хотод бослого гарсан.
МЭӨ 763 онд нар хиртэлт болсон.
МЭӨ 760-761 онд Аррафагийн хотод бослого гарч.
МЭӨ 759 онд бас нэг аймшигт тахал гарсаныг, Бурханы шийтгэл гэж айн сүрдэн хүлээн авсан байдаг.
Ийнхүү бэлтгэгдсэн Ассиричууд МЭӨ 758 онд Ионаг сонсож, гэмшиж даруу болсоноор Эзэн шийтгэлээ буулгаагүй юм.

5. Номын агуулга болон дамжуулж буй үгс.

А. Бурхан Ионаг анх дуудсан нь (Ионаг 1:1-2:10)

I. Ниневе рүү явах Ионагийн дуудлага: (1:1-2) Ниневе нь Ассирийн нийслэл байсан. Ассири нь харгис, түрэмгий, дайнч улс байсан. Израил нь Ассирийг жигшин, асар их аюул занал гэж үздэг байв. Бурхан гэм нүглийнх нь улмаас Ниневег шийтгэх гэж буйгаа тунхаглуулахаар Ионаг дуудсан.
II. Иона зугтсан нь: (1:3)
Ниневечүүд гэмшээд, шийтгэлээс мултарчихвий, гэж Иона айсан учир эсрэг зүг рүү нь зугтсан. Бурхан харь үндэстэнд, тэр дундаа Ассирт өршөөлөө үзүүлэхийг Иона хүсээгүй. Христ мөн адил биднийг сайн мэдээ тунхаглуулахаар дуудсан боловч, заримдаа бид өөрсдийн ахуй амьдралд л ач холбогдол өгч илгээлтэнд явахаас цааргалдаг.
III. Ионагийн дуулгаваргүй байдлын үр дагавар (1:4-17). Бурхан Өөрийн зорилгоо хэрэгжүүлэхийн тулд, тэнгист хүчит салхи илгээсэн. Ионагаас болж олон хүний амь нас аюулд учирсан. Харин Иона гүн нойронд автсан. Өнөөдөр эргэн тойрны маань олон хүн сүнслэг үхэлд ороод байхад, бид унтаа байдалд байх нь бий. Далайчид шавга татахад, Эзэн гэм буруутныг илрүүлсэн. Ямартаа ч Бурханы хүн бусдын төлөө, өөрийгөө золих зүрх сэтгэлтэй байсан нь сайшаалтай. Бурхан, биднийг идэвхгүй, сул дорой, унтаа байхад ч ажлаа хийсээр, Өөрийгөө алдаршуулсаар л байдаг. Далайчид бүгд Эзэнд мөргөж, харин дуулгаваргүй Иона загасны ходоодонд заларсан. Эзэний төгс эрх мэдлийг эндээс харж болно.
IV. Эзэн сонсож, Ионаг аврав. (2:10)
Эзэн үргэлж биднийг анхааран ажиглаж, хүнд нөхцөлд хаядаггүй бөгөөд, гуйлтыг маань сонсож, мутараа сунган тусалдаг билээ.

Б. Бурхан Ионаг хоёрдах удаагаа дуудсан нь (Иона 3:1-4:11)

I. Ниневе рүү явах Ионагийн хоёрдах дуудлага (3:1-2) Иона хоёрдах удаагаа мөхөл болон шүүлтийн талаар тунхаглахаар дуудагдав. Эзэн хэзээ ч өөрчлөгддөггүй бөгөөд, тэр тусмаа биднийг дуудсан зорилго нь ч хувиршгүй юм. Бид сайн мэдээг өөрийн тааламжаар, мөн сонсогчдод тааруулан өөрчилөх ёсгүй. Христийн гайхамшигт аврал болон, Түүний дотор хаях, золиослох, өөрчлөх ёстой зүйлсийг ч, мөн итгэхгүй бол ирэх шүүлтийн талаар ч тунхаглах нь зүйтэй.
II. Иона дуудлагаа дуулгавартай биелүүлсэн нь (3:3,4) Иона загасны гэдсэнд гэмшсэн гэмшилдээ үнэнч байсан. Гэмшил нь үйлсээр харагдаж байж төгс болдог. Бас Эзэний Үгийг тунхаглахад, өөрийн зүгээс золиослол, зориулалт шаардлагатай. Иона ч үүнчлэн үйлдэн, дайсандаа гэмшилийг тунхагласан.
III. Ионагийн дуулгавартай үйлчлэлийн үр дүн. (3:5-10)
Харь үндэстэн Ассирчууд Ионагийн тунхаглалыг сонсоод, нийгмийн бүх давхаргаараа гэмшсэн нь, өөрсдийгөө даруу болгосон нь үнэхээр гайхамшиг юм. Ниневечүүд гэмшсэн учир, Эзэн Өөрийн шийтгэлийг хойш татсан. Бурханы зорилго бол яллан шийтгэх биш, уучлан өршөөх нь юм. Тэр хэнийг ч мөхөөсэй гэж хүсдэггүй. Харин гэмшил, уучлал, мөнх амь руу ирээсэй гэж дууддаг. (2Петр.3:9)

В. Ионагийн гоморхол (Иона 4:1-11)

I. Эзэний нийгүүлсэлд Иона уурласан нь (4:1-4) Бурхан Ниневе хотыг хэлтрүүлсэн нь Ионад таашаагдсангүй. Тэрээр Бурханыг Израилын дайсанд өршөөл үзүүлсэнд нь уурлаж байлаа. Иона ийм юм болж магадгүй гэж урьдаас мэдэж байсан. Эзэн бол “нийгүүлсэнгүй” (өөрөөр хэлбэл, Тэр хариу харалгүй тусалдаг), “өрөвч” (ө.х, Тэр зовж буй нэгний зовлонг ойлгон хуваалцдаг.), “уурлахдаа удаан” (ө.х, гэмтнийг яллан буруутгахаа зорилгоо болгодоггүй), “хайр энэрэлээр бялхам” (ө.х, Тэр эелдэг, уучлахад хэзээ ч бэлэн байдаг), “гай гамшгийг зөөлрүүлэгч” (ө.х, Тэр хүмүүсийн гэмийн үр дагаварыг сайнаар эргүүлэгч) юм.
Библи тэр чигтээ, Бурханы эдгээр зан чанарыг товойлгосон байдаг. Ионагийн урам хугарч, сэтгэлээр маш их унасан байдаг тул, үхсэн нь дээр гэж үзсэн. Бурхан дайсанд нь өршөөл үзүүлсэнээр, өөрөөс нь болон ард түмнээс нь нүүр буурууллаа, гэж бодсон.
Иона Бурханы хүсэлд өөрийгөө эн тэргүүнд зориулахын оронд, Израилын улс төрийн нөхцөл байдалд илүү анхаарч байсан нь гол дутагдал нь юм.
Өнөөгийн бид ч чуулганы амжилтанд алив зүйлээ зориулдаг боловч, Бурханы хүсэл зорилго болон ариун жишгүүдэд өөрийгөө үнэн сэтгэлээсээ зориулдаггүй байж болох юм.
II. Эзэн Ионаг зэмлэж сургамжилсан нь (4:4-11)
Гэмтнүүд гэмшин, бузар муугаас эргэж, Бурханы өршөөлийг хүртэнэ гэдэг бол гайхамшиг бөгөөд, үүнд уурлана гэдэг бол Бурханы хүнд байж болшгүй зүйл юм.
Харин Иона уурласан. Гэвч Бурхан түүнийг хайрлан сургамжилсан. Ургамал ургуулаад, дараа нь хатааж устгасан үйлдлээрээ, аливаа бүтээлийг хөгжүүлж цэцэглүүлэх, устгаж үгүй хийх нь, Бурханы эрх мэдлийн асуудал юм, гэдгийг харуулсан. Нэг үгээр Ассири үндэстнийг бий болгож, Ниневе хотыг босгон байгуулсан нь Эзэн бөгөөд, устган сөнөөх, уучлан өршөөх нь Түүний л хүслээр байх болно. Энэ үйлсэд ямар ч үүрэг оролцоогүй Ионагийн хувьд, уурлах нь мунхаг хэрэг юм. Эзэн бол өрөвч, нийгүүлсэнгүй юм, гэдгийг харуулсан.

6. Номын хэлж буй үг нь Бурханы өнөөгийн хүмүүст ч мөн адил өгөгдсөн эсэх.

Хүн төрөлхтөний төлөөх Бурханы хайр нь, Өөрийнх нь ард түмэн, чуулганаас халин, газар дэлхийн төөрсөн хүмүүс рүү (итгэгч хүний амьдралаас халин, эргэн тойрных нь хүмүүст) хандсан байдаг. Энэхүү үнэн нь, Есүс Эзэн дагалдагчиддаа “...дэлхийн хязгаар хүртэл явж, авралын сайн мэдээг тунхаглан, бүх үндэстнийг дагалдагч болгохоор...” тушаасан (Мт.28:18-20) явдлаас харагддаг юм. Үүнийг хэрэгжүүлэх нь өнөөгийн чуулганы, итгэлийн хүмүүсийн үүрэг юм.

7. Номын гол сэдэв:

Агуу салхи (1:4), агуу шуурга (1:12), агуу загасыг (1:17) ашиглан дуулгаваргүй Ионаг, агуу хот Ниневе рүү илгээсэн. Ингэснээр Ниневе гэмшин аврагдсан. Үүгээр Агуу Бурханы, аврал өршөөлийн цар хүрээ хир агуу уудам болох нь харагддаг.

8. Номын бичигч.

Амиттаин хүү Иона (1:1), II Иеробамын хаанчлалын үед (МЭӨ 793-753) хойд Израилд эш үзүүлэгч байсан тухай (2Ха.14.25)-д өгүүлдэг. Түүний еврей нэр нь “Yonah” бөгөөд “тагтаа” гэсэн утгатай. Тэрээр Галилын Назараас хойш 3 миль (бээр) зайтай орших Гатхебер гэдэг жижиг тосгоноос гаралтай. Иона бол Бурханаас зугтах гэж оролдсон цорын ганц эш үзүүлэгч. Түүний эш үзүүлэгчийн үйчлэл нь Елишагийн дөнгөж дараахан болсон ба Амосынхтай (Амос 1:1) давхцдаг. Уг номонд бичээчийн талаар дурдаагүй ч, тухайн үед өөрийгөө 3-р биеийн хэлбэрээр өгүүлэн бичих нь нийтлэг байснаас үзвэл, Иона л бичээч байх магадлал их юм.

9. Номын зорилго

Энэ ном нь дараах таван зорилгын дагуу бичигдсэн.
I. Бурханы хайрыг харь үндэстнүүдэд болон Израилд үзүүлэх. Мөн тэдний дунд хийж буй Бурханы ажлыг дүрсэлсэн.
II. Хуучин Гэрээний үеийн харь үндэстний төлөөх авралын хэрэгцээ шаардлагыг үзүүлсэн
III. Ионагийн жишээгээр дамжуулан Израилын жинхэнэ зорилгыг харуулсан
IV. Сүүлчийн өдрүүдэд Еврейчүүдийн үлдсэн хүмүүсийн гэрчлэлийн ердийн зураглалыг үзүүлсэн.
V. Бурхан дуулгаваргүй зарцад арга хэмжээ авдагийг харуулсан

10. Та энэ номноос юу сурсан бэ?

Энэхүү номыг судалснаар олон зүйлийг шинээр харж, сурч ойлголоо. Үүнд:
I. Бурханы миний амьдралаар харуулахыг хүссэн тэр үйлсийг, бүхий л чадлаараа дуулгавартай хэрэгжүүлэх нь зохистойг ухаарлаа.
II. Бид хэчнээн сул дорой болж, муу хүсэл, бардам сэтгэлдээ хөтлөгдсөн ч, Эзэн биднийг хайрлан сургамжилдаг болохыг ойлголоо.
III. Бидний нүдээр харахад засрах, аврагдах ямар ч найдлагагүй мэт хүмүүс ч гэмшин эргэснээр, Эзэний өршөөлийг хүртдэг болох нь харагдлаа.
IV. Хэн нэгнийг аврах эсвэл шүүх эрх нь, зөвхөн түүнийг бүтээсэн Эзэнд л байдагийг нотоллоо.
V. Эзэний хүслийн дагуух бидний дуулгавартай байдал ямар гайхамшигт үр дүнг авчирдаг болох нь харагдлаа…
Энэ мэт олон зүйл сурч, ухаарч болохыг тус хичээлийн “Lesson from Jonah” хэсэгт маш тодорхой жагсаасан буй.

11. Хэрэв Хуучин Гэрээний номуудыг огт сонирхдоггүй хүнтэй уулзвал, та хэрхэн Хуучин Гэрээг унших хүсэл төрүүлэх вэ?

Би Ионагийн түүхийг сонирхолтойгоор ярьж өгнө. Хэрхэн Эзэн үгээ айлдсан. Энэ нь Ионад таалагдахгүй. Тэр зугтсан ба Эзэн далайд хүчит шуурга дэгдээсэн. Далайчид шавга татаж Иона дээр таарсан. Түүнийг далайд хаямагц, шуурга номхорсон. Далайчид Эзэнд мөргөсөн. Иона загасанд залгиулаад, 3 хоног ходоодонд нь амьд байсан.
Тэндээс Иона Эзэнд залбирмагц, загас түүнийг далайн эрэг дээр бөөлжин гаргасан. Улмаар хоёрдах удаагаа Эзэний Үг ирж, Иона дуулгавартайгаар дагасан. Үр дүнд нь харь үндэстэн Ниневечүүд гэмшсэн.
Харин Иона дургүйцэн гомдоллосон боловч Бурхан түүнийг хайрлан сургамжилсан зэргийг ярьж өгөх болно.
Энэ түүхээс өнөөгийн бид юуг ойлгож ухаарах ёстойг ч “Lesson from Jonah”-с хэлэлцэн ярилцана. Бас Эзэн Есүс ч (Мт.12:39-41) Өөрийнхөө загалмайн авралын аугаа үйлсээ, Ионагийн түүхтэй харьцуулан сургасан байдгийг заана.

12. Ном зүй
I. “Ариун Библи” Монголын Библийн Орчуулгын Хороо. Улаанбаатар хот. 2000 он
II. “Мэргэн ухааны бичээс болон зөнчдийн номнууд” хичээлийн материал UBTC, багш: Петрус Хандоёо 2007 он
III. “Бялхам амь судлал Библи” Дональд С.Стамп Life Publishers International, Улаанбаатар хот. 2006 он
IV. “Библийн хураангуй толь бичиг” Zondervan Corporation, Улаанбаатар хот. 2004 он





Шалгасан багш: Петрус Хандоёо
"Мэргэн ухааны бичээс болон Зөнчдийн номууд" хичээлийн гэрийн даалгавар
2007 он 1-р курс

Еврей ном - асуулт, хариулт

Еврей 2:1-4
А.  Энэ хэсэг дээрээс “Аврал”-ыг хэрхэн ойлгох вэ? 1-р бүлэгтэй хэрхэн холбогдож байна вэ?

-- Энэ хэсэг нь уншигчдыг 1-р бүлэг рүү хандуулж байна. 1-р бүлэгт, Есүс бол эш үзүүлэгчдээс зөгнөгдсөн (1:1) ирэх ёстой байсан Нэгэн ба Бурханы Хүү (1:2,3а) юм. Тэр тэнгэр элч нараас давуу (1:4,6), анхнаасаа ертөнцийг Бүтээгч (1:10), мөнхөд Оршигч (1:11), үеийн үед Хаанчлагч (1:8), нүглүүдийн ариусгалыг Гүйцээгч (Аврагч) (1:3б) бөгөөд, тиймээс Түүгээр илчлэгдсэн, хэлэгдсэн (1:2а) аврал нь үнэхээр аугаа бөгөөд баттай юм.

Үүнийг сонссон хүмүүс (2:3б) болон Бурхан Өөрөө тэмдэг, гайхамшиг, хүчит үйлсээр, Ариун Сүнсний бэлгүүдээр (2:4) гэрчлэн баталж байна. (Хуулинд 2 буюу түүнээс олон гэрчийн гэрчлэл баттай (Дх.19:15) гэсэн байдаг.) Тиймээс энэхүү авралын сайн мэдээнд хайнга дуулгаваргүй хандвал, аврагдах боломжоо алдах (2:1) ба эцэг өвгөд шиг шийтгэл хүртэх болно (2:2) гэж уншигчдад сануулж байна.

В.  Хуучин Гэрээнд гарч буй гэмийн завхрал түр хугацаагаар үргэлжлэх үү эсвэл мөнхөд байх уу?

-- Хуучин Гэрээнд гарч буй гэмийн завхрал нь түр зуурынх бөгөөд Есүс гэмтнүүдийн төлөө амиа өргөж (Ев.9:28) (Мт.20:28) тэднийг гэмийн боолчлолоос чөлөөлсөн юм. Мөн сайн мэдээг үл тоомсорлон, Бурханы Хайрыг хүлээн аваагүй гэмт хүмүүс эцсийн шүүлтийн өдөр (Илч.20:11-15) диавол болон түүний тэнгэр элч нарын хамт, галт нуурт хаягдан хоёр дахь үхлээр төгсөснөөр бүх бузар муу нь устгагдана.

С.  Итгэгч хүмүүс эцсийн үед хийсэн гэмийнхээ төлөө энэ амьдралдаа дуулгаваргүй байсан байдлынхаа төлөө тэд шүүгдэх үү?

-- Бүх итгэгчид “Христийн шүүхийн сэнтийн” (2Кор.5:10) өмнө зогсож шүүгдэх болно. (1Пт.4:17) (1Кор.3:12-15). Нэгэнт л шүүлт болох учраас яллалт (Кол.3:25) (Мт.7:21) явагдаж, ичгүүрт орох (1Иох.2:28), хохирол, алдагдал амсах (2Иох.1:8), бүх насных нь ажил шатах (1Кор.3:13-15) ба бас шагнал өргөмжлөл ч (1Кор.3:14) (1Петр1:7) зэрэг явагдах болно.


Еврей 3:7-4:13
 А.  Дуулал 95-д гардаг Израйлийн гэмд ямар хүмүүс оролцсон бэ? Тэдний хувьд дуулгаваргүй байдал нь ямар утгатай байсан бэ? Үүний үр дүн нь юу вэ?

-- (Дуулал 95)-д гардаг Израйлийн гэмд (Ех.17:1-7) Мосегоор удирдуулан Египетийн боолчлолоос гарсан, Бурханы аугаа гайхамшигт авралын үйлсийг нүдээрээ харж, биеэрээ амссан, насанд хүрсэн бүх Израилчууд оролцсон. Тэд (Тоол.11:1-6) хоол хүнсээ голж гомдоллосон. Эзэний амласан (Тоол.14:1-12) нутагт очихоос айж, Египет рүү буцахаар гомдоллосон, (Тоол.16:25-35) Эзэний томилсон удирдагчдынхаа эсрэг гомдоллосон.

Масса ба Мерибад (Ех.17:1-7) Эзэнийг сорьсон шиг (Тоол.20:2-13) уух уснаас болж бас л Бурханы эсрэг итгэлгүй ба талархах сэтгэлгүй хандсан. Эдгээрийг “Еврей” номын зохиогч “итгэлгүй бузар зүрх” гэж тодорхойлоод, уншигчдыг болгоомжлуулан, амьд Бурханаас салж болзошгүйг анхааруулсан. Дуулгаваргүй Израилчууд Эзэний амлагдсан нутагт орж чадалгүй, Иошуа, Калеб хоёроос бусад нь цөлд унасан. (Тоол.14:29,30)

В.  Цөл газарт тэнүүчилсэн хүмүүсээс нэг нь ч амлагдсан газар ороогүй тэгвэл бид тэднийг жинхэнэ итгэгчид байсан гэж дүгнэх үү?

-- Тооллого ч, Еврей ном ч харь үндэстнүүдэд (итгэгч бус хүмүүст) биш харин Бурханы ард түмэнд (итгэгчдэд) зориулж бичигдсэн. Еврей номыг зохиогч (бид ч бас) цөлд унасан дуулгаваргүй хүмүүсийг (Ев.3:19) (Ев.4:2) итгэлгүй хүмүүс байсан, гэж дүгнэсэн.

С.  Амралт гэж юу вэ? Хэзээ амрах ёстой вэ?

-- (Д.х.12:9-11)-т Эзэн ард түмэндээ газар нутаг амлаж байна. Энэхүү амласан нутаг нь Есүс Христ ба (Ев.4:1) амралт юм. Энэ Амралтанд (Ев.4:3б), итгэж дуулгавартай байгсад л орно. Бурханы Амралт руу (Есүс Христийн дотор) орсон хүн, (Ев.4:10) өөрийн ажлуудаас амардаг.

D.  Хэрвээ хэн нэгэн хүн гэмд унасан эсвэл дуулгаваргүй байвал тэр Бурханы амралтыг алдах уу эсвэл тухайн үедээ өв эзэмших эрхээ алдах уу?
-- (Ев.4:3а) Энд бас сайн мэдээг эсэргүүцэгчид Амралтанд огт орохгүй гэж ойлгогдож байна. (Ев.4:6)-д сайн мэдээг сонгосон боловч дуулгаваргүй байгсад Амралт руу орж чадаагүй, гэж байна. Зохиогч энд ямар ч өв эзэмшилийн тухай дурдаагүй ба гомдоллон, Христийн хайр, золиослолыг үнэлэхгүй, амлалтыг нь үл тоомсорлох нь Бурханы Амралтанд (Христийн дотор) орох боломжийг алдан, цөлд унах аюултайг сануулсан.

E.  Дуулал 95 дээр ямар итгэлийг хэлж байна вэ? Энэ нь авралын итгэл мөн үү?

-- (Дуулал 95)-д гарч буй итгэл нь (Ев.3:19) Есүс миний төлөө үхсэн, бас дахин амилсан гэдэгт итгэх авралын (ерөнхий) итгэлээс огт өөр итгэлийн тухай ярьж байна. Бид итгэлийн амьдралдаа Бурханы агуу гайхамшигуудыг үзэж, мэдэрч, сэтгэл хөдөлж байдаг ч, замд тохиолддог жижиг саад, шалихгүй бэрхшээлд гомдоллож, Эзэнийг сорьж эхэлдэг. Тэгээд унаж итгэлээс алдагддаг. Гэм нь жижиг зүйлээс эхэлдэг ба ахисаар бидний зүрхийг хатууруулдаг. Бидний итгэл нь тасралтгүй үргэлжлэн хөгжсөн итгэл байх ёстой.

Еврей 5:11-6:20
А.  “Төлөвшилт”-ын тухай өгүүлсэн хэсэг нь анхааруулганд хэн багтаж байгаа тухай ойлголтонд маань нөлөөлөх үү? Өөрөөр хэлбэл төлөвшөөгүй байгаа байдлыг нь зэмлэх ба гэмшихгүй байгаа байдлаас ирэх аюулын хооронд ямар холбоо байна вэ?
-- Энэ хэсгийг уншаад “төлөвшилт” гэж юу болохыг ойлгосондоо баяртай байна. Төлөвшөөгүй, сүүгээр амьдрагч хүн нь хэдийнээ багш болохоор хугацаанд (5:12) чуулганы дотор амьдравч, зөвт байдлын үгийг (5:13) соснсохдоо хойрго (5:11), сайн мууг ялгах чадваргүй (5:14), Христийн тухай анхдагч ойлголт, сургаальд (6:1) сэтгэл нь ханадаг байна.

Тэд уналтанд орж (6:6а), улмаар дахин гэмшиж сэргээгдэх боломжгүй байдалд (6:6б) хүрч, цаашилбал зүрх сэтгэл нь бузар муу болж, Эзэний шийтгэлд (6:8) өртөн мөхөх аюулд ойрхон байдаг байна. Зохиогч ийнхүү хатуу сануулаад, хойрго байлгүй үлгэр жишээч хүмүүсийг дуурайн (6:12) (Жишээ нь: Абрахам (6:13-15)), бидний найдвар болсон Бурханы амлалт (6:17), бидэнд бодит жишээ болж хөтлөн дагуулагч Есүс (6:20)-т итгэцгээе, гэж уриалжээ.

В.  4-р ишлэлээс авахуулаад итгэгчдийг үү эсвэл итгэдэггүй хүмүүсийг дүрсэлсэн үү?

-- Угаасаа “Еврей” ном нь үл итгэгчдэд бус итгэгч хүмүүст хандан бичсэн захидал юм. Энд загалмайн үнэнийг сонсож (6:4а), Ариун Сүнсээр тослогдсон, эсвэл билэг авъяасыг авсан (6:4б), сургаал номлол сонсон (6:5а), эдгэрэл, чөлөөлөлтийг (6:5б) мэдэрсэн, нэг үгээр итгэгч хүмүүсийн талаар яригдаж байна.

С.  “Доош унасан” гэсэн үг нь өмнөх ишлэлтэй холбоотой юу?

-- (Ев.6:6)-д дурдагдаж буй “…унасан” гэсэн үг нь өмнөх ишлэлтэй шууд холбоотой. Учир нь зогсож буй хүн л “унадаг” ба угаасаа босгогдоогүй (итгээгүй) хэвтэж байгаа хүнд уналтын талаархи ойлголт хамаагүй юм.

D.  “Шатаагдаж” гэсэн үг нь мөнхийн тамын галыг илэрхийлж байна уу? Энэхүү дүрслэлээр юуг илэрхийлж байна вэ?

--Зохиогч энэхүү “…шатаагдаж төгсдөг” гэж (Ев.6:8) бичихдээ, Мосе Аарон нарын эсрэг гомдоллон маргаж, утлага уугиулж байгаад Эзэнээр шатаагдан нас барсан (Тоол.16:35) 250-н дуулгаваргүй хүмүүсийг бодож байсан болов уу?! Эсвэл бузар муу хотууд болох Содом, Гоморрагийн (Эх.19:24,25) сүйрлийг ч бодож байсан байж болно. Бүр эсвэл Исаиа зөнчөөр дамжуулан “Усан үзмийн талбайгаа (Израйлийг) шатаан цэвэрлэнэ", гэж сануулж буй цэцэрлэгч (Эзэний)-ийн сануулгыг ч (Ис.5:5) (Ис.27:4) уншигчиддаа дахин сануулсан байж болно.”

Е.  Итгэгч хүн үнэ цэнэгүй гэж дүрслэгдэж болох уу?

--Хэдийгээр Ертөнцийн Эзэн амьд оршдог. Түүний хүү Есүс бол Аврагч, бидний төлөө цовдлогдогч, дахин амилаад Эцгийн баруун талд заларсан, гэдэгт итгэсэн байлаа ч, тэр ч бүү хэл чөтгөрүүдийг хөөх, өвчтөнүүдийг эдгээх, гайхамшигуудыг үйлдэх үйлчлэлийг Эзэний нэрээр хийдэг ч байсан бай, эцсийн цагт (Мт.7:21-23) үнэ цэнэгүй, гэж тооцогдон хөөгдөж болох юм.

Еврей 10:19-39
А.  ”Санаатайгаар нүгэл үйлдэнэ” гэдгээр зохиогч маань чухам юуг оюун санаандаа төсөөлж байсан болоо? /10:26/
-- (Ев.10:26)-д “санаатайгаар нүгэл үйлдвэл”, гэж зохиогч маань бичиж байхдаа, уншигчид нь анхлан итгээд гал халуунаар, аливаа гүтгэлэг, доромжлолыг тэвчиж (10:32), ад үзэгдсэн үлгэр жишээ итгэгчидтэй хамт зовж (10:33), тэр ч бүү хэл дээрэмдүүлэн тонуулж байхдаа ч баяр хөөртэй байсан үеийг дурсан санаж, Бурханаас амлагдсаныг хүлээж авахын тулд тэвчээр (10:36) хэрэгтэй ба одоо ч ухарч болохгүй (10:39) гэж анхааруулсан. Харин зовлон бэрхшээл, дарамт хавчлагыг тэвчихгүй итгэлээ хаях нь тэнгэр дэх аугаа шагналаасаа ухарсан (10:35) хэрэг юм гэж, оюун санаандаа төсөөлж байсан болов уу?!

В.  10:27-р ишлэлд гарч байгаа шүүлтийн тухай Хуучин Гэрээний ямар үндсэн иш таталтыг хэлж байна вэ? Энд ямар шүүлтийн тухайн хэлж байна вэ?
-- Зохиогч (Ев.10:27)-д аймшигт шүүлтийн талаар бичихдээ, (Тоол.16:35)-д Мосе, Аарон нарын эсрэг гомдоллоод, шатаагдсан, нэр нөлөө бүхий 250 удирдагч, (Лев.10:1,2)-т Эзэний тушаагаагүй ёс бус галыг өргөн шатаагдсан Аароны хөвгүүд Надаб, Абиху нар, (Эх.19:24,25)-т бузар муу хотууд Содом, Гоморрагийн шүүлт, (Хаад.дэд1:10,12)-т гардаг эш үзүүлэгч Елиагийн дуудаснаар тэнгэрээс буун ирж хоёр тавьтыг шатаасан галан шүүлт, зэргийг хэлсэн байх. Энд, одоо эцсийн цагт явагдах галт (2Пт,3:7,10,12) (Илч.14:10) (Илч.20:15) шийтгэлийг анхааруулан хэлж байна.

С.  Бурхан зарим жинхэнэ итгэгчдийг босгохын тулд хатуу шийтгэлийг оногдуулах уу? /10:29/ Энэ нь түр зуурынх уу эсвэл мөнхөд байх уу?
-- Энэ асуултын утганд тааруулж (Илч.3:19) Есүс Эзэн хайрладаг хүмүүсээ зэмлэдэг, сахилгажуулдаг ба энэ нь тухайн итгэгчийг гэмшилд дуудсан дуудлага ба гэмшин эргэсэн тохиолдолд хайраараа тэврэн авдаг, түр зуурын шийтгэл юм, гэж хариулж болж байна. Харин (Ев.10:29)-т дурдагдаж буй итгэгч нь, Есүсийн цусыг бузар гээд, Ариун Сүнсийг доромжилсон гэмтэй нэгэн байна. (Мт.12:32)-т Ариун Сүнсний эсрэг доромжлол уучлагдахгүй, гэсэн байдаг. Энэ хүн сахилгажуулагдаад гэмшин эргэж сэргээгдэх, эсвэл мөнхийн шийтгэлд орох эсэх нь Эзэний л эрх мэдлийн асуудал. Бид энд тодорхой хариулт өгөх аргагүй. Зохиогч ч асуугаад л хариултыг тодорхой хэлэлгүй үлдээжээ.

D.  30-р ишлэлийг хэрхэн орчуулах вэ? “Бурхан өөрийн хүмүүсийг шүүнэ” эсвэл “Бурхан өөрийн хүмүүсийг өмгөөлнө” Аль нь Хуучин Гэрээний агуулгатай тохирох вэ? Аль нь Шинэ Гэрээтэй тохирох вэ?
--“Шүүлт” гэдэг нь яллалт, буруутгал, шийтгэл гэсэн утгатай, гэж олонхидоо эмээдэг. Харин энэ нь үнэн худал, зөв бурууг ялгаж салгах гэсэн утгатай. Үнэн зөв шүүлт явагдсанаар, хэлмэгдсэн хохирсон хүмүүс цагаатгагдах, амжилт гаргасан нь шагнагдах, тэвчсэн нь өргөмжлөгдөх, алдсанд нь нөхөн олгох зэрэг олон үйл ажиллагаа өрнөх нь мэдээж. Хуучин гэрээ нь хуулийн хүрээнд байсан тул “Бурхан өөрийн хүмүүсийг шүүнэ” гэсэн нь, Шинэ гэрээ бол хуулиас чөлөөлөгдсөн нийгүүсэлийн гэрээ учир “Бурхан өөрийн хүмүүсийг өмгөөлнө” гэсэн нь тохирох болов уу?!

Еврей 12:12-29
А.  Синай уул /Хуучин Гэрээнд онцолдог/ Сион уул/Шинэ Гэрээнд онцолдог/ эсрэг тэсрэг болгож байгаагийн зохиолчийн гол санаа юу вэ?
-- (Ех.19:12,13) Синаи уулан дээр Бурхан бууж ирэх үед, болгоомжгүй ойртсон хүн амьтан хэн ч бай үхэх ёстой, гэсэн хатуу тушаалтайгаар, дүрэлзэх гал харанхуй, түнэр харанхуй, хуй салхи болон асар хүчтэй хүнгэнэх бүрээн дуун (Ех.19:16-19) дунд Эзэнийг буун ирж Үгээ айлдахад газар дэлхий (Ев.12:26а) доргин ганхаж байлаа. Энэ явдал үнэхээр аймшигтай байсан тул, бүх Израил, бас Мосе хүртэл “айдаст автан чичирсэн” (Ев.12:21). Гэвч Израил дуулгаваргүй байсан тул шийтгүүлсэн. Харин бидний ойртон очдог Сион уул бол (Ев.12:22) шинэ гэрээний зууч Есүсийн цусаар (Ев.12:24) цэвэрлэгдсэн, дахин төрж зөвт болгогдсон хүмүүсийн чуулган (Ев.12:23) юм. Энэ нь Бурханы хаанчлал (Ев.12:28) ба эрт үед Синаи уулан дээр буун ирсэн Бурхан Хаан нь юм. Нэг л Бурханы хоёр янзаар илчлэгдсэнийг зохиолч сөргүүлэн тавьсан гол шалтгаан нь, Хүү Есүсийн дотор айлдсан аугаа нийгүүлсэлийн (авралын) Үгийг тоомсорлохгүй бол Мосегийн цаг үед дуулгаваргүй Израилчууд шийтгүүлснээс илүү хүнд шийтгэлийг дагуулах (Ев.12:25) болно гэж сануулах нь юм.

В.  Энэ нь зөвхөн нэг аргаар маргаад байна уу эсвэл аюулд өртөөд байгаа хүмүүсийн хувьд өөр байна уу? Хэрвээ тийм бол яагаад?
-- Энд огт өөр, шинэ, эцсийн түвшиний Аврал ба шийтгэлийн талаар яригдаад байна. Зарим хүн, Есүс Христийн загалмайн золилтыг мэдээгүйгээр нас барсан Хуучин Гэрээний үеийн хүмүүст ч, Есүс сайн мэдээг тунхагласан тул (1Пт.3:19) эцсийн шүүлтийн өдөр тэдэнд боломж бий, гэж үздэг. Харин энэхүү сайн мэдээ нь эцсийн боломж бөгөөд, энэ үеийнхэн үүнийг үл тоомсорловол, цаашдаа ямар ч боломжгүй бөгөөд, тэнгэр газарт (1Пт.4:17,18) (Ев.13:25-27) (Илч.20:11) байх газар олдохгүй гэдэг.

С.  Тэдний зугтахгүй байсны аюул нь юу вэ?
Махан биед хамаатай хуулийн илчлэлтээс хүмүүс зугтаж чадаагүй бөгөөд, дуулгаваргүй байсныхаа төлөө үхлийг амссан бол, амь сүнс болон махан биед аль алинд нь хамаатай, Есүс Христийн аврал нийгүүлсэлд үл итгэгч, үл тоомсорлогч нь, эцсийн шүүлтийн өдөр 2 дахь үхэл (Илч.20:14) (Илч.21:8) буюу галт тамаас ч зайлах аргагүй юм.





Шалгасан багш: Ариел Себаллос
"Еврей ном" хичээлийн гэрийн даалгавар 2-р курс